كسر _أُنثي 💔
بقلم : امونة_خليفه
#كسر _أُنثي《01》💔
#بقلمي_امونة_خليفه💜
#الجزء_الاول
ــہہہـ٨ـــ٨ــــــہہـ٨ــ♡ــــــــــــــــــ❥ :00:00
°شايفاها عاملة كيف!
^اي عايني لي لونها وشكلها هي مالة ما تعمل زي البنات بدل ما تحسن نفسها بي الكريمات وتبقي زي البنات تقعد كدا!
°تقولي شنو بس المشكلة هي شينة شناه مرة وسوووداااة لمن بي هناك وبعد ده كلو ما بتعمل شي
^هاها سمعتا بتقول ما بغير خلقتي وده لوني وأنا بفتخر بيهو
°ياخ لون زي ده يفتخروا بيهو؟ المشكلة لونها أسود شديد هي ما شايفة نفسها ولا شنو!
__
كنتَ واقفة جنبهم وأنا بسمع في كلامهم الجارح ده إي هم قاصدني أنا وهم قاصدين يعلوا صوتهم عشان أقدر اسمعهم الانتقادات دي عذبتني في إي مكان القي ناس تتكلم في شكلي إي أنا شينة وسودة ومقتنعة الحمد لله هم مالم! حارقهم شنو!! لي يدخلوا في حياتي من وأنا صغيرة بسمع تنمر في شكلي أو لوني هسي بقيت كئيبة وباهتة طول اليوم... مشاعري كلها اتجمدت الاتنقادات دي معليش لو بسمعها من زول قريب لكن أنا بسمعها حتي من أهلي ماف زول وأقف معاي غير بت خالتي
بعرفكم علي نفسي عشان تفهموني أنا سارة عمري١٩ زي توقعاتكم لوني أسود باهت وقبيحة وإي زول يشوفني بنفر مني لحدي هنا كفاية! بتعرفوني أكتر من قصتي
من بعد كلام البنات رجعت البيت امي فتحت الباب قالت لي مالك جيتي بدري؟ قلت ليها تعبانة بس سكتت ما ردت لي دخلت طوالي قعت في الراكوبة إي بيتا بسيط ويمكن ابسط من بسيط راكوبة من قش وغرفة بعيدة وبس وما عندنا كهربا أبوي مختفي ليهو أكتر من ١٠سنة ماف زول معانا غير أنا وإمي وعندي أخت وأخو ما بقوليكم هم سمحين وأنا الشينة لا بالعكس كلنا لونا اسود وشينين بس اختي من النوع البتفسخ ودائماً بتشاكلني أختي مخطوبة وأنا الاكبر منا ماف زول دقة الباب وجاني عشان بس مافسخت ! امي كم مرة حاولت معاي عشان افسخ بس أنا كلمتي وحدة لوني ما ببدلو لو بي ذهب أختي بقت ما بطيقيني زاتو وكل يوم عاملة مشكلة معاي كل ما تنشاكل بتقول لي أمشي يا شينة يا زرقة شوفي شكلك في المراية وتعالي أتكلمِ معاي شناه وعدم أخلاق كمان المشكلة ماف زول بقيف معاي شايفين كلامها صاح وأنا غلط بقيت كتومة طول اليوم إي إتنقاد بجيني بسكت منو ما ببكي إلا وأنا في المصلاية وبدعي لي ربنا ولمن أكون مع بت خالتي
مرة كنت ماشة في الشارع لقيت شفعة بقو يتنمرو فيني سكتة منهم عشان هم صغار في واحد فلفني بي طوبة وقالي هييي يا شييييينة اتلفت عليهو وقلت ليهو أنت معاي قالي في زول زي شناتك دي في الحلة قلت ليهو هو يا ولد أنا ماقدرك أحترم نفسك طلع لسانو وقالي بحترم السمحين وبس ما الزيك وضحك هو صحبانو وكلهم بقوا يفلعوني بالطوب💔 لمن كبيت دم بكيت رجعت البيت حكيت لي امي الحصل امي دائماً بتسكتي مابترد لي لا عرفتها معاي ولا ضدي بس أختي ضحت وقالت لي يا زولة ما تفضحينا في الحلة بكفي نحنا لسه متقبلنك دايرة شنو تاني إمي نهرتا أنا طوالي طلعت منهم واتوضيتي وصليتي وبقيت أبكي وأقول يارب ساعدني تعبت من كلام الناس تعبت من تعليقاتهم لي يارب أنصرني بعد صليت مشيت لي إمي قلت ليها ماشة لي مني (بت خالتي) قالت لي أمشي بس ما تتاخري لبست ومشيت ليهم من جيتها بكيييت قالت لي سارة ما معقولة معاك لي إنتِ ضعيفة كدا قلت ليها الناس بقتني كدا كل ما اكون قوية بخلوني ارجع للصفر! قالت لي ربنا كريم ما تهتمي بيهم إنتِ زولة أصلية في زمن بقت فيهو الجمال مزيف قلت ليها بس أنا ما جميلة قالت لي بكفي في نظري إنتِ جميلة وبكفي كمان ربنا سخرك لي عشان ما فسخت لوني وبقيت أنا بي شخصيتي وشكلي إبتسمت ليها اتونسته معاها زي ساعتين وطلعت منها وأنا راجعة في الشارع لقتني بت بقت تعاين لي فوق وتحت قلت ليها في شيء؟ قالت لي ومالك بتساليني قلت ليها عشان شفتك بتعايني لي شديد قالت لي أنا عاينت لي شكلك عشان ما لقيت بت بي قباحتك وضحكت ومشت...
•••••••••••••••••••••••••••••••••••••••••••••••••••••••••••
#كسر _أُنثي《02》💔
#بقلمي_امونة_خليفه💜
#الجزء_الاول
ــہہہـ٨ـــ٨ــــــہہـ٨ــ♡ــــــــــــــــــ❥ :00:00
بعد كلام البت دي ماقدر أتحكم في دموعي طوالي نزلت صاح قلت ليكم ماببكي إلا في المصلاية أو مع بت خالتي بس ماقدرت خلاص التراكمات بقت كتيرة وهسي انفجرت بقيت أبكي وأنا ماشة البيت دخلت وعلي طول غسلت وشي عشان إمي ما تلاحظ أخوي جانا وكان فرحان شديد قلتا ليهو مالك فرحان كدا ؟ قالي أنا داير امشي أتقدم لي البت الانا دايرها وفرحان عشان اتكلمت معا أخوها وقالي تعال لينا عشان تتقدم رسمي فرحت ليهو قلت ليهو مبروك مقدماً أختي جات وقالت ليهو في شنو ومبروك لي شنو؟قاليها بكرة بإذن الله ماشي أتقدم لي بت قالت لي جد وأها هم موافقين قال ليها قلت ليك ماشي تقولي ليهم تقولي لي موافقيت! .. قامت عاينت لي وقالت لي بي همس بس سمعتها( ودي ماشة معانا) هز ليها راسو بي نعم عاينت لي من فوق ولي تحت ومشت... قلت ليهو فرحت ليك شديد ياخ قالي إن شاءالله يوافقوا مشيت منو وأنا مبسوطة مريت بي جنب الاوضة سمعت اختي قالت لي أمي بس يا أمي كيف نوديها معانا بي شناتها دي أمي قالت ليها في النهاية دي أختك ردت ليها لا أختي لا بعرفها ما بمشي أنا لو هي ماشة قالت ليها عننك داك أخوك قولي ليهو هو ما أنا
بعد ماسمعت كلامها قلت لي أخوي ما ماشة قالي لي شنو قلت ليهو بس كدا ما نفسي أمشي إنتوا أمشوا قالي لو ما ماشة أنا م ح أمشي قلت ليهو ده فرحك أنت لي داير تربطو بي! قالي يازولة ماشة ولا لا قلت ليهو ما ماشة قالي طيب نلقي الفكرة من أساسها وطلع قلت ما أكون أنانية أخوي كدا ما ح يعرس البت الدايرها مشيت ليهو وقلت لي طيب ح أمشي
في اليوم التاني بقينا داخلين وطالعين عشان نمشي شايفة التوتر في وش أخوي لبسنا ومشنا أختي قالت لي أخوي مرتك دي ح تكون أعز صديقة لي قلت ليها وأنا كمان قالت لي بي سخرية صديقة ليك إنتِ! شكلك ما نصيحة مالها ومال الاشكال الزيك قلت ليها الاشكال دي خلقة ربنا قالت لي مشكلتك ما دايرة تفسخي وتبفي زي البنات قلت ليها الفسخ حرام وكمان في أضرار كتتير قالت لي بطلي فلسفتك دي وأسكتي سكتا منها وصلنا البيت كان كبير شديد ظاهر أنهم أغنياء رحبوا بينا نحنا دخلنا جوا وأخوي مشي الصيوان ام البت كانت كل مرة بتعابن لي أمي قالت ليها ولدي قال داير بتك وقال دايرة بس بالحلال قالت ليها طيب وضعكم كيف وهو بشتغل شنو أمي بي عفويا قالت ليها أعمال حرة ونحنا الحمد لله قد حالنا حسيت ام البت شكلها اضايقت وقالت لينا الكلام كلام زوجي طبعاً امي قالت ليها إن شاء الله يوافق قعدنا معاهم حبه كدا ورجعنا البيت أخوي كان متوتر شديد قالي خايف مايقبلوني ما شفتِ وضعم قلت لي الفيها النصيب ح تجيك ما تتوتر كدا أنتَ الزيك منو قالي عارفك دايرة تهدني بس ما فلحتي قلت ليهوأنت أصلاً ما بتستاهل زول يقيف معاك🙂
اليوم التاني جاء وجاء معاهو الرد ايوا رفضوا أخوي أمي قالت لي ما تزعل الخير موجود أخوي من ما رفضوا بقي كئيب وبضايق سرعة قلت ليهو مالك يا مدثر! الحصل ليك شنو ويعني لو رفضوك!!! قالي ما إنتِ ما حاسة بي عارفة لي رفضوني! عشان وضعنا المادي وعشان أنا ما تميت قرايتي طلعت من الثانوي قلت ليهو ربنا كريم بس ما تيأس كدا الخيرُ في ما أختارهو الله قالي ونعم بالله ومشي من قدامي..
اخوي من أبوي أختفي خلا القراية وبقي هو البصرف في البيت أمي بتبيع تسالي وأسكريم وكسرة وحاجات خفيفة عشان نترزق بيها والحمد لله البيت حقنا ولا كنا أتجهجهنا في الايجارات أنا بقرأ في الجامعة وأختي دخلت السنة دي أخوي ما مقصر مننا نهائي. بجيب لينا وبنسا نفسو أما أهل أبوي نحنا ما سمعنا عنهم شيء من ما أبوي أختفي أخبارهم أنقطعت هم في ولاية ونحنا في ولاية تانية
مرة كنتَ قاعدة أغسل العدة أختي وقفت قصادي وقالت لي الليلة أهل خطيبي جايني زيارة ممكن تعملي لينا الشاي والبسبوسة قلت ليها طيب فعلاً بعد غسلت عملتها بالمساء كدا جوا كنتَ أنا البضيفهم أم خطيبة أختي قالت لي اقعدي من قبيل شغالة يا بتي قعدة قالت لي إنتِ بتقري في سنة كم وياتو جامعة قلت ليها جامعة إم درمان الاسلامية سنة تانية كلية الصيدلة قالت لي ماشاء الله بتها قالت لي فعلاً الصيدلة حلوة شديد أتونسوا حبه وقالوا ماشين وقبل ما يقوموا زينب قالت(أخت خطيب أختي) إنتِ يا سارة متين دايرة تكوني زي البنات قلت ليها كيف يعني قالت لي قصدي تفتحي لونك وكدا إنتِ سمحة بس ناقصك الاهتمام قلت ليها إي صاح نقصني الاهتمام بس أهتمام يكون تحت الحلال😊 قالت لي ما تزعلي مني بس الزمن ده لو البت ما كانت بيضاء ماف زول ح يقدر يعرسها قلت ليها كلو بي يد ربنا وربنا البرزق ما الون وقمت منهم
فعلاً في المجتمع في ناس بتفكر كدا وتفكيرهم للأسف عقيم
أهل خطيب أختي مشو بعد ما هم مشوا أختي سمعتي كلام فارغ وقالت لي كان أحسن ليك تسكتي قلت ليها لي متين أسكت من هسي ح أدافع عن نفسي قالت لي إنتِ وحدة حقودة دايرة خطوبتي تفركش صاح أصلاً بعرفك أنا قلت ليها بتفهمي كيف إنتِ وده كلام شنو كمان
حمرت لي من فوق لي تحت ومشت أمي جات قعدت جنبي ولي أول مرة قالت لي يا بتي المجتمع ظالم بس إنتِ قوية وبقدري تواجهي صعوبات الناس كونك مقتنعة بي لونك دي حاجة ما هينة هزيت ليها راسي وقلت ليها كل الاقتناع باستني في راسي ومشيت
بعد ما مشيت شلت الشاي عشان اودي لي أختي طبعاً نحنا نظامنا في البيت البعمل شي بسوي للنانين😂 لمن قربته للباب سمعت أختي بتقول قصِدك شنو قصدك شنو ح يتزوج غيري!!!.؟؟؟؟.....
•••••••••••••••••••••••••••••••••••••••••••••••••••••••••••
#كسر _أُنثي《03》💔
#بقلمي_امونة_خليفه💜
#الجزء_الاول
ــہہہـ٨ـــ٨ــــــہہـ٨ــ♡ــــــــــــــــــ❥ :00:00
دخلته ليها جوا قلت ليها في شنو؟ بقت تبكي قلت ليها سمر ما تخوفيني مالك وشنو يتزوج غيري دي قالت لي وااي ياسارة ضحك علي بعد ما خطبني هسي قال ما دايرني وداير يتزوج تهاني قلت ليها لعلا تهاني البت الحلبية ديك؟ قالت لي هي زاتها من زمان خايفة يكونوا دايرنها بس شكوكي كانت في محلها تتخيلي ياسر قال شنو؟ بت فاسخة ما بتلزمني ... وبقت تبكي قلت ليها من زمان يا سمر وريتك كوني علي طبيعتك بس إنتِ ابيتي تسمعي كلامي قالت لي إنتِ مجنونة هو قال فاسخة ما بتلزمني بس ما قال دايرة وحدة تكون سودة كيف بقبلوني وريني قلت ليها نحنا أقلبنا سود والسودان أقلبوا كدا فشنو العنصرية الجديدة دي ياخ قالت لي وهي تمسح دموعها المجتمع ظالم وتاني شي هو قال داير بت بيضاء لمن أمو أول مرة شافتني قايلاني حلبية بس لمن عرفت الحقيقة ورتو وهو رفضتني وقال داير بت بيضاء (وبقت تبكي)
بقيت أطبطب عليها بس ما عرفت أعمل ليها شنو أمي جات لمن سمعت صوت بكي سمر وقالت في شنو؟؟ حكيت ليها الحصل أمي بكت وقالت ليها يا بتي ربنا كريم أكيد الخير في ما أختارو هو
طلعت منهم وأنا مخبطة معقولة بلد زي السودان اقلبو سمر وسود يكون فيهو عنصرية؟ طيب إذا السودان كدا البلاد التانية كيف؟ مشيت وريت إمي ماشة الدكان قالت لي أمشي طلعت قلت أجيب بيض وباكنج بودر وفنيلا وحاجات الكيك أخفف لي أختي شوية أشريت حاجاتي وكنتَ ماشة لقيت بت بتأشر لي من بعيد بي معني تعالي أستغربت مشيت ليها قلت ليها معاي هزت راسها قالت لي أتبعيني مشيت وراها وأنا مافاهمة حاجة؟ قلت ليها في شي ؟ وقفت في محطة باص وقالت لي ممكن تقعدي دايرة أتكلم معاك قعت جنبها وإنتظرتها تتكلم قالت لي أنا نور قلت ليها نور منو قالت لي نور محمد صالح شهقت وقلت ليها المشينا أتقدمنا ليها قالت لي إي قلت ليها دايرة شنو في حاجة ؟ قالت لي بي صراحة جيت أتكلم معاك عن موضوع كدا وبتمني ما ترديني خايبة قلت ليها قولي قالت لي أنا ما عندي مشكلة في زواج اخوك ديل أهلي بس ممكن يوافقوا لكن بي شرط قلت ليها بي لهفة الشرط شنو ؟ قالت لي بي صراحة كدا عندي أخوي عمرو٣٥ ما أتزوج لسه ولو واقفتي ح اقنع اهلي عشان ابوي وأمي ممكن يعملوا البقدروا عليهو في سبيل أخوي قلت ليها ولي أنا سكتت ما ردت لي قلت ليها مالو أخوك؟ قالت لي هو عميان ما بشوف قبل ١٠سنة عمل حادث لمن كان ماشي الشغل ومن يومها عِمى قلت ليها ولي أنا من كل الناس سكتت ما ردت بس قامت وقالت لي فكري ووريني وده رقمي أضربي لي فيهو تمام ومشت!!
استغربت منها وقلت في سري ولي أنا يعني لي ما قالت لي أختي ولا عشان كانت مخطوبة مشيت البيت وأنا في راسي ألف سؤال جيت عملت الكيك وطلعت وديتو المخبر قعتَ مسافة لحدي ما أداني ليهو شلتو ومشيت البيت عملت شاي وديت لي اختي ابت تاكل إلا بي غصب بعد ما اتكلت وديت لي أمي
المساء أخوي جاء ووريناهو الحاصل حسيتو أضايق. قلت ليهو ما تزعل كلو لي خير مشيت جبت ليهو من الكيك وعملت ليهو شاي وبعديها مشيت لي أختي وقلت ليها اها هسي كيف قالت لي زحي مني ما تتكلمي معاي قلت ليها شنو؟ قالت لي من الصباح شايفاك فرحانة ده كلو حقد منك قلت ليها إنتِ ما دايرة تتغيري لي إي شي اعملو بتشفيهو حقد لي يعني أحقد عليك في زول بحقد علي أختو! قالت لي بالله خلي فلسفتك دي ما ناقصني وجع راس وزحي مني .. طلعت منها مشيت الغرفة عشان أشيل الكباية قبل ما أدخل لقيت أخوي يبكي من شفتَ دموعو بكيت معاهو قلت معقولة شايلها في قلبك كدا نسيت أمر الكباية
مشيت الراكوبة أمي كان بترمي لقيمات لي بكرة شافتني شاردة وهامة قالت لي مالك يا بت قلت ليها ماف حاجة يا يمة قالت لي كيفن مافي شي ظاهر الضيق في وشك قلت ليها أخوي إلي الآن زعلان قالت لي ربنا يجبر بي خاطرو حارة يا بتي بس كلو بي يد ربنا قلت ليها قدر الله وما شاء فعل .. قعتة حبة وقمت وأنا ماشة وبقول في سري أخفف ليهو حزنو كيف؟ فجأة اتذكرت نور والرقم الادتني ليهو شلتو دايرة أضرب ليها لقيت الوقت متأخر قلت أحسن بكرة مشينت نمتا ..
بكرة الساعة عشرة كدا ضربت ليها قالت لي الوو قلت ليها كيفك أنا سارة قالت لي سارة؟ قلت ليها أخت مدثر☺ حسيت الفرح في وشها قالت لي كيفك اها وافقتي ولا لا قلت ليها موافقة بس بي شرط أول يعملوا عرسك إنتِ واخوي قالت لي إن شاءالله أطمني ح أخليهم يوافقوا ما عليك وفقلت الخط
بعد المكالمة حسيت نفسي أتسرعت بس قلت المهم سعادة أخوي التعب عشانا والخلة القراية عشان يقرينا هو عمل لينا كتير يعني ما اوفيهو حقو واسعدو ! كدا ح أكون أنانية
بعد كم يوم أخوي جانا فرحان وقال وافقوا😍 امي قالت ليهو وافقوا كيف بعد ما رفضوا قلت ليهو مبروووك قالي الله الله يبارك فيك أمي قالت بس ما غريبة يوافقو قال ليها بكون ولدهم هو صاحبي خلاهم يوافقوا أمي قالت بكون . اختي العصر جات وورينها قالت لي أخوي من هسي أنا ح أختار حاجات العرس ضحك وقال ليها بس حق نور تختارو هي أما حق التجيهزات إنتِ لوت خشمها وقالت طيب..
تلفوني ضرب وكانت نور! قلت ليهم دقائق بس مشيت منهم وفتحت الخط قلت إيوا في شي قالت لي أسمعي ما تفكري تلعبي بي أنا صاح خليتهم يقتنعوا بس بعد ما قلت ليهم نزوجك لي أخوي وصاح ح نتزوج أنا ومدثر بس بعد الزواج لو عملتي كدا ولا كدا ما ح تشوفي مني خير ويمكن أخوك بدخل السجن بي سببك.
خفت من كلامها وقلت ليها إن شاء الله ما بحصل إلا خير قالت لي تمام وقفلت
مرت الايام بي سرعة والعرس تم ما كان عندنا ناس كتيرة وما عملنا حفلات عشان نحنا ما ناس حفلات حتي ناس نور برضو ما بحبو الحفلات
بعد عرس أخوي بقيت اترقب مصيري المجهول هل ح يكون كويس ولالا بقيت خايفة شديد وبدعاء ربي من كترة الخوف ....
•••••••••••••••••••••••••••••••••••••••••••••••••••••••••••
#كسر _أُنثي《04》💔
#بقلمي_امونة_خليفه💜
#الجزء_الاول
ــہہہـ٨ـــ٨ــــــہہـ٨ــ♡ــــــــــــــــــ❥ :00:00
بعد مرة شهر أمي قالت لينا ارح نشوف أخوكم سمر قالت ليها بس يا أمي ما ليهم إلا شهر قالت ليها اها براك قلتيها شهر ما كتيرة أنا وأبوك زمان أسبوع وجينا والبيت أتملا ناس.. في الحظة دي حصل صمت غريب أمي لمن اتذكرت أنها جابت سيرة أبوي دنقرت راسها وقامت طوالي أما أختي حسيتها ح تبكي بس أتمالكت نفسها وقامت لحقت أمي .. وأنا ما قدرت علي دموعي طوالي بكيت أبوي اختفي ومامعروف هو وين هو كان شغال في الجيش بس مرة ودوهو مامورية ومن يومها اختفي أبوي كان أكتر واحد بحبني في البيت بس أنا عبدعي دائماً انو يرجع وإلي الآن بدعي ليهو في صلاتي الظهر أذن قمت اتوضيت وفرشت المصلاية وصليت
مشيت لي مني كان معاها صحباتها قعتة معاهم بي طبعي كتومة ما بتكلم كتتير وحدة قالت لي مني دي منو قالت ليهم دي بت خالتي سارة وياسارة ديل صحباتي ..وبقت تأشر بي يدها وتعرفني ليهم مني أستاذنت مشت تسوي لينا جنبة بعد ما مشت وحدة منهم قالت لي مالك ما مهتمية بي شكلك كدا قلت ليها الطبيعة جبل☺ ضحكت وقالت لي إنتِ من زمن الكلام ده يابت هووي ما تكوني زي مني افتحي لونك وكوني سمحة قلت ليها ما دايرة كدا مرتاحة وحدة تانية قالت لي بس المجتمع ما بحب البت السمرة معليش والسودة كمان وتاني قالت لي ما تباري مني في أنو ده لوني وما ببدلو لو بي دهب وتاني كمان مني سمحة يمكن يقبلوها قمت منهم قالت لي ماشة وين قلت ليها ماشة البيت اتاخرت طلعت منهم لقيت مني جابت الجنبة قالت لي ههههي مالك ماشة قلت ليها تعبانة شدديد ماشة البيت قالت لي متين جيتي اقعدي شووية قلت ليها يوم تاني قالت لي بس نحنا مساقرين اليوم يوم الخميس قلت ليها شنو ولي ما وريتونا قالت لي السفرة جات فجأة بت عمي دايرين يعرسوها قلت ليها ايوا قالت لي طيب ما تعقدي معاي.. غصباً عندي قعتة عشان يوم الخميس بعد بكرة
اليوم التاني مشينا لي أخوي في بيتو هو أجر بيت عشان نور قالت ما بتقدر تسكن معانا وده حقها طبعاً مشينا ليهم كرمتنا وادتنا الموية والعصير واتغدينا معاهم وقبل ما تمنشي أمها وابوها جوا سلمو علينا وقعدوا طبعاً هم بعد ما سلامو ماف زول أتكلم بس كانوا بعاينوا لي بعض .. بعد مسافة امها كسرت حاجز الصمت العميق وقالت لي أمي يا أختي كوثر نحنا دايرين بتك لي ولدنا وأشرت علي أمي اتخلعت وقالت ليها االموافقة والرفض من بتي ما مني قامت أمها عاينت لي وقالت لي أها رايك شنو عاينت لي أمي مسافة وقلت ليها موافقة أمي كانت بتاعين لي بي صمت أما أختي فكانت مصدومة بس أبو نور قال لينا وعشان ما نغشكم ولد عميان ليهو ١٠ سنة بي سبب حادث أمي قامت فوق وقالت إنتوا علي العين والراس بس بتي مالة يعني أم نور قالت ليها نحنا ما قلنا أنو بتك فيها عيب بس قلتا ليك دايرنها لي ولدي و... امي قاطعتها وقالت ليها بس نحنا ما دايرين الزواج ده .. قاطعت أمي وقلت ليها بي كل أدب أنا موافقة عاينت لي جوا عيوني وقالت لي شنو ! موافقة!! قلت ليها وأنا متوتر إي يا أمي ماعندي مشكلة بتزوجو أمي قالت لينا انا وأختي قوموا يلا نمشي البيت دايرة أتكلم معاها نهرتني وقالت لي قلت ليك يلا قمت سرعة ومعاي أختي ومشينا دايرين نفتح الباب أخوي جاء كان برا مشا يجيب حاجات جاء وشايل أكياس قال لينا ماشين وين أمي قالت ليهو الوقت أتاخر يا ولدي عشان كدا قال ليها طيب شيلو الاكياس دي جبتها ليكم أمي قالت ليهو لي بتعب نفسك كدا القروش يادوب بتكفيك لي يا ولدي قال ليها يا أمي إنتوا أهلي يعني دايرني أخلكم خلاص قالت لي مرتك عروس وأكيد بتكون دايرة حاجات قال ليها مرتي ما بقصر منها إن شاء الله المهم بعد نقاش أمي شالت الاكياس ومشينا في البيت شاكلتني كيف توافقي علي ولدهم وكمان عميان قلت ليها يا أمي يعني شنو عميان فيها شي ما في حاجة أختي قالت لي أمي خليها تتزوج ويعني لو عيان لو شاف شكلها الله أعلم ما كان أتزوجها أمي نهرتها وقالت ليها ربنا البعرف البتزوجها أو لا وتاني شي مالة أختك فيها عيب علي الاقل قاعدة في أصلها ما بقت مزيفة زي ناس كدا عشان المجتمع يتقبلهم أختي انزعجت من كلام امي ومشت مننا أمي قالت لي بي هداوة يا بتي ما تدفني نفسك كدا لي قلت ليها يا أمي بس انا دايرة أتزوج قالت لي ماف ليك زواج تبوري أحسن من ما تتزوحيهو هم براهم متكبرين مالك ومالهم إنتِ ! ومشت مني
اليوم التاني قلت لا ح اكل ولا أشرب لو ما وافقوا أمي ما كان دايرة توري أخوي بس في النهاية اتصلت ليهو وورتو وقالت لي تعال فهم أختك دي اخوي جاء وقالي يا سارة لي دايرة تتزوجي قلت ليهو بس دايرة اتزوج مش عندي حق الرفض والقبول قالي بس يا سارة الزول عميان قلت لي برضو دايرة قالي خلي العناد وقومي أكلي قلت لي ما باكل إلا لمن تخلوني اتزوجوا قالي إنتِ مالك يا بت تتزوجي شنو قاليك الزواج لعبة انفحرت فيهو من البكاء لمن هو أتخلع وقالي سارة أسكتي ما تبكي مالك هسي قلت لي خلوني اتزوج طيب أمي كان واقفة جنب الباب وقالت شايف نشاف راسها وعنادها!! قال ليها يا أمي أختي دي ما بتعاند كدا إلي لمن يكون في حاجة وهي مخبيها مننا عاين لي وقالي في شنو هزيت راسي بمعني لا قالي بعرفك أنا قلت ليهم كفاية لي دايرين تعذبوني لي مالكم ريحوني شوية أمي قالت ليهو أحسن تعرسو زاتو بتكون قالت عشان أنا شينة يمكن ما بجيني عريس ودايرة العريس ده حتي لو عميان .. كلمها كسر خاطري بس أنا سكتة أخوي قال لي أمي كدي خلينا برانا أمي مشت وقبل علي وقالي في شنو قلت ليهو ماف شي ودنقرت راسي قالي وريني الحاصل قلت ليهو يا أخوي ما تعذبني أكتر عصر علي يدوا مسافة وقالي مش الزول ده المجننك عشان تتزوجي ح نزوجك ليهو بس لو حصل شي ما تجيني تشتكي لينا تمام قام وفات من وشي...
•••••••••••••••••••••••••••••••••••••••••••••••••••••••••••
#كسر _أُنثي《05》💔
#بقلمي_امونة_خليفه💜
#الجزء_الاول
ــہہہـ٨ـــ٨ــــــہہـ٨ــ♡ــــــــــــــــــ❥ :00:00
بعد ما قال كلامو ده بقيت ببكي شدديد هو ما عارف إلي أنا عملت كدا ما عارف ده كلو عشانو .. فعلاً اخوي اقنع أمي بي موضوع العرس أما أختي من الاساس كانت موافقة أمي ما أتكلمت معاي شكلها زعلت كنت براضيها وبعمل إي شي بسعدها بس الحال في حالو يوم كانت دايرة تشيل الكسرة عشان توديها لي سيد الدكان قلت ليها خليك بوديها أنا مشيت شلت الكسرة وطلعت وأنا في الشارع بقيت أفكر في البحصل قلت ربنا يكتب لي الفيهو النصيب مشيت لي سيد الدكان عشان اديهو الكسرة قالي معليش بقيت ما ببيع كسرة قلت ليهو بس نحنا دائما بنبيع معاك رد لي ما سمعتني ولا شنو قلت ليهو بس أنت عارف نحنا بنترزق بيهو وعارف الفول والتسالي ما ماشي حالو قالي معليش يا بتي بس نحنا بقينا نشيل كسرة من وحدة تانية شلت صينية الكسرة وأنا خاطري مكسور وأنا راجعا بيتنا لقيت البت الزمان الحمرت لي ومعاها تهاني !! تهاني جات وسلمت لي وقالت لي كيفها سمر قلت ليها بعد العملتي جاية تسألي عنها؟! قالت لي ح أعمل ليها شنو يعني شباب الزمن ده بحبو البت البيضاء😏 واا نسيت ما سألتك مالك ما فسختي لسه بي شناتك دي!! تاني ضحكت وقالت لي معليش لو فسختي ما حتبقي سمحة البت الحمرت لي ديك بقت تضحك تهاني قالت ليها يلا يا وفاء من هنا مشوا وهم بتبسموا ..
رجعت البيت وأنا مضايقة من الحصل اختي شافتني وقالت لي مالك وريتها الحصل (لمن أكون زعلانة بحكي الفي قلبي كلو) قالت لي تهاني دي كان ما ندمتها تشوف قلت ليها ح تعملي شنو مثلاً! بتقتليها!! سمر نحنا ما أتربينا علي أذيه الغير
دي ما صفات المؤمن قالت لي هي بتأذينا نحنا نسكت ليها ما نشيل حقنا قلت ليها شيلي حقك بي الدعاء لي ربنا .. ربنا كفيل يشيل حقك من الظلموك سكت ومشت .. أمي جات وهي تبكي قالت لي أنا دايرة شنو غير سعاتك ولو العرس ده بسعدك فانا رضيانة بيهو بكيت وحضتنها
بعد أسبوع جابو الشيلة ودق الريحة في وحدة كانت بتهمس وتعاين لي بتتكلم مع الجنبها لمن شافوني عاينت ليهم سكتو
بعد ما فتحو الشلة في وحدة من النسوان قالت لي مالك ما فتحتي لونك قلت ليها لي شنو افتح لوني قالت لي عشان تبقي سمحة قلت ليها الجمال ما بالون والجمال ما شكل وبس الاخلاق اهم شي عوجت لي خشمها وسكتت
ام نور أسمها اسماء قالت لي العرس بعد أسبوع أمي قالت ليها لي بدري كدا قالت ليها والله ولدي مستعجل وكدا ☺
أمي سكتت وبقت تعاين لي قلت ليهم ما دايرها حاجات كتيرة عقد لو بي بلح موافقة مافي داعي لي الحاجات الغالية المرة القبيل قالت لي بكفي أتزوح وحدة زيك لسه ما نفرح بيهو خالتو أسماء نهرة وقالت ليها ما تقولي كدة أمي قااللت لي شفتي من هسي بقو يعملوا حركات ربنا يعينك يا بتي قلت ليها ربنا كريم يا أمي
الاسبوع مرة سريع من دخان وعروكات ومسوح رفضته أفتح لوني قدر ما أمي اقنعتني وأختي ابيت أمي قالت لي يا بتي معاك أنا وضد الفسخ بس ده عرسك لو مافسختي بشيلوا حالنا قلت ليها خليهم يشيلوا يا أمي لوني ما بغيروا
قالت لي علي كيفك بس كان رجعوك بي جردك خبيزك ما تتباكي لي أختي قالت ليها زاتو أخوي قال ليها تاني لو عملو ليك شنو ده ما بساعدك
أمي سكتت وقامت واختي لحقتها وأنا بقيت أبكي بس بكيت لمن قلبي وجعني
فضل يوم للعرس مني وخالتي جونا من السفر مني فرحت لي شديد واكتر لمن شافتني ما فتحت لوني خالتي قالت لي كان تفتحي لونك يا بتي قلت ليها كدا مرتاحة قالت لي بس ما شفت لي عروس سودة أمي قالت ليها خليها يا سعاد البت راسا قوي ما بتفهم خالتي قالت ليها بس يا كوثر الناس بتشيل حالك ومعليش لو كانت سمحة بتك شينة شديد والتفتت علي وقالت لي معليش بس كلامي صاح أنتِ ما سمحة كان فتحتي وشك يمكن تبقي حلو قمت منهم وأنا دموعي عشرة عشرة مني قامت وراي مشيت الجهه التانية من الحوش وبقيت أبكي مني قالت لي ما تزعلي يا سارة ما تهتمي بي كلامهم قلت ليها كتر علي يا مني قالت لي خليك في موقفك المجتمع صاح جنو تنمر ويمكن تواجهي صعوبات بس يا سارة الفسخ ده فيهو اضرار قلت ليها الكلام ليك ساهل عشان إنتِ سمحة بس أنا شينة قالت لي ما تقولي كدا يلا قوشي دموعك يا عروس الحزن ما بشبهك ضحكت وقلت ليها ربنا يخفظك قالت لي ويخفظك
اليوم الموعود جاء وعملوا العقد وزي ما قلت ما عملنا حاجات كتيرة كنتَ متوترة أمي بكت وودعي ومني وخالتي حتي أختي بكت لي ودعوني ومشيت مع خالتو أسماء وصلتا الشقة قلت ليها وين أمير(راجلي😁) قالت لي جوا هو ما بريد الجوطة وكدا دخلنا ليهو لقيتو قاعد في السرير شكلو يعني ما سمح شديد وضعيف بشبة أصغر من عمرو قالت لي أمير دي سارة قبلت علي وقالت لي ما محتاحة وصية هزيت ليها راسي بعد مشت قعتَ بقيت أعاين ليهو قلت ليهو كيفك ما رد علي قلت يمكن ما سمعني قلت ليهو أمير سامعني شات الكبابي الكانت جنبو وقالي دايرة مني شنو مالك يا بت بقيت برجف قلت ليهو كنتَ دايرة أتونس معاك بس قالي ما داير ونسة معاك ما داير ونسة مع زول وقام بقي يكسر إي شي قدامو....
•••••••••••••••••••••••••••••••••••••••••••••••••••••••••••
#كسر _أُنثي《06》💔
#بقلمي_امونة_خليفه💜
#الجزء_الاول
ــہہہـ٨ـــ٨ــــــہہـ٨ــ♡ــــــــــــــــــ❥ :00:00
بقيت برجف وبعاين ليهو وهو بكسر إي شي يشوفو قدامو ماعرفت أعمل شنو لقيت غرفة مفتوخة جريت دخلتها وقفلت نفسي ..
بعد نص ساعة طلعت لقيتو نايم!!قلته غريبة قبل نص ساعة كان هايج زي التور!!! مالو !! لي عمل كدا
راسي بقي شاطب وانا قاعدة جنب الكرسي الجنبوا وهو كان نايم جنبي فجأة يدو اتحركت قلبي بقي يدق شديد بقي يتحرك حركة عشوائية تاني قام ما عرفت أعمل شنو بقيت أعاين يمين وشامل هو كسر حاجز الصمت وقال
لسه قاعدة هنا رديت ليهو نعم سكت ما رد لي بعد مسافة قلت إي .. تاني سكتنا ما اتكلمنا قلت ليهو بس كيف عرفت إني هنا قالي زول عميان عشرة سنين ما بكون اتعود وبعرف بالشم والحركة! قلت ايواا
طوالي قام ودخل الغرفة وقفل الباب! أنا نمت في مكاني صيت الصباح بي يد زول بقومني قمت لقيتو هو قالي ماشي الصلاة قومي صلي ومشي!
غريبة يمشي براهو كيف ؟! قمت واتوضيت وصليت بعد ما صليت هو جاء كان شايل حاجات قالي عارفك أمبارح بتكوني ما اكلتي قلت ليهو فعلاً أنا جعانة قالي طيب هاك... مدة لي الكيس قلت لي وأنت ؟ قالي ما عندي نفس وطوالي مشي الغرفة وقفل الباب!
اكلت بي شراهة لأني كنت جعانة بعديها شلت تلفوني بقيت اتصفح الواتس مني رسلت لي
(في عروس بتدخل الفيس في أيام عرسها!؟؟؟؟)
رديت ليها اااي اااانا
قفلت التلفون ومشيت غرفة أمير ودقيت الباب فتح لي وقال لي دايرة شنو قلت لي ممكن اتكلم معاك ما جاوبني بس كان داير يغفل الباب سبتو وقلت لي مالك أنت أنا مرتك قالي ما مرتي أنا أنجبرت بيك ياخ أنا ما داير أعرس بعد الحصل لي قلت لي يعني الحادث سكت ما جاوب لي قلت ليهو ده أبتلاء من ربنا أنت ما عليك بس إلا تصبر قالي تمام قلت ليهو طيب ممكن نتونس مع بعض😁 زحة يدي وقفل الباب!!
////////////////////
يا أمي إنتوا لسه ما لقيتو اهل القتيل ؟
°يابت ياخ بنفتش ليهم قريب ١٠سنة ما لقيناهم لحدي ما جينا أستغرينا في الخرطوم
^بس يا أمي بعد ما أخوي ضرب الراجل داك لي الان ضميرو مانبو ما عرف يعمل شنو
°ربنا كريم يا بتي
^بس يا أمي إنتوا ما وريتو الشرطة بس قلتو لقينا الزول ده في حادث
°مجنونة إنتِ دايرة أخوك يشنقوهو
^بس يا أمي اخوي ما كان قاصد ..
°اسكتي يا بت ما تناقشيني في الموضوع ده
//////////////////////////
صحيت من نومي وأنا سامعة صوت زول يبكي لمن ركذت لي مصدر الصوت عرفتو أمير مشيت جنب الباب وبقيت أدق فيهو وأنا بقول يا أمير أفتح ياخ كفاية يعني شنو لو عميان إي زول عندو إبتلاءت وأنا إن شاء الله ما بخليك كون قوي وواجهه الوجع ما تتهرب منو سكتة وما سمعت صوت لا بكاهو لا غيرو
بقيت ادق الباب وأنا بقول أمير سامعني؟
بس ما كان في رد قلت يمكن ما داير يتكلم معاي أحسن استناهو لمن يفتح
الظهر أذن وهو طلع عرفتو ماشي المسججد فتح الباب وطلع بدون ما يقول كلمة!
بعد أسبوع قالي خلاص نرجع البيت قلت ليهو طيب
مشينا وأسقبلونا أحسن أستقبال من تاني يوم بقيت أنضف معاهم هم كويسن معاي عشان كدا لمن خالتي تقول شي ما برفض ليها
في يوم كنت قاعدة في المطبخ مع سوسن (عديلتي) قالت لي أمير زول طيب بس بعد الحصل أتغير قلت ليها فعلاً سمعنا اقدام جاية علينا عاينت لي الباب لقيتها تهاني قلت ليها إنتِ عاينت لي وابتسمت وفجأة شالت كباية وكسرتها جنبهاوبقت تبكي وتقول وااي سارة وقعت فيني الكباية ما تمة دقيقة ولقيت أمير جاري وهو شال صوت!!!!
//////////////////
مالك يا بت لي بتتعاملي معاي كدا
°يا مدثر أنا قلت ليك المكيف ده ما بارد دايرة نسمة أنا جايب لي الخردة ده
^اصبري يا نور أشتغل وأجيب ليك إي شي إنتِ دايراهو بإذن الله بس اصبري لي
° أنت ما نافع في حاجة كرهتك أنا ياخ لو ما دايرة أطلع أخوي من الحالة الهو فيهو دايرة بيك شنو أنا
^قصدك شنو؟
"بي ارتباك"° ما قصدي شي قلتها ساي بس المهم الليلة ولا بكرة المكيف الجديد يجي
وطلعت.....
ما قصرت منكم😁💜
•••••••••••••••••••••••••••••••••••••••••••••••••••••••••••
#كسر _أُنثي《07》💔
#بقلمي_امونة_خليفه💜
#الجزء_الاول
ــہہہـ٨ـــ٨ــــــہہـ٨ــ♡ــــــــــــــــــ❥ :00:00
ياخ مش مليون مرة قلت ليك أهلك ديل ما يجوني😤 ما معقولة كل بعد يومين جايني هنا
°يا نور ديل أهلي بتقولي شنو إنتِ يعني دايراني أقول ليهم تاني ما تجوا هنا عشان إنتوا بتزعجونا!!!
^وده المطلوب أنا ما بحب الزيارات وبكرة الناس البجوك دائماً وخصوصاً اهلك
°خلاص ياخ وصلتا حدي معاك يومياً في النقاش ده إنتِ مالك معاهم لي حركاتك دي!! المشكلة هم ما بقعدوا كتتير دقائق ويمشوا!
^شفته لو وقفوا جنب الباب أنا ما دايرهم
"مدثر ما قال ليها شي بس عايني ليها وطلع!!"
اي الو عمر! مالك ضارب لي كدا
=ضربت ليك بي خصوص أختي قبل شوية ضربت لي وكانت بتبكي تعال لي جنب المحل
°طيب تمام
قفلت التلفون ومشيت ليهو قعتة معاهو كنت ساكت وهو كان بعاين لي قالي مش وريتك أنا زمان قلت ليك إختي دي مدلعة شديد ما بينفع معاها وأنا كا أخوها وريتك قلت ليك ما بتنفع معاك بس أنت أصريت عاينت ليهو بي يأس وقلت إي عارف بس في النهاية قدر ومكتوب قالي ونعم بالله تاني زاد وقال لو داير تطلقها أنا معاك انتنفضة من مكاني وقلت ليهو شنو!! أطلقها ما جادي طبعاً ما من مشكلة بسيطة يا عمر أطلقها .. هز لي أكتافو وقال أختي وبعرفها ووريتك ماف حل غير رة رديت ليهو لو جايبني لي ده أنا ح أمشي وكتر خيرك عارفك ما داير لي الكعبة بس الغلط ما بتصلح بالغلط!! قالي طيب تمام دي مرتك وأنت حر ! قلت ليهو تمام يلا أنا ماشي رد لي علي وين ما بتمشي إلا نرجع البيت وتتغداء معانا قلت ليهو بس قالي قلت ليك ماف إلا تتغداء معانا
///////////////////////////////////
^يا بت يا سارة
°نعم يا خالتي
^أمشي سوي الغداء سريع ولدي جاي معاهو صحبو
"ردت بي فتور وهي بتمسك يدينها الواجعاها"° طيب يا خالتي
طلعت منها وأنا ما قادرة أمشي بعد الحصل وصلت المطبخ بقيت أجهز في الفطور بعد دقائق سمعنا الباب فتح وسمعت السلام عليكم من نبرة الصوت عرفتو أخوي طلعت براها وأنا فرحانة يمكن لمن يشوفني ما يخليني في البيت ده
لقيتو هو وعمر قادين يتونسوا أخوي رفع راسو وشافني وتاني نزل راسو! طيب علامات الضرب ما شايفو !!
خالتي نادتني من بعيد جيتها قالت لي وين الغداء قلت لي دقيقة أجيبوا مشيت وأنا مصدونة كيف ده ما ظاهر فيني يعني؟
°يا خالتي أختي مالا وشها مورم كدا؟
^لالا ماف شي بس كانت بتمسح السراميك ووقعت بي وشها ههه عشان كدا وكان في كراسي وقعت فيهو ما حصل شي كتتير
جبت ليههم الغداء ومشيت منهم حتي ما عاينت لي أخوي مشيت غرفتي وبقيت أبكي في الحظة دي أمير قالي مالك؟ قلت ليهو ماف حاجة ومسحت وشي ونومتة
#أحكي ليكم الحصل😁
أمير كان جاري وهو شايل الصوت وقع في تهاني ضرب! وهي بقت تبكي وتنادي في خالتواسماء يا امممممي ! يعني تهاني بتها طيب نور أختها!! بقيت مصدومة ونسيت أنو تهاني بتضرب خالتي جات وقالت ليهو خليها يا ولدي عملت ليك شنو فكها بس هو ما رد عليها مسكت يدو وقالت لي فكها ياخ وقف وقال ليها تاني قول ليها ما تعمل مشكلة ا الناس بقت ما بتجينا في حركاتها دي.... ومشا من قدامنا ! طيب كيف عرفها غلطانة في زول وراهو؟
تهاني بقت تبكي وقالت لي أمها بي سبب البت دي دقاني (مأشرة علي)
خالتي عاينت لي بي غيظ ورجعت وبعد مسافة جات وشايلة عصاية ووقعت فيني ضرب ما قدرت أتفكي منها
//////////
صحيت علي صوت خالتي أسماء وأنا خايفة قالت لي سامحيني يا بتي بس تهاني دي بريدها شديد وما كنت عارفة هي غلطانة! قلت لي مسافحاك إنتِ مهما عملتي لي بتظليِ في مقام أمي قاالت لي ربنا يرضي عليك
من طلعت اتصل لي اخوي من شفت رقمو فرحت فتحت الخط قالي أمي بعدين قالت ليك تعالي وقفل مني!
ما قالي مالك ولي كنتِ كدا
ما قالي الحصل ليك وجديدك ياخ ده أخوي بقيت أعاين لي الرقم عشان اتأكد ولقيت فعلاً حق أخوي بكيت عشان هو ما كان كدا نهائي أخوي الكان من يشوفني زعلانة ما برتاح إلا يراضيني هسي شافني ما قادرة أمشي زي الناس وما قال حاجة حتي مالك حصل ليك شنو ماقالها
قطعت تفكيري علي صوت نور وهي بتحكي لي خالتي
مدثر قال بكرة ح يفتش لي بيت ملك ولو ما لقي بيت ح يبيع قطعة من بيتهم ماهو بيتهم كبير بكفي....
•••••••••••••••••••••••••••••••••••••••••••••••••••••••••••
#كسر _أُنثي《08》💔
#الاخيـــــــــــــــــــــــــــــرة
#بقلمي_امونة_خليفه💜
#الجزء_الاول
ــہہہـ٨ـــ٨ــــــہہـ٨ــ♡ــــــــــــــــــ❥ :00:00
بعد سمعت كلام نور راسي بقي شاطب ومستغربة يبيع نص البيت؟ عشان منو نور ولي ما تسكن مع ناس امب ويفصل البيت ولي يعني يبيع نص البييت بس البيت حق ورثة ما عندو حق يبيعو زاتو
شلت تلفوني واتصلت علي رقمو وأنا الغضب أتمالكني بس قفل في وشي!! ضربت تاني برضو قفل تالت ضربت جاني مغلق!! مالو ده يعني خلاص نور مسحت راسو اخوي يعمل كدا!! ولي يعني كل ده.. تاني ضربتها في راسي وقلت
يعني لمن شافني مضروبة ما قال شي عشان نور! وأنا كنت قايلة عشان كلامو القالو زمان داك!!
بقيت ما عرفة اعمل شنو
المساء كنت ببكي من الحصل و أختي ضربت لي وقالت: إنتِ مالك ما جيتي؟ مش أمي قالت ليك تعالي! ضربت راسي وقلت ليها نسيت والله بس إن شاء الله بكرة بجيكم قالت لي مالو صوتك؟ قلت ليها مالو قالت: كأنك كنتِ بتبكي! قلت: لالا أبكي شنو بس تعبانا شوية قالت: إنتِ حزنك ما بتقدري تخبي في شنو ... ما قدرت أحكي ليها الحصل لي مع أخوي بس قلت ليها تصدقي تهاني طلعت أخت نور بي خلعة قالت: شنو؟ وكيف ده ولو أختها صاح لي ما جات العرس؟؟؟ قلت : ماعارفة والله قالت: في شي قلت ليها يمكن
بعد قفلت منها سمعت صوت خالتي بتناديني وهي بتقول
يابت يا سارة تعالي اعملي الاكل
اليوم التاني مشينا سماية ضربت لي اختي ووريتها ما بقدر اجيهم من قعتة في واحدة بتعاين لي من قبيل قالت لي إنتِ سارة قلت ليها اي كيف عرفتي قالت لي واضحة من مواصفات النااس القالوها لي سكت منها تاني قالت: زي ما قالوا سودة وشينة قلت : دايرة مني شنو ضحكت وقالت : ادور شنو منك أنا وتاني ضحكت ومشت
في الحظة دي نور جاتني قالت : مالك بتعايني لي سماهر قلت ليها سماهر دي منو قالت لي خطيبة أمير زمان قلت ليها: جادة قالت: ومتين كذبت أنا
موضوع السماية كان طويل شديد بعد فطرنا جاتني سماهر قعدت جنبي تاني قالت لي: كيف قبلتي بي أمير أنا من ما عمل الحادث خليتو عاينت ليها مسافة وتاني مشيت
"بعد ما سارة مشت سماهر قالت وقعتي يا سارة ماعارفة المخبي وراك ولا عارفة أمير هو شنو وقعتي وبقت تضحك جاتها تهاني وقالت ليها مالك بتضحكي ردت: سارة ماعارفة أخوك تهاني قفلت خشمها لي سماهر وقالت ليها أسكتي ما تخلي زول يعرف أمي ما عارفة خلي سارة"
بعد السماية رجعنا البيت كنت تعبانة شديد حاسة بي دوخة وطمام خالتو اسماء قالت لي مالك؟ قلت ليها ما عارفة
قالت لي يمكن .. قاطعتها وقلت ليها مستحيل قالت لي :كيف لكن وقبل ما أرد ليها تهاني دخلت وقالت أمي جوك ضيوف خالتو أسماء طلعت تهاني عاينت لي بي أستحقار ومشت وراء أمها
اليوم التاني صبحت وأنا محمومة شديد أمير قال : احسن نوديك المستشفي قلت ليهو لالا ما ماشة حمة خفيفة وح تروح قالي مابنفع كدا قلت : لا ما ماشة هي حمي بسيطة بس قالي : طيب راحتك
صحيت بي يد بتتضربني لقيتها تهاني قالت لي: أمي قالت لي قومي أعملي الغداء قلت في سري ما تعملي إنتِ ما هو جاهز يعني لازم يقوموني حتي لو عيانة!
صحيت مشيت المطبخ قبل ما أدخل حسيت بي لفة وطوالي وقعت من طولي
///////////////////////////////
°عايني مش كلامك الاخير ده أنا ما موافق عليهو فاهمة
^ أنت لو بتحبي أصلاً كان وافقت بس ما بتحبني ودة ظاهر
° يا نور خلاص كفاية خليني في حالي ياخ
طلعت منها وأنا متعصب تعبت ماعرف أعمل ليها شنو اي شي اعملي ما بنفع معاها كانها بتقولي أنا ما سعيدة معاك وده الظاهر طيب اعمل ليها شنو؟؟ دخلت يدي في جيبي عشان اشيل تلفوني لقيتو ماف!! قلت يمكن نسيتو في البيت رجعت البيت لمن وصلت قريب الغرفة سمعت نور بتقول إي يا تهاني زي ما قلت ليك الحادث الحصل قبل ١٠سنة والعقيد المات داك لي الآن ما عرفنا لي اهلو أثر
دخلت متعصب وقلت: العقيد اسمو منوو
/////////////////
صحيت بي صوت امير وهو بكورك فيني قومي يا خاينة ده جزائي ليك قومي قلت ليهو : في شنو ولي بتتكلم معاي كدا قالي وكمان تسألي بعد العملتيهو تحملي من منو وريني قلت ليهو وأنا برجفف: ح ح حمل كيف ده قالي: اسألي نفسك أنا ما قربت منك عشان تحملي مسك يدي وهو بهز فيها وقالي وريني وي صوتو العالي جات خالتو أسماء وتهاني خالتي قالت لي في شنو قال ليها: ماف شي وتاني مسكني من يدي وقالي البسي سريع لبست وأنا برجفف طلعنا واجر امجاد وخالتي ماسكاهو ما كان قادر يمشي زي الناس دخلني في الامجاد وهو دخل وقالي ودينا مكان(___) قالي: بس المكان بعيد قاليهو ودينا وأنا بدفع ليك إي سعر أنت دايرو
اتحركنا لي مكان مجهول أنا ما بعرفو ما قدرت اسألو من كترة العصبية الهوا فيها بس فجأة اتذكرت وقلت المكان الماشين ليهو هو نفسو المكان الاختفي فيهو أبوي وبي صدمة عاينت لي أمير و الافكار كلها اتجمعت في راسي يعني أمير هو القتل ابوي؟؟ عاينت لي ولي أول مرة عيونو تقع في عيني قلت لي أنت ما عميان!!..
النهـــــــــــــــــــ🖤ـــــاية
•••••••••••••••••••••••••••••••••••••••••••••••••••••••••••
☆يتبــــــــــــــــــــــــــــــــــــــــــــع☆ للجزء الثاني
أن شاء الله مشوق وفيهو احداث كتير
☆يتبــــــــــــــــــــــــــــــــــــــــــــع☆ للجزء الثاني
أن شاء الله مشوق وفيهو احداث كتير
التسميات
روايات حزينة