رواية رحلة~كفاح -(الفصل الول)

رحلة~كفاح

#بقلم~هيام~عبد_القادر{السمحة♥️}

 

#رحلة~كفاح 《01》
#بقلم~هيام~عبد_القادر{السمحة♥️}

★ــہہہـہہـ♡ــــــ★ـــــــہہہـہہـــــــ★★ـــــ❥​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏
 ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​‏​​‏​​‏​​‏​​‏​​
كل مرة بتقولو لي نفس الكلام اتحملي اصبري عشان ولدك وكل مرة انا بسمع كلامكم وبتحمل وبرجع ليهو بس المرة دي خلاص طفح الكيل صبرتا لمن الصبر العندي قرب ينتهي انا اتحملتا بما فيهو الكفاية وصبرتا عليهو كتير واديتو فرص اكتر ما بستاهل وفي كل مرة بخذلني وبندمني على اني سامحتو بس المرة دي انتو ما ح تقدرو تجبروني ارجع ليهو وما ح اسمح ليكم بالشئ دا لاني مصممة على الطلاق وماف زول بقدر يغير رأيي وانت يا ابوي لو وقفتا معاي ولا لا انا ح أطلق منو انا عانيت واتأذيت بما فيهو الكفاية شوفني عاجبك شكلي كدا انا بي سببو فقدتا حتى رغبتي في الحياة وانا لو لي هسي صابرة بس عشان ولدي ما اكتر ولو ما هو كان زمان لقيتوني ميتة.. ابوي قال لي برضو عشان ولدك انتي ح ترجعي ليهو وتتحملي عشانهم.. قلتا ليهو لا غلطان ما ح ارجع ليهو انا ما بقدر اخلي ولدي يعيش مع واحد زيو انا دمرتا نفسي وحياتي مستحيل اسمح ليهو يدمر لي ولدي مستقبلو وجودو مع اب زيو ح يدمرو.. ابوي قال لي الشغلة ما على كيفك ح ترجعي ليهو يعني ح ترجعي والموضوع اتقفل.. قلتا ليهو لا ما اتقفل انا لو على جثتي ما ح ارجع ليهو الموت أهون لي من اني ارجع لي مكان كل يوم بهنوني وبذلوني فيهو وكل يوم بمسحو بي كرامتي الواطة انا لو رجعتا يبقى ما عندي ولا ذرة احترام لي نفسي ولو على ولدي اشرف لي اني اربيهو براي بعرق جبيني احسن من يتربى على مال حرام وحق ناس.. دخلتا غرفتي وقفلتا الباب علي وبقيت ببكي اصلا ما عندي حل تاني غير البكى مافي يدي اعمل اي شئ دي الطريقة الوحيدة البقدر اطلع بيها كل القهر والوجع والحزن الجواي على صوت بكاي صحى ولدي.. قال لي ماما انتي لي شنو بتبكي.. قلتا ليهو لالا يا حبيبي انا ما ببكي بس في تراب دخل في عيوني عشان كدا دمعو.. قال لي ماما ما تغشي علي انا ما شافع انا عارفك بتبكي عشان بابا زعلك انا بكرهو.. قلتا ليهو باسل حبيب ماما أنا مش قلتا ليك قبل كدا عيب تتكلم عن بابا كدا هو مهما عمل بفضل ابوك وماف زول بكره ابوهو ما عايزة اسمع منك كلام زي دا تاني والا بزعل منك انا ربيتك تقول كدا.. قال لي بس يا ماما هو بعاملك بي طريقة ما كويسة وكل مرة ببكيك وبزعلك.. قلتا ليهو حتى ولو دا شئ خاص بيناتنا انت ما مفروض تدخل فيهو وبحزرك كلام زي دا ما تقولو والا بزعل منك وتاني ما بتكلم معاك نهائي.. قال لي ماما خلاص اسف تاني ما بقول كدا انتي بس ما تزعلي مني، ومسح لي دموعي قال لي ما عايزك تبكي تاني وطول ما انا معاك ما تخافي ولا تبكي كويس.. قلتا ليهو كويس تاني ما ح ابكي، يلا هسي انت ارجع نوم.. قال لي انتي ما عايزة تنومي.. قلتا ليهو هسي ما نعسانة لمن انعس بنوم.. قال لي لو نمتي متأخرة ما ح تقدري تصحي بدري وبتبقي كسلانة مش انتي بتقولي لي كدا.. قلتا ليهو لالا ما ببقى كسلانة بعد شوية بنوم.. قال لي خلاص تصبحي على خير وباسني في خدي ورقد.. انا ما عارفة من دون باسل كيف كنتا ح اقدر اتحمل دا كلو مع انو عمرو صغير شديد بس دائما بحسسني انو هو أكبر من عمرو وأحيانا بقول لي كلام ولا بتقول دا شافع عمرو 5 سنوات بتحس بيهو زول كبير بتكلم، كتير منكم ح يستغرب كيف هو عمرو لسه 5 سنوات وبتكلم عديل كيف بس تصدقو حتى انا مستغربة زيكم عندو فصاحة كدا ما طبيعية بتخلي الزول يتحير انو البتكلم معاهو دا طفل لسه ولا زول كبير ربنا يكملو بي عقلو يارب.. صحيت الصباح بي لمسات يدين باسل الصغار على وشي قال لي ماما صباح الخير.. قلتا ليهو صباح الورد يا قلب ماما انت.. قال لي نقوم نصلي عشان ما نتأخر.. قلتا ليهو اي نقوم مشينا اتوضينا وجينا صلينا وقرينا أذكار الصباح وورد من القرأن ودعينا وقمنا.. باسل من كان عمرو ثلاثة سنوات اتعود يقوم معاي بدري عشان بصلي وشوية شوية بقى يصلي معاي مع انو صلاتو بتكون في اغلاط بس معليش احسن من بدري يتعود على الصلاة وانا بحاول اعمل كل البقدر عليهو عشان ما يطلع بشبه ابوهو أبدا عايزة اربيهو على انو علاقتو مع ربنا تكون سمحة وما يقصر فيها واعلمو القرأن لانو هو ح يعلمو أي شئ في الحياة عايزاهو من هو صغير يتربى على حب الله واتباع سنة رسوله صلى الله عليه وسلم وعلى عمل الخير ويتعلم يفرق بين الصح والغلط ما عايزاهو يقع في نفس اغلاطي.. طلعتا من غرفتي مشيت المطبخ عملتا لينا الشاي وعايزة اشيلو.. اها جيتي تاني يا وش الفقر انتي.. قلتا ليها اي جيت يا مرة ابوي ومن هسي حاولي اتعودي على شوفتي  لاني ح اقعد معاك لي فترة طويلة.. قالت لي بتحلمي تقعدي هنا اكتر من يوم انا ح اخلي ابوك يرجعك الليلة قبل بكرة.. قلتا ليها دا في أحلامك ح اقعد هنا ولو ما عاجبك بتقدري تمشي وهسي ممكن تبعدي من قدامي ولدي منتظرني بالشاي.. قالت لي انتي السمح ليك تشيلي من لبن أولادي منو.. قلتا ليها لي معلوماتك اللبن دا جايبو ابوي وما محتاجة اذنك عشان اشيل منو ويلا مع السلامة.. شلتا الشاي ودخلتا غرفتي قعدنا انا وباسل شربنا الشاي دخلتا حميتو وغيرتا ليهو ملابسو وخليتو طلع يلعب مع الشفع برة.. جاتني نور بنت ابوي قالت لي ابوي في غرفتو بناديك.. قلتا ليها امشي هسي جاية، اكيد دي بتكون امها الحرباية حرشتو على زي كل مرة، لبستا طرحتي ومشيت ليهو في غرفتو قال لي امشي لمي ملابسك وجهزي ولدك ح ترجعي بيك راجلك.. قلتا ليهو اولا داك ما راجلي وثانيا انا من امبارح كلمتك اني مستحيل ارجع ليهو.. قال لي من متين بقيتي تقولي كلمة فوق كلمتي.. قلتا ليهو من الزمن الانت بقيت ما بتهتم بي بتك وبترميها زي كأنك جايبها من الشارع.. قال لي طلاق ماف ليك وح ترجعي يعني ح ترجعي عشان ولدك.. قلتا ليهو انت لمن طلقتا امي فكرتا فيني ولا قلتا البنت دي ح تتربى بعيد عن امها وابوها كيف وهسي من وين لي وين لمن بتفكر في ولدي وزي ما انا اتربيت بعيد عن امي ولدي بقدر يتربى بعيد عن ابوهو.. مرة ابوي قالت ليهو شايف قلة ادبها وشايف بترد ليك انت ابوها كيف البنت دي ما ح تتربى لو ما رجعت لي راجلها.. قلتا ليها انتي ماف زول سألك عن رأيك انا بتكلم مع ابوي انتي ما تدخلي والسم الجواك دا احسن تطلعي بعيد مني.. ابوي قال لي يابت احترمي نفسك واتكلمي معاها عديل دي زي امك.. قلتا ليهو الحرباية دي مستحيل تكون زي امي ولا بتشرف بيها تكون زي امي.. حسيت بي كف قوي على وشي.. ابوي قال لي انتي بقيتي قليلة ادب ومحتاجة تربية من اول وجديد وقعدة في البيت دا ماف ليك.. قلتا ليهو طالما انت ما عايز تستقبلني في بيتك وما عايز ولدي انا ح امشي لي امي واقعد معززة ومكرمة هناك وعلى الأقل هناك راجل امي بحبني وبهتم بي اكتر منك.. وطوالي مشيت لميت ملابسي وسقتا باسل وطلعتا مشيت بيت امي خليت باسل بلعب مع اخواني برة وانا دخلتا جوة خلاص اعصابي باظت وما قادرة اتحمل اكتر بقيت قاعدة وببكي يا الله انا عملتا شنو عشان استاهل البحصل لي دا كلو من جهة ابوي ومعاملتو لي ومن جهة مرة ابوي ومن جهة تانية الاسمو راجلي انا تعبتا من كل شئ معقوله انا سيئة لي درجة يحصل لي كل دا.. أمي جات قعدت جنبي قالت لي هيومة بتي مالك حاصل معاك شنو ليه بتبكي في زول زعلك.. قلتا ليها امي انا تعبتا ما قادرة اتحمل اكتر كل مرة بقولو لي اصبري واتحملي ح يتعدل وما ح يرجع لي عمايلو تاني بس هو كل مرة برجع اسوء من اول انا عملتا شنو عشان استاهل كل كدا وبعد دا كلو بدل ابوي يقيف معاي ويطلقني منو بقول لي ارجعي ليهو وبطردني من بيتو.. امي قالت لي بعد كدا طف الكيل كل مرة بقول ما أدخل واسكت بس لي هنا وكفاية ابوك دا جن ولا شنو كيف يعني ترجعي ليهو تاني وبعدين انتي ماف شئ بجبرك ترجعي ليهو الاتحملتي كفاية شديد والمرة دي انا وافقة معاك وما ح اخليك الا تطلقي انا ما لقيتك في الشارع عشان اديك لي واحد كل يوم بزعلك وبقهرك وببكيك وبجرحك وابوك كان ما واقف معاك امك ح تقيف معاك.. قلتا ليها امي انتي ابوي دا لي بعمل لي كدا انا مش بتو ومش مفروض يقيف معاي وما يرضى زول يزعلني ليه الغرباء احن علي منو.. قالت لي والله ما عارفه اقول ليك شنو بس الله يهدي سرو انا زاتي مستغربة هو لي بعمل كدا متين بقى قاسي بالشكل دا بس كلو مع الايام بهون.. قلتا ليها امي انا خايفة ابوي يرجعني ليهو تاني انا والله ما بقدر اتحمل اقعد معاهو ثانية على قدر ما كنتا بحبو على قدر ما بقيت اكرهو واحتقرو أضعاف مضاعفة انا لو رجعتا ليهو بموت.. قالت لي إياك اسمعك بتقولي الكلمة دي تاني انا قلتا ليك ما ح ترجعي ليهو انا ما قنعانة منك انا فرطا فيك مرة مستحيل ارجع اعملها مرة ثانية، وهسي امسحي دموعك ما عايزة اشوفها تاني وهسي ارتاحي لي بعدين ح نتفاهم في الموضوع دا.. بعد المغرب بابا جمال راجل امي جاء قال لي الليلة البيت منور بوجودك.. قلتا ليهو منور بي ناسو.. قال لي اخبارك وليه ليك فترة ما بتجينا زعلتي مننا ولا شنو.. قلتا ليهو العفو والله ما زعلانة بس مشغوليات.. قال لي ما مشكلة عازرنك بس المرة دي ح تقعدي معاي كم اسبوع عشان نقتنع انك ما زعلانة مننا.. قلتا ليهو بدون ما تقول اصلا ظاهر علي ح اتقل عليكم.. قال لي والله بزعل منك دا كلام شنو لو ما شالك بيتنا بنشيلك فوق رأسنا وبعدين غرفتك لي هسي قاعدة وما خليت زول يدخل فيها هسي قومي ختي حاجاتك فيها وتقعدي معانا لحدي ما تقنعي.. امي قالت ليهو اصلا ح تقعد معانا لأنها ح تطلق.. بابا جمال قال لي يا ساتر حصل شنو لمن قررتو القرار دا.. قلتا ليهو والله حصل كتير يا بابا جمال وانا خلاص بقيت ما قادرة اتحمل دستا على كرامتي كتير وصبرتا بس ماف فايدة ما بنفع معاهو ولا ح ينفع.. قال لي والله يا بتي ما عارف اقول ليك شنو بس الفيهو خير ربنا يقدمو.. قلتا ليهو الخير ح يكون في إني انفصل عنو وبس.. سمعنا صوت الباب دقة بابا جمال مشى يفتح الباب جاء داخل وكان معاهو ابوي والزفت الاسمو راجلي جلال.. قلتا ليهو خير انت الجابك هنا شنو عايز مني شنو تاني.. قال لي قافلة تلفونك لي شنو.. قلتا ليهو واضحة لاني ما عايزة اتكلم معاك وعايزة أطلق منك واخلص من قرفك.. ابوي قال لي يابت احترمي نفسك انتي بتتكلمي مع راجلك.. قلتا ليهو دا ما راجلي ولا شئ وهسي جبتا معاك قسيمة الطلاق ولا لا.. قال لي انا طلاق ما بطلق.. قلتا ليهو ما على كيف ح تطلقني والا ح امشي المحكمة واخلعك وتبقى ليك سمعة الراجل المخلوع.. قال لي ابوي سامع بتك بتقول لي شنو انا جيت عشان ارجعها وشوف هي بتعاملني بي ياتو طريقة.. بابا جمال قال لي هيام اهدي الخلافات ما بتتحلى بالطريقة دي خلينا نتكلم بي رواقة.. امي قالت ليهو ماف داعي نتكلم في الموضوع اصلا البنت خلاص ما عايزاك ولي مصلحتك ومصلحتها احسن تطلقو واي زول يشوف طريقو بي وين.. ابوي قال ليها انا ما عندي بنت بطلقوها وهسي هي ح ترجع مع راجلها.. امي قالت ليهو ما على كيفك بتي ما ح ترجع معاهو وح يطلقها وانت كان خايف تتحمل مسؤوليتها انا بتحملها وتقعد معاي معززة مكرمة بس رجع ليهو تاني ماف.. جلال قال ليهم وانا طلاق ما بطلق.. امي قالت ليهو طالما ما عايز تطلقها بيناتنا المحكمة بعد كدا وبرضاك أو غصبا عنك ح تطلقها.. ابوي قال ليها ماف اي محكمة والبنت دي هسي ح ترجع معاهو.. بابا جمال قال ليهو طول ما هيام ما راضية ترجع ليهو من البيت دا ما ح تطلع ويلا لو سمحتو بتقدرو تطلعو من بيتي.. ابوي قال ليهو ح اطلع بس ح اطلع وبتي معاي.. قلتا ليهو انت ما عندك بنت هنا انت خسرتا حقك في انك تكون ابوي من يوم قبلتا تقيف معاهو ضدي وانا لا راجعة معاك ولا معاهو انا ح اقعد مع امي هنا، وانت لو عندك شوية كرامة بتقبل تطلقني والا والله العظيم البتعملو كلو ح افضحك وما ح اعمل حساب لي اي شئ من قلتا ليهو كدا ملامح وشو اتغيرت.. جلال قال لي زي ما عايزة انتي طالق.. طوالي فكيت ليك زغرودة لمن حسيت قلبي برد وقلتا ليهو عليك الله ما تطول في قصة القسيمة.. قال لي قسيمتك بكرة بتصلك وطوالي طلع.. ابوي قال لي كدا مرتاحة بقيتي مطلقة افرحي وخلي امك وراجلها ينفعوك وهو زاتو طلع.. طوالي مشيت دخلتا غرفتي تصدقو حتى ما انصدمتا من كلام ابوي معاي طول عمرو ولا مرة ما وقف معاي والمرة دي ما استغربتا من ردة فعلو بس رغم الحصل كلو ياداب حاسة نفسي اني بقيت قادرة اتنفس وانبسط واخيرا خلصتا منو وح ارتاح.. جاني باسل داخل قلتا ليهو كنتا وين من جبيل مافيش.. قال لي مشيت مع خالو عامر لي صحبو وقعدنا هناك.. قلتا ليهو وصحبو دا مشيتو ليهو وين.. قال لي ما عارف مكان بعيد شوية.. قلتا ليهو كويس اها صليت ولا لسه.. قال لي اي صليت بس العشاء لسه ما صليتو.. قلتا ليهو خلاص قوم خلينا نصلي مشينا اتوضينا وصلينا وقرينا أذكار المساء وورد القرآن بعد خلصنا قلتا ليهو بسولي حبيبي عايزة اقول ليك شئ بس ما تزعل.. قال لي ماما في شنو في زول زعلك.. قلتا ليهو لالا ماف زول زعلني بس انا وبابا أطلقنا وتاني ما ح نرجع نعيش مع بعض بس ما عايزاك تزعل في أي وقت عايز تشوف بابا ح تمشي ليهو ولا هو ح يجيك اتفقنا.. قال لي انتي ما ح تزعلي تاني ولا ح تبكي صح.. قلتا ليهو لالا ماف شئ بزعلني تاني بس لي سألتا.. قال لي طول ما انتي مبسوطة انا ح اكون مبسوط وما مشكلة لو ما شفتا بابا.. قلتا ليهو ما تقول كدا في أي وقت عايز تشوفو او تتكلم معاهو انا ح اوديك ليهو أو هو ح يجي يشوفك اتفقنا.. قال لي اي اتفقنا.. ما عارفة حسيت بيهو زعلان بس ما عايز يبين لي، قلتا ليهو انت زعلان صح.. قال لي لا يا ماما ما زعلان.. قلتا ليهو اها عايز تكذب على ماما كمان.. قال لي ما عايز اكذب عليك بس ما عايزك تزعلي تاني.. قلتا ليهو انا ما ح ازعل وانت زاتك ما تزعل صدقني العملتو دا لي مصلحتنا نحنا الاثنين وانت مع الايام ح تفهم ولو عايز تبكي انا ابكي ما مشكلة.. قال لي شايفاني شافع عشان ابكي انا بقيت راجل وكبرتا خلاص.. قلتا ليهو طيب يا راجل البيت تعال ننوم خلاص رقدنا مثلتا اني نمتا بعد مسافة سمعتا صوتو وهو ببكي براحة عشان ما يحسسني معليش خلي يبكي هسي ويزعل احسن من يزعل بعدين انا ما عاجبني الحصل بس لي مصلحتو قبل مصلحتي احسن نبعد من ابوهو ونبدأ صفحة جديدة ومع شروق شمس صباح بكرة ح تبدأ حياتنا الجديدة بعيد عن كل أخطاء الماضي واحزانو بإذن الله

___________♥️

وكنت الاختيار الفاشل الذي سأظل بقية عمري اندم عليه💔💔
 في امان الله♥️
•••••••••••••••••••••••••••••••••••••••••••••••••••••••••••
 

#رحلة~كفاح 《02》
#بقلم~هيام~عبد_القادر{السمحة♥️}

★ــہہہـہہـ♡ــــــ★ـــــــہہہـہہـــــــ★★ـــــ❥​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏
 ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​‏​​‏​​‏​​‏​​‏​​
صحيت الصباح ودي اول مرة من زمن طويل اصحى وانا مبسوطة وحاسة الحمل التقيل الكان في قلبي انزاح قمتا صليت ركعتين شكر لانو ربنا خلصني من جلال قومتا باسل وصلينا وطلعنا شربنا الشاي مع ناس امي.. عامر اخوي قال لي اخيرا جيتي تقعدي معانا هنا من زمان بنحنسك تجي ابيتي.. قلتا ليهو زمان كان في زول مانعني بس هسي خلاص ماف شئ بمنعني وح اقعد معاكم.. عمار قال لي تقعدي معانا ماف مشكلة بس راجلك ح يقول شنو.. قلتا ليهو انا ما عندي راجل لأننا خلاص انفصلنا.. عامر قال لي بركة خليتيهو اصلا ما حبيتو ولا كنتا بطيقو.. حمرتا ليهو نظام باسل قاعد.. علا اختي قالت ليهو بسولي حبيب خالتو تمشي معاي الدكان نجيب شوية حاجات.. قال ليها اي بمشي.. علا ساقتو ومشو قلتا ليهم كلام زي دا قدام باسل ما تقولو تاني في النهاية لو مهما عمل دا ابوهو وانا ما برضى تقولو اي كلام عنو قدامو ما عايزة صورتو تتهزة في عينو.. عمار قال لي حاضر البتقولي عليهو بحصل وما ح نجيب سيرتو تاني.. بعدها اي زول قام مشى على شغلو وانا قمتا نضفتا البيت وبخرتو.. اعرفكم على اخواني اولاد امي ،امي اسمها منى وراجلها اسمو جمال، الكبير اسمو عمار عمرو 18 سنة وبعدو عامر عمرو 15 سنة وبعدو علا عمرها 12 سنة وبعدها عدن عمرها 9 سنوات واخر العنقود علي عمرو 6 سنوات ودا صاحب باسل واي مكان بمشو مع بعض بس اليومين دي عدن وعلي قاعدين مع ناس عمتهم يومين وح يجو.. بعد الفطور في نسوان جو لي امي اصلا انا عارفة هم جو لي شنو وعايزين يستفسرو عن شنو بعد قدمتا ليهم الموية والعصير.. في واحدة قالت لي جيتي زيارة لي ناس امك.. قلتا ليها لالا ما جيت زيارة ح اقعد معاهم.. قالت لي وبيتك وراجلك.. قلتا ليها ما عندي راجل واصلا انا عارفة انتو جايين عشان شنو وعشان ما تتعبو نفسكم وتسألو انا براي ح اوريكم وبالمرة تمشو تكلمو الباقي عشان ما يجو ويعملو زحمة ساي انا اطلقتا.. واحدة منهم قالت لي كيف يعني اطلقتي.. قلتا ليها الطلاق الواحد دا ما بتعرفو يعني انفصلنا خلاص عرفو الجيتو تعرفو بعد كدا انا بستئذن منكم ما اظن عندكم شئ عايزين تعرفو تاني والسبب الاطلقنا عشانو ماف داعي تعرفو وطلعتا خليتهم.. اليوم كلو انا منتظرة بي فارغ الصبر يجيبو لي قسيمتي عشان أصدق انو الكابوس دا خلاص انتهى وح ارتاح منو.. بعد المغرب جلال رسل لي قسيمتي واخيرا حسيت نفسي ح اطير من الفرح وكأني اتحررتا بعد سنين طويلة من السجن وكأنو طائر كان محبوس واتحرر من سجنو، كتير منكم ح يكون مستغرب كيف انا مبسوطة بعد ما اطلقتا وغيري بزعلو لو حصل الطلاق بس انا بالنسبة لي الطلاق دا كان خلاصي الوحيد.. بعد العشاء جاء وابوي ومعاهو عمي الكبير الصادق.. عمي قال لي الطلاق عمرو ما كان حل للمشاكل الناس بتقعد وبتتفاهم وبتحاول تحل مشاكلها بس انتي عملتي شنو بدون ما تسمعي كلام زول فينا وتحترمينا قررتي من رأسك انك عايزة تطلقي وما فكرتي حتى في ولدك وح يتربى كيف بعيد عن ابوهو.. قلتا ليهو يا عمي دي ما اول مرة تحصل مشكلة بيناتنا وفي كل مرة انتو بترجعوني وانا بسمع كلامكم بس المرة دي انتو كمان احترمو رأيي زي ما انا في كل مرة كنتا بحترم رأيكم وبالنسبة لي ولدي ح يقدر يتربى بعيد عن ابوهو زيي انا لاني برضو اتربيت وكبرتا وامي وابوي منفصلين يعني دي ما مشكلة.. عمي قال لي طالما كدا انتي عارفة احساس الولد البتربى واهلو منفصلين ليه بتحكمي على ولدك يعيش نفس الانتي عشتيهو.. قلتا ليهو عمي ولدي لي مصلحتو يتربى بعيد عن ابوهو لانو لو فضل معاهو انا خايفة ولدي يطلع زيو.. عمي قال لي كيف يعني تخافي على ولد من ابوهو وبعدين ابوهو عيبو شنو لمن تخافي يطلع زيو.. قلتا ليهو عمي دا خصوصيات بيت وانا ما بقدر اقولها بس انا اكتر واحدة ادرى بي مصلحة ولدي.. قال لي يعني ما ناوية ترجعي ليهو.. قلتا ليهو انا ما صدقتا خلصتا منو ومستحيل افكر ارجع ليهو تاني.. ابوي قال ليهو انت بتعب نفسك معاها ساي دي رأسها قوي وما بتسمع كلام زول وامها مقوياها علينا وانا تاني ما ح اتكلم معاها تعمل العايزاهو براحتها بس بعدين إياك تجي تشتكي لي.. قلتا ليهو انا من زمان بطلتا اشتكي ليك لاني عارفه لو اشتكيت ليك ولا لا الحالة واحدة لأنك ما ح تعمل لي شئ بفضلك اتعلمتا اني ما اعتمد على زول الا على نفسي وبس.. عمي قال لي يابتي دا كلام شنو دا ابوك واكيد في يوم من الايام ح تحتاجي ليهو.. قلتا ليهو عمي احتاج ليهو لي شنو وانا كل مرة كنتا بحتاج ليهو كان بخليني وما بساعدني مع انو هو عارف اني ما عندي غيرو بس كل مرة كان بخذلني وبتخلى عني انا كان نفسي ولو لي مرة واحدة أمد ليهو يدي يمسكها ويقيف معاي بس لا مستحيل يعمل كدا انت عارف يا عمي مرات بحس بيك انت بتهتم بي اكتر منو على الأقل انت بتسألني عن السبب بس هو ولا بتعب نفسو ويسألني ويفهم مني الحاصل شنو وانا ليه قررتا قرار مصيري زي دا انا نفسي مرة احس انو هو ابوي بالجد نفسي يعاملني زي باقي الآباء ويحبني معقوله انا سيئة لي درجة انو ابوي ما يحبني انا منتظرة شنو من باقي الناس طالما ابوي الجابني على الدنيا دي ما بحبني ولا بهتم لو انا فرحانة ولا زعلانة، انا بي سببك بقيت اغير من البنات الابهاتهم بحبوهم وبهتمو بيهم انا أحياناً بحس انو بابا جمال بحبني وبهتم لي أمري اكتر منك، انتي ليه بتعاملني كدا معقوله انا استاهل كل القسوة دي منك متين قلبك ح يحن علي معقوله انا ما بستحق انك تكون ابوي ولو لي مرة واحدة بس.. خليتهم ودخلتا غرفتي بس المرة دي ما ح ابكي ابدا انا تاني مستحيل اسمح لي زول انو يزعلني ويخليني ابكي انا لازم اكون قوية عشاني وعشان ولدي من هسي الطريق الاخترتو دا ما ساهل وح اسمع فيهو كلام كتير وممكن اتوجع بس كل شئ يهون عشان خاطر باسل وسعادتو.. انا أحلامي كلها اتدمرت بعد اتزوجتا بس هسي خلاص الكابوس انتهى وح ارجع عشان أحقق أحلامي وطموحاتي وكل الكنتا بتمناهو الحياة لسه قدامي وكل نهاية بداية لي حياة غيرها وبعد كل ليل حزين و طويل مصيرها شمس الفرح تشرق من جديد.. طول الثلاثة شهور حقت الحبس انا كل يوم بقيم الليل وبدعي انو جلال ما يجي يقول عايز يرجعني الا بعد شهور العدة تخلص لانو لو خلصت ما بقدرو يرجعوني ليهو الا بي رضاي انا وبس والحمدلله دعواتي استجابت ولحدي ما خلصتا شهور العدة جلال ما عرض وشو وقال عايز يرجعني ولا حتى اهلو جو من البداية هم ما كانو عايزني وما استغربتا انو لمن سمعو بي قصة الطلاق ما فضل ليهم الا يعملو حفلة لأنهم خلصو مني.. وطول الثلاثة شهور دي ابوي ولا فكر يتصل ويسأل عني ابدا وحرفيا بقى ما فارق معاي كتير همي كلو بقى كيف اقدر اعيش انا وولدي من دون ما نحتاج مساعدة من أي شخص ما عايزة اخلي ولدي يحتاج لي حاجة ولا احسسو انو ابوهو ما موجود.. تاني يوم بابا جمال ناداني قال لي انتي شهادتك حقت ثالث قاعدة صح.. قلتا ليهو اي قاعدة لي في شنو.. قال لي خلاص جيبيها عندي صحبي شغال في جامعة لو بتقبلي اخليهو يقدم ليك وتنزلي طوالي.. قلتا ليهو ياريت والله بس بعد الفترة الطويلة دي ممكن يقبلو شهادتي.. قال لي ان شاء الله انتي كدي جيبي شهادتك ونسخة من الرقم الوطني حقك وان شاء الله خير.. قلتا ليهو بابا جمال انت ما عارف انا كنتا منتظرة اللحظة دي من متين من 4 سنين انا مجهزة اي شئ عشان انزل الجامعة بس جلال منعني اقراها.. قال لي هسي ماف شئ بمنعك وان شاء الله ح تقدري الجامعة وتتخرجي بس انتي عايزة يقدمو لي في ياتو تخصص.. قلتا ليها تقنية معلومات من زمان حابة التخصص دا.. قال لي عظيم يبقى امشي جيبي رقم الجلوس حقك عشان أدي صحبي يقدم ليك وان شاء الله يقبلوك.. قلتا ليهو أن شاء الله يا بابا جمال والله بتمنى.. قال لي وكان قبلوك طوالي نمشي نسجل ليك وتنزلي عشان ما تتأخري.. قلتا ليهو كويس، بس عندي شرط.. قال لي قولي شرطك العايزاهو وانا موافق.. قلتا ليهو انا ح ادفع مصاريف جامعتي ح افتش شغل واشتغلو وبالمرة اصرف على نفسي وولدي.. قال لي لي يابتي نحنا مقصرين معاك في شئ لمن تشتغلي.. قلتا ليهو العفو والله ما مقصرين مني بس انا ما عايزة اكون حمل عليك وكدا ح اكون مرتاحة.. قال لي انتي زي علا وعدن عندي واحد وما بفرق بينكم والبعملو ليهم بعملو ليك انتي برضو.. قلتا ليهو برضو يا بابا جمال عليك الله ما تحرجني اكتر خليني اعمل العايزاهو.. قال لي طيب يا بتي زي ما عايزة المهم تكوني مرتاحة.. مشيت جبتا ليهو أوراقي اديتها ليهو وطلع، ناديت باسل ودخلنا غرفتي قلتا ليهو انا عندي ليك خبر حلو شديد ماما واخيرا ح ترجع تقرأ الجامعة وح تشتغل وان شاء الله تاني ما ح نحتاج حاجة من أي زول.. قال لي ماما لي تشتغلي انتي انا بشتغل وبهتمة بيك.. قلتا ليهو حبيب قلبي انت لسه صغير على الشغل وانا من واجبي اني اعتني بيك لحدي ما تكبر وبعدين انت طولك شبرين ح تشتغل كيف يا ولد انت الكلام دا جايبو من وين وانت لسه عمرك 5 سنوات.. قال لي ماما انتي ما يغشك طولي دا انا بقدر اشتغل وبعدين العمر ما مقياس المقياس هو عقلك ومقدار وعيك مش انتي كنتي بتقولي لي كدا هسي نسيتي كلامك.. قلتا ليهو النقاش معاك ما منو فايدة الايام دي لسانك طول زيادة عن اللزوم ما عايزة معاك اي نقاش.. جاء علي اخوي قال لي باسل تعال ارح نمشي نلعب وبعدها ح نمشي الخلوة.. باسل قال ليهو حاضر امشي هسي بلحقك وقال لي كلامنا لسه ما خلص بمشي وبجيك وطلع.. قعدتا اضحك عليهو بس سبحان الله الحنية والحب العند باسل ما لقيتها عند أي زول تاني رغم عمرو الصغير يمكن ربنا عوضني عن الحب الفقدتو في باسل لاني مستحيل القى زول بحبني زيو.. بالمساء كدا عمار جاء وجاب لي معاهو حلاوة قطن(غزل البنات) لاني بحبها شديد.. قال لي عارفك بتحبيها شديد وليك فترة ما اكلتيها ولمن شفتا طوالي اتذكرتك وقلتا اجيب ليك منها.. قلتا ليهو انت الزيك منو تصدق قبل كم يوم كان نفسي فيها.. عدن قال ليهو يعني بتجيب لي هيومة براها ونحنا ما بتجيب لينا.. قال ليها معقولة انساكم كمان عارفك بتحبي الحلاوة وجبتا ليك انتي والباقين شيلي العايزاها وادي الباقي معاك.. قالت ليهو انت احلى اخ في الدنيا.. قال ليها الكلام الحلو دا عشان الحلاوة صح.. قالت ليهو لالا انت عارف من زمان انا بحبك وبعتبرك احلى اخ.. قال ليها وانا بحبك يا عسل انتي.. عمار قال لي جيبل كنتا بتكلم مع ابوي وقال عايز يسجل ليك في جامعة صح.. قلتا ليهو اي اتكلمنا جبيل واديتو أوراقي ادعي ان شاء الله يقبلوني.. قال لي بإذن الله ح يقبلوك بس موضوع الشغل دا شنو كمان.. قلتا ليهو عمار انا كدا ح اكون مرتاحة احسن لي اصرف على نفسي وولدي.. قال لي نحنا ما ماليين عينك ولا ما معتبرانا اخوانك و لا القصة شنو ولا ما ح نقدر نتحمل مسؤوليتك انتي وولدك ولا مقصرين معاك في شئ لمن تمشي تشتغلي ونحنا قاعدين.. قلتا ليهو والله الموضوع ما زي ما انت بتقول بس انا حابة اعتمد على نفسي واتحمل مسؤوليتي انا وولدي عليك الله ما تعترض انا كدا بكون مرتاحة.. قال لي على راحتك اعملي وطوالي قام مشى، حسيت بيهو زعل من كلامي.. تاني يوم الصباح كنا بنشرب في الشاي قلتا لي بابا جمال وعمار وعامر انا ما عايزاكم تزعلو مني إلا تأخدو على خاطركم من كلامي بس انا حابة اعتمد على نفسي ويكون عندي مصدر دخل خاص بي عايزة اكون امرأة عاملة ومستقلة ودا ما ليهو علاقة بيكم بس انا من زمان حابة استقل بي نفسي وبي شغلي انتو الحمدلله ما مقصرين معاي في حاجة بس انا زاتي من حقي أشق طريقي براي واتعب على نفسي عشان اكون فخورة بي نفسي واخليكم تفخرو بي.. بابا جمال قال لي كلام حلو يابتي وما فيهو شئ غلط بس قبل كل شئ انتي لازم تكلمي ابوك وتأخدي رأيو وموافقتو.. قلتا ليهو بابا جمال انت عارف انو هو ما ح يوافق وح يرفض واحتمال يمنعني اكمل جامعتي اصلا.. قال لي ما ح يعمل كدا انتي اتكلمي معاهو برواقة واخدي رأيو وان شاء الله ح يوافق.. قلتا ليهو انت بعد السنين دي كلها لسه ما عرفتو ولا ما عارف طباعو.. قال لي الزول مع الايام بتغير وابوك اكيد ح يكون اتغير وان شاء الله ح يوافق.. عمار قال لي لو ما وافق نحنا ح نقنعو وفي النهاية انتي ما قاعدة تعملي شئ غلط ولا عيب والتعليم حق كل زول وهو شاف أنو الزواج ما كل شئ عشان كدا قرايتك وشهادتك هي الح تفيدك وتخليك تتقدمي ولو عايزة انا بمشي معاك تتكلمي معاهو.. قلتا ليهو لالا ما بحتاج انا بمشي اتكلم معاهو براي.. بابا جمال قال لي يا بتي اتكلمي براحة وحاولي بي هدوء اشرحي ليهو وجهة نظرك في الموضوع واخدي رأيو واتفاهمي معاهو برواقة ومشي على قدر ما تقدري في النهاية هو ابوك ومجبورة تحترمي وتسمعي كلامو وتطيعيهو.. قلتا ليهو حاضر يا بابا جمال ح اعمل كل القلتو.. بعد العصر كدا مشيت لي ابوي في بيتو لقيتو قاعد في الصالون وعماتي برضو قاعدين طبعاً من يوم اطلقتا ماف واحدة ضربت لي تلفون ولا جات تشوفني ولو بالغلط ساي سلمتا عليهم ودخلتا غرفتي كان عندي باقي حاجاتي انا وباسل لميتها طلعتا ماشة لي ابوي في الصالون واحدة من عماني قالت لي صحي طلقوك.. قلتا ليها اي صح انا اطلقتا ما طلقوني صححي معلوماتك.. قالت لي ما كلو واحد في النهاية طلاق.. قلتا ليها ما واحد في فرق بين أني قلتا يطلقوني وبين انو هو طلقني براهو ما تلخبطي.. عمتي الثانية قالت لي بطولي لسانك على شنو وانتي مطلقة.. قلتا ليها وانتي بتك لمن طلقوها وجو رموها ليك زي الكلبة طولتا لسانها مالا حلال ليها وحرام علي انا.. قالت لي يابت انتي ما تحترمي نفسك.. قلتا ليها انا الحمد لله محترمة نفسي وانا جوابتك على حسب سؤالك ما قليت أدبي في شئ.. مرة أبوي قالت ليهم خلوها ما تشتغلو بيها دي بعد الطلاق عقلها طار.. قلتا ليها انا عقلي في محلو كعب الناس الما عندهم عقل اصلا، ولا كترتا كلامي معاهم مشيت لي ابوي في الصالون قلتا ليهو في موضوع عايزة اتكلم معاك فيهو.. قال لي قولي.. قلتا ليهو ابوي انت عارف اني من زمان كنتا عايزة اقرأ الجامعة بس بعد العرس ما قدرتا وهسي بعد اطلقتا قلتا احسن ارجع وأكمل جامعتي واشيل شهادتي وبالمرة اشتغل واصرف على نفسي وولدي وما اشيل زول حملي وجيت استئذنك عشان اقرأ الجامعة واشتغل وبتمنى تقبل.. قال لي يابتي انتي ادرى بي مصلحة نفسك ولو شايفة كدا ح تكوني مبسوطة ارجعي اقري وانا ما عندي مانع.. ما اكذب عليكم طبعا انصدمتا بكلمة بتي لانو ليهو سنين ما قالها لي وثانيا انو وافق على كلامي من اول مرة ما قادرة أصدق نهائي قلتا ليهو شكرا على موافقتك ومشيت غرفتي شلتا حاجاتي وانا طالعة سامعة عماتي ومرة ابوي بتكلمو لكن ما ركزتا معاهم لسه مصدومة في انو ابوي وافق بدون ما يعترض الفرحة الساعة ديك ما كانت سايعاني واخيرا ح أدخل الجامعة لمن مشيت كلمتا امي هي زاتها في البداية انصدمت بس تاني فرحت لي لانو ابوي وافق.. بالمساء بابا جمال جاء قال لي انو الجامعة قبلتني وتاني يوم امشي اسجل طوالي عشان النزول بعد اسبوعين.. اخيرا وبعد فترة طويلة ح اعمل شئ انا حاباهو من جوة قلبي الحمدلله حمدا كثيرا طيبا مباركا فيه الحمد والشكر ليك يارب♥️♥️

____________♥️

ما أجمل إحساس الفرحة الذي يأتي بعد سنين من الحزن♥️♥️
 في امان الله♥️
•••••••••••••••••••••••••••••••••••••••••••••••••••••••••••
 

#رحلة~كفاح 《03》
#بقلم~هيام~عبد_القادر{السمحة♥️}

★ــہہہـہہـ♡ــــــ★ـــــــہہہـہہـــــــ★★ـــــ❥​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏
 ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​‏​​‏​​‏​​‏​​‏​​
تاني يوم قمتا من الصباح اتجهزتا ومشيت مع بابا جمال وعمار جامعة التقانة عشان نسجل لي فيها شلتا أوراقي واتحركنا على الجامعة لمن وصلنا طوالي دخلنا على مكتب التسجيل كملنا إجراءات التسجيل وقالو لي الدراسة بتبدأ بعد اسبوعين، بابا جمال استئذنا مننا ومشى على شغلو طوالي قعدنا انا وعمار فطرنا ومشينا شارع النيل حمنا شوية وكسرنا الزمن وبعدها رجعنا البيت لقيت جلال جاء سلمتا عليهو ودخلتا خليتو قاعد مع باسل ياداب بعد ثلاثة شهور فكر يجي يسأل من ولدو ويشوفو اه على راحتو هو حر المهم يهتم بي ولدو والباقي ما بفرق بعد مسافة باسل جاني داخل.. قلتا ليهو بابا مشى ولا شنو.. قال لي اي بابا هسي مشى وقال لي اديك ديل وطوالي طلع.. فتحتا الظرف لقيت فيهو قروش كويس اتذكر انو عندو ولد ولازم يصرف عليهو بس لازم بأسرع وقت القى لي شغل واعتمد على نفسي دخلتا الفيس وبقيت افتش على عروض حقت شغل وكان في شركة طيران بتفتش على موظفة بتستقبل مكالمات وبتحجز تذاكر طيران والدوام كان مسائي يعني ظابط معاي شلتا رقمهم واتصلتا عليهم وبكرة ح امشي اعمل المقابلة الليل كلو ما قدرتا انوم خايفة انو ما يقبلوني جهزتا أوراقي من الصباح قمتا مشيت شركة الطيران دخلتا لقيت في سكرتيرة قاعدة.. قالت لي اتفضلي بقدر اساعدك.. قلتا ليها انا جاية عشان مقابلة الشغل.. قال لي اسفة يا أستاذة بس الوظيفة شغلتها واحدة تانية.. قلتا ليها ما مشكلة وطلعتا، هيام ما مشكلة دي اول محاولة أن شاء الله الجايات اكتر ما تيئسي من اول مرة في شارعي كان في كم شركة دخلتا سألتا فيها عن شغل برضو ما لقيت، مر اسبوع كامل وانا بفتش عن شغل ما لقيت.. فضل اسبوع منو وانزل الجامعة كان عندي فساتين وعبايات في بيتي القديم ما لبستهم لانو بعد اشتريتهم حلال منعني البسهم مع انهم حلوين وواسعات بس ما عارفة الوسواس العندو دا شنو سقتا عمار معاي ومشينا بيتي دخلتا سلمتا على جيراني وكان معاي نسخة من مفاتيح البيت فتحتا البيت ودخلتا فتحتا غرفة النوم اتفاجأتا بي جلال ومعاهو بنت في الغرفة من الخلعة اتجمدتا في مكاني ما قدرتا اتحرك الا بعد مسافة طوالي قفلتا الباب وطلعتا وانا حاسة الدنيا لافة بي مسافة انا ما قادرة استوعب اي شئ صح دي ما اول مرة يعمل كدا بس دي المرة الأولى الانا بشوفو فيها.. عمار جاء قال لي مالك لي ما دخلتي شلتي حاجاتك.. قلتا ليهو ما عايزاها خلينا نمشي.. قال لي في شنو ولونك مخطوف كدا لي شنو.. قلتا ليهو لالا ماف شئ خلينا نطلع من هنا.. قبل ما نتحرك البنت الكانت مع جلال جات طالعة وهي خايفة عاينت لينا وطوالي جرت طلعت.. عمار قال لي دي منو وجات تعمل هنا شنو انا كنتا واقف برة وما شفتها دخلت متين جات.. قلتا ليهو انا ما عارفة ما تسألني ما عارفه ياخ.. قال لي اهدي شوية واخدي نفس ما تتوتري.. بعدها جاء جلال طالع عاين لي ونزل رأسو وطلع من البيت.. عمار قال لي هيام البحصل هنا شنو هسي تفهميني وسبب طلاقك منو شنو الرفضتي تورينا ليهو.. قلتا ليهو عمار عليك الله انا ما قادرة اتكلم.. قال لي ح تقدري تتكلمي وهسي ح تفهميني البحصل هنا شنو ومن شكلك ظاهر انو دي ما اول مرة يعمل كدا صح.. قلتا ليهو عمار عليك الله ما تضغط علي اكتر من كدا.. قال لي بضغط انا لازم افهم في شنو احكي لي.. قلتا ليهو انا ما حابة اتذكر الحصل.. قال لي انا اخوك كلميني لي متين ح تفضلي حابسة في قلبك وما عايزة تكلمي زول.. قلتا ليهو لاني كل ما اتذكر الموضوع بحس في سكاكين بتنغرز جوة قلبي.. قال لي مع ذلك احكي لي في شنو.. قلتا ليهو دي ما اول مرة يحصل كدا جلال كتير لمن اكون مافي البيت بجيب معاهو بنات وجيراني بكلموني وكم مرة قبضتو بتكلم مع بنات وحاولتا اتجاوز بس لمن غلبني جيت وقلتا عايزة أطلق وكل مرة كانو برجعوني ليهو انا ما رضيت احكي لي زول عشان ما ينفضح وانا انفضح معاهو وانجبرتا اتحمل واصبر عشان ولدي بس خلاص فاض بي حتى ما مقدر وجودي ومحسسني اني نكرة وكل عندي وجود وأهمية في حياتو وبعمل اي شئ عايزو من غير ما يفكر فيني ويراعي لي مشاعري انا واحدة لي مدة ثلاثة سنوات شافت راجلها بخونها وسكتت واتحملت عشان ولدها انا دستا على كرامتي واتحملتا بما فيهو الكفاية بس خلاص طفح بي الكيل وما قدرتا اتحمل عشان كدا طلبتا الطلاق ولمن هددتو بي اني افضحو قبل انو يطلقني من غير اي نقاش انا ما عارفة الصبرني ثلاثة سنوات شنو يمكن عشان كنتا بحبو قلتا احتمال يتغير وبعد فترة حتى حبي ليهو اتلاشى واتحول لي كره واحساس بالقرف منو وبعد فترة بقى ما بفرق معاي هو بعمل في شنو اساسا بس لمن حسيت انو سلوكو دا ممكن يأثر على باسل وخايفة يطلع زيو قررتا انفصل عنو واربي ولدي بعيد عنو.. قال لي انتي كيف قدرتي تتحملي الحصل دا كلو من غير ما تحكي لي زول وحبستي في قلبك والتافه دا حسابو معاي بعدين كيف يعمل كدا ما بخجل ولا بستحي من نفسو وما عارف البعمل فيهو دا حرام وانتي كيف بتسكتي عليهو وبتتغاضي عن العملو.. قلتا ليهو عايزني اعمل شنو لو مشيت اشتكيت ممكن عادي ينكر وانا ما عندي دليل ضدو وممكن يرفع على دعوة اني اتهمتو افتراء وواحد بعمل كدا الحلفان عندو عادي وبطلعني انا كذابة وبفتري علي.. قال لي انا ما قادر أصدق كيف جلال بطلع منو كل دا وانتي كان تجي تورينا الخلاك تسكتي وتتحملي الفترة دي كلها شنو انتي مجنونة انتي كدا تبقى مشتركة معاهو لانو الساكت عن الحق شيطان اخرص.. قلتا ليهو انا عارفه انو العملتو دا ما صح بس ما كان في يدي حيلة انا خفتا على نفسي وولدي لو فضحتو يقوم يعمل لي شئ هو هددني لو كلمتا زول بشيل مني باسل وتاني ما ح يخليني اشوفو ولا اسمع صوت ولو بالغلط ساي انا ما بقدر اتحمل اني اعيش من غير ولدي هو الوحيد المصبرني على الوضع والعشتو كلو ما بقدر اخسرو بموت لو يوم بعد عني.. قال لي ونحنا قاعدين لي شنو قايلة لو شالو نحنا ما ح نقدر نرجعو ليك ولا شنو وهو اصلا ما ح يقدر يشيلو منك طول ما انا موجود والحمد لله وقت خلصتي من واحد زيو وهسي شيلي حاجاتك وخلينا نطلع من البيت دا.. قلتا ليهو اول عايزاك توعدني انو ما ح توري زول بالكلام القلتو ليك دا.. قال لي ما بقدر.. قلتا ليهو لو وريت زول بزعل منك وتاني ما بتكلم معاك.. قال لي ما بوعدك لكن ان شاء الله ما بوري زول بس ما هسي بقول ليك لو في يوم اضطريت ح اتكلم واليوم داك إياك تزعلي مني.. قلتا ليهو أن شاء الله يوم زي دا ما يجي انا عايزة انسى كل شئ حصل في الماضي وعايزة ابدأ حياة جديدة مع ولدي.. قال لي ح تبديها وتنبسطي وتنسي كل الحزن المريتي بيهو معاهو.. قلتا ليهو والله بتمنى من جوة قلبي.. قال لي وان شاء الله ح تلقي الأحسن منو ويعوضك عن كل شئ حصل.. قلتا ليهو لالا ما عايزة كفاية تجربة واحدة فاشلة انا عايزة اعيش انا وولدي برانا وبس.. قال لي انتي لسه صغيرة والحياة قدامك ليه توقفي حياتك عشان تجربة واحدة فاشلة ح يجي يوم وترجعي تحبي من تاني وتتزوجي وتنبسطي.. قلتا ليهو الحب دا تاني توبة منو وبعدين انا الزواج دا خلاص قفلتا بابو عايزة التفت لي حياتي المهنية واركز فيها وبس.. قال لي انتي ما عارفة القدر مخبي ليك شنو لي قدام اتفائلي.. قلتا ليهو انا والله متفائلة بس حتى لو فكرتا في يوم اتزوج لو ما لقيت زول باسل حباهو وقدر يتعود عليهو ويحبو هو زاتو ويقبل انو ولدي يعيش معانا مستحيل اتزوجو لانو راحة ولدي عندي هي الأولوية ومستحيل اخليهو يعيش ما واحد ما بحبو ومتقبلو أو يقول لي خلي ولدك دي مستحيلة.. قال لي لو على باسل مستحيل زول يشوفو وما يحبو ويتعلق بيهو انا بضمن ليك لانو سبحان الله اي مكان اسوقو معاي الناس بتحبو وبتقول لي دائما كل ما اجي الا اجيبو معاي عشان كدا من الناحية دي ما تخافي.. قلتا ليهو انا خايفة حتى لو بعد زمن جاء واحد باسل ما يقدر يتأقلم معاهو أو يحبو، ولا اقول ليك هسي خلينا من الكلام دا لمن يجي وقتو خليني اشيل حاجاتي ونطلع من البيت دا بسرعة اصلا قعدنا فيهو اكتر من اللزوم شلتا حاجاتي وحاجات باسل وألعابو وختيت نسخة المفاتيح المعاي وطلعنا من البيت رجعنا بيتنا بديت أرتب ملابسي في الدولاب بعد خلصتا مسكتا تلفوني وبقيت اتصفح في الفيس ودخلتا قروبات فيس تبع جامعتنا.. الاسبوع مرة بي سرعة البرق الليلة وبكرة الجامعة جهزتا ملابسي من بدري وانا متحمسة شديد اول يوم لي في الجامعة ح يكون كيف مجتمع جديد وناس جديدة وبيئة جديدة ح يكون كل شئ مختلف وفريد من نوعو وان شاء الله ح اتعرف على صحبات جداد غير صحباتي البعد عرستا انقطعو مني وقطعو علاقتهم معاي ولا واحدة فضلت متواصلة معاي مع اني ما عارفة السبب شنو وكتير حاولتا افهم منهم الحاصل شنو ولي فجأة قطعو علاقتهم معاي بس ولا واحدة ردت علي وحتى لمن مشيت ليهم في بيتهم كل واحدة بتتحجج عشان ما تتكلم معاي وكذا مرة بمشي لي واحدات في بيوتهم وبكونو قاعدين بس بقولو لي اخواتهم يقولو لي انهم ما فايشين ما عارفة السبب شنو بس اي واحدة تاني تأخد راحتها وفي النهاية اكتشفتا اني ما عرفتا ولا اختار صحبات ولا راجل فشلتا في الإثنين سوى بس الله كريم كلو لي خير وان شاء الله ربنا ح يعوضني بي صحبات احسن من الخسرتهم وربنا دائما ببعد عننا الناس البإذونا او النحنا بنأذيهم بي وجودنا في حياتهم واحتمال اكون انا النعمة الهم رفضوها في حياتهم وح يجي ويندمو على خسارتهم لي بس وقتها الندم ما ح يفيدهم

قعدت اتونستا مع باسل شوية وكلمني عن بنت الجيران صحبتو وانو جبيل كانو بلعبو مع بعض ولمن جو ماشين هي أدتو حلاوة ومشت بيتهم وقال لي بكرة وانا جاية من الجامعة اجيب ليهو معاي شوكولاتة عشان يديها ليها لأنها الليلة أدتو حلاوة.. قلتا ليهو حاضر يا استاذ باسل من عيوني بكرة بجيب ليك معاي بعدها جو علا وعدن وعلي باسل وعلي قعدو يلعبو وعلا وعدن قعدو يتونسو معاي من فترة طويلة ما انبسطتا قدر كدا وهم قاعدين مع اتونسنا وحكو لي عن المدرسة وصحباتهم واساتذتهم البحبوهم منو وما بحبو منو اليوم داك قعدنا للساعة 12 بنتونس وانا زاتي اتذكرتا ايام المدرسه والامتحانات والشغب والكلام في الحصص وانتو الاثنين الحصة الجاية ما تقعدو لي جنب بعض دي الجملة المشهورة الكانت بتقولها لينا الأستاذة لمن اقعد مع الكنتا مفتكراها صحبتي وهسي خلتني ومشت من دون أي سبب ولا مبرر وحتى لمن سمعو اني اطلقتا ماف واحدة فيهم جاتني ولا سألت عني.. لمن الزمن اتأخر قلتا ليهم يلا على سرايركم انا بكرة عندي جامعة من الصباح بدري يلا تصبحو على خير.. قالو لي وانتي من أهل الخير ومشو نامو.. رقدتا وبقيت بفكر في الحصل لي كلو من غير ما احس قعدتا ابكي انا براي بحب انكد على نفسي بس اعمل شنو حاسة نفسي ضعيفة وهشة وقلبي تقول انكسر لي ألف قطعة وقطعة ومستحيل يرجع يتصلح تاني اي زول انا بتعلق بيهو بخسرو واي حاجة عايزاها ما بحصل عليها انا عارفة كلو بحصل لي خير بس والله كتر على شديد البحصل دا معقوله انا ما بستاهل زول يحبني ويبقى وفي معاي للآخر ويراعي لي مشاعري واحساسي ويفهمني ويفضل معاي رغم كل الظروف معقوله الحب كتير علي وانا ما بستاهلو.. هيام بطلي جن خلاص من الناقص من حب بسبب ليك الحزن والوجع بس الحب حلاوتو في الوجع والما اتوجع معناها حبو دا ما حقيقي خليك من الكلام الفارغ دا وركزي في مستقبلك وقرايتك وبس وخلي الفارغة لانو دا ما وقتها وهسي نومي احسن ليك.. صحيت تاني يوم اتجهزتا وسرحتا حواجبي وعملتا ماسكرة وقلوس لي شفايفي وصبحتا على ناس امي وشربتا الشاي وطوالي اتحركتا على الجامعة لمن وصلتا ودخلتا ما عرفتا امشي على وين بقيت واقفة وبتفرج في الناس ماشين وجايين وانا ما عارفه أقبل على ياتو جهة وكل شوية بجو طلاب راكبين عربات اي واحد بركن عربيتو في الباركين وبمشي على جهة أصحابو لمن فترتا من الوقفة بقيت لافة في الجامعة ساي من غير ما انتبه ضربتا في بنت ودفقتا العصير الكانت شايلاهو في ملابسها.. قالت لي انتي عمية ما بتشوفي قدامك.. قلتا ليها انا آسفة ما انتبهتا ليك بعتزر..قالت لي هسي اعتزارك ح يفيدني في شنو شوفي وسختي لي ملابسي كيف.. قلتا ليها انا اعتزرتا منك وبعدين انتي مكبرة الموضوع على شنو كلو شوية عصير ما حصلت مصيبة.. قالت لي حصلت مصيبة وفوق ما انتي غلطانة بطولي لسانك.. قلتا ليها لساني من يومو طويل ونقول انا ما شايفة انتي برضو عمية ما بتشوفي ولا انتي مع نظاراتك دي ح تشوفي كيف اصلا المهم ما ضروري تردي اصلا ومشيت خليتها دا شنو ناس بالزوق ما بتفهم اعتزرتا منها وبرضو بتكبر في الكلام غلطانة انا ما كان اعتزر منها وتستاهل وقت العصير ادفق في ملابسها ماشة وانا بتكلم براي زي المجنونة ما انتبهتا للعربية الجاية علي الا لمن ضرب لي البوري من الخلعة اتجمدتا في مكاني وغمضتا عيوني وقلتا خلاص الليلة ح تموتي من اول يوم ليك في الجامعة وعندك ولد صغير ح تخلي لي منو يا حليلك يا باسل امك ح تموت وتاني ما ح تشوفها ربنا يغطي عليك ويحفظك يا ولدي وامك بتحبك شديد انا لسه صغيرة ما شفتا للدنيا شئ ولا حققتا أحلامي ولا عملتا اي انجاز الناس بتقدر تتذكرني بيهو يا حليلي ح أموت وماف زول ح يتذكرني كلها يومين وينسوني ويكملو حياتهم من دوني عادي.. وتاني ما حسيت بي أي شئ..........
 في امان الله♥️
•••••••••••••••••••••••••••••••••••••••••••••••••••••••••••
 

#رحلة~كفاح 《04》
#بقلم~هيام~عبد_القادر{السمحة♥️}

★ــہہہـہہـ♡ــــــ★ـــــــہہہـہہـــــــ★★ـــــ❥​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏
 ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​‏​​‏​​‏​​‏​​‏​​
صحيت من دوامة تفكيري بي صوت بوري العربية فتحتا عيوني لقيت العربية واقفة وما ضربتني الولد الكان في العربية نزل قال لي يابت انتي مجنونة ولا عايزة تموتي واقفة قدام عربيتي ليك ساعتين في شنو مستغنية عن روحك يعني ولا شنو.. قلتا ليهو ما مستغنية عن روحي ولا شئ.. قال لي طيب مالك غبية ولا حاجة ولا عايزة تعملي درامات.. قلتا ليهو استنى يا استاذ درامات شنو وثانيا انتي بتسوق عربية ما بتشوف قدامك كنتا ح تضربني.. قال لي انتي الوقفتي قدام عربيتي وبعدين انا عارف البنات الزيك بفكرو كيف عايزة تعملي درامات عشان تتعرفي علي لأنك معجبة بي أشكال البنات الزيك ديل انا بعرفهم وفاهم حركاتكم عشان كدا ما تجربي على الفاضي لأني مستحيل أقبل اطلع مع واحدة زيك.. قلتا ليهو هيي انت قايلة نفسك منو اصلا انا ما بشرفني اعرف واحد زيك خلي اطلع معاهو وثانيا شايف نفسك على شنو لا سماحة ولا أخلاق كلو طين في طين وشبهك ديل القروش والعربات العندهم هي البتقيمكم وبدونها انت ولا شئ نكرة وصفر على الشمال ماف زول بشوفو عشان كدا ما تكبر في نفسك على الفاضي لأنك ولا شئ واخيرا انت لو فضلتا آخر واحد انا ما بشرفني اعرفك لانو معرفتك تخجل وأشكال الناس الزيك ديل ما بفكر فيهم ولا بعجبوني امشي شوف مكان البنات العاجبهم واقعد معاهم انت وهم واحد اصلا فخار يكسر بعضو، ولا استنيتو يرد علي طوالي مشيت جات بنت لاحقاني قالت لي لو سمحتي ممكن تقيفي.. قلتا ليها اتفضلي عايزة حاجة.. قالت لي انتي عارفة دا منو الاتكلمتي معاهو بي الأسلوب دا واحرجتيهو قدام الناس ديل.. قلتا ليها ما بعرف ولا بهمني اصلا اعرف هو منو.. قالت لي وب عليك دقستي دقست عمرك.. قلتا ليها لي في شنو ح يكون منو يعني.. قالت لي دا واحد من شلة الشباب البرجوازيين فوق العادي في الجامعة ونص الجامعة بتتمنى تصاحبهم وتتكلم معاهم وانتي هسي جيتي احرجتي واحد فيهم يا حليلك بعد دا.. قلتا ليها يعني لو برجوازيين شديد الشئ دا بسمح ليهم يغلطو على الناس وما يردو عليهم.. قالت لي ما كدا بس الشلة دي مسيطرة وماف زول بقدر يعمل ليهم شئ لانو أهلهم واصلين شديد ولو ختوك في رأسهم ممكن عادي يرفضوك من الجامعة ولا بفرق معاهم.. قلتا ليها خلي يعملو العايزنو على الأقل لو رفضوني بثبتو لي انهم خافو مني وما قدرو علي بس ما اكتر.. قالت لي يابت انتي ما بتخافي.. قلتا ليها بخاف لمن اكون غلطانة بس ما العكس وهسي خلينا منهم ما بستاهلو اضيع زمني فيهم، بالمناسبة انا هيام.. قالت لي وانا دينا اتشرفتا بي معرفتك.. قلتا ليها وانا كمان، برلومة ولا سنير.. قالت لي برلومة وانتي.. قلتا ليها برضو برلومة، طالما انتي برلومة كيف بتعرفي التفاصيل دي كلها عنهم.. قالت لي انتي ما دخلتي قروبات الواتس العملوها ولا شنو.. قلتا ليها لالا ما دخلتا في شنو.. قالت لي ديل القروب كلو بكون بتكلم عنهم وأنهم ما شايفين زول وخاتين نفسهم دائما احسن من كل الناس ودائما الناس بتحذر من المشاكل معاهم لانو قبل كدا ولد وبنت كان اتشاكلو معاهم تاني يوم رفضوهم من الجامعة.. قلتا ليها ديل شايفين نفسهم على شنو لو ما قروش أهلهم والواسطة حقتهم هم بدونها ولا شئ.. قالت لي حتى ولو المهم أهلهم عندهم قروش وواسطة وبقدرو يعملو اي شئ عايزنو.. قلتا ليها يعملو العايزنو بس بتمنى ما الاقي ولا واحد منهم كفاية من الصباح دي المرة الثانية اتشاكل فيها.. قالت لي المرة الثانية انتي مالك بتحبي المشاكل كدا.. قلتا ليها والله ما بحبها ولا شئ بس براها بتجيني وكل ما احاول اتجنبها بلقاها قدامي.. قالت لي المشكلة الأولى كانت مع منو.. قلتا ليها مع بنت كدا سخيفة من غير قصد دفقتا فيها العصير عملت منها مشكلة.. قالت لي لي مصلحتك تبطلي مشاكل وتهدي عشان تقدري تكملي جامعتك بدون مشاكل، اها نمشي على القاعة.. قلتا ليها المشاكل دي كلها حصلت بي سبب انا ما عرفتا القاعة مكانها وين.. قالت لي طيب ارح معاي اوريك ليها وين، شكلك ما بتعرفي زول هنا.. قلتا ليها صدقتي والله ما بعرف زول غيرك انتي.. قالت لي حتى انا ما بعرف ولا زول.. قلتا ليها والقروبات الدخلتيها ما اتعرفتي على زول.. قالت لي والله دخلتا بشوف الرسايل بس لكن ما بتكلم مع اي زول.. قلتا ليها ما مشكلة عرفتيني انا خلينا نمشي سوى طالما الاثنين ما بنعرف زول.. قالت لي كويس وبالمرة نبقى صحبات وفرد.. قلتا ليها طوالي ماف مشكلة واتبادلنا أرقام بعض وقالت لي بدخلني القروبات ومشينا على القاعة.. بعد مسافة جات السكرتيرة حقت عميد الجامعة ومعاها دكتورة رحبو بينا وعرفونا على نظام الدراسة وجاء عميد الجامعة برضو رحب بينا ووزعو لينا حلاوة وبعدها طلعو مشينا انا ودينا الكافتيريا عشان نأكل هي مشت تطلب لينا الأكل وانا ضربتا لي امي اتكلمتا مع باسل شوية وقفلتا دينا جابت الاكل قعدنا نأكل جات مارة البنت الدفقتا فيها العصير حمرت لي ومشت.. دينا قالت لي مالا البنت دي معاك.. قلتا ليها دي الجبيل دفقتا فيها العصير.. قالت لي وقعتك سوداء بعد كدا.. قلتا ليها لي في شنو.. قالت لي في يوم واحد اتشاكلتي مع اثنين من شلة البرجوازيين الله يكون معاك.. قلتا ليها انا عرفني شنو وبعدين انا ما غلطتا وحصل الحصل خلاص هم ينسو زي ما انا ح انسى وبس.. قالت لي ادعي انو ما تتقابلي معاهم لي فترة.. قلتا ليها بتمنى مع انو ما اظن لكن نعمل شنو قسمة، هسي خلينا نقوم نلف في الجامعة ونعرف مكان القاعات عشان المرة الجاية ما نضيع.. قالت لي كلامك صح اصلا ما عندنا شئ نعملو.. قمنا ماشين ما انتبهتا ضربتا في واحد قلتا ليهو اسفة ما انتبهتا ليك.. قال لي ولا يهمك عادي بس المرة الجاية انتبهي.. قلتا ليهو حاضر ومشينا، دينا دا منو الزوق دا اول مرة من الصباح الاقي لي زول ما اتشاكل معاهو.. قالت لي دا واحد من شلة البرجوازيين.. قلتا ليها مبالغة طلع زوق ما بشبه الإثنين الغياظيين ديلك.. قالت لي دا الوحيد الفرق منهم تحسي متواضع شديد.. قلتا ليها طيب المقعدو مع ديلك شنو.. قالت لي لانو ابهاتهم أصحاب شديد فتلقائيا أولادهم بقو أصحاب برضو بس هو ما بشبهم ابدا.. قلتا ليها احسن ليهم ما يبقى متعجرف زيهم، يلا خلينا من سيرتهم مشينا لفينا في الجامعة كلها ما خلينا مكان ما مشينا شفناهو في النهاية ونحنا طالعين خلاص من الجامعة شفتا الشلة البقولو عليهم برجوازيين كلهم قاعدين مع بعض البنت والولد الاتشاكلتا معاهم قعدو يحمرو لي عاينتا ليهم من فوق لي تحت وطلعتا دينا مشت على جهة مواصلاتها وانا ماشة قريب من الجامعة شفتا مطعم قلتا نجرب حظي وان شاء الله القى عندهم شغل دخلتا طلبتا اشوف المدير قالو ما موجود بس النائب حقو قاعد طلبتا اشوفو دخلوني مكتبو سلمتا عليهو وقعدتا.. قال لي اتفضلي بقدر اساعدك في شئ.. قلتا ليهو انا جاية افتش شغل وبتمنى القى عندكم وانا مستعدة اشتغل اي شئ.. قال لي يا انسة.. قلتا ليهو اسمي هيام.. قال لي طيب يا انسة هيام من حظك انو قبل يومين بس واحد من موظفينا ترك الشغل لي ظروف ونحنا محتاجين موظف عشان نغطي النقص الحصل.. قلتا ليهو يعني ح تقبلوني في الشغل.. قال لي ان شاء الله بس انتي ما حابة تعرفي عايزة تشتغلي شنو.. قلتا ليهو ما بفرق المهم القى شغل بس عندي طلب.. قال لي اتفضلي.. قلتا ليهو ممكن اشتغل بدوام مسائي لاني شغالة جامعة.. قال لي ما عندك اي مشكلة اصلا الموظفة العايزنها كان لي دوام مسائي.. قلتا ليهو شكرا كتير ليك متين بقدر أبدأ.. قال لي من بكرة ان شاء الله، وشغلك ح يكون تأخدي طلبات وتقديمها وتأخدي الحساب وبس.. قلتا ليهو طيب وان شاء الله ما ح أكون عند حسن ظنك.. اداني ورقة قال لي سجلي فيها معلوماتك ورقم تلفونك عشان لو احتجناك في أي شئ نقدر نصل ليك.. قلتا ليهو حاضر سجلتهم وطلعنا عرفني على طاقم العمل وقال ليهم دي هيام من بكرة ح تشتغل معاكم دوام مسائي، واداني اللبس حق المكان وكان تيشيرت ومعاهو يا إما بنطلون أو اسكيرت البريحك تلبسيهو، شلتا الملابس وطلعتا وانا الفرحة ما سايعاني واخيرا لقيت شغل بعد تعب بس الحمد لله مع انو اليوم من بدايتو ما كان سمح بس نهايتو كانت حلوة شديد رجعتا البيت وانا طايرة من الفرحة وفرحتهم معاي بي خبر شغلي وانو قريب من الجامعة يعني ما ح اتعب شديد.. بعدها دخلتا استحميت واكلتا ودخلتا غرفتي مسكتا تلفوني وفتحتا الشبكة لقيت دينا مدخلاني في القروب القالتو داك لقيت في رسائل كتيرة قلتا بكون في شئ مهم بس لقيت كلامهم كلو عن شلة البرجوازيين قلتا ليهم انتو لي مهتمين بيهم للدرجة دي هم ناس زيهم زيكم واحد ماف اي فرق غير انهم شايفين روحهم بي قروش أهلهم وانتو مدنهم قيمة اكتر من حقتهم عشان كدا شايفين نفسهم عليكم بالله حاولو ما تركزو معاهم وركزو في حياتكم احسن، بعد رسلتا الرسالة طوالي طلعتا من القروب وقفلتا الشبكة وطلعتا قعدتا مع ناس امي برة.. بابا جمال قال لي اها اول يوم جامعة كان كيف.. قلتا ليهو والله ما كعب شديد واتعرفتا على واحدة ظريفة اسمها دينا ولافينا في الجامعة وعلى كدا اليوم انتهى بس.. قال لي كويس والله بالتوفيق ليك.. قلتا ليهو شكرا يا بابا جمال والليلة لقيت شغل في مطعم وان شاء الله بكرة ح ابدأ شغل.. قال لي ربنا يعينك يابتي.. قلتا ليهو اللهم اميين وجمعا يارب، ما كلمتا زول عن المشاكل الحصلت الليلة ما حابة اخوفهم من اول يوم بس للصراحة كلام دينا خوفني شوية بس ان شاء الله ما بحصل الا الكاتبو ربنا.. امي قالت لي الروضة القريبة مننا ح تفتح بعد اسبوعين لو عايزة تسجلي باسل عشان يمشي مع علي.. قلتا ليها كويس والله طوالي اسجلو فيها ومنها تكون قريبة شوية للبيت وما بمشي براهو بس لمن أفضى بمشي.. قالت لي خلي انا بسجل ليهو لانو بكرة ماشة اسجل علي.. قلتا ليها كويس وانا بعد كم يوم بمشي عشان اشوف الروضة بيئتها كيف وكويسة ولا لا، انتي يا أمي المدرسة ما قربت تفتح.. قالت لي اي قربت برضو بتفتح بعد اسبوعين وبكرة برضو بمشي اسجل لي علا وعدن للسنة الجديدة.. قلتا ليها والله حلو شديد.. دخلتا غرفتي لقيت باسل قاعد بلعب بي تلفوني بعد خلص لعب اداني ليهو ومشى لي علي اخوي فتحتا الشبكة لقيت كمية رسائل من دينا كاتبة لي دا كلام شنو القلتي في القروب وما شفتي بعد طلعتي منو حصل شنو وناس كتيرة اتناقشت في الموضوع وما بعيد انو الرسائل تكون وصلت للشلة ديك يا حليلك انتي مجنونة عشان تقولي الكلام دا.. رديت عليها انا ما مجنونة ولا شئ بس ما بحب الحركات دي يعني شنو لو عندهم قروش يشوفو نفسهم وعلى شنو ياريت لو كان القروش دي تعبانين فيها كلها حقت أهلهم وهم بتباهو بيها ما اكتر.. تاني لقيت رقم غريب مرسل لي رديت عليهو  وسألتو انت منو.. بعد مسافة رد علي قال لي مع الايام بتعرفي انا منو بس عايز اعرف انتي مشكلتك مع شلة البرجوازيين شنو.. قلتا ليهو والله انا ما عندي معاهم اي مشكلة بس ناس الجامعة مدنهم أهمية اكتر من البستاهلوها وغير كدا هم شايفين نفسهم بي قروش أهلهم.. قال لي يعني مشكلتك قروشهم ولا عشان شايفين نفسهم.. قلتا ليهو القروش عمرها ما بتقيم زول البقيمو اخلاقو وتصرفاتو واحترامو للناس وثانيا القروش الشايفين بيها نفسهم دي ماف واحد فيهم تعب وشقى عشانها لاقوها جاهزة من أهلهم ما اكتر.. قال لي وانتي العرفك شنو انو ما تعبو فيها.. قلتا ليهو لانو البتعب في حاجة مهما كانت بسيطة ما بفرط فيها ولا بشوف نفسو بيها بس ديل ظاهر عليهم ما تعبانين فيها ولا شوية وظاهر من تصرفاتهم أنو عمرهم ما اشتغلو ولا عارفين الشغل دا يعني شنو، وثانيا انت منو وبتدافع عنهم لي شنو ولا انت زي الجماعة الطيبين محامين دفاع من غير شنطة.. قال لي انا ما بدافع عنهم ولا شئ بس انتي قبل تحكمي عليهم مفروض تتعرفي عليهم.. قلتا ليهو الليلة اتعرفتا على اثنين وكأنو كفاية بالنسبة لي عشان اعرفهم.. قال لي برضو ما ضروري تكوني حكمتي عليهم صح.. قلتا ليهو انا من جبيل بسألك انت منو وما بترد علي.. قال لي انا بنادوني محور الكون.. قلتا ليهو وانا الملكة.. قال لي اتشرفنا.. قلتا ليهو انت بتهظر يعني ولا شنو.. قال لي ابدا انا حقيقي بنادوني بالاسم دا.. قلتا ليهو واسمك الحقيقي منو.. قال لي مع الايام ح تعرفيهو يا الملكة.. قلتا ليهو كويس نعيش ونشوف وقفلتا الشبكة جهزتا ملابسي حقت بكرة ورقدتا انا وباسل نمنا، صحيت تاني يوم اتجهزتا ومشيت الجامعة بعد وصلتا ضربتا لي دينا سألتها انتي وين.. قالت لي انا وصلتا جنب تحالبوابة.. قلتا ليها خلاص ادخلي بتلقيني قدامك.. جاتني قبل تسلم ولا شئ قالت لي انتي نويتي عايزة يطردوك من الجامعة صح ما شفتي بعد رسالتك القروب الناس كلهم بقو يتكلمو وعايزين يعرفو دي منو القالت الكلام دا واسمها منو.. قلتا ليها خليهم يعرفو ساي ما بفرق معاي لاني ما قلتا اي شئ غلط.. قالت لي الله يديني قوة القلب العندك دي.. قلتا ليها مع الايام بتبقى عندك ما تخافي.. الحمد لله اليوم عدة من غير اي مشاكل نهاية اليوم مشيت المطعم وبديت شغل طوالي وزي ما قال نائب المدير الشغل ما متعب شديد وممتع خلصتا شغل حوالي الساعة 9 بعدها طوالي رجعتا البيت.. امي قالت لي انها مشت سجلتا اخواني وباسل وجات ومشو اشترو ليهم كل احتياجات الروضة والمدرسة وخلصو كل شئ فضل النزول بس قلتا ليها والله كويس شديد وبعدها دخلتا غرفتي وطوالي نمتا.. مرو اسبوعين كل شئ كان ماشي فيهم كويس وزي العسل وفي الجامعة بقيت ما بشوف شلة البرجوازيين اصلا والشغل ماشي معاي زي العسل ومافيهو تعب كتير.. وانا والاسمو محور الكون نص اليوم بنكون بنتراسل مع بعض وبقينا شبه أصحاب شديد وعلاقتنا ماشة حلوة مع اني نفسي اعرف محور الكون دا منو بس مصيرو يجي يوم واعرف هو منو.. في يوم بعد ما خلصتا شغل في المطعم وخلاص طالعة تلفوني ضرب لقيت دي امي قلتا ليها بعد شوية جاية ما تخافي.. قالت لي هيومة الحقيني.. قلتا ليها في شنو وصوتك لي ظاهر كانو بتبكي باسل حصلت عليهو حاجة طيب اخواني كويسين في زول حصل ليهو شئ.. قالت لي الحقيني ابوك جمال حصل معاهو حادث..........

______________♥️

في اللحظة التي ظننت فيها انا كل شئ فيها سيتحسن ساء كل شئ💔💔💔
 في امان الله♥️
•••••••••••••••••••••••••••••••••••••••••••••••••••••••••••
 

#رحلة~كفاح 《05》
#بقلم~هيام~عبد_القادر{السمحة♥️}

★ــہہہـہہـ♡ــــــ★ـــــــہہہـہہـــــــ★★ـــــ❥​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏
 ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​‏​​‏​​‏​​‏​​‏​​
قالت لي الحقيني ابوك جمال حصل معاهو حادث....... قلتا ليها كيف ومتين ووين وهسي هو كويس وانتي مشيتي ليهو المستشفى ولا وين.. قالت لي ما عارفه ياداب وصلتا المستشفى وما عارفة هو وضعو كيف كلمتا عمار وجاييني وباقي اخوانك ما كلمتهم عشان ما يخافو عليهو.. قلتا ليها طيب مسافة الطريق وبكون معاك بس انتو في ياتو مستشفى ولحدي ما اجي اسألي هو وين ووضعو كيف.. قالت لي نحنا في مستشفى.... قلتا ليها خلاص هسي بجي عليك، طلعتا من المطعم وانا ما عارفه امشي على وين رأسي شغال يودي ويجيب يارب هو كويس طيب اتأذى كتير ولا لا وهسي حالتو كيف يارب يكون بخير ماشة في الشارع ما انتبهتا في عربية كانت ح تضربني سيد العربية نزل قال لي انتي كويسة ما حصل ليك شئ.. قلتا ليهو انا كويسة بس لازم امشي بسرعة.. قال لي بي حالتك دي ماشة وين.. قلتا ليهو ماشة المستشفى ابوي عمل حادث.. قال لي خلاص تعالي اوصلك.. قلتا ليهو لالا ما بحتاج بمشي براي.. قال لي انتي ما كويسة ما ح تقدري تمشي براك خليني اوصلك.. قلتا ليهو ما عايزة اتعبك معاي.. قال لي ماف اي تعب تعالي اركبي خليني اوصلك سرعة.. ركبتا معاهو العربية وانا من الدموع ما قادرة اشوف زي الناس بابا جمال بالنسبة لي اكتر من زوج ام كان بالنسبه لي الأب وكان بحبني زي بتو ويمكن اكتر وعمرو ما حسسني اني بكون بنت مرتو ما بتو يارب احفظو لينا انا ما بقدر اتحمل خسارتو يارب احفظو.. الولد قال لي ما تبكي أن شاء الله ح يكون كويس وما عندو اي عوجة انتي بس ادعي ليهو وخلي أملك في ربنا كبير.. قلتا ليهو ونعمة بالله هو بالنسبة لي اكتر من أب يارب ما يحصل ليهو شئ.. قال لي بإذن الله ما ح يحصل ليهو شئ، بس ما وريتني في ياتو مستشفى.. قلتا ليهو في مستشفى... قال لي المستشفى دي قريبة هسي ح نصل اطمني أن شاء الله ح تلقيهو بخير.. قلتا ليهو بتمنى يكون بخير، وصلنا المستشفى نزلتا من العربية سريع وطوالي دخلتا المستشفى ضربتا لي امي وصفت لي هم قاعدين وين وصلتا قلتا ليها امي بابا جمال كيف والحادث حصل كيف.. قالت لي هسي كويس واحسن الحمدلله بس حصل كسر في رجلو وكم رصخ في يدينو.. قلتا ليها يعني ماف خطر على حياتو والحادث حصل وين ومتين.. قالت لي لالا ماف اي خطر على حياتو، انتي عارفة طبيعة شغلهم كان بوصل في وصلات كهرباء ووقع من فوق ورجلو انكسرت.. قلتا ليها الحمد لله جات على كدا وماف شئ خطير وقالو بخرجو متين.. قالت لي بكرة ان شاء الله ح يطلع.. قلتا ليها الحمد لله، عمار وينو.. قالت لي مع ابوك جمال جوة.. قلتا ليها خليني ادخل اشوفو دخلتا ليهو جوة شفتو راقد ومعلقين ليهو رجلو المكسورة من شفتو عيوني رقرقو وقربتا ابكي قلتا ليهو بابا جمال انتي كويس حاسي بي شنو.. قال لي يا بتي انا كويس الحمد لله زي ما شايفة قدر.. قلتا ليهو انا الف مرة قلتا ليك انتبه بس انت ما بتسمع كلامي هي كويس الحصل ليك دا لي بتخوفنا عليك كدا.. قال لي يابتي ربنا كاتب يحصل لي كدا والحمدلله جات خفيفه.. قلتا ليهو من الليلة تاني ح تنتبه على نفسك اكتر وما تخوفنا عليك كدا تاني كويس.. قال لي حاضر يا بتي أن شاء الله بنتبه لي نفسي اكتر من اول، وهسي انتي امشي البيت اقعدي مع اخوانك وارتاحي بتكوني تعبانة وبكرة عندك جامعة.. قلتا ليهو لالا ما بمشي اخليك والجامعة ما مشكلة يوم واحد كان ما مشيت ما بحصل شئ واخواني عمار هسي برجع ليهم.. قال لي هيومة اسمعي الكلام وارجعي هدا انا قدامك كويس وما عندي عوجة وبكرة برجع البيت وثانيا عمار ما بعرف يهتم بي اخوانك كويس وجامعتك ح تمشي عادي وإياك تغيبي لانو ماف داعي.. قلتا ليهو بابا جمال بس انا.. قال لي ما بس ولا شئ اسمعي كلامي الله يرضى عليك وارجعي وما تخافي علي هدي امك ح تكون معاي.. قلتا ليهو حاضر ح ارجع بس بكرة من الصباح ح اجي.. قال لي طيب تعالي وهسي ارجعي البيت.. ودعتو وطلعنا انا وعمار عشان نمشي البيت قال لي اها الشغل ماشي معاك كيف.. قلتا ليهو والله ما كعب واتعودتا عليهو.. قال لي صحي انتي جيتي من البيت ولا من شغلك.. قلتا ليهو جيت من الشغل لقيت ودا حلال وصلني، الله انا كيف نسيت اشكرو.. قال لي دا منو الوصلك دا.. قلتا ليهو انا زاتي ما بعرفو لقيتو وانا طالعة ولمن شاف حالتي ما كويسة أصر انو يوصلني وانا نسيت اشكرو.. قال لي بغض النظر عن انو وصلك بس انتي البخليك تركبي مع واحد ما بتعرفي شنو.. قلتا ليهو عمار انا الوقت داك ما كنتا قادرة افكر في أي شئ ولا عارفة امشي وين وهو كتر خيرو وصلني.. قال لي المرة دي بمشيها ليك لكن تاني ما تعيديها وتركبي مع زول ما بتعرفي.. قلتا ليهو حاضر تاني ما بعيدها بس انت مكبر الموضوع كدا لي شنو.. قال لي انتي ما عارفة الحاصل في البلد ولا شنو كم واحدة خطفوها وما معروف ودوها وين والحصل ليها شنو العربات المقفلة دي بقت خطيرة شديد هي المواصلات خطيرة وبخطفو فيها خلي العربات الخاصة وتاني بحزرك ما تركبي عربية مع زول ما بتعرفي.. قلتا ليهو كويس هي اصلا كانت مرة واحدة وما بتنعاد تاني.. رجعنا البيت لقينا اخواني قاعدين قالو لي ابوي كيف هو كويس حصل ليهو شنو.. قلتا ليهم اهدو شوية بابا جمال كويس وح يبقى احسن من اول وبكرة ح يخرجو ويجي البيت حصل ليهو كسر في رجلو وكم رصخ في يدينو بس هسي احسن ما تخافو.. علي قال لي يعني ابوي ما ح يموت.. قلتا ليهو منو القال ليك كدا ابوك كويس وبكرة برجع وما ح يموت وهسي كلكم امشو نومو عشان بكرة عندكم مدرسة من بدري يلا على النوم.. علا قالت لي انتي ما بتكذبي علينا وابوي كويس صح.. قلتا ليها والله ما بكذب عليكم هو كويس واصبري ضربتا لي امي خليتها تديهم بابا جمال اتكلمو معاهو حتى اقتنعو انو هو كويس ومشو نامو، وانا من التعب زاتي نمتا وصحيت من صلاة الفجر نضفتا البيت وجهزتا ليهم ملابسهم والشاي وعملتا ليهم الفطور ولي ناس امي لمن يجو يلقو شئ يأكلوهو حوالي الساعة 7 كدا طلعو على مدرستهم وباسل وعلي مشو الروضة وانا جهزتا نفسي ومشينا انا وعمار لي ناس امي في المستشفى اطمنا عليهم ومشيت على الجامعة لمن وصلتا كانت المحاضرة الأولى بدت اترددتا أدق الباب ادخل ولا لا في النهاية اتشجعتا ودقيت الباب الدكتور جاء قال لي انتي مش عارفة زمن المحاضرة متأخرة لي شنو.. قلتا ليهو اسفة يا دكتور بس ابوي كان في المستشفى ومشيت شفتو عشان كدا اتأخرتا.. قال لي سلامتو واتفضلي بس المرة الجاية ما تعيديها.. قلتا ليهو الله يسلمك، وحاضر أن شاء الله ما ح تتكرر تاني ودخلتا قعدتا بعد زي 10 دقائق كدا جو طالبتين دقو الباب الدكتور طردهم وقفل الباب ورفض يدخل زول بعدو تاني في نهاية المحاضرة قال ليهم تاني انا بعد ادخل القاعة دي ماف طالب بدخل وراي لو كان منو داك والقاعدين كلمو الما دخلو محاضرتي الليلة.. في واحدة من البنات قالت ليهو طيب لي يا دكتور دخلتا الطالبة دي والبعديها ما دخلتهم.. قال ليها انتي طالبة وانا ما ببرر ليك عملتا كدا لي شنو المهم كلامي واضح جدا وطوالي طلع.. دينا جاتني قالت الاخرك شنو وليه ما بتردي على تلفونك من الصباح بضرب ليك.. قلتا ليها تلفوني كان صامت عشان كدا ما رديت واتأخرتا لاني كنتا في المستشفى.. قال لي الحاصل شنو والوداك المستشفى شنو.. قلتا ليها بابا جمال راجل امي امبارح حصل معاهو حادث.. قالت لي كفارة وسلامتو وان شاء الله هسي كويس.. قلتا ليها والله احسن الحمد لله والليلة بخرجو.. قالت لي الحمدلله، صحي انتي الدكتور دخلك كيف وهو الجامعة كلها عارفاهو صعب وماف زول بدخل بعدو.. قلتا ليها عديل كدا كلمتو انو بابا جمال عمل حادث وكنتا معاهو في المستشفى عشان كدا اتأخرتا وهو أتفهم الوضع ودخلني بس.. قالت لي متأكدة كدا بس وماف شئ تاني.. قلتا ليها شئ تاني زي شنو يعني.. قالت لي احتمال يكون معجب بيك.. قلتا ليها انتي ما نصيحة ولا شنو يعجب بي لي شنو بطلي تألفي سيناريوهات من رأسك وخلينا نطلع.. قالت لي انتي صحي كل يوم بعد الجامعة بتطلعي مستعجلة لي شنو.. قلتا ليها بطلع سريع عشان الحق الشغل.. قالت لي شغل شنو.. قلتا ليها بتعرفي المطعم القريب من الجامعة داك انا شغالة هناك.. قالت لي والبخليك تشتغلي شنو.. قلتا ليها حابة اعتمد على نفسي وما احتاج لي زول.. قالت لي والله احسن ليك تكسبي قروش ومنو بتأخدي خبرة لو عايزة تفتحي مطعم لي قدام.. قلتا ليها والله ما فكرتا بس ما كعب نكتسب خبرة بستفيد منها.. قالت لي حظك يا ريتني زيك بس انا للأسف اهلي ما بخلوني اشتغل نهائي لانو موفرين لي اي شئ انا بطلبو.. قلتا ليها الشغل ما الا زول يكون محتاج ممكن زول يشتغل عشان شغفو بس.. قالت لي اهلي ما بفهمو شئ زي دا وتعبتا من المحاولة معاهم مقتنعين اني اشتغل بس بعد اخلص جامعتي.. قلتا ليها ما كعب انتظري تشيلي شهادتك واشتغلي بيها.. قالت لي الا كدا، صحي عندي ليك شمار خطير.. قلتا ليها انتي وشماراتك الما بتخلص اها قولي.. قالت لي شلة البرجوازيين ح ينزلو بعد اسبوع.. قلتا ليها اها واعمل ليهم شنو يعني.. قالت لي مالك باردة كدا.. قلتا ليها ما باردة بس كلهم على بعضهم ما بهموني ينزلو ولا لا.. قالت لي انا غايتو منتظرة ينزلو عشان اشوف الاولاد المزز حقنهم.. قلتا ليها دا همك كلو انتي نازلة تقري ولا تنبرشي في الاولاد.. قالت لي الإثنين سوى المشكلة وين.. قلتا ليها صاحب بالين كذاب اثبتي على واحد.. قالت لي الاولاد المزز اكيد.. قلتا ليها فاشلة ما عندك موضوع مركزة معاهم.. قالت لي اركز في شنو وانا شايفة مزز في كل مكان ما بقدر.. قلتا ليها يوم بتموتي بي سبب المزز البتقولي عليهم ديل.. قالت لي ما مشكلة عشانهم كلو بهون.. قلتا ليها والله انتي مجنونة، ارح خلينا نمشي نفطر قعدنا في الكافتيريا بنأكل في بنات قعدو يعاينو لينا ويتوسوسو بيناتهم ما عارفة بقولو في شنو حاولتا اتجاهلهم لانو الفيني مكفيني ما فاضيه انشغل بيهم بعد خلصنا رجعنا القاعة المحاضرة الثانية بدت اخدنها وبعدها كان في محاضرة ثانية وخلصنا خلاص.. ضربتا لي ناس امي اطمنتا عليهم وأنهم رجعو البيت وقفلتا مشيت الشغل كنتا عايزة اطلب إذن بس انا ياداب بديت شغل من اسبوعين وما ظريف اخد إذن طوالي فاضطريت اني اكمل الدوام عادي، رجعتا البيت لقيت عماتي اخوات بابا جمال الإثنين قاعدين عمتو جليلة وعمتو إجلال سلمتا عليهم وقعدتا معاهم.. عمتو جليلة قالت لي هيومة كنتي وين لي هسي.. قلتا ليها عمتو والله كنتا في الشغل.. قالت لي شغل شنو كمان.. قلتا ليها بعد الجامعة قاعدة امشي اشتغل.. قالت لي يعني انتي محتاجة لي شغل.. عمتو إجلال قالت لي اخونا دا مقصر معاك في شئ لو مقصر كلمينا.. قلتا ليها والله يا عمتو بابا جمال ما مقصر معاي في أي شئ مكفي وموفي.. قالو لي طيب شغالة لي شنو.. قلتا ليهم انا شغالة عشان عايزة اعتمد على نفسي واكون مسؤولة عن نفسي وولدي.. عمتو إجلال قالت لي والله احسن ليك وفكرتي بس كيف مع الجامعة والشغل الإثنين.. قلتا ليها والله هي متعبة شوية بس بحاول أوافق بينهم الإثنين.. عمتو جليلة قالت لي ربنا يوفقك ويعينك يابتي.. قلتا ليها اميين يارب، وهسي بستأذن منكم ماشة ارتاح شوية.. قالو لي اخدي راحتك.. مشيت استحميت وصليت واكلتا ناديت باسل قعدتا معاهم قلتا ليهو بسولي حبيب ماما اعفي لي الايام الفاتت ما كنتا فاضيه ليك.. قال لي ما مشكلة يا ماما انا عارفك مشغولة وبعدين انتي اليوم كلو بتتصلي على حبوبة وبتسأليها مني وبتتكلمي معاي.. قلتا ليهو برضو ما زي زمان لمن نكون قاعدين وبنحكي لي بعض الحصل اها ما وريتني الروضة لقيتها سمحة ولقيت أصحاب هناك.. قال لي الروضة سمحة وعندي أصحاب بس في اولاد هناك بضايقوني وبقولو لي انت ما عندك اب.. قلتا ليهو ولي بقولو ليك كدا.. قال لي عشان بابا ما عايش معانا وهو بعيد وما بجي يشوفني.. قلتا ليهو بسولي حبيبي ما تسمع كلامهم بابا الأيام دي مشغول شوية عشان كدا ما جاء يشوفك، وثانيا اولاد زي ديل ما تقعد معاهم ولا تتكلم وما تسمع كلامهم بابا بحبك وقريب ح يجي يشوفك وهو ما عايش مع لي ظروف وانت عارفها عشان كدا ما تزعل.. قال لي ماما انا ما زعلان بس كلامهم بضايقني وبعملو كدا قاصدين.. قلتا ليهو انت حاول اتجاهلهم وما تسمع كلامهم وخليك مع علي وباقي اصحابك، اها ما وريتني صحبتك بنت الجيران وين.. قال لي قاعدة وبتقرأ معانا في الروضة وكل يوم بنمشي ونجي سوى.. قلتا ليهو اسمها منو.. قال لي جوجو.. قلتا ليهو جوجو اسمها ولا اسم الدلع.. قال لي اسمها جمانة وانا بدلعها جوجو.. قلتا ليهو خلاص بعد بكرة اعزمها اتعرف عليها.. قال لي حاضر بعزمها وهسي انتي نومي وارتاحي وبكرة بنكمل كلامنا.. قلتا ليهو انت زاتك تعال نوم.. قال لي انا بجي بعد شوية انتي نومي.. من التعب طوالي نمتا صحيت تاني يوم صبحتا على ناس امي وعمتو ومشيت الجامعة قاعدة في القاعة منتظرة دينا تجي شايفة نص الدفعة بتعاين لي وبتكلمو ركبتا سماعتي وشغلتا قرأن بصوت حمزة بوديب وبستمع ليهو جات دينا طلعتا سماعتي.. قالت لي سرحانة من جبيل وين لمن ما شفتيني.. قلتا ليها كنتا خاتة سماعتي وما انتبهتا ليك، وانتي ناس الدفعة ديل لي بعاينو لي وبتكلمو.. قالت لي انتي ما شفتي قروب الدفعة حاصل فيهو شنو.. قلتا ليها والله ما فتحتا الشبكة اليومين دي مشغولة.. قالت لي كلهم بتكلمو عنك وعن دكتور إدريس.. قلتا ليها يتكلمو عننا لي شنو.. قالت لي لانو امبارح دكتور إدريس لأول مرة يدخل طالبة بعدو.. قلتا ليها عليك الله اقفلي الموضوع ما بهمني وخليهم يقولو العايزنو انا طالما متأكدة انو ماف شئ بينا.. قالت لي برودك دا بقتلني.. قلتا ليها اعمل ليهم شنو خليهم يتكلمو وبعد يومين بسكتو براهم وانا لو ركزتا معاهم بكون قيمتهم ما اكتر.. قالت لي برضو وجهة نظر وانا من امبارح بحاول اشرح ليهم انو ماف شئ بينكم بس ما راضيين يقتنعو.. قلتا ليها ما تتعبي معاهم خليهم يقولو ويسكتو بس.. الدكتورة جات اخدنا المحاضرة وطلعنا كان باقي اليوم ما عندنا محاضرات مشيت المكتبة قعدتا اراجع في المحاضرات الادونا ليها واحاول أنجز منها حبة وخليت دينا قالت راجعة البيت، قعدتا قريت كم محاضرة وبعدها طلعتا مشيت المطعم ولبستا ملابس الشغل مشيت اخد طلب زبون جاء قدمتها ليهو الموية وقلتا ليهو يا استاذ بتحب تطلب شنو، لمن رفعتا رأسي وعاينتا ليهو لقيتو دا نفس الشاب الوصلني المستشفى.. قال لي الوالد بقى كيف.. قلتا ليهو احسن الحمدلله وشكرا ليك لأنك وصلتني اليوم داك نسيت اشكرك.. قال لي ماف داعي للشكر عملتا الواجب بس.. قلتا ليهو تاني برجع بشكرك، وطلبك شنو.. قال لي نسكافيه معاهو كوكيز.. قلتا ليهو حاضر ثواني وبجيك، مشيت جبتا ليهو طلبو وختيتو وماشة ما عارفة الموية جات من وين انزلقتا قربتا أقع قام الولد ثبتني.. سمعتا صوت زول من وراي قال لي انتي جيتي تشتغلي ولا تقلي أدبك مع الرجال وتركبي معاهم عربات...........
 في امان الله♥️
•••••••••••••••••••••••••••••••••••••••••••••••••••••••••••
 

#رحلة~كفاح 《06》
#بقلم~هيام~عبد_القادر{السمحة♥️}

★ــہہہـہہـ♡ــــــ★ـــــــہہہـہہـــــــ★★ـــــ❥​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏
 ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​‏​​‏​​‏​​‏​​‏​​
سمعتا صوت زول من وراي قال لي انتي جيتي تشتغلي ولا تقلي أدبك مع الرجال وتركبي معاهم عربات....... قبلتا وراي لقيتو دا جلال قلتا ليهو انت الجابك هنا شنو اطلع سريع.. قال لي جيت عشان اشوف انتي بتعملي شنو.. قلتا ليهو انت مالك ومالي اعمل العايزاهو وانت قبل تحاسبني حاسب نفسك والنفسو وتفكيرو وسخانين بفكر كل الناس زيو وبعدين على أي أساس انت جاي هناك وانت ولدك ما بتضرب تسأل عنو وتجي تشوفو اختشي على دمك ياخ انت فشلتا تكون زوج على الأقل ما تفشل في انك تكون اب مع انك ما بتستاهل.. قال لي انتي ما ليك حق تحاسبيني بعمل في شنو في الاول انت انتبهي لي نفسك وتصرفاتك وكمان دا منو البقيتي تمشي معاهو دا.. الولد قال ليهو انتبه لي كلامك وثانيا انت بتلمح لي شنو.. جلال قال ليهو البلمح ليهو واضح في شنو بينك وبينها.. الولد قال ليهو احترم نفسك وأنت بتقول في شنو نحنا اصلا ما بنعرف بعض عشان يكون في شئ بيناتنا.. قلتا ليهو لو سمحتا ضروري توضح ليهو اي شئ.. جلال قال لي يوضح لي وهو اي شئ بينكم واضح.. جاء الراجل الشغلني قال لي الولد يا شهاب في مشكلة ولا شنو.. شهاب قال ليهو من متين يا يونس بتدخل أشكال زي دي المطعم.. يونس قال ليهو المشكلة شنو وهسي بنحلها.. شهاب قال ليهو جاي بكل وقاحة بقل ادبو علي وعلى الموظفة دي وانت لو ما قادر تحسم الفوضى دي احسن لي امشي.. يونس قال ليهو لالا ما تمشي المشكلة دي هسي بتتحلى، نادى الحرس وطلعو جلال برة.. قلتا ليهم انا بعتزر منكم شديد على الحصل وان شاء الله ما ح يتكرر تاني انا خجلانة منكم شديد.. شهاب قال لي ماف شئ تخجلي منو انتي ما عملتي شئ، بس دا منو.. قلتا ليهو دا طليقي.. قال لي وطليقك بدخل فيك لي شنو.. قلتا ليهو انا والله ما عارفه وما عارفة اصلا عرف انا هنا كيف وجاء، وبعتزر يا استاذ يونس أن شاء الله ما ح يتكرر تصرف زي دا تاني.. قال لي حصل خير المهم هسي ارجعي لي شغلك.. قلتا ليهو حاضر ومشيت يا الله جلال هسي الجابو شنو انا ما صدقتا خلصتا منو ومن مشاكلو هسي جايي يلحقني ويعمل لي مشاكل في مكان شغلي ويخرب علي هسي هو العرفو انا هنا شنو يارب ما يرجع يجي تاني انا ما صدقتا متين انبسط الا جاء هو عشان يخرب لي فرحتي بس هو كيف عرف انا شغالة هنا، وانا واقفة جات البنت الشغالة معاي اسمها سامية قالت لي انتي بتعرفي شهاب من وين.. قلتا ليها ما بعرفو ولا شئ وانتي بتسألي لي شنو.. قالت لي انا عارفة أشكال البنات الزيك ديل لكن احسن ليك تبعدي من شهاب لانو شهاب لي انا وبس.. قلتا ليها انتي مريضة ولا شئ انا مالي ومال شهاب وثانيا انا الفيني مكفيني ما فاضية لي حركاتك الفارغة دي وهداك شهاب لو عايزاهو امشي ليهو المانعك منو مع انو ما اظن يعاين لي واحدة زيك بس جربي حظك ما بتخسري شئ ومشيت خليتها.. معانا واحدة تانية اسمها سميرة قالت لي اديتها ضربة قاضية لكن.. قلتا ليها دا البتستاهلو اصلا انا ما فاضيه ليها ولا لي حركات المراهقين حقتها دي واصلة معاي للنهاية وفضل لي شوية وانفجر.. قالت لي اهدي العصبية ما بتفيدك في شئ غير بتعقد المواضيع زيادة اطلعي برة اخدي نفس وريحي رأسك وتعالي داخلة وانا بغطي عليك لحدي ما تجي.. قلتا ليها شكرا ليك كتير.. قالت لي ولو العفو ما بيناتنا.. طلعتا برة حاولتا بقدر الإمكان امسك نفسي عشان ما ابكي بس دموعي كالعادة خزلتني ونزلت يا الله اديني الصبر والقوة من عندك يارب اللهم اني مسني الضر وانت ارحم الراحمين يارب الطف بي يارب رفقاً بقلبي.. شهاب جاء مد لي منديل قال لي امسحي دموعك الدنيا ما بتستاهل كل دا خليك قوية وواجهي كل مشكلة وانا صامدة وصابرة ومتوكلة على ربنا لانو ربنا سبحانه وتعالى ما بخت شخص في اختبار أو مصيبة الا وهو عالم انو بيقدر يتخطاها ويطلع منها أقوى من اول وربنا دائما ببتلي الناس البحبهم انتي عايزة شنو اكتر من انو ربنا يحبك ويبتليك عشان يعرف مقدار صبرك وتحملك لي المصائب وما بعد الحزن الا الفرح وكلما ضاقت ستفرج بإذن الله، وانتي كان فضلتي تبكي على أي مشكلة بتواجهك ح تتعبي وتكتئبي على الفاضي ونفسك دي ليها حق عليك عشان كدا نصيحة ليك واعملي بيها لي قدام خليك دائما شامخة وصامدة قدام اي مشكلة واي زول ومهما كنتي ضعيفة ومكسورة من جوة ما تبيني لي زول انك مكسورة لانو بعض الناس بستغلو حزنك وكسرك دا ضدك عشان كدا قدام اي زول ومهما حصل وسمعتي كلام واتهامات واجهيها بالبرود والصمود حتى لو كنتي مقهورة من جوة بيني ليهم انك قوية وما فارق معاك صدقيني كدا ح توجعيهم ويحسو نفسهم صغار شديد وانو كلامهم عنك غلط وما بأثر فيك، الحياة مليئة بالاختبارات وعشان تجتازي اي اختبار لازم تتعلمي تصبري وتتحملي وتضحكي حتى وانتي في عز وجعك وتعدي وربنا بجزيك على صبرك وبعوضك عن الخسرتيهو بالاحسن منو انتي ما عليك إلا تحمديهو وتشكريهو في الفرح والحزن وفي عز المصائب وبعد الخلاص منها اشكريهو على الخير والشر وفي أي وقت وشوفي ح يرضيك ويجازيك كيف واخر شئ دائما خلي ثقتك فيهو كبيرة لانو رب الخير لا يأتي إلا بالخير ووراء كل شر في شعاع بتاع خير نحنا ما بنشوفو بس ربنا عالم بيهو وخليها عادة عندك بعد كل صلاة تسجدي سجدة شكر وتقولي اللهم لك الحمد والشكر على كل الماضي والحاضر، وهسي ارجعي على شغلك.. طوالي مشى في الوقت دا اكتر حاجة انا كنتا محتاجة اسمعها كلامو دا كلام يقويني ويرجع لي ثقتي في نفسي بعد كلامو دا حسيت بي إيجابية وكأني ما كنتا هسي مضايقة رجعتا شغلي وانا مبسوطة ومتفائلة ومليانة نشاط وحيوية على غير العادة بعد خلصتا دوامي انتبهتا لي تلفوني لقيت مكالمات من محور الكون لي كم يوم ما دخلتا الواتس اكيد بكون ضرب عشان يعرف مختفية مالي فتحتا الشبكة نزلتا كمية كبيرة من الرسائل اول دخلتا قروب الدفعة وغادرتو طوالي وتاني لقيت حوالي 10 رسائل من محور الكون وينك ومختفية لي شنو وحاصل عليك شنو وانتي كويسة طمنيني عليك وبضرب ليك لي ما بتردي علي.. رسلتا ليهو اسفة ما قصدي اختفي حصل غصبا عني وحكيت ليهو الحصل لي في اليومين الفاتو وانو ما رديت على مكالماتو لانو تلفوني ما كان معاي ما كان داخل عشان كدا ما شاف الرسائل ورد على طوالي قفلتا الشبكة وطلعتا مشيت البيت لمن دخلتا لقيت ابوي وجلال قاعدين عرفتا جلال ح يكون مشى كلمو سلمتا على ابوي وعلى بابا جمال وامي وعمار وعامر وجلال كانو ما قاعد ولا عبرتو اصلا كنتا ماشة غرفتي.. ابوي قال لي تعالي عايز اتكلم معاك في موضوع.. قلتا ليهو اتفضل.. قال لي دا شنو الكلام السمعتو دا.. قلتا ليهو خير ان شاء الله سمعتا شنو.. قال لي بقيتي تركبي عربات مع رجال وتخليهم.. قلتا ليهو مافي داعي تكمل كلامك لانو الوصل ليك الكلام وصلو ليك غلط اولا انا ما ركبتا عربات مع رجال كل القصة انو لمن امي كلمتني انو بابا جمال عمل حادث خفتا عليهو ولقيت ولد حلال وصلني المستشفى وبس وبالنسبة للقصة الثانية الما عارفة الأستاذ وصلها ليك كيف بس كنتا شغالة وقدمتا طلب للزبون وماشة والأرض كان في موية انزلقتا وكتر خيرو مسكني وما وقعتا دي كل القصة وهسي لو خلصتا اسألتك بقدر امشي لاني تعبانة وعايزة ارتاح.. امي قالت لي امشي ارتاحي خلاص.. دخلتا غرفتي كان نفسي بس يكون جاء عشان يطمن علي ويسألني كيفك وناقصك شنو وانتي مبسوطة بس للأسف في كل مرة بخزلني وبكسر توقعاتي ما عارفه انا لي بتأمل مع اني عارفة انو ح يخيب زي كل مرة ليه يا قلبي انا رافض تقتنع انو هو ما ح يتغير ولا ح يجي يوم ويحبني ويعاملني على اني بتو ويهتم بي كنتا ح ابكي بس لمن اتذكرتا كلام شهاب معاي قررتا اني ابقى قوية وما ازعل واركز على نص الكباية المليان وغير كدا عندي امي وبابا جمال واخواني وولدي ديل كلهم بحبوني وشديد كمان وما لازم اركز مع الما بحبوني لاني ح اضايق نفسي ما اكتر وما ضروري الناس كلها تحبني كفاية جدا شوية الناس البحبوني وبهتمو لي أمري.. جاني باسل قال لي شوفي بابا جاب لي اللعبة العايزها.. قلتا ليهو حلو مش قلتا ليك بابا مشغول لمن يفضى بجي شفتا زعلتا على الفاضي.. قال لي تاني ما ح ازعل وبابا وعدني كل أسبوع ح يجي يشوفني.. قلتا ليهو كويس ،اها بكرة جوجو ح تجي.. قال لي اي كلمتها وقالت جاية.. قلتا ليهو كويس يلا امشي العب مع علي شوية انا عايزة ارتاح حبة.. قال لي حاضر يا ماما وباسني في خدي وطلع.. رقدتا فتحتا الشبكة لقيت محور الكون مرسل لي قعدتا اتونستا معاهو مسافة وانا ماسكة التلفون ما حسيت على نفسي نمتا متين، صحيت بي لمستا يدين باسل على وشي قال لي ماما قومي صلي الزمن اتأخر.. قلتا ليهو الساعة كم.. قال لي الساعة 9.. قمتا من السرير مخلوعة قلتا وب علي اتأخرتا على الجامعة.. باسل قال لي ماما اهدي الليلة يوم الجمعة يعني ما عندك جامعة.. بعد كلامو حتى ياداب ارتحتا شوية قمتا سريع صليت وطلعتا شربتا الشاي وصبحتا على ناس امي جيت شلتا تلفوني لقيت الشبكة لسه فاتحة كان في رسائل قفلتا الشبكة وختيت التلفون في الشاحن وطلعتا عملتا الفطور وكويت لي اخواني جلاليب الجمعة ودخلتا غرفتي فتحتا الشيتات وبحاول اقرأ عشان اقدر الحق وانجز حبة منهم لانو باقي الأسبوع بكون شغالة وما بقدر اقرأ عديل وانا لازم أوافق بين الشغل والقراية وما أقصر في ولا واحد منهم قعدتا اقرأ لحدي بعد الصلاة قمتا صليت ومشيت قعدتا مع ناس امي وعملتا ليهو القهوة واتونستا معاهم وجات جمانة صحبت باسل البنوتة طلعت حلاتها وظريفة شديد خليتهم بلعبو ودخلتا اكمل باقي قرايتي لحدي بعد العصر صليت واتجهزتا مشيت الشغل وعلى غير العادة الليلة المطعم كان مليان شديد يمكن عشان الليلة الجمعة والناس كلها حابة تطلع وتغير جو ومن بين الزباين كان في راجل ومرتو قاعدين وظاهر عليها حامل لانو كرشتها كانت كبيرة كانو حلوين شديد مشيت على الطاولة القاعدين فيها قلتا ليهم اتفضلو حابين تطلبو شنو.. راجلها قال لي جيبي لي نسكافيه وللمدام ميلك اتشيك معاهو قطعة كيك بالفراولة لأنها بتحبو.. قلتا ليهم حاضر ثواني بس وبجهز طلبكم، مشيت جبتو ليهم وجيت ختيتو ليهم ومشيت وانا ما بعيد براقبهم وشايفاهو بأكلها الكيك كيف والحب الشفتو في عيونو ليها خلاني لي لحظة اتمنى اكون في مكانها وألقى زول يحبني بالطريقة دي ويعرف انا بحب شنو وعايزة شنو من غير ما اتكلم منظرهم كان حلو شديد شلتا تلفوني من غير ما احس وصورتهم عشان كل ما اشوفهم اتأكد انو لسه في ناس بحبو بصدق ومن جوة قلبهم وبحافظو على الشخص البحبوهو وبحاولو يسعدوهو بي كل الطرق.. الحب♥ حلو بس لمن يكون مع الشخص الصح الشخص البقدر وبحترم مشاعرك وما بحاول يأذيك بالكلام ولا الأفعال لانو بكون خايف على مشاعرك وبراعي ليها دا هو الحب الحقيقي♥️♥️

________♥️_______

 في مكان اخر:-

انت يا ابوي لي بتعمل كدا انا كم مرة قلتا ليك اني ما عايز مساعدتك انا طلعتا من الشركة واسست شركتي الخاصة عشان عايز استقل بي شغلي الخاص وعايز أبدأ من الصفر واعتمد على نفسي واكون لي اسم وسمعة خاصة بي بعيد عن شغل العائلة انا ما عايز الناس يقولو وصل لي المكانة دي بي سبب سلطة ابوهو وللسبب دا انا خليت كل شئ وبديت من البداية بس انت ما ناوي تخليني اعتمد على نفسي انا ما طلبتا منك مساعدة وحبيت ابدأ براي وانت لسه مصر تدخل وتساعدني.. قال ليهو يا ولدي انا عملتا كدا عشان مصلحتك وعايز اساعدك ما اكتر.. قال ليهو يا ابوي انا لو كنتا محتاج مساعدتك كان طلبتا وانا لو عايز انك تساعدني ما كان طلعتا من الشركة واسستا شركتي الخاصة عشان كدا لو سمحتا تاني ما تدخل في شغلي وما تساعدني ولا بأي طريقة وخليني اعتمد على نفسي وابني اسم وسمعة من تعبي وجهدي الخاص من دون مساعدة منك أو من أي زول تاني وعشان كدا انا ح أرفض المشروع الاديتني ليهو وح القى مشروع تاني واحصل عليهو بي جهدي ومن دون مساعدة منك أو من غيرك وطوالي طلع دخل غرفتو.. جاء اخوهو داخل قال ليهو حاول تهدأ شوية وما تعصب انت عارف ابوي عمل كدا عشان يساعدك.. قال ليهو ماهي دي المشكلة انا ما عايزو يساعدني ما عايزو يعمل اي شئ عشاني طلبي الوحيد انو يخليني اجرب براي اقع واقوم واغلط واتعلم من غلطي واخد خبرة وانمي بيها شغلي انا عايز احاول براي من دون ما يساعدني انا لو كنتا عايزو يساعدني كان اشتغلتا في شركتو وما تعبتا نفسي وبديت من الصفر واسستا شركتي الخاصة انا عايز لمن اشوف نفسي في المراية احس اني فخور بيها ولو مهما كان المكان الوصلتا ليهو عايز اتأكد اني وصلتا بي جهدي وتعبي ما بي مساعدة ابوي بس ما عارف ليه ابوي ما عايز يقتنع ويخليني أجرب براي.. قال ليهو ابوي من خوفو عليك وعلى مصلحتك عمل كدا فكر انك ح تنبسط لمن تأخد المشروع دا.. قال ليهو يا شادي انا كنتا ح انبسط لو اخدتو بي حقي وجهدي من غير اي تدخل من ابوي ولو سمحتا فهم ابوي انو تاني ما يدخل في شغلي ويبقى بعيد عنو ويخليني ابني مستقبلي بعيد عنو.. قال ليهو طيب يا شهاب انا ح احاول اتكلم مع ابوي عشانك وان شاء الله يقتنع بي كلامي.. قال ليهو لو ما اقتنع خلي امي تتكلم معاهو المهم أقنعو بي أي طريقة تكون انو ما يتدخل في شغلي.. يونس جاء داخل قال ليهو انا كل ما اجيك الا القاك صاري وشك في شنو.. شادي قال ليهم اخدو راحتكم اصلا انتو عذابة ساي وما عندكم مسؤولية.. يونس قال ليهو كويس بجي يوم ونعرس نحنا زاتنا ونشوف تاني بتغيظ منو.. شادي قال ليهم نشوف متين ح يجي اليوم دا مع انو ما اظن يجي قريب وطلع.. يونس قال ليهو أن شاء الله خير في شنو مضايقك تاني.. شهاب قال ليهو ابوي مصر في كل مرة يتدخل في شغلي ويساعدني.. يونس قال ليهو انت مشكلتك شنو وبعدين انت مضايقاك مساعدتو لي شنو.. قال ليهو حتى انت يا يونس ما عايز تفهمني.. قال ليهو انا فاهمك انت عارف من واحد بتمنى الانت بترفضو وكم واحد بتمنى يكون في مكانك وابوهو يساعدو وانت رفضتا كل شئ واتخليت عنو.. قلتا ليهو لاني ما حابي مساعدة من ابوي وخليهم العايزين يكونو مكاني بي راحتهم بس انا لا انت ما عارف الموضوع دا مضايقني قدر شنو وللسبب انا ما كلمتهم بي موضوع شراكتنا في المطعم.. يونس قال ليهو عليك الله ما تذكرني امك تقول حاسة انو ما انا براي فتحتا المطعم وكل مرة بتضغط علي عشان اوريها.. شهاب قال ليهو ما تكون قلتا ليها شئ لانو لو عرفو ح يدخلو برضو وابوي تاني اجتماعاتو المهمة ح يقرر يعملها في المطعم عشان يزيد ارباحو هو هسي ما مقصر وكل فترة بجي وبعملها هناك.. قال ليهو ما تخاف ماف زول عارف، وهسي خلينا نطلع وتغير جو شوية.. قال ليهو دا اكتر شئ انا محتاج ليهو حاليا خلينا نمشي المطعم وانفرد في مكاني المفضل واكيد ح اروق.. طلع مشى المطعم ودخل المطبخ مكانو المفضل وبدأ يطبخ وهو مبسوط واخر رواق.....

_______________♥️

ما أجمل أن يكون للشخص مساحته الخاصة ويفعل فيها اشياءهو المفضلة بكل حب♥️♥️
 في امان الله♥️
•••••••••••••••••••••••••••••••••••••••••••••••••••••••••••
 

#رحلة~كفاح 《07》
#بقلم~هيام~عبد_القادر{السمحة♥️}

★ــہہہـہہـ♡ــــــ★ـــــــہہہـہہـــــــ★★ـــــ❥​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏
 ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​‏​​‏​​‏​​‏​​‏​​
 من جانبي:-

صحيت من الصباح على غير العادة وانا مبسوطة وحاسة انو في شئ حلو ح يحصل ما عارفه هو شنو بس في احساس من جواي بقول لي انو يومي ح يكون حلو شديد لبستا احلى فستان عندي واكتر واحد بحبو وعملتا مكياج خفيف وطلعتا مشيت الجامعة.. دينا قالت لي الليلة النفسيات عالية لمن عاملة ميكب اب ومتظبطة.. قلتا ليها والله ماف اي سبب بس الليلة صحيت مبسوطة.. قالت لي الله يديم على الانبساط يارب.. قلتا ليها اميين وجمعا يارب.. قالت لي صحي يوم الا تمشي معاي بيتنا امي من كترت ما حكيت ليها عنك قالت حابة تتعرف عليك.. قلتا ليها أن شاء الله لو لقيت يوم اكون فاضيه فيهو بجيكم.. قالت لي في انتظارك وصحي انتي ما حكيتي لي شئ كتير عنك والولد الخاتة صورتو خلفية وبروفايل على الواتس دا منو.. قلتا ليها دا ولدي باسل.. قالت لي انتي متزوجة يعني.. قلتا ليها كنتا متزوجة واطلقتا.. قالت لي اطلقتي لي شنو.. قلتا ليها لي أسباب كتيرة ما حابة اتذكرها.. قالت لي على راحتك المهم تكوني مبسوطة والماضي انسيهو وركزي في الجاي وبس.. قلتا ليها ودا العملتو عشان كدا قررتا انزل جامعة وأكمل حلمي الاتخليت عنو زمان.. قالت لي انتي كل مرة بتثبتي لي قدر شنو انتي قوية هي واحدة تانية لو كانت مكانك بعد الطلاق كان قعدت في البيت تربي ولدها واتخلت عن كل شئ بس انتي رفضتي الاستسلام وقررتي تلحقي أحلامك وطموحاتك انا فخورة بيك شديد وفخورة اني بعرفك وصحبتك.. قلتا ليها كلامك دا عندي بالدنيا والله.. قالت لي انا ما قلتا الا الحقيقة وبس ما اكتر.. قلتا ليها هسي خلينا نمشي القاعة قبل ما المحاضرة تبدأ والدكتور يطردنا.. قالت لي الليلة في محاضرة واحدة والساعة 10 والباقي اليوم مفتوح.. قلتا ليها مفتوح كيف وليه باقي المحاضرات لغوها.. قالت لي انتي طلعتي من قروب الدفعة عشان كدا ما عارفة الحاصل الليلة في حفل استقبال للطلاب الجدد يعني نحنا عشان كدا لغو المحاضرات.. قلتا ليها ايواا كويس.. قالت لي انا كنتا قايلاك متظبطة عشان الحفلة.. قلتا ليها لالا قلتا ليك نفسيات بس وما كنتا عارفة في حفلة.. قالت لي هسي عرفتي بالمرة الليلة نستمتع ونغير جو ونشوف اولاد مزز.. قلتا ليها انتي همك دائما بس في الاولاد المزز ما بتقدري تفكري في شئ تاني.. قالت لي ما بقدر سماحتهم مأخدة عقلي ومكسراني من جوة ومخلياني راقدة رز.. قلتا ليها انتي لو ما بطلتي انبراش في الاولاد يوم بتقعي ليك في مصيبة.. قالت لي كل مصيبة من وراهم بتهون عادي.. قلتا ليها والله انتي مجنونة، خلينا من دا كلو ارح نمشي المكتبة نقرأ شوية لحدي ما المحاضرة تبدأ.. قالت لي انتي مالك جنك قراية كدا.. قلتا ليها ما جني قراية لكن كل ما القى زمن فاضي بحاول أنجز لانو اليوم كلو في الجامعة وبعدو الشغل ما قاعدة القى زمن اقرأ فيهو عديل.. قالت لي خلاص تمام خلينا نمشي اصلا انا ما عارفة اي شئ على الأقل اعرف.. مشينا المكتبة فتحنا مادة الشبكات وبقينا نقرأ فيها لحدي ما جاء زمن المحاضرة اخدناها وطلعنا تلفوني ضرب وكان رقم غريب في الاول ما رديت لمن اتصل تاني رديت جاني صوت ولد بقول لي السلام عليكم.. قلتا ليهو وعليكم السلام.. قال لي معاي الآنسة هيام عبد القادر.. قلتا ليهو اي معاك بس انت منو.. قال لي انا عامل توصيل في هدية مرسلنها ليك وانا موصلها انا واقفة برة جامعتك ممكن تطلعي تستلميها.. قلتا ليهو هدية لي انا من منو.. قال لي ما عارف جاية من مجهول.. قلتا ليهو انت متأكد انو لي انا.. قال لي مش انتي الآنسة هيام بتقري في جامعة التقانة قسم تقنية المعلومات.. قلتا ليهو اي دي انا.. قال لي حلو انا في العنوان الصحيح ممكن تطلعي وتستلميها.. قلتا ليهو حاضر ثواني وبجي.. دينا قالت لي دا منو وهدية شنو.. قلتا ليها انا زاتي ما عارفة قال لي في هدية وصلتك من مجهول.. قالت لي خلاص خلينا نمشي نشوفها انا الشمار حرقني.. طلعنا برة ضربتا لي بتاع التوصيل وصف لي هو وين مشيت استلمتا منو بوكس كبير ومزخرف من برة بي طريقة رهيبة شديد، شكرتا بتاع التوصيل ومشينا الاستراحة.. دينا قالت لي بكون فيهو شنو وجايي من منو.. قلتا ليها انا زاتي ما عارفة خلينا نفتحو ونشوف فيهو شنو، لمن فتحتو في الأول كان في رسالة مكتوبة في ورقة ملونة مكتوب فيها:-  جميله انتي كضوء القمر 🖤 💥 ك الأعمى الذي دعى ربه أن يرى وراي 🖤 💥 ك فرحه عقيم بمولوده ♥️ 💫 ك شفاء طفل صغير 🧒 ك دعوه يتيم 💛 جميله انتي ك موسيقى الرومان 💝💫 جميله انتي ك سماء صافيه ❤️💫 جميله انتي وكأن سحر الشروق بين عيني 😍 جميله انتي ك طفل يعزف سمفونيه غرام 💛💫 جميله انتي ك نون الوطن.. ك حاء الروح ❤️💫 جميله انتي ك فاد الفؤاد 💙💙 جميله انتي ك ميم الإيمان... جميله انتي ك ام تسجد باكيه على ابنها الشهيد 🖤💫 جميله انتي ك شهيد ردد الله أكبر قبل موته 💙💫 جميله انتي ك فرحه العالمين يوم يحل السلام على الأرض 😍💫 جميله انتي وكأنما كلمه الجمال خلقت ليك وبك وفيك ❤️💫.. في لحظتها ما قدرتا اعبر عن الفرحة الفي قلبي ما عارفة دا منو الرسلها بس صراحة نجح في انو يبسطني لقيت في البوكس فستان بي طقمو ومعاهو ساعة وبارفان ودفتر صغير وقلم وشوكولاتات وبي فوق وتحت مزين بي ورد طبيعي.. في النهاية برضو لقيت رسالة صغيرة مكتوب فيها بتمنى تلبسيهو في يوم لقاءنا وللزمن داك خلي بالك من نفسك♥️.. دينا قالت لي كدا ما ممكن انا بموت دا منو الرسل ليك الهدية الرهيبة دي معقولة يكون معجب سري.. قلتا ليها انا زاتي ما عارفة والله بس الهدية في قلبي لي فترة طويلة من انبسطتا زي الليلة اصلا من الصباح كنتا حاسة انو في شئ حلو ح يحصل بس ما اتوقعتا للدرجة دي لأول مرة بعد زمن زول يفكر يجيب لي هدية بس هو منو ما عارفه.. دينا قالت لي ما ضروري تعرفي منو بس المهم هو طلع زوق وراقي شديد.. قلتا ليها حرفيا والله بس مصيرو يجي يوم واعرف هو منو، كملتا اليوم وكان رهيب شديد والحفلة كانت سمحة جابو محمد بشير ورباها لينا لمن قلنا بس، انا عشان زمن شغلي خلاص قرب خليت الحفلة ومشيت المطعم لقيت ناس سميرة قاعدين يزينو فيها.. قلتا ليها سميرة الليلة في شنو لمن بتزينو المطعم.. قالت لي في واحد حجز نص المطعم عشان عايز يعرض الزواج على حبيبتو.. قلتا ليها ما جادة الناس ديل قايلين روحهم أتراك ولا شنو وبعدين من متين بتحصل حاجات زي دي.. قالت لي يا حليلك ديل البرجوازيين بعملو اكتر من كدا ودي ما اول مرة يتحجز فيها نص المطعم عشان عرض زواج حصل كتير ومع الايام بتتعودي.. قلتا ليها والله حاسة نفسي في فيلم تركي.. قالت لي الفيلم ببدأ لمن هم يجو نحنا عشان عاديين ما بنشوف حاجات زي دي بس البرجوازيين بعملو اكتر من كدا والحاجات دي عندهم عادية شديد.. قلتا ليها والله عشان وشفنا والله قصص ودرامات.. قالت لي الدرامات ح تشوفيها بعدين اصبري بس.. قلتا ليها كويس.. قالت لي خليك من دا انا مبسوطة لانو في النهاية عرض الزواج لو رافقت حبيبها بقدم هدية لي واحدة من الموظفين وان شاء الله اكون انا.. قلتا ليها هدية شنو كمان.. قالت لي بعد حبيبتو توافق بقدم هدية مبلغ مالي لي واحد من الموظفين وبختاروها بالقرعة.. قلتا ليها ايواا لكن بعملو كدا لي شنو.. قالت لي انا زاتي ما عارفة بس كلهم بعملو كدا.. قلتا ليها كويس ان شاء الله تكون من نصيب البستاهلها.. بعد المغرب جو اثنين وظاهر عليهو دا الشاب الحجز نص المطعم عشان يتقدم ليها بعد اكلو، البنت ظاهر عليها متوترة وبتسألو في شنو، بعد اشر لي شلتا الصينية المزخرفة الفيها الخاتم.. قال ليها انتي ما عارفة انا كنتا مستني اللحظة من متين طول الفترة الماضية انا كنتا مخبي عليك قدر شنو انا بحبك وعايزك تكوني معاي باقي عمري الجاي عايز كل ما اصحى الصباح اتصبح بي وشك الحلو عايز كل ما اتضايق اجيك وتكون ملجئ وكل ما احتاجك القاك جنبي انا ما عايز ولا لحظة تمر علي وانتي بعيدة عني فيها بتقبلي تتزوجيني.. قالت ليهو اكيد موافقة.. قال يا الله أناس قلتي شنو انتو سمعتو هي قالت شنو.. قالت ليهو انا موافقة اتزوجك وأكمل معاك باقي عمري الجاي لاني بحبك من جوة قلبي.. قال يا الله لك الحمد والشكر يارب، كلمي ابوك أنو بكرة انا وأهلي جايين نخطبك.. قالت ليهو بالسرعة دي يا مجنون.. قال ليها حتى انا اتأخرتا وشديد كمان ،قال لي بتقدري تلبسيها الخاتم.. قلتا ليهو اكيد، لبستو ليها وانا شايفة لمعة الفرحة في عيونها وعيونو، انا بقيت اضحك معاهم من غير اي سبب.. جاء وقت تقديم الهدية حقت الموظف لأنها قبلت انا مشيت المطبخ وديت الصينية الكان فيها الخاتم بعد شوية جات سميرة نادتني قالت لي تعالي سريع اختاروك انتي.. قلتا ليها اختاروني في شنو.. قالت لي هدية الليلة طلعت من نصيبك انتي.. قلتا ليها كذابة.. قالت لي والله العظيم انا جادة تعالي.. مشيت معها الشاب قدم لي بوكس صغيرة وحلو وشكرتو وبعدها قامو طلعو.. حرفيا اليوم يفوز بأحلى يوم ما متذكرة آخر مرة فرحتا زي الفرحة دي من يوم ولدتا باسل وشفتو قدامي لأول مرة.. انا من زمان فقدتا الأمل في الحب واستنكرتا فكرة انو في حب حقيقي وزواج عن حب وكل الكلام دا بس الليلة بعد شفتا الاثنين الجو المطعم اقتنعتا انو لسه في ناس بتحب بي صدق وبتوفي بي وعودها بالزواج وانو يكملو باقي حياتهم مع بعض، شوفتهم رجعت لي الأمل في الحب وانو ممكن يجي يوم وألقى زول يحبني بالجد وأكمل معاهو باقي حياتي.. طول الطريق وانا بضحك براي زي الما نصيحة حسيت فضل لي شوية واطير من الفرح دخلتا البيت طوالي على غرفتي ختيت البوكسين حقين الهدايا وطلعتا سلمتا على ناس امي.. بابا جمال قال لي ما شاء الله الليلة وشك منور من الفرحة عساك دائما مبسوطة كدا.. قلتا ليهو أن شاء الله يارب، اها الليلة الرجل بقت كيف.. قال لي والله احسن من اول وبكرة عندي مقابلة مع الدكتور.. قلتا ليهو على خير ان شاء الله وقريب ينجبر الكسر وترجع تمشي.. قال لي اميين يارب.. مشيت غرفة الاولاد سلمتا على اخواني وباسل وقعدتا معاهم شوية ومشيت لي اخواتي اتونستا معاهم وطلعتا، باسل باعني وبقى يمشي ينوم مع علي ويخليني براي.. رجعتي غرفتي فتحتا الشبكة وبقيت بتونس مع محور الكون وحكيت ليهو الحصل في المطعم.. قال لي على فكرة دي شئ بسيط شديد في غيرهم بعملو اكتر من كدا ودا راجل طالما وفى بي وعدو وماشي يتقدم ليها ويتزوجو..قلتا ليهو والله فعلا راجل وولد رجال تخيل ما قبل أو يلمسها ويلبسها الخاتم وطلب مني البسها ليهو.. قال لي لانو البحب من جوة قلبو بخاف على البحبها حتى من نفسو وبحافظ عليها لحدي ما تبقى حلالو.. قلتا ليهو ديل جابو لي جفاف عاطفي لمن قربتا ابكي.. قال لي ما تبكي مصيرو يجي يوم وتلقي واحد يعمل ليك اكتر من كدا ويحبك حب حقيقي.. قلتا ليهو انا بعد تجربتي الفاشلة في الزواج فقدتا الثقة في حاجة اسمها حب والكلام دا.. قال لي ما تفقدي ثقتك فيهو ولا شئ انتي لسه ما عارفة الحياة مخبية ليك شنو لي قدام اتفائلي.. قلتا ليهو بحاول، صحي ما وريتك الليلة جاني بوكس هدية من مجهول رهيب لمن مبالغة.. قال لي يعني عجبتك هديتي.. قلتا ليهو انت الرسلتها.. قال لي اي.. قلتا ليهو السبب شنو وانت من وين عرفتا اسمي الكامل.. قال لي دي هدية شكر بسيطة وعرفتا اسمك من وين دي خليها في زمن تاني.. قلتا ليهو تشكرني على شنو.. قال لي كل القصة انو كان عندي صفقة مهمة وما تمت ومن يوم اتعرفتا عليك ولي هسي اي شئ اكون عايزو بحصل بقيتي بالنسبة لي زي فاتحة الخير عشان كدا حابي اشكرك انا عارف كل شئ بتسهل لمن ربنا يشاء ويقول كن فيكون بس انتي قدمك كانت خير علي.. قلتا ليهو والله ما عارفه اقول ليك شنو بس بتمنى انو كل شئ بتتمناهو يحصل وربنا يفتحها عليك دنيا وآخرة لكن عندي تعليق بسيط بدل الهدية الجبتها لي كان ممكن تتبرع بي المبلغ دا لي اي دار أيتام أو مستشفى أو أي زول محتاج ليهو وكدا بتكون كسبتا أجر وحسنات وشكرتا ربنا على نعمتو الانعمها عليك.. قال لي صح كلامك وان شاء الله ح اعمل كدا.. قلتا ليهو انت لسه ما جاوبتا على سؤالي من وين عرفتا اسمي.. قال لي المهم عرفتو انت مالك لمن يجي الوقت المناسب بوريك.. قلتا ليهو طيب ما عايز توريني اسمك منو.. قال لي لمن يجي الوقت المناسب بتعرفي ما تستعجلي.. قلتا ليهو ما عايزني استعجل كيف وانت عارف اي شئ عني وانا حتى اسمك ما بعرفو.. قال لي ولدك باسل كيف.. قلتا ليهو يعني بالطريقة دي عايز تتهرب من الموضوع وما تجاوب.. قال لي ابوك جمال بقى كيف وان شاء الله رجلو اتحسنت.. قلتا ليهو اتهرب كويس ح يجي يوم واعرف وبعدها قفلتا الشبكة وطوالي نمتا.. يوم في الجامعة بعد خلصنا دوام جاتني طالبة قالت لي دكتور إدريس بناديك في المكتب.. قلتا ليها ياتو مكتب.. قالت لي في الطابق الثاني في آخر الممر في مكتب قال ليك تجيهو هناك.. قلتا ليها كويس ح امشي بعد شوية.. قلتا لي دينا خلاص انتي امشي انا بشوف دكتور إدريس عايز شنو ومن هناك بمشي الشغل.. قالت لي طيب خلي بالك من نفسك.. قلتا ليها حاضر وانتي كمان.. مشيت مكان وصفت لي المكتب دقيت الباب ودخلتا ما لقيت أي زول قلتا احتمال يكون طلع هسي بجي بقيت واقفة مستنياهو فجأة باب المكتب قفل بقيت أدق فيهو منو القفل الباب انا جوة ممكن تفتحو الباب، انا بخاف من الأماكن المغلقة حتى في غرفتي بخلي الباب فاتح لانو بحس لو اتقفل ح يكتم على نفسي اتذكرتا لمن جلال كان بقفل على الباب وبخليني في الظلام براي وانا بخاف بقيت ببكي وبدق في الباب في زول سامعني تعالو افتحو لي الباب لو سمحتو في زول سامع صوتي انا محبوسة هنا تعالو افتحو لي الباب، بقيت اعاين حولي وانا خايفة وحاسة نفسي بدأ يضيق والاوكسجين كانو بدأ يقل في المكان وحاسة بي صعوبة في التنفس.. الله يخليكم زول يجي يفتح لي الباب انا محبوسة هنا ماف زول سامع صوتي تعالو افتحو الباب.. ضميت رجلين علي وبقيت قاعدة ابكي ويا الله قادرة اخد نفس حسيت خلاص ح أفضل محبوسة هنا للأبد.. ماف زول سامع صوتي انا محبوسة هنا تعالو افتحو لي الباب عليكم الله زول يجي يفتح لي الباب افتحو لي الباب صوتي بدأ يختفي وبدق في الباب عشان زول يسمعني ويجي يفتح لي الباب انا ما قادرة اتنفس زول يجي يساعدني طلعوني من هنا في زول هنا سامعين صوتي انا محبوسة هنا زول يجي يساعدني...........
 في امان الله♥️
•••••••••••••••••••••••••••••••••••••••••••••••••••••••••••
 

#رحلة~كفاح 《08》
#بقلم~هيام~عبد_القادر{السمحة♥️}

★ــہہہـہہـ♡ــــــ★ـــــــہہہـہہـــــــ★★ـــــ❥​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏
 ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​‏​​‏​​‏​​‏​​‏​​
 "شهاب"

طلعتا من المحاضرة وكنتا ماشي لي يونس في المطعم مشيت الطابق الثاني كان في كم سؤال عايز اسألهم لي دكتور إدريس واتوقعتا القاهو في مكتبو بس لمن وصلتا لقيت المكتب مقفول كنتا عايز امشي سمعتا صوت ضرب على الباب من جوة اول قلتا يمكن بتخيل ولا شئ تاني سمعتا صوت بنت بتقول انا هنا ساعدوني افتحو لي الباب انا محبوسة هنا افتحو لي الباب.. قلتا ليها انتي سامعة صوتي القفلك هنا منو.. قالت لي الله يرضى عليك افتح لي الباب انا ما قادرة اتنفس وخايفة.. قالت ليها اصبري هسي بفتحو ليك ،فتشتا المفتاح عشان افتح القفل ما لقيتو، بقيت افتش في شئ عشان افتح بيهو الباب غريبة الطابق دا كل يوم بكون مزحوم والليلة ما فيهو ولا زول كيف والبنت دي كيف اتقفلت هنا أثناء ما بفتش شفتا حديدة دقيت بيها القفل لحدي ما فتح دخلتا لقيت البنت دي هيام كانت قاعدة وضامة رجلينها عليها وبتبكي وبتقول ح تطلعي من هنا ح يجو ينقذوك ويا الله قادرة تاخد نفس.. قعدتا جنبها هيام انتي كويسة حاولي اخذي نفسي عايني لي خلاص ح تطلعي من هنا شوفي الباب انفتح، هي لسه كانت في نفس الحالة وبتبكي.. هيام عايني لي انا شهاب وشوفي الباب انفتح وخلاص طلعتي ما تبكي عايني لي وحاولي اخد نفس ركزي معاي شهيق زفير شهيق زفير عايني في عيوني واتنفسي واهدي خلاص طلعنا.. قالت لي طلعنا صح الباب انفتح وانا ما فضلتا محبوسة.. قلتا ليها عايني الباب انفتح وانا معاك هنا.. بعد مسافة قدرت تتنفس عديل ووقفت بكى طلعتا مشيت جبتا ليها موية شربت وغسلت وشها وهدأت حبة.. قالت لي انا لازم امشي الشغل اتأخرتا.. قلتا ليها الليلة اخدي اجازة وارجعي البيت ارتاحي.. قالت لي لالا ما بقدر وما اخدتا إذن.. قلتا ليها يونس انا بأخد ليك منو الإذن الليلة ارجعي البيت ارتاحي.. قالت لي لالا انا حاسة نفسي بقيت كويسة وبقدر اشتغل.. قلتا ليها ما عايز اي اعتراض، وارح انا ح اوصلك.. قالت لي لالا ماف داعي بمشي براي.. قلتا ليها متأكدة.. قالت لي اي متأكدة وشالت حاجاتها وطلعت.. مشيت لي يونس في المطعم.. قال لي دي جيتك من الجامعة.. قلتا ليهو اي انت عارف خلاص نزلنا.. قال لي انت الجابرك على الشقاوة دي شنو قريت هندسة واتخرجتا وهسي عندك شركة طول وعرض مالك ومال القراية دي.. قلتا ليهو انت عارف انا قريت الهندسة عشان أرضي امي وابوي بس ما اكتر وما كان رغبتي فيهو وهسي ياداب بقرأ تخصص انا عايزو وحابيهو وشغفي فيهو وانا كدا مرتاح.. قال لي انت والله براك بتحب تزود على نفسك ضغط ما اكتر.. قلتا ليهو ما زودتا على نفسي ولا شئ انا كدا مرتاح.. قال لي انا ما ح اتكلم معاك اكتر بس بعدين لمن الشغل يكتر عليك ما تجي تقول لي ساعدني وما ادراك.. قلتا ليهو انت صحبي واخوي وما لي غيرك ولو ما طلبتا مساعدتك البساعدني منو.. قال لي كلامك دا ما بخارج معاي تاني وقلع شوكك براك.. قلتا ليهو كويس يا يونس بقت كدا صح ما مشكلة وبالمناسبة الليلة هيام ما ح تجي الشغل.. قال لي لي شنو وانت من وين عرفتا.. قلتا ليهو انا اديتها إذن عشان ترتاح.. قال لي ما تقعد تنقط الكلام وقول لي في شنو ولاقيتها وين.. قلتا ليهو انت عارف نحنا بنقرأ في نفس الجامعة والليلة لاقيتها في زول كان قفل عليها باب المكتب ولمن فتحتو حالتها كان صعبة وبتبكي ظاهر عليها بتخاف من الأماكن المغلقة وبي حالتها دي ما اظن تقدر تشتغل عشان كدا.. قال لي يا ساتر مسكينة بس انت ما عارف العمل كدا وقفلها منو.. قلتا ليهو والله ما عارف لانو لمن مشيت الطابق كان فاضي وما فيهو اي زول.. قال لي انا ما عايز اظلمهم بس متأكد انو ديل اصحابك ديلك.. قلتا ليهو قصدك ناس مجاهد.. قال لي اي وفي غيرهم بعمل كدا.. قلتا ليهو ما اظن وبعدين هم ما بعرفو هيام عشان يتصرفو معاها بالطريقة دي.. قال لي هم اصحابك ديل ضروري يكونو بعرفو الزول عشان يتصرفو معاهو كدا انا الف مرة قلتا ليك ابعد منهم بس انت ما بتسمع كلامي.. قلتا ليهو هم يمكن يكونو شايفين نفسهم وحقارين بس ما بتصل بيهم يعملو كدا.. قال لي ديل بعملو اكتر من كدا وانت عارف وناسي قبل كدا بي سببهم بنت وولد اترفضو من جامعتكم عشان بس مشكلة بسيطة ديل شوية عيال مدلعين زيادة عن اللزوم ومحتاجين زول يربيهم من اول وجديد.. قلتا ليهو كلامك صح هم بظهر عليهم كدا بس انت لو اتعرفتا عليهم بتغير نظرتك اكيد.. قال لي شكرا ما عايز اتعرف عليهم ولا يعرفوني انا لمن يجو المطعم هنا ما بجي اشوفهم خلي اتعرف عليهم خليهم بعيد مني احسن.. قلتا ليهو والله انا نفسي اعرف مشكلتك معاهم شنو.. قال لي ما عندي اي مشكلة معاهم بس لي الله كدا ما ردتهم ولا طقتهم من الأساس.. قلتا ليهو على راحتك بس انا برضو ما اظن انهم بعملو كدا.. قال لي كويس مصيرو يجي يوم ونعرف العمل كدا منو بس خليك متأكد انهم ح يطلعو وراء الموضوع دا برضو، بس الما قادر افهمو انت ليه مهتم بي هيام للدرجة دي.. قلتا ليهو ما عارف من يوم شفتا البنت دي في حاجات غريبة كتيرة بتحصل لي وأولها متذكر قبل كم يوم لمن ابوي اداني الصفقة وانا رفضتها وكنتا مستني موافقة لي صفقة غيرها وهي مهمة شديد عشان شغلي يطور تاني يوم طوالي من شفتها جاتني الموافقة على الصفقة الكنتا منتظرها لي اكتر من شهر وزيادة ممكن تقول البنت دي قدمها خير علي.. قال لي والله يا صحبي شكلك كدا بديت تعجب بالبنت دي.. قلتا ليهو إعجاب شنو انت مجنون ولا شنو.. قال لي انا ما مجنون ولا شئ بس بحاول أوضح ليك.. قلتا ليهو ماف شئ عشان توضحو وبطل فهمك الدائما غلط دا.. قال لي كويس هسي انا فهمي بقى غلط صح ماف مشكلة مقبولة منك يا صحبي.. قلتا ليهو على فكرة من بكرة ح ابدأ اشتغل للمشروع الجديد هنا لانو براك عارف الشركة بعيدة من الجامعة وضروري أوافق بين القراية والشغل عشان كدا.. قال لي المكان مكانك وطاولتكم حقت كل مرة موجودة خليهم يجو بس.. قلتا ليهو عظيم من بكرة ح اكلمهم يجو، ضروري مجسم المشروع والتصمايم تجهز في أسرع وقت ويوافقو عليها عشان نبدأ تنفيذ طوالي.. قال لي انتو ما بنخاف عليكم بتجهزو سريع.. قلتا ليهو بس عندنا مشكلة بسيطة الكانت مسؤولة عن التصميم الداخلي الايام دي مأخدة اجازة ومحتاجين لي مصممة تصميم داخلي بسرعة.. قال لي طيب ح اعمل اتصالاتي وان شاء الله بأسرع وقت ح القى ليك واحدة تانية.. قلتا ليهو تكون ما قصرتا ياخ الوقت كلو مشغول وما لقيت زمن عشان افتش.. قال لي وانا موجود عشان شنو عشان اساعدك خلي الموضوع دا علي.. قلتا ليهو طيب هسي خليني امشي البيت عشان عندي باقي شغل عايز اكملو.. قال لي طيب ما تنسى تسلم على خالتو نهى وناس شادي.. قلتا ليهو يوصل وامي زعلانة منك قالت بقيت ما تجي تسلم عليها.. قال لي قول ليها في أقرب وقت ح اجي ازورها ما بقدر على زعل الكويين نهى.. قلتا ليهو كويس في انتظارك وطلعتا، وصلتا البيت لقيت ناس امي قاعدين في الصالون بشربو في شاي المغرب سلمتا عليهم وكنتا طالع غرفتي.. امي قالت لي شهاب تعال اقعد معانا شوية.. قلتا ليها امي والله كان بودي بس عندي شغل كتير ومضغوط.. شادي قال لي استلمتا المشروع الكنتا عايزو.. قلتا ليهو اي جاتني الموافقة ومفروض ابدأ في تجهيز التصميم بس المشكلة انو مصممة التصميم الداخلي مأخدة اجازة.. امي قالت لي في وقت زي دا واخدت اجازة.. قلتا ليها امي المرة قربت تولد خلاص عشان كدا.. شادي قال لي طيب ممكن نرسل ليك واحدة من شركتنا تقدر تساعدك.. قلتا ليهو لالا شكرا انا ح القى براي.. قال لي حتى في الموضوع دا ما عايز مساعدة.. ابوي قال ليهو خليهو يعمل الفي رأسو محسسنا كان ساعدناهو ح يموت في النهاية نحنا اهلك وين المشكلة لو ساعدناك.. قلتا ليهو ابوي انا ما عندي مشكلة بس ما عايز اتعود انكم في أي صغيرة وكبيرة تساعدوني عايز اعتمد على نفسي كليا واتعلم احل اي مشكلة بتواجهني براي واتعلم منها لي قدام عشان ما تتكرر تاني لو سمحتو خليكم واثقين فيني واسمحو لي اتصرف على راحتي.. ابوي قال لي اصلا انت مأخد راحتك في كل شئ وأولها انك اتخليت عن شركتنا واسستا شركة براك وبعد دا كلو رجعتا تقرأ تاني وما اعترضنا على قرارك بس رفضك لي مساعدتنا ليك دا ما فهمتو.. قلتا ليهو ابوي بعيد وبكرر ليكم كلامي انا لو كنتا عايز مساعدة من الاول ما كان خليت شركتكم واسستا شركتي الخاصة وقررتا ابدأ من الصفر واشق طريقي براي فلو سمحتو ما عايز نرجع نتناقش في الموضوع دا تاني لانو منتهي بالنسبة لي.. خليتهم طلعتا غرفتي اخدتا حمام وصليت وبديت اشتغل على فكرة مبدئية لتصميم الشقق الطالبنها ولسه كان في شغل التصميم الداخلي للشركة والألوان.. يارب سهلها من عندك واديني القوة والتحمل عشان اكمل في الطريق البديتو دا يارب العالمين اللهم ارحمني وافتحها علي يارب.. جاتني كم فكرة كدا وبديت في تنفيذها بس لسه ما اعتمدتا على شئ مؤكد.. نزلتا تحت المطبخ عايز اعمل لي نسكافيه عشان اروق حبة واعرف اشتغل لقيت في المطبخ آمنة زوجة اخوي شادي.. قالت لي اووه شهاب الغالي وينك مختفي.. قلتا ليها والله قاعد بس مع ضغط الشغل والجامعة.. قالت لي ربنا يكون في عونك، واتفضل دا النسكافيه حقك متأكدة دا اكتر شئ محتاجو في الوقت دا.. قلتا ليها تسلمي ياخ تصدقي هسي نزلتا عشان اعملو.. قالت لي عارفاك ما بتقدر تركز من دونو.. قلتا ليها تعبتك معاي.. قالت لي ماف اي تعب اصلا ولد اخوك دا معذبني وهسي نزلتا عشان نفسي في شوكولاتة.. قلتا ليها ربنا يعينك.. قالت لي اللهم اميين لكن قربتا كلها كم اسبوع واولد وارتاح.. قلتا ليها ربنا يقومك بالسلامة وتجيبي لينا الأميرة أو الأمير بخير.. قالت لي أن شاء الله.. قلتا ليها يلا بستأذن منك.. طلعتا غرفتي عشان اكمل باقي الشغل لمن حسيت نفسي تعبتا رقدتا وفتحتا الشبكة وبديت اتصفح شوية وبعدها طوالي مشيت نمتا عشان بكرة يومي ح يكون طويل شديد وضروري اكون مصحصح وبي كامل نشاطي..........

_______♥️________

من جانبي:-

رجعتا البيت وانا حاسة نفسي تعبانة ومرهقة وكل شوية بتذكر لو شهاب ما كان جاء انا كان ممكن أفضل محبوسة لي تاني يوم الصباح بس منو العمل فيني كدا ولي شنو انا اذيتو في شنو لمن يتصرف معاي بالأسلوب دا.. لمن دخلتا البيت امي اتخلعت لمن شافتني قالت لي هيومة بتي مالك ولي عيونك وارمة ووشك باهت كدا.. قلتا ليها امي ماف اي شئ بس شوية إرهاق وعايزة ارتاح.. قالت لي حتى عيونك الوارمة إرهاق ولا بكيتي.. قلتا ليها ابكي لي شنو قلتا ليك مرهقة شوية وما تخلي زول يجيني انا عايزة ارتاح وطوالي دخلتا غرفتي ورقدتا كل الذكريات والعذاب الاتعذبتو حاولتا انساهو وأكمل حياتي عادي بس في لحظة واحدة كل الذكريات رجعت لي ليه بحصل معاي كدا لي متين ح أفضل اتحمل كل دا معقوله انا ما من حقي ارتاح وافرح زي باقي الناس ليه دائما الحزن مكتوب علي انا وبس.. جاني باسل داخل قال لي ماما انتي كويسة.. قلتا ليهو انا كويسة حبيبي بس تعبانة شوية.. قال لي ما تكذبي علي انتي ما كويسة وشوفي حتى قاعدة تبكي.. قلتا ليهو ما قاعدة ابكي بس في غبار دخل في عيني عشان كدا دموعي نزلت.. قال لي انا كبرتا ما شافع ما بتغشني بالكلام دا انتي مش دائما بتقولي لي انو ربنا لمن يبتلينا لانو بحبنا ويختبر إيمانا وصبرنا على الابتلاء واحتمال ربنا اشتاق لي صوت دعائنا عشان كدا ابتلانا عشان نرجع ليهو ونعرف انو ماف ملجئ ومنجي غيرو وانو ربنا كريم بضيقها علينا عشان تفرج ونحنا كان صبرنا وشكرنا ربنا على الابتلاء قبل الفرج ربنا بجزينا على صبرنا وإيمانا وثقتنا فيهو وانتي زاتك اصبري وربنا بفرجها عليك وهسي قومي صلي ركعتين وادعي وانا ماشي وبجيك بعد شوية.. كلام باسل جاني في وقتو انا الفترة الفاتت حاسة انو علاقتي مع ربنا بقت ما زي اول وبقيت مقصرة في حاجات كتيرة قمتا اتوضيت وصليت لي ركعتين وقعدتا اقرأ قرأن وادعي ياداب حسيت بي راحة وقلبي شوية ارتاح وحسيت الحمل خفة.. باسل جاء داخل وجاب لي معاهو غزل البنات.. قال لي ماما عارفك بتحبيهو وماف غيرو بحسن مزاجك.. قلتا ليهو حبيبي انت وبستو في خدو.. قال لي هسي امشي نومي وارتاحي حبة لي بعدين.. قلتا ليهو حاضر رقدتا في السرير جاء قعد جنبي وبقى بمسح في شعري لحدي ما نمتا.. صحيت عاينتا في تلفون لقيت الساعة 10 قمتا مخلوعة انا نمتا الزمن دا كلو وما صليت ولا المغرب ولا العشاء قمتا سريع صليت وطلعتا ليهم برة قلتا ليهم لي خليتوني نايمة الزمن دا كلو ما صحيتوني.. امي قالت لي لقيت نايمة ومرتاحة ما حبيت اصحيك وانتي لي كم يوم ما بتنومي كويس.. عمار قال لي لو حاسة نفسك تعبانة خلي الشغل اصلا ما مجبورة عليهو واقعدي ارتاحي.. قلتا ليهو لالا ما تعبانة بس امبارح ما نمتا كويس عشان كدا.. عامر قال لي انتي في شئ حاصل معاك وما عايزة تورينا وباين من عيونك.. قلتا ليهو لو في كان وريتكم ماف سبب بخليني ادس منكم.. عمار قال لي متأكدة.. قلتا ليهو اي متأكدة.. بابا جمال قال ليهم مالكم نازلين فيها اسئلة كدا طالما قالت ماف شئ يبقى ماف لانو لو في هيام ما بتدس مننا.. استئذنتا منهم ودخلتا غرفتي تاني قعدتا اقرأ عشان اشتت إنتباهي وما اتذكر الحصل تاني قعدتا اكل غزل البنات الجابو لي باسل لمن نعستا رقدتا نمتا.. صحيت تاني يوم الصباح وانا ما عندي مزاج عشان امشي الجامعة اصلا فتحتا الشبكة عشان اشوف في القروب عندنا كم محاضرة لقيت مرسلين انو الليلة ما شغالين لمن شفتا الرسالة حسيت نفسي ح اطير من الفرح طلعتا برة لقيت اخواني كلهم طلعو مشو المدرسة قعدتا شربتا الشاي مع بابا جمال.. قال لي الليلة ما ماشة الجامعة.. قلتا ليهو الليلة ما شغالين.. قال لي ايواا كويس منو ترتاحي.. قلتا ليهو اي والله اها نسيت أسألك انت امبارح قالو ليك في المقابلة شنو.. قال لي الدكتور قال لي الكسر بدأ ينجبر وكم اسبوع لي قدام ح يفكو لي الجبيرة وارجع امشي واشتغل عادي.. قلتا ليهو أن شاء الله.. دخلتا غرفتي اتراسلتا مع دينا ولقيت محور الكون ما داخل رسلتا ليهو وقفلتا الشبكة قعدتا اقرأ شوية.. استنيت لمن جو اخواني من المدرسة قعدتا العب معاهم وغيرتا جو حبة بعد العصر اتجهزتا ومشيت المطعم.. سميرة قالت لي امبارح مالك ما جيتي خوفتيني عليك.. قلتا ليها والله كنتا مرهقة شوية عشان كدا.. قالت لي سلامتك.. قلتا ليها الله يسلمك، انت القاعدين هناك وشغالين ديل منو.. قالت لي ديل موظفين شركة الأستاذ شهاب جايين يشتغلو هنا.. قلتا ليها ما عندهم شركة لمن بشتغلو هنا.. قالت لي عندهم بس كل فترة بجو يشتغلو هنا.. قلتا ليها ايواا.. قالت لي عليك الله شيلي القهوة وديها ليهم.. قلتا ليها حاضر وشلتا كباية نسكافيه لي شهاب، قدمتا ليهم القهوة واديت شهاب النسكافيه.. قال ليهم معقوله ماف زول فيكم قادر يفكر في تصميم داخلي مناسب للشركة دي.. قلتا ليهو ممكن اساعدكم.. قال لي انتي دارسة تصميم داخلي.. قلتا ليهو شبه كدا لاني مأخدة 5 كورسات فيهو فلو سمحتا لي ممكن اصمم ليكم.. قال لي طبعا اتفضلي.. قعدتا اشتغل واصمم فيهو اصلا من زمان بحب التصميم وفترة زواجي لانو كنتا قاعدة ساي اخدتا كورسات في التصميم الداخلي وقضيت زمني.. قعدتا قريب ساعتين حتى صممتا ليهم فكرة مبدئية عن التصميم ومحتاجة وقت اكتر عشان اتمو.. قلتا ليهو دي فكرة مبدئية ولو كان عندي ومن اكتر كان صممتو احسن من كدا.. شهاب قال لي رأيك شنو تشتغلي معانا وكدا بكون عندك الوقت الكافي عشان تصممي وتبدعي.. قلتا ليهو انت جادي.. قال لي اكيد جادي فكري في عرضي كويس معاك يومين وتديني الجواب.. قلتا ليهو أن شاء الله بفكر وللوقت داك بكون كملتا باقي التصميم دا.. جاتني سميرة قالت لي اتفضلي تلفونك من جبيل برن.. لقيت المتصلة دي علوية مرة ابوي.. قلتا ليها اتفضلي عايزة شنو.. قالت لي تعالي المستشفى سريع.. قلتا ليها اجي المستشفى لي شنو.. قالت لي ابوك جاتو جلطة ودخلو العمليات..............
 في امان الله♥️
•••••••••••••••••••••••••••••••••••••••••••••••••••••••••••
 

#رحلة~كفاح 《09》
#بقلم~هيام~عبد_القادر{السمحة♥️}

★ــہہہـہہـ♡ــــــ★ـــــــہہہـہہـــــــ★★ـــــ❥​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏
 ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​‏​​‏​​‏​​‏​​‏​​
لقيت المتصلة دي علوية مرة ابوي.. قلتا ليها اتفضلي عايزة شنو.. قالت لي تعالي المستشفى سريع.. قلتا ليها اجي المستشفى لي شنو.. قالت لي ابوك جاتو جلطة ودخلو العمليات........ قلتا ليها جلطة شنو وهسي هو كيف.. قالت لي ما عارفه هو كيف قبل شوية دخلو غرفة العمليات.. قلتا ليها كويس مسافة الطريق وبجيك.. شهاب قال لي خير ان شاء الله منو الفي المستشفى.. قلتا ليهو ابوي جاتو جلطة ونقلو المستشفى انا لازم امشي.. قال لي تعالي اوصلك.. قلتا ليهو طيب شلتا حاجاتي وطلعنا اتحركنا على المستشفى انا أعصابي خلاص باظت يارب ابوي ما تحصل ليهو حاجة انا ما بقدر اتحمل اخسرو يارب هو صح ما كان لي الأب وما احتواني بس برضو ما بقدر على فراقو في النهاية هو ابوي وما عندي غيرو يارب احفظو لي يارب ما بتحمل فقدانو.. شهاب قال لي اهدي شوية أن شاء الله ح يكون بخير ما تخافي.. قلتا ليهو ما قادرة ما بي يدي انا خايفة اخسرو.. قال لي بطلي تفكري بطريقة سلبية ابوك ح يكون بخير وان شاء الله الجلطة ح تكون خفيفة ويرجع ليك بعافيتو.. قلتا ليهو أن شاء الله.. وصلنا المستشفى ضربتا لي مرة ابوي وصفت لي هي وين مشينا عليها قلتا ليها ابوي كويس حصل ليهو شنو والدكتور قال شنو.. قالت لي ما عارفه من جبيل دخلو غرفة العمليات ولسه ماف اي خبر عنو.. قلتا ليها حصل شنو لمن جاتو جلطة.. قالت لي بي سببك انتي.. قلتا ليها بي سببي انا عملتا شنو.. قالت لي مالك ما عارفة نفسك بتعملي شنو كل يوم بتتأخري لي انصاص الليالـي وما معروف بتكوني وين وانتي عارفة الناس ما بسكتو وما برحمو زول.. قلتا ليها اولا انا ما عملتا شئ غلط ومعروف ماشة وين وجاية من وين وانتي لو ما عارفة شئ احسن تسكتي.. قالت لي اسكت لي شنو ما هو واضح بتعملي في شنو وبي كل وقاحة جايباهو معاك لي هنا.. قلتا ليها ما تضغطي علي زيادة عشان ما تسمعي شئ ما برضيك وهسي ممكن تنقطينا بي سكاتك لانو صوتك بدأ يزعجني وانا ما ناقصة فلو سمحتي اسكتي كفاية.. قالت لي عشان عارفاني بقول الحقيقة عايزاني اسكت.. قلتا ليها حقيقة شنو انتي سامعة نفسك بتقولي في شنو ياخ اخجلي انتي عندك بنات ودور يا زمن ولف والبتقولي دا يمكن يحصل مع واحدة فيهم عشان كدا اسكتي كفاية.. قالت لي انا الحمد لله بناتي مربيات.. قلتا ليها كويس نعيش ونشوف.. شهاب كان واقف بعيد والحمدلله ما سمع هي بتقول في شنو.. عمي الصادق قال لينا دا ما وقت الكلام دا هسي خلونا نطمن عل اخوي الأول عماتي سكينة ومحاسن وسلوى كانو بعاينو لي من فوق لي تحت .. قلتا لي عمي  ابوي ح يبقى كويس صح وح يتعافى.. قال لي ما تخافي بإذن الله ح يتعافى.. قلتا ليهو أن شاء الله.. عمتي سكينة قالت لي اكيد الحصل ليهو بي سببك انتي يا وش الفقر.. عمي الصادق قال لي سكينة اسكتي الكلام دا هسي ما وقتو.. عمتي سلوى قالت ليهو تسكت لي شنو لأنها بتقول الحقيقة اي مصيبة حصلت لي اخوي من وراها هي وبس.. عمي الصادق قال ليهم كلمة زيادة منكم كلكم ح ترجعو البيت ما عايز كلام كتير هنا فهمتو.. حسيت نفسي بدأ يضيق طلعتا برة المستشفى عشان اشم حبة هواء.. شهاب قال لي اهدي شوية ابوك ح يكون كويس خلي ثقتك في ربنا كبيرة.. قلتا ليهو والله انا تعبتا خلاص من كل شئ كل ما اقول الأمور ح تتحسن بتحصل حاجة كعبة وهسي شوف حصل شنو.. قال لي كل شئ بحصل لي خير والبجي من الله كلو سمح لو كان خير او شر انتي اصبري واتوكلي على ربنا وهسي ادخلي شوفي العملية لو انتهت وانا بنتظرك هنا تطمنيني عليهو.. قلتا ليهو ماف داعي تنتظر اصلا كفاية تعبتك معاي.. قال لي ماف اي تعب وانا ح انتظرك هنا.. دخلتا جوة لقيت الدكتور ياداب طلع جريت عليهو يا دكتور طمنا على ابوي هو كويس.. قال لي ابوك كويس واتخطى مرحلة الخطر وهسي حالتو مستقرة وح نستنى لحدي ما يصحى عشان نعرف تأثير الجلطة عليهو كيف.. قلتا ليهو يعني ح يتعافى.. قال لي اي بإذن الله ح يتعافى.. قلتا ليهو بنقدر نشوفو.. قال لي حالياً صعب بس ان شاء الله اول ما يصحى ح نخليكم تشوفوهو وعليهو العافية.. قلتا ليهو الله يعافيك.. الحمد لله يارب انك حفظتا لي ابوي وعافيتو الحمدلله.. طلعتا برة لي شهاب طمنتو على ابوي وقلتا ليهو بعد كدا بتقدر تمشي تعبتك معاي.. قال لي العفو ماف اي تعب ودا رقمي لو احتجتي لي اي شئ في أي وقت بتقدري تتصلي علي وما تنسي تفكري في موضوع الشغل بجدية.. قلتا ليهو أن شاء الله وتسلم، قبل ما أدخل المستشفى تلفوني ضرب لقيت دي امي رديت عليها.. قالت لي هيومة انتي وين ولي اتأخرتي كدا في شنو.. قلتا ليها امي انا في المستشفى.. قالت لي انتي كويسة حاصل معاك شنو.. قلتا ليها امي انا كويسة بس ابوي جاتو جلطة ونقلناهو المستشفى.. قالت لي يا ساتر وهسي هو كيف أن شاء الله احسن ووضعو ما خطير.. قلتا ليها الحمدلله هسي احسن من اول ووضعو مستقر والليلة ح ابيت معاهو.. قالت لي كويس بكرة الصباح أن شاء الله ح اجيكم.. قلتا ليها كويس وجيبي لي معاك ملابس عشان من هنا ح امشي الجامعة، وسلمي على ناس باسل.. قالت لي كويس خلي بالك من نفسك.. قلتا ليها وانتو كمان.. وقفلتا دخلتا جوة بقيت قاعدة قدام الغرفة الموجود فيها ابوي.. كل تعصيبي وزعلي منو  واحاسيسي الملخبطة واتجاهو واي شئ عملو لي اتمحى في اللحظة القالو لي انو جاتو جلطة انا ممكن اكون زعلانة منو بس عمري ما بتمنى انو يخليني ويمشي أن شاء الله خلي ما يحبني ولا يهتم بي ولا يسأل عني ولا يعمل اي واجب من واجباتو كأب لي ماف مشكلة بس المهم اني اعرف انو هو كويس ولسه عايش وبتنفس وكلو بهون حتى لو ما شفتو بكفيني اعرف انو هو بخير بس.. الأب مهما كان قاسي علينا وصعب وجافي بس من جوهو بكون مليان حنية وحب اتجاهنا حتى لو كان ما بظهر لينا الشئ دا ويمكن حبو وخوفو علينا بظهور على هيئة قسوة وصعوبة بس دا ما بغير حقيقة انو هو بحبنا ويخاف علينا.. الأب نعمة كبيرة وما بحس بيها الا الفقدها لانو بكون ليك السند والحيطة البتتميل عليها والشخص الوحيد البسندك لمن الدنيا كلها تتخلى عنك

 قالو في الاب:-

أنه الضهر♥️ والحيطة الشايلة البيت♥️ وانا قلت ابويا يعني سند العمر♥️ يعني الايدين الخشنة والضهر الي ما يميلش♥️ يعني البشيلك في وقت الناس ما بتشلشي♥️ يعني العودو يميل وما يسيبك تميلشي وتتعكز عليه ولا تخاف♥️ مين يعني يحبك تكون احسن منو؟؟؟ غير ابوك بالذات♥️ انا ابويا الايد اللي في ظهري وعارف دائما انها ساندة♥️ انا ابويا الشخص الما احتاج بيجيني لوحده بدون ما انده♥️ مسمار الضهر♥️ ونور العين♥️ سيد كل الناس♥️ وحبيب الكل♥️ انا ابويا يطل♥️ الدنيا بخير والحاجة تفك أن كانت عنده♥️ تشوف في عنيه زمن وحياة وأيام عاشها علشانك♥️ ويتبهدل من الدنيا وياخد ضربها مكانك♥️ بتزعل لمن يقسى عليك عشان ما تدقشي من مُرة♥️ وراحته تروح عشان راحتك ويدبل عمره في زمانك♥️ بتقفلك كل الناس تقدير وتشلني الناس تقدير لأجلك♥️ عيني ما تنزلش لأي كان تنزلك وحدك ولاجلك♥️ ربنا ما ينزل عينا لحد♥️

 "فارس قطرية"

ما حسيت على نفسي متين نمتا في الكرسي صحيت مع صلاة الفجر نزلتا تحت المسجد اتوضيت وصليت وقعدتا أدعي لي ابوي انو يتحسن ويرجع لينا بصحتو وعافيتو.. الشمس لمن طلعتا ركبتا فوق غرفة ابوي كان لسه ما صحى قعدتا برة مستنية الدكتور يجي يفحصو وما عارفة عمي وعماتي ومرة ابوي مشو وين.. ما قدرتا انتظر دخلتا لي ابوي وقعدتا في الكرسي الجنبو مسكتا يدو قلتا ليهو ابوي انا آسفة على كل كلمة قلتا ليها وجرحتك بيها بقصد أو من دون قصد انا كنتا غبية وما فاهمة اي شئ واتعاملتا معاك بي طريقة بشعة بتمنى تسامحني وتعفي لي يلا قوم ولو عايز شاكلني واعمل العايزو بس الله يرضى عليك قوم ما تتخلى عني وانا محتاجة ليك لو سمحتا قوم خلاص.. وانا بتكلم معاهو شفتا عيونو بدأت تتحرك وشوية كدا فتحها عديل جريت ناديت الدكتور دخل يفحصو وخلاني برة.. يارب لك الحمد والشكر انا بحمدك وبشكرك لأنك عافيت لي ابوي.. عمي وعماتي ومرة ابوي جو قلتا ليهم ابوي اخيرا صحى وهسي الدكتور معاهو قاعد يفصحو.. عمي قال لي الحمد لله وان شاء الله يجيب لينا أخبار حلوة.. بقيت ماشة وجاية مستنية على آخر من الجمر الدكتور يطلع ويطمنا على ابوي.. بعد مسافة الدكتور جاء طالع وملامح وشو متغيرة كانو في شئ.. قلتا ليهو يا دكتور طمنا ابوي وضعو كيف ومتين ح نقدر نخرجو.. قال لي وهو متردد انتو لازم تكونو أقوياء لانو ابوك في الفترة ح يحتاج ليكم شديد.. قلتا ليهو في شنو يا دكتور ما تخوفنا.. قال لي ابوك بسبب الجلطة حصل شلل لي جانبو الأيسر وفقد القدرة على الكلام بس ما تخافي مع الوقت ح يتحسن ويرجع يمشي ويتكلم تاني.. كلامو حسيت بيهو زي البغرزو سكاكين في قلبي كيف يعني ما ح اقدر اسمع صوت ابوي تاني ولا ح يقدر يمشى ليه كل دا.. مرة أبوي قالت يا حليلك يا علوية تاني تعملي شنو وراجلك اتشلى وبقى ما بتكلم تعملي شنو يا حليلك من المصيبة الجاتك، وعماتي قعدو يبكو معاها.. عمي قال ليهم اصبرو وما تعملو كدا عبد القادر لو شافكم بالحالة دي ح يزعل اكتر وتحسسو بالعجز اصبرو وما تعملو كدا.. عمتي محاسن قالت ليهو نصبر كيف واخونا اتشلى وبقى ما بتحرك ولا بتكلم يا حليلك يا عبد القادر من الجاتك.. علوية قالت ليهم كلو بي سبب المنحوسة دي كل مصيبة نزلت على رأسنا من وراها هي وهسي اكيد مبسوطة بعد ما ابوك اتشلى صح افرحي حصل العايزاهو.. قلتا ليها كفاية ياخ انتو من امبارح مصرين تتكلمو وما تسكتو وانتي على أساس شنو بتتكلمي هو قبل ما يكون راجلك انتي كان ابوي انا فهمتي ومستحيل تقدري تحبيهو وتخافي عليهو اكتر مني انا انتي بتتكلمي عن شنو وعلى شنو انتي ابوي عمرو ما كان بهمك عشان كدا ما تجي تلعبي قدامي دور المرأة الخايفة على راجلها لانو ما جايي معاك.. وانا بحزركم كلكم واحد واحد لانو بي حالتكم دي ما بسمح لي زول فيكم يدخل على ابوي ويشوفو لو عايزين تبكو وتنوحو ما تدخلو لي ابوي لانو الفيهو مكفيهو وما ناقص تزيدوها عليهو وتحسسو بالشفقة ولي وقت تكونو قادرين تتعاملو على طبيعتكم حتى تدخلو ليهو انا ما عايزة تعملو ليهو اي تصرف ممكن يأثر على صحتو النفسية فاهمين.. علوية قالت لي انتي قايلة نفسك منو عشان تمنعينا ندخل ونشوف عبد القادر وكمان بتختي شروط.. قلتا ليها بي صفتي بنتو بمنعكم وكلامي ح يتنفذ وغصبا عنكم.. عمتي سلوى قالت لي عمي الصادق شايف بنت اخوك بتتكلم معانا بي ياتو اسلوب وكمان بتمنعنا نشوف اخونا.. عمي الصادق قال ليها هي ما غلطت في كلامها انتو لو دخلتو ح تأذمو نفسيتو اكتر من اول ولي مصلحتو انكم تبقو بعيدين عنو.. علوية قالت ليهو حتى انت يا الصادق واقف معاها عايزين تمنعنوني اشوف راجلي.. عمي قال ليها نحنا ما منعناك تشوفيهو بس لحدي ما تستجمعي نفسك وتبطلي بكى وتكوني قادرة تتكلمي معاهو بدون ما تحسسي بي عجزو ح تدخلي تشوفي.. خليتهم بتكلمو ومسحتا دموعي واستجمعتا نفسي ودخلتا لي ابوي لقيتو سرحان والدموع في عيونو دي يمكن اول مرة من بعد سنين اشوف ابوي ببكي كل دمعة بتنزل من عينو حسيت كانو بدلها بتنغرز سكين في قلبي اتماسكتا ومشيت قشيت ليهو دموعو قلتا ليهو ينفع كدا يا ابوي انا عارفاك انك قوي ودي أزمة وح تعدي وح نتخطاها مع بعض وح ترجع تقيف على رجلينك وتتكلم بس للزمن داك لازم توعدني انك ح تكون قوي وما تستسلم عشانك وعشانا نحنا لانو محتاجين ليك ومحتاجين تكون معانا وتسندنا وما تتخلى عن نفسك وعننا لو موافق غمض عيونك وانا بفهم.. غمض لي عيونو مرتين.. قلتا ليها يبقى اتفقنا هسي عايز حاجة.. عاين لي كباية الموية.. قلتا ليهو عايز تشرب موية.. غمض لي عيونو.. شلتا معلقة وبقيت بشربو شوية شوية بعدها الممرضة جات وادتو الأدوية تلفوني ضرب طلعتا برة رديت على دينا قالت لي يابت وين انتي لسه ما جيتي.. قلتا ليها انا في المستشفى.. قالت لي خير الوداك المستشفى شنو.. قلتا ليها ابوي جاتو جلطة ونقلناهو على المستشفى وانا هسي معاهو.. قالت لي ألف سلامة عليهو وان شاء الله هسي احسن.. قلتا ليها والله الحمد لله احسن بس الجلطة سببت ليهو شلل في الجانب الأيسر وبقى ما بقدر يتكلم.. قالت لي يا ساتر ياخ الف سلامة عليهو، هسي انتو في ياتو مستشفى.. قلتا ليها في مستشفى... قالت لي خلاص بعد الجامعة انا بمر عليكم.. قلتا ليها ماف داعي ما تتعبي نفسك.. قالت لي ماف اي تعب قلتا ليك جاية والموضوع انتهى ما تكتري كلامك.. قلتا ليها كويس واتكلمتا معاها مسافة وقفلتا.. امي جات وجابت لي معاها ملابس مشيت اغير وخليتها دخلت لي ابوي تكفر ليهو.. بعد غيرتا مشيت لي الدكتور سألتو بنقدر نطلع ابوي متين.. قال لي الليلة ح نخلي عشان نطمن عليهو اكتر وبكرة أن شاء الله ح نخرجو.. شكرتو وطلعتا مشيت لي امي قلتا ليها اها بابا جمال وباسل واخواني كيف.. قالت لي كويسين الحمد لله، وعمار قال بعدين لمن يخلص شغل ح يجي يمر عليكم.. قلتا ليها ايواا صح من امبارح هو وناس الشغل بضربو لي بس ما قدرتا ارد عليهم ولا رجعتا ليهم لسه.. شلتا تلفوني عشان ارجع ليهم لقيت في رقم غريب بتصل علي رديت عليهو بعد سلم علي.. قال لي ابوك بقى كيف.. قلتا ليهو الحمد لله احسن من اول.. قال لي اها الدكتور قال ليكم شنو وان شاء الله الجلطة كانت خفيفه.. قلتا ليهو والله ما كانت خفيفة لأنها سببت ليهو شلل في الجانب الأيسر وبقى ما بقدر يتكلم.. قال لي ربنا يواليهو بالعافية وان شاء الله كفارة ذنوب.. قلتا ليهو اميين يارب، بس معليش ما عرفتك معاي منو.. قال لي معاك شهاب ما سجلتي رقمي عندك.. قلتا ليهو معليش والله ما فضيت عشان اسجلو.. قال لي ولا يهمك والف سلامة عليهو.. قلتا ليهو الله يسلمك.. قال لي ما أطول عليك لي بعدين.. قلتا ليهو تمام وقفلتا.. رجعتا لي استاذ يونس لانو لقيت منو كم مكالمة وكلمتو عن وضع ابوي.. قال لي بتقدري تأخدي اجازة لحدي ما ابوك يتحسن شوية.. قلتا ليهو شكرا على تفهمك واسفة على التقصير.. قال لي ولا يهمك ربنا يواليهو بالعافية.. قلتا ليهو اميين يارب.. ورجعتا لي سميرة لانو برضو كانت متصلة علي وطمنتها على ابوي وقفلتا.. مرة ابوي جات امي اول ما شافتها قالت لي خليني امشي بعد كدا اصلا اخوانك بكونو قربو يجو وابوك جمال خليتو في البيت براهو.. قلتا ليها طيب وسلمي لي علي باسل وبوسيهو.. قالت لي كويس ومشت.. عماتي وعمي ظاهر عليهم رجعو البيت لانو من الصباح ما شفتا زول فيهم.. علوية قالت لي امك الجابها هنا شنو.. قلتا ليها كيف يعني جابها شنو جات تعمل الواجب.. قالت لي واجب شنو كمان ومنو الطلب منها.. قلتا ليها واجبها اتجاه ابو بتها وثانيا ما ضروري زول يطلب منها.. قالت لي امك تاني ما اشوفها هنا.. قلتا ليها ما انتي البتحددي يجي منو وما يجي منو فاهمة.. ومشيت خليتها ودخلتا قعدتا مع ابوي.. بعد العصر كدا دينا ضربت لي قالت لي انا وامي واقفين برة تعالي لينا.. قلتا ليها ثواني وبكون معاكم، نزلتا ليهم تحت سلمتا عليهم.. دينا قالت لي امها دي صحبتي هيام الكلمتك عنها وهيام دي امي حنان.. قلتا ليها اتشرفنا يا خالتو.. قالت لي شرف الله مقدارك، هسي ابوك بقى كيف.. قلتا ليها الحمد لله احسن من اول وح يتحسن اكتر واكتر.. قالت لي أن شاء الله.. قلتا ليها والله ما كان في داعي تتعبو نفسكم.. قالت لي يا بتي ماف اي تعب والله.. قلتا ليها طيب ادخلو كفرو ليهو.. مشينا على غرفة ابوي لقيت الدكتور والممرضات داخلين على غرفة ابوي.. سألتا مرة ابوي قلتا ليها في شنو وابوي مالو.. قالت لي كنتا عندو فجأة الأجهزة أدت انزار والنبض حقو وقف.. قلتا ليها كيف يعني وقف.. قالت لي ما عارفة بقى ما بتنفس واحتمال مات.............

______________♥️

قبل اما تمشي انا جيت علشان اسلم بس💔 علشان ابوسك بس💔 والاوضة بابها الغبي مكتوب عليه ممنوع💔 كل الدكاترة هناك ولا يعرفوك حتى ولا يعرفو انو اكيد ح تحب اكون حاضر💔 كان يومها اول يوم اسكت واقول حاضر💔 حسيت كأني غريق💔 والدنيا سوداء ضباب كان قلبي بيعيط من كسرة الخاطر💔💔
"فارس قطرية"
 في امان الله♥️
•••••••••••••••••••••••••••••••••••••••••••••••••••••••••••
 

 

#رحلة~كفاح 《10》
#بقلم~هيام~عبد_القادر{السمحة♥️}

★ــہہہـہہـ♡ــــــ★ـــــــہہہـہہـــــــ★★ـــــ❥​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏
 ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​‏​​‏​​‏​​‏​​‏​​
سألتا مرة ابوي قلتا ليها في شنو وابوي مالو.. قالت لي كنتا عندو فجأة الأجهزة أدت انزار والنبض حقو وقف.. قلتا ليها كيف يعني وقف.. قالت لي ما عارفة بقى ما بتنفس واحتمال مات........ قلتا ليها كيف يعني مات انتي بتهظري صح انا ابوي هسي خليتو كويس وما فيهو اي شئ انا ابوي مستحيل يخليني ويمشي ما بخليني ما بصدق.. خالتو حنان قالت لي يا بتي اهدي شوية ابوك ح يكون بخير ان شاء الله ما تفقدي ثقتك في ربنا.. قلتا ليها خالتو ما قادرة انا ما بقدر اتخيل حياتي وابوي ما موجود فيها بموت لو حصل ليهو شئ انا بموت.. قالت لي ما تجيبي سيرة الموت انعلي الشيطان وخلي ثقتك في ربنا كبيرة.. دينا قالت لي هيومة حبيبتي انتي أقوى من كدا بي كتير اصبري والدكتور هسي بطلع وبطمنا عليهو وانو بقى كويس.. قلتا ليها أن شاء الله.. بقيت ماشة وجاية قدام الغرفة بطقطق اصابعيني ودموعي نازلة من غير ما احس وقلبي شغال زي الدلوكة واعصابي باظت وجسمي حاسة بيهو بقى بارد زي التلج ورأسي شغال يودي ويجيب اللحظات دي مرت علي كأنها الف سنة وحسيت روحي قاعدة تطلع وانا منتظرة برة.. الدكتور طلع جريت عليهو عليك الله يا دكتور ما تقول لي انو مات الله يرضى عليك قول لي خبر سمح وما تكسر بي خاطري.. قال لي لو سمحتي اهدي شوية ابوك الحمدلله هسي بخير حصلت ليهو انتكاسة بسيطة بس هسي هو كويس وحالتو استقرت بس لازم يبقى كم يوم تحت المراقبة لحدي ما نطمن عليهو كويس.. لمن قال لي كدا طوالي سجدتا سجدة شكر وبقيت ببكي الحمد لله ليك يارب الحمدلله حمداً كثيراً طيباً مباركاً فيه.. طلعتا من المستشفى وانا طايرة من الفرح دينا جات لاحقني بقيت بوزع في كرامة عشان ابوي طلع منها بالسلامة وما خسرتو.. بعدها مشينا انا وهي المسجد صلينا ركعتين شكر وقعدنا دعينا لي ابوي.. دينا قالت لي دقيقة انا ما فاهمة شئ قبل فترة قلتي لي ابوك عمل حادث ورجلو انكسرت وهسي ابوك جاتو جلطة بس رجلو ما مكسورة كيف يعني.. قلتا ليها ابوي جمال هو العمل حادث وهو راجل امي والجاتو جلطة دا ابوي الحقيقي.. قالت لي يعني انتي عندك أبين.. قلتا ليها اي بعد امي وابوي انفصلو اي واحد فيهم اتزوج مرة تانية وبابا جمال بقى بالنسبة لي زي ابوي الثاني بعاملني زي بتو وما حصل مرة حسسني انو هو راجل امي ابدا وما اكذب عليك لو قلتا انو يمكن بحبني اكتر من اولادو وهسي هو الشجعني عشان ارجع اكمل جامعتي واشيل شهادتي.. قالت لي حظك والله ما كل رجال الأمهات زي ديل ربنا يحفظكم ويخليكم لي بعض يارب.. قلتا ليها اميين وجمعا يارب.. قمنا طلعنا من المسجد وركبنا فوق.. خالتو حنان قالت لي دينا بعد كدا نرجع البيت.. دينا قالت ليها امي عليك الله خليني أقعد مع هيومة لأنها قاعدة براها هنا وبكرة برجع البيت.. قلتا ليها دينا ماف داعي ما قصرتي انك جيتي.. قالت لي انتي تسكتي وبس، امي عليك الله خليني معاها.. خالتو حنان قالت ليها انا ما عندي مشكلة بس ابوك نقول ليهو شنو.. قالت ليها ابوي دا خليهو علي انا انتي بس وافقي.. قالت ليها خلاص موافقة.. دينا ضربت لي ابوها ومشت بعيد مننا بعد مسافة جات وأدت التلفون لي امها قالت ليها ابوي قال عايزك.. خالتو حنان اتكلمت معاهو وقفلت.. قالت لي دينا خلاص انا ماشة وانتبهو على نفسكم كويس ولو احتجتو لي اي شئ كلموني.. دينا قالت ليها حاضر.. طلعنا وصلناها لي برة المستشفى لحدي ما ركبت العربية ومشت.. قلتا لي دينا والله ما كان تتعبي نفسك وتقعدي.. قالت لي لو قلتي كدا تاني والله بزعل منك انتي لو ما معتبراني صحبتك وريني وهسي بمشي.. قلتا ليها والله القصة ما كدا بس.. قالت لي ما بس ولا شئ طالما انا صحبتك يبقى من واجبي اقيف معاك في الحلوة والمرة سوى فاهمة.. قلتا ليها اي فاهمة.. تلفوني ضرب برضو رقم غريب رديت عليهو قال لي انا واقف ليك برة المستشفى انتي وين.. قلتا ليهو انا زاتي برة، بس انت منو.. قال لي خلاص شفتك هسي بجي عليك وقفل الخط.. دينا قالت لي دا منو.. قلتا ليها انا زاتي ما عارفة خلي ننتظر ونشوف.. بعد شوية جاء شهاب ومعاهو يونس سلمو علينا.. شهاب قال لي برضو ما سجلتي رقمي لمن بتسأليني تاني انا منو.. قلتا ليهو والله انشغلتا بس ونسيت اسجلو.. قال لي ما مشكلة.. يونس قال لي اها الوالد بقى كيف.. قلتا ليهو والله قبل شوية حصلت ليهو انتكاسة بس هسي حالتو مستقرة.. قال لي الحمدلله ربنا يشفيهو ويعافيهو يارب.. قلتا ليهو اميين.. دينا قرصتني في يدي.. قلتا ليهم نسيت اعرفكم دي دينا صحبتي وديل استاذ يونس وشهاب، استاذ يونس مديري في الشغل وشهاب صحبو.. دينا قالت ليهم اتشرفنا.. قالو ليها الشرف لينا.. شهاب قال لينا عشان ما نطول عليكم اكتر نحنا ماشين جينا نطمن على ابوك وقالو زيارة المريض بتكون قصيرة.. قلتا ليهم والله ما قصرتو وتعبتو نفسكم.. يونس قال لي ماف اي تعب وان شاء الله اخر الأحزان ونزورك كدا في الافراح.. قلتا ليهو اميين وجمعا يارب.. بعدها استئذنو ومشو.. دينا قالت لي بتعرفي ولد البرجوازيين دا من وين.. قلتا ليها قصدك منو.. قالت لي شهاب بتعرفي من وين.. قلتا ليها اتعرفتا عليهو لمن ابوي جمال عمل حادث هو الوصلني المستشفى وتاني اتلاقينا في المطعم بتسألي لي شنو.. قالت لي لانو دا واحد من شلة البرجوازيين ولو متذكرة دا نفسو الضربتي فيهو ونحنا طالعين وقلتي انو واحد زوق.. قلتا ليها كذابة معقوله يكون نفسو بس انا كيف ما ركزتا.. قالت لي هسي دا همك كلو متين لمن بقيتي صحبة معاهو لمن بجيك المستشفى.. قلتا ليها ما صحبة معاهو ولا شئ لمن عرفتا انو ابوي جاتو جلطة كنتا في المطعم ووهو الوصلني بس.. قالت لي فهمتا انو وصلك بس السبب الخلاهو يجي الليلة شنو.. قلتا ليها والله ما عارفه هسي كان واقف كنتي تسأليهو.. قالت لي من كل عقلك عايزاني اسألو.. قلتا ليها اي لاني جواب السؤال دا ما عارفاهو.. قالت لي هسي المهم احكي لي من البداية بالتفاصيل اتعرفتو كيف وحصل شنو.. حكيت ليها الحصل كلو.. قالت لي حظك يا بت بقيتي تعرفي واحد برجوازي بس الما قادرة افهمو دا منو الحبسك في المكتب واستفاد شنو.. قلتا ليها حتى انا ما عارفة دا منو.. دينا قالت لي اني بعض الظن إثم بس ما يمكن يكونو ديل شلة البرجوازيين العملو فيك كدا لانو اتشاكلتي مع إثنين منهم واحرجتي الولد وحبو ينتقمو منك.. قلتا ليها ما للدرجة دي معقوله عشان مشاكل بسيطة زي دي يعملو كدا.. قالت لي يمكن تكون بسيطة بالنسبة ليك بس ليهم لا لانو ما حصل زول اتجرأ واتعامل معاهم بالطريقة دي.. قلتا ليها حتى ولو ما بعتقد يعملو كدا.. قالت لي انتي صح قوية ولسانك طويل ولئيمة بس طيبة وقلبك ابيض ونيتك صافية وما كل الناس زيك كدا في ناس قلوبهم سوداء وحقودين.. قلتا ليها حتى ولو الزول قلبو اسود لو شنو داك بس ما بيأذي زول ما بعرفو بالطريقة دي.. قالت لي انتي خليك بي طيبة قلبك دي كدا وح تضيعي.. قلتا ليها ماف شئ بضيعني ربنا بيدي الزول على حسب نيتو وانا طول ما بتمنى الأذى لي زول ماف شئ بيأذيني الا شئ كاتبو لي ربنا وبس.. قالت لي ونعمة بالله بس برضو حاولي فتحي عيونك وما تتخدعي في الناس.. قلتا ليها كويس.. مشينا صلينا المغرب وطلعنا لي ابوي فوق دخلتا الغرفة قعدتا معاهو مسافة حتى طلعتا.. بقينا قاعدين قدام الغرفة اخوي عمار وباسل جو.. باسل اول ما شافني جاء جاري حضني وقال لي ماما انا اشتقتا ليك.. قلتا ليهو حبيبي وانا اشتقتا ليك انت كويس.. قال لي انا كويس وجدو بقى كيف.. قلتا ليهو جدو زاتو كويس وح يتحسن.. عمار قال لي حمدلله على سلامتو وربنا يقومو بالسلامة.. قلتا ليهو اميين يارب.. باسل حبيب ماما سلام على خالتو دينا صحبت ماما.. باسل سلم عليها وعمار برضو سلم عليها وقعدو معانا.. باسل قال لي ماما انتي بكيتي صح.. قلتا ليهو لالا ما بكيت.. قال لي ماما انتي برضو بتكذبي علي انا ما شافع قلتا ليك انتي كل مرة بتبكي وانا بقول ليك ما تبكي وطول ما انا معاك ما عايز اشوف بتبكي تاني.. قلتا ليهو بسولي حبيبي القصة ما بي يدي من غير ما احس بلقى دموعي بتنزل وما بقدر اوقفها.. قال لي برضو حاولي عيونك سمحة ما تستاهل تبكي بتستاهل تفرح وبس مش كدا يا خالو عمار.. عمار قال ليهو أكيد كلامك صح بس امك ما بتسمع الكلام.. باسل قال ليهو من الليلة ح تسمع كلامنا صح يا ماما.. قلتا ليهو حاضر أن شاء الله بحاول.. قعدو معانا مسافة مشو البيت.. دينا قالت ما شاء الله تبارك الله ولدك عسل شديد وبتكلم بي طريقة يحسسك انو زول كبير ما طفل وظاهر عليهو حنين شديد.. قلتا ليها والله الحنية الفيهو علي ما شفتها من زول تاني مع انو هو صغير بس كل مرة بفلح انو يطلعني من حالة الضيق والكأبة الانا فيها.. قالت لي ربنا يحفظو ليك ويخليكم لي بعض يارب.. قلتا ليها اللهم اميين وجمعا يارب.. قالت لي انتي صحي أهل ابوك وين ما شفتهم.. قلتا ليها والله انا زاتي ما عارفة امبارح عماتي وعمي جو بس الليلة من الصباح ما شفتهم ومرة ابوي ما عارفه هسي مشت وين.. قالت لي طيب انتي ما عارفه ابوك حصلت ليهو جلطة بسبب شنو.. قلتا ليها والله ما عارفه وبسأل مرة ابوي بتقول لي انا السبب وبتتهرب من باقي الإجابة مع اني حاسة انها داسة عني حاجة بس مصيرها تتكشف لو مهما طال الزمان.. قالت لي مرة ابوك دي الزول من يشوفها بحس انها مخبية شئ وتصرفاتها بشكك الزول فيها مع احترامي ليك يعني.. قلتا ليها حتى انا من شفتها حسيت انو في شئ غلط بس هو شنو ما عارفة.. قالت لي اصبري مصيرها الحقيقة تظهر لو مهما طولت.. ح يكون حصل شنو لمن ابوي جاتو جلطة اكيد في سبب وراها بس هو شنو انا لازم اعرف بس عمي وعماتي من مشو لي لي هسي ما جو وما سألو ومرة ابوي مشت وين الأسئلة دي كلها ح تخلي عقلي يطرشق من التفكير.. دخلتا غرفة ابوي اطمن عليهو لقيتو عرقان شديد شلتا مناديل وبقيت امسح في عرقو لاحظتا لي آثار يدين حولين رقبتو كانو في زول حاول يخنقو ناديت دينا عشان اتأكد وما يكون بتهيئ لي ساي.. قالت لي كلامك صح والله في آثار يدين ظاهر وكأنو في زول حاول يخنقو.. يارب دا شنو البحصل ومنو عايز يقتل ابوي وح يستفيد شنو بس اولا لازم اعرف آثار اليدين دي كانت قبل ما ينقلو المستشفى ولا بعد.. دينا قالت لي بتفكري في شنو.. قلتا ليها عايزة اعرف الآثار دي كانت موجوده قبل ولا بعد ما جاء المستشفى.. قالت لي جواب السؤال بسيط نمشي نسأل الدكتور اكيد بكون فحصو قبل وبعد ما جاء وهو الح يجاوب لينا على السؤال دا.. قلتا ليها كلامك صح.. مشينا لي الدكتور في مكتبو قلتا ليهو بنقدر ندخل.. قال لي اكيد اتفضلو.. قلتا ليهو دكتور انا جيت أسألك وبتمنى تجاوبني بي صراحة.. قال لي اسألي.. قلتا ليهو دكتور انا هسي لمن كنتا عند ابوي شفتا آثار يدين حولين رقبتو وعايزة اعرف منك الآثار دي كان قبل أو بعد ما جاء المستشفى.. قال لي انا هسي كنتا عايز اناديك عشان الموضوع دا لاني سألتا الممرضات الدخلو لي ابوك كلهم وقالو لي انو لمن جاء ما كان في أي آثار على رقبتو وانا لمن كنتا بعالجو ما شفتها برضو.. قلتا ليهو معناها في زول كان قاصد انو يخنقو بس دا منو ولي شنو.. قال لي ما عارف بس طالما هو حاول يخنقو مرة اكيد ح يجرب مرة ثانية.. قلتا ليهو دكتور ممكن اطلب منك طلب.. قال لي طوالي اتفضلي.. قلتا ليهو عشان حماية ابوي ممكن نغير ليهو الغرفة بس بشرط انو ماف زول غيري انا وانت وصحبتي وممرضات بتثق فيهم شديد يعرفو رقم غرفتو الجديدة.. قال لي لو كان وضع تاني انا ممكن أرفض بس لضرورة انو حياتو ممكن تكون في خطر انا موافق.. قلتا ليهو شكرا ليك كتير وجميلك دا ما بنساهو ليك.. قال لي ولو دا واجبي.. قلتا ليهو طيب بكرة مع صلاة الفجر غيرو الغرفة لانو ما ح يكون في زول معاهو ولو اهلي ضغطو عليك شديد توريهم مكان الغرفة قول ليهم يجوني انا وبتصرف.. قال لي اتفقنا.. طلعنا من عند الدكتور دينا قالت لي ح تعملي شنو.. قلتا ليها انا زاتي ما عارفة بس اليومين الجايين ابوي لازم يفضل بعيد عن الكل لحدي ما اعرف العمل كدا منو وهدفو شنو.. قالت لي طيب خلينا نفكر انتي الدخل لي ابوك منو من الصباح.. قلتا ليها دخلتا انا وامي وتاني ما عارفه.. قالت لي جبيل لمن انتكس مرة ابوك كانت عندو معقوله تكون هي.. قلتا ليها ما اظن ح تستفيد شنو لو عملت كدا وامي مستحيل تعملها يبقى في احتمال واحد الدخل ليهو دا دخل لمن كنا نحنا مافيشين بس السؤال الأهم هو منو.. قالت لي هيومة ختي كل الاحتمالات ما بعيدة تكون مرة ابوك عملتها.. قلتا ليها تعمل كدا لي شنو لازم يكون في سبب قوي بخليها تعمل كدا.. قالت لي انتي الفترة الماضية ما كنتي قاعده معاهم وما عارفة الحاصل شنو عشان كدا انتبهي منها ما عارفه لي بس من شفتها ما ارتحتا ليها وحاسة في شئ من وراها.. قلتا ليها كلامك صح الحزر بقى واجب وللسبب دا انا مفروض ارجع اقعد في البيت مع ابوي لحدي ما يتحسن وبالمرة اقدر اعرف العملو فيهو كدا منو وسبب الجلطة شنو.. قالت لي طيب خلي بالك من نفسك ومن ابوك كويس لانو انتي لسه ما عارفة العايز يأذيهو منو.. من خوفتي على ابوي يحصل ليهو شئ الليلة كلو ما قدرتا انوم بقيت قاعده في الكرسي وبراقب فيهو ودينا من التعب نامت، فتحتا الشبكة لقيت محور الكون مرسل لي وين انتي مختفية.. قلتا ليهو والله في المستشفى.. كان متصل رد علي طوالي قال لي خير ان شاء الله في شنو.. قلتا ليهو ابوي جاتو جلطة ونقلناهو المستشفى وهسي انا معاهو.. قال لي ألف سلامة عليهو وان شاء الله هسي احسن.. قلتا ليهو الحمدلله هسي احسن.. قال لي طيب المسهرك لي هسي شنو مش مفروض تنومي.. قلتا ليهو ما جاني نوم وخايفة على ابوي.. قال لي مش قلتي انو كويس خايفة عليهو لي شنو.. حكيت ليهو الحصل ما عارفة ليه كل ما اتكلم معاهو بحس بي راحة ومن دون ما أشعر بحكي ليهو اي شئ مضايقني وبسهولة بقدر يمتص الخوف والقلق العندي وبريحني، قعدنا نتراسل لي الساعة 3.. قال لي بعد كدا قومي صلي قيام الليل وادعي لي ابوك ونومي شوية عشان جسمك يأخد راحتو.. قلتا ليهو حاضر يلا تصبح على خير.. قال لي وانتي من اهل الخير.. وقفلتا الشبكة مشيت اتوضيت وجيت صليت ودعيت ورقدتا في المصلاية نمتا حوالي الساعة 5 كدا جات الممرضة صحتني ونقلنا ابوي لي غرفة جديدة.. حوالي الساعة 7 كدا انا ودينا اتجهزنا وماشين على الجامعة مشيت صبحتا على ابوي وطلعنا.. ما عارفه بعد غيرنا لي ابوي غرفتو انا لسه خايفة عليهو وقلقانة من انو تحصل ليهو حاجة .. دينا قالت لي عارفاك خايفة عليهو بس خلي ثقتك في ربنا كبير واحفظي في ودائع الله وبإذن الله ما بتجيهو حاجة.. يارب استودعتك ابي وانت الذي لا تضيع عنده الودائع انت تحفظه لي من كل شر ومن كل شئ يريد انا يأذيه يارب يا قادر يا كريم.. وصلنا الجامعة دخلنا المحاضرة كان قربت تبدأ طوالي دخلنا القاعة قلتا لي دينا انتي المحاضرة الليلة حقت دكتور منو.. قالت لي حقت دكتور إدريس انتي نسيتي ولا شنو.. قلتا ليها انا فضل فيني عقل عشان اتذكر.. قالت لي ما تضايقي كلها ايام وبتعدي والجايي أجمل بإذن الله.. قلتا ليها والله بتمنى، انتي صحي امبارح ادوكم محاضرات شنو.. قالت لي جانا دكتور إدريس وبعدو جات دكتورة كدا ما عارفة زاتو بتقول في شنو، وصحي امبارح دكتور إدريس جاء و.. قبل ما تكمل كلامها دكتور إدريس جاء داخل القاعة كلها طوالي سكتت ولا حس ما بتسمع غير صوت المراوح والمكيفات بس.. دكتور إدريس جاء وقف قال قدامي قال لي امبارح كنتي وين ما حضرتي المحاضرة.. قلتا ليهو كنتا في المستشفى ابوي جاتو جلطة وكنتا معاهو.. قال لي ألف سلامة عليهو.. قلتا ليهو الله يسلمك يارب.. قال لي وهسي بقى كيف.. قلتا ليهو احسن الحمدلله وشكرا على سؤالك.. قال لي حلو كدا نقدر نبدأ محاضرتنا.. بعد الدكتور خلص المحاضرة طوالي انا ودينا طلعنا من القاعة لقينا شهاب في وشنا.. قال لينا صباح الخير.. قلتا ليهو صباح الورد.. قال لي اها كيفك وابوك بقى كيف.. قلتا ليهو والله تمام الحمد لله في أحسن حال.. قال لي اها عرفتو آثار اليدين الفي رقبتو جات من وين.. قلتا ليهو لالا لسه ما عرفنا، ثواني انت عرفتا من وين وانا ما بتذكر اني كلمتك...............
 في امان الله♥️
•••••••••••••••••••••••••••••••••••••••••••••••••••••••••••
 

☆يتبــــــــــــــــــــــــــــــــــــــــــــع☆☆