عشقت متزوج
بقلمي اسماء محمد 🫶🏻💛
عشقت متزوج{{01}}❤🔥
بقلمي اسماء محمد 🫶🏻💛
♡♡__✿✿__♡♡
___ غنوة♧♤ دلوعة ابوي ، حلوة و كيوت، عمري ٢٠ سنةة بحب اصرف قروش و بموت في المرقات، بحب الترفيه و الرحلات، امي متوفية من كان عمري ١٠ سنوات بابا ما اتزوج نهائي عندي اخين ، كاظم و محمد و اخت وحدة عفراء متزوجة و عندها ولدين ، هيثم و غانم
● ابوي عاوزة مفتاح العربية !!( ابوي اسمو سراج طبعآ ما برفض لي طلب نهائي ) سراج = ماشة وين ؟ قلت ليهو ماشة مع صحباتي ناكل اسكريم ما ح اتاخر ، بوعدك يا ابوي
سراج = سوقي على مهلك و ما تشردي في الونسة و انت سايقة و اوع تتأخري و و .............. ( محاضرة طويلة و عريضة ) مشيت لصحبتي إيناس فتنا الايسكريم ( روبنز) كنا بجد مستمتعين اخدتنا الونسة و الزمن فات و تلفوني كان صامت كمية مكالمات من اخواني و ابوي ، كانو خايفين علي لانو بجد اتخرتا ، رفعت راسي لقيت ليك المكان مافيهو غيرنا ، يا بت إيناس ارح اتاخرنا ووبعلي من اخواني ، قمنا سرعة وصلتها بيتم و جيت البيت لقيت ناس البيت كلهم واقفين على اعصابم ، قلت السلام عليكم مافي زول رد لي ، (اخوي كاظم دا طبعآ جن غلب الفكي اخر مرة ضربني كف كان قبل سنةة) كاظم = غنوة انا مش قلت ليك ممنوع تقعدي برة للساعة تسعة ، غنوة = و الله يا كاظ....
كاظم = هس لسانك الطويل دا انا بعرف بقصو كيف ، انت متين ح تكبري ؟! المرة الجاية ما تلومي الا نفسك
♧♤ ابوي كان ساكت نهائي ما دافع عني ، كان زعلان بالجد ، دخلت غرفتي و اخدت لي نفس عميق قلت الحمد لله جات سليمة تاني بعمل حسابي ،،، صحيت متأخرة ، لقيت ماما نفيسة فوق راسي ، ( ماما نفيسة هي مربياني و مدلعاني كان بتشتغل عندنا في البيت ، لكن حاليآ بتهتم بي فقط ، بحبها كتير) ماما نفيسة مالك ما صحيتيني؟؟ ..... نفيسة = لقيتك تعبانة قلت اخليك ترتاحي شوية ،،،، غنوة = كان عندي محاضرة لكن !!
نفيسة = ما يوم واحد بس بكرة تمشي كدي قومي استحمي عشان اجهز ليك الشاي ، شربت الشاي بعداك نزلتا سلمت لأبوي و اعتذرت منو و اعتذرت ل كاظم و محمد و قعدتا عادي بنتونس ، الساعة ٧ اخواني و ابوي مرقو الشغل ، فضلتا براي ( ملل و زهج ما طبيعي ) طلعت على غرفتي اتصلت ل حسام♡♡
عشقت متزوج{{02}} ❤🔥
بقلمي اسماء محمد 🫶🏻💛
♡♡__✿✿__♡♡
● حسام ( دا ال❤️، من فتحت عيوني على الدنيا و انا بحب حسام من قمت ما بعرف راجل غير حسام ، ساكن معاي في الحلة ، حسام اوسم ولد في الحي اسمر ، معضل ، بحب شعرو🙈 ، عمرو ٢٥سنة ، ولد رضي ماسك شركة ابوه ، و أهم حاجة انو بحبني حد الجنون ) الوو
حسام = يا قلب ،،، غنوة = جنبك انا ،،، حسام = كيف اصبحت ؟ ،، غنوة = زهجانة ،،، حسام = مالك اليوم من الصباح شنو المزهجك ؟ ،،، غنوة = براي في البيت و معاقبة ( ممنوع امرق اي حتة غير الجامعة لمدة شهر ) ،،، حسام = ليه كدا لكن ؟!! ،،، غنوة = امبارح مرقتا مع إيناس اكلنا اسكريم و اتاخرنا ...... ما اتكلم معاي كتير لانو كان مشغول ، اتصلت علي إيناس و حكيت ليها الحصل معاي امبارح...............
ماما نفيسة نادتني مشيت فطرتا معاها ، مافي حاجة اعملا ، نمتا من الساعة ٩ صحيت الضهر صليت ، فتحت الشبكة و سرحتا في الفيس ، جو اخواني و ابوي اتغدينا سوا و قعدتنا نتونس و نذكر امي ، انا ما بعرفا كتير لكن في بعض الذكريات ، كنت متعلقة بامي شديد و عندي ليها صورة كبيرة في الغرفة يعني موجودة معاي على طول ( ربنا يرحمك يا أمي )
كل مرة اتذكر فيها امي ببكي شوية و بصلي و بدعي ليها ، بعد صليت نمتا طوالي الصباح شغالة محاضرات ، صحيت بدري و لبستا لي فستان اسود و طرحة بيج و شبشب اسود و شنطة سودا ، اخوي كاظم وصلني لقدام باب الجامعة و رجع ، لاقيت إيناس و باقي الشلة، البنات كانو ماشين الجبل، اتذكرت نفسي معاقبة قلت ليم ما عندي مزاج انتو امشو ،، و انا محروقة من جوة نفسي في المشوار لكن مافي طريقة ، كنت شغالة محاضرة وحدة ، مرقت من المحاضرة لقيت كاظم في خلقتي ، رجعني السجن ( اقصد البيت ) ، اخواني ما عارفين بعلاقتي مع حسام ، عسى ما يعرفو ، ما كنت حابة اتكلم مع زول قفلت على نفسي باب الغرفة و حكيت لأمي عن حسام و حبنا و احلامنا الرسمناها سوا ، أثناء ما كنت بكلم صورة امي اتصل علي حسام الووو
حسام = مساء الشوق
غنوة = ( كنت زعلانة منو لانو قالي لحظة برجع ليك مشى بوشو ) انا ما مشتاقة😒
حسام = حبيبتي 😍 ،، غنوة = لا حبيبتك و لا بعرفك 😌 ،،، حسام = بحبك ،،، غنوة = ( ابتسمت و احمرت خدوي) و تاني؟😒 ،،، حسام = قلبي و حنيني و مرتي يا غنوة انت الحاجة الحلوة الحصلت في حياتي ، انا آسف ما مني ضغط الشغل كتير 🥹
غنوة = سامحتك لكن اوع تعيدا ، حسام ....
حسام = نعم غنوة .. ،،، غنوة = انا بحبك يا حسام، الكمال لله لكن وجودك في حياتي بحسسني بالكمال انت مالي حياتي و دنيتي ،،،، حسام = انتظريني بس سنة واحدة بظبت اموري و اجيبك بيتي و تبقي مرتي على طول جنبي
غنوة = بنتظرك عمري انا ما عايزة راجل غيرك ....... أثناء ما كنت بكلم حسام جات ماما نفيسة نادتني للغدا ، نزلتا اتغديت مع اخواني ...............
عشقت متزوج{{03}}❤🔥
بقلمي اسماء محمد 🫶🏻💛
♡♡__✿✿__♡♡
♧♤ بعد الغدا طلعت غرفتي و ناديت ماما نفيسة ، اول مرة احكي ليها عن حسام ، كانت خايفة علي شديد من اخواني قلت ليها ما تخافي حسام ح يجي بعد سنة و يطلبني من ابوي ، قالت لي ما تثقي كتير في الرجال دايمآ كلامهم معسول عكس الفعل انت واعية يا غنوة اوع يغشك ، خايفة يخذلك و يكسر قلبك يا بتي، قلت ليها يا ماما حسام غير كل الرجال حسام قطعة من الجنةة و انا واثقة من حبو ،، ماما نفيسة اوع توري زول خلي الموضوع دا بيناتنا
● مر الايام و الحب في أبهى طلة ، اتصل علي حسام و عزمني القاش ( القاش جاب موية و الجو رهيب) ،،، غنوة = اي حتة يا حسام غير القاش لانو فيهو ناس كتار خايفة يشوفني واحد من اخواني او اصحابنم انا ما ناقصة مشاكل ....
حسام = انا مشتاقة ليك و حابي اكون معاك في اللحظة دي ، اتصرفي تعالي !!
غنوة = تمام برجع ليك ...... استحميت سرعة و لبست لي عباية سودا و طرحة سودا و لبست نقاب عشان مافي زول يعرفني، اتصلت ل حسام جاني قلت ليو تعالي بورا البيت ، اقنعت ماما نفيسة تقول لاخواني لو سألو مني ( غنوة مصدعة هسي نامت خلوها ترتاح شوية ) ، مشيت لحسام و فتنا القاش و (احلااام ،الحب بخليك تسوي اي حاجة) ، قعدنا في الحافة و نزلنا رجولنا في الموية ، بحب اتمعن ملامح حسام لانو بالجد ملامحو كلها حلوة ، أثناء ما كنا مندمجين في الونسة حسام جاتو مكالمة رد ، الو ... سلم عادي و قال برجع ليكي
غنوة = دي منو البترجع ليها بعدين( طبعآ انا غيورة لدرجة ، حسام حقي براي ، لو لقيت بت بتعاين ليو ساي بفرج فيها أمة محمد) ،،، حسام = دي السكرتيرة عايزة تتكلم في موضوع الشغل قلت ليها برجع ليك بعدين الغلط وين؟!!!
غنوة = حسام انا ماشة البيت ( حسيت نفسي مضايقة و عايزة انفجر ) رجعني بيتنا لو سمحتا
حسام = يا بت جنيتي، و الله العظيم دي السكرتيرة ما تضايقي ، انا مستحيل اخونك ، يا غنوة انت بأربعة و .....و.......
غنوة = توديني البيت ولا ارجع براي؟ ( نفس اللحظة الشك خش في قلبي ، حسام قال كلام حلو لكن الغيرة عمتني ولا انتبهت لكلامو ) ..... جابني البيت و كنت زعلانة ، صليت العشا ، عملت تلفوني صامت و نمتا
♧♤ اليوم جمعة صحيت بدري صليت و قريت سورة الكهف ، ماما نفيسة جابت لي الشاي في الغرفة شربتا ، قمتا رتبتا دولابي و جيت قعدتا مسكت تلفوني لقيت كمية رسايل و مكالمات من حسام ( بصراحة بحبو شديد ما اقدر ازعل منو اكتر من يوم واحد ) اتصلت عليو ، اعتذر و قبلت اعتذارو و المياه رجعت لمجاريها ...
__ مرت سنة كانت سنة سريعة و دا آخر سمستر لي في الجامعة( انا بقرا إدارة اعمال) حسام ح يخطبني و بعد التخرج نعمل المناسبة .............
عشقت متزوج{{04}} ❤🔥
بقلمي اسماء محمد 🫶🏻💛
♡♡__✿✿__♡♡
♡♡ و رجعنا نحب بعض اكتر من الاول ،
● حسام كلم ابوه و وافق ، الأسرة كلها وافقت
اتصل علي حسام = يا غنوة انا كلمت اهلي وبكرة ان شاء الله بجيكم للخطوبة ، و اديني رقم ابوك ، حاضر ،، رسلت ليهو الرقم ،، طبعآ دا احلى خبر سمعتو في حياتي ، كلمت ماما نفيسة و قلت ليها ارح معاي نكلم ابوي ، و فعلآ حكيت ليهو قصتي مع حسام وافق ،، سراج = انت لسع صغيرة و طايشة، العرس مسؤولية كبيرة يا غنوة ،،،، غنوة = ابوي انا قدر المسؤولية، انا ما عايزة راجل غير حسام
سراج = ربنا يسوي الفيهو خير ،،، ابوي كلم اخواني ما اعترضو لانو حسام راجل و اخلاقو عالية
♧♤ اليوم احد ( يوم خطبتي و اخيرآ علاقتي مع حسن ح تكون رسمية بطلع معاه متى ما عايزة ) و فعلآ جو و خطبوني ل حسام لبسني الدبلة ، و جابو لي هدايا و تمت الخطبة على خير و العرس اتحدد بعد تلاتة شهور بعد التخرج طوالي .
♡♡ مرت الايام بنطلع سوا و بدينا نشتري الاثاثات ، ( حسام عندو اخت وحدة بتقرا في الثانوي اسمها يسرا و ابوه اسمو عبدالله و امو اسمها عزة ) اتفقنا نسكن مع اهلو في الشقة فوق ....... ( كل يوم بنوم و بصحى على ذكراه ، بحبو يا أمة النبي )
● حسام كان ماسك مشروع جديد و مشاركو مع شركة تانية و الشركة دي لواحد اسمو بشير و بشير دا عندو بت جميلة و حلبية اسمها ملاذ و هي ماسكة المشروع ، حسام و ملاذ اتعرفو على بعض بسبب الشغل ، غير كدا مافي حاجة بتجمعم ، حسام و ملاذ فهمو بعض و بقو أصحاب و بقو يطلعو مع بعض و انا ما عندي علم ،، اخوي كاظم شاف حسام مع ملاذ كذا مرة لكن أتجاوز الموضوع لقايت ما شافهم في وضع ...... ملاذ كانت دايخة و حسام ختا ايدا في كتفو عشان يسندا و يطلعا في العربية ، اخوي كاظم شاف المنظر دا و اتذكر المرات الشافهم مع بعض ، جمع الأحداث( عقلو رسم ليو انو في علاقة حميمية بين حسام و ملاذ بعد الشوفة دي اكيد حسام ما بستاهل غنوة ) حسام ركب ملاذ في العربية و فات كاظم ما قدر يحصلو ، كاظم جا البيت و باين عليو مضايق لكن ما قال حاجة مرق و انتظر حسام رجع من شغلو ،، كاظم خبت باب بيت ناس حسام لمن فتح الباب ضربو بوكس في انفو حسام كان متحير مالك يا كاظم ، كاظم = انت واحد خاين على اساس شنو خاطب اختي و بتطلع مع بنات الناس
حسام = منو قاليك؟ ......
كاظم = شفتك بعيني و انت بت* بش في البت ، و اوع اشوفك تاني مع اختي ولا تسمح لنفسك تشوفا ولا في خيالك واحد وسخ
حسام كان دايخ و انفو قعد ينزف و ما مستوعب الحاصل ، جا ابوه و حكا ليهو الحاصل ،،، عبدالله = انا م ح اخليو ح افتح فيو بلاغ و حسام البت دي لو بقت مريم العذراء م ح ازوجا ليك و ما تناقشني
حسام = ابوي الحاصل دا كلو سؤ تفاهم ، غنوة ذنبها شنو ؟!! ابوي انا ما عايز افتح بلاغ في زول ح امشي ليم نحل الموضوع براحة
عبدالله = طيب ما ح افتح بلاغ لكن عرسك من غنوة التغى و دي اخر كلام ........
عشقت متزوج{{05}}❤🔥
بقلمي اسماء محمد 🫶🏻💛
♡♡__✿✿__♡♡
● كنت قاعدة في غرفتي برتب في ملابسي سمعت ليك صوت كاظم يا غنوة يا غنوة ، وين البت دي ، حصل غرفتي و لزا الباب خشا لي طوالي( عادة بدق الباب و يستئذن) اديني ، اديك شنو يا كاظم ،، سرعة مرقي الدبلة دي من ايدك و اديني ليها ، سألت لشنو؟ و في شنو؟ ... مسك يدي و مرقا من اصبعي بالقوة و قالي وين باقي الحاجات؟؟( عندي صندوق خاتة فيهو الهدايا حقت حسام و كل ذكرياتنا سوا) كنت خايفة و تايهة و ابى يقولي الحاصل أشرت ليو مكان الصندوق رفعو و نزل تحت و رسل لحسام الصندوق ، جاني راجع ... غنوة ... غنوة انت سامعاني صح ؟!! هزيت براسي ( اي سامعاك) من بعد اليوم ممنوع تشوفي حسام ولا تتصلي عليهو و تسالي منوو كويس ، انسيو لانو ما بستاهلك( حسام عندو علاقة مع بت تانية و انا شفتهم اكتر من مرة ، المرة دي شفتو خاتي ايدو في كتفها و ركبا في العربية) فهمتي !!!!؟
● يا جماعة كاظم بقول في شنو ؟!! اعصابي تلفت و حسيت نفسي مخنوقة ما قادرة اتنفس و حاسة بجوطة و كمية أصوات في اضاني ( لااا ، حسام بحبني مستحيل يعمل علاقة مع بت تانية ، انت فاهم الموضوع غلط )
كاظم = مافي اي غلط شفتو بعيني ، لو برضاك او غصبآ عنك ح تسيبيهو ...... أثناء ما بتكلم كاظم حسام اتصل كاظم مسك التلفون لقا المتصل حسام كاظم رد = اسمعني يا حسام لو ما شلت غنوة من بالك بدمرك و الله بجيب أجلك ..... بعد فصل كسر التلفون
غنوة = انا ما ح اسيب حسام الا كن تلحقوني امي ( كنت قعد ابكي و اترجا كاظم يقتلني ، لحقني امي اخير لي من العيشة دي .....) جا ابوي و سمع الحصل وقف مع كاظم ولا حاول يسمع مني و محمد و عفراء كلهم وقفو معاه كنت وحيدة و حزينة ، يا ماما نفيسة انا عايزة اموت ، يا ماما لو امي كانت عايشة كان وقفت معاي كنت قعد ابكي و اتنهد لقايت ما نمتا ، مرضتا من عدم النوم و الأكل، اياام و انا في الحالة دي
● بهناك عزة و عبدالله جاطو و قومو الدنيا لكن حسام ما خلام يجونا البيت ، عزة و عبدالله قررو يزوجو حسام من بت خالتو اسمها هبة يتيمة ابوين بت مسكينة خلاص ، طبعآ حسام رفض نهائي و قال انا ما داير غير غنوة تكون مرتي ، ايام و ليالي بحاولو لمن اقنعوهو، حسام وافق يتزوج هبة و فعلآ اتزوجا و سكنا في بيتم فوق
♤♧ خشيت في غيبوبة ١٥ يوم و ما كنت عارفة الحاصل ، فتحت عيوني لقيت اختي عفراء و ماما نفيسة فوق راسي ، ما قدرت اتكلم من التعب ، عاينت للغرفة عرفتا نفسي في المستشفي ، بعد يومين صحتي اتحسنت و رجعوني البيت ، كنت قعدة افكر بالحصل جاني اخوي كاظم و قالي ( يا غنوة امي وصتني عليك و عصبيتي دي كلها من حبي ليك عشان ما تطلعي انسانة فاشلة في المجتمع، تذكري قبل سنتين ضربتك كف و الله يا غنوة الكف دا وجعني اكتر من ما وجعك نفس اليوم ما نمتا نهائي ، يا غنوة انت بذكريني بامي شايلة نفس ملامحا و نفس الضحكة و حتى نبرة صوتك ،،، عشانك انا ح اكسر غروري و امشي لحسام افهم منو الحاصل شنو و بتمنى اكون الغلطان ، أرقدي ارتاحي ) باسني في جبهتي و مشى ، كنت حابة اسمع صوت حسام مشتاقة ليو و طولت ما سمعت صوتو ( ما عندي تلفون لكن ح اتصل عليو بحق ماما نفيسة ) رقدتا على ضهري و كنت بفكر في حسام و اتذكر لحظاتنا مع بعض فجأة اتذكرت حاجة ( لمن كنت في الغيبوبة جاتني إيناس و معاها بنات كانو بتكلموو بقولو حسام اتزوج بت خالتو ) قمت مفزوعة و دموعي سبقت تفكيري ، لا مستحيل بتهيء لي ، اصلا الزول ال في غيبوبة زي الميت لا بسمع ولا بحس ، طمنتا نفسي و نمتا ..........
عشقت متزوج{{06}}❤🔥
بقلمي اسماء محمد 🫶🏻💛
♡♡__✿✿__♡♡
♧♤ نمتا و في قلبي ( اكيد الحصل سؤ تفاهم و كاظم ح يرجع لي حسام ) ، صحيت نشيطة مليانة امل صليت ، اخدت لي دوش و لبست جلباب واسع و اكمامو طويلة ، نزلت تحت لقيت ابوي و محمد و عفراء و ماما نفيسة ( بصراحة ملامحم و نفسياتم هابطةو حسيت بابتسامتم مجاملة)سلمت على ابوي و مسكتا ايدو بستها و بستو في جبهتو و اعتذر منو ، قعدتاا جنب محمد و اعتذرت منو حضني و قالي ممنوع الزعل يا السمحة☺️ اعتذرت منهم كلهم الا كاظم ، وين كاظم انا ما شيفاه قالت لي عفراء كاظم بيت في المعرض الشغل كتر عليو ، كان يجيب الملفات و يشتغل عليم في البيت ، كنا هادئين على غير العادة ، السفرة كانت جاهزة بدينا ناكل ، ( كلم كانو ساكتين و ما قعد ياكلو كانو بهبشو في الأكل ساي ) الا عفراء ، اديني دا ، مدي لي دي ، كبي من داك شغالة ترمرم، غنوة = عفراء انت حامل ؟!!
عفراء = لا ، مالك؟
غنوة = طيب شنو حركات الوحم ؟!😄 ،،، عفراء = انا ما حامل و باكل بعافيتي كبي لي عصير ارح .......😅
قمتا من السفرة طلعت غرفتي جات عفراء بوراي و قعدت في السرير و رقدتني في كرعينا و بقت تمسح لي في شعري ، قالت يا غنوة عاوزة اقوليك حاجة ،،، غنوة = لو حاجة تزعل ما عايزة اعرف ، و صحي انت حامل صح؟!! ،،، عفراء = اي حامل في الشهر التالت و ع طول جيعان اليوم كلو باكل ....
غنوة = حسيت عليك الف مبروك حبيبتي ربنا يحلك بالسلامة ،،،، عفراء = بصراحة لازم تعرفي الحاصل غنوة حبيبتي ، يا غنوة حسام اتزوج بت خالتو لمن كنتي في غيبوبة
● الخبر كان زي الصاقعة رفعت راسي و عاينت لعفراء قلت ليها ناس البيت دا كلكم جنيتو مرة كاظم بقولي حسام قعد يخونك و انت هسي جاية تقولي لي حسام اتزوج بت خالتو انتو ما بتحبوني ناويين تموتوني صح ؟!! عفراء حضنتني قوي تصبر فيني و انا ما كنت عايزة أصدق نزلت تحت كوركت لأبوي، ابوي حسام اتزوج حضني ( منظري كان مزري فقدتا توازني عقلي وقف ، اغمى علي ) ، لمن وعيت لقيت كاظم جنبي دموعي بقت تنزل عشرة عشرة حضني و قالي ما يستاهل تبكي عليو انت بت سراج انت اخت كاظم ، ما تحزني خليك قوية انسيهو ، كملي السمستر دا و انا بوعدك اسفرك تحضري الماجستير في الإمارات، خلي تفكيرك كلو في قرايتك و اهتمي بنفسك زي اول ، جبت ليك تلفون و دي مفتاح عربيتك يلا قومي استحمي عشان تاخدي اخوك لمشوار عمرو ..... بصراحة التلفون رهيب و كلام كاظم كان منطقي و سرعة خشى قلبي و لمت نفسي لاني حبيتو حب ما يستاهلو ، قمتا استحميت و لبست فستان ابيض بطرحة كحلية و مسكتا مفتاح العربية ، لقيت كاظم برة منتظرني ، ركبنا و اخدتو جيلاتو اكلنا اسكريم ، مشينا الواحة اتعشينا و اتناسيت لكن ما نسيت .....
♧♤ مسكتا نفسي ولا حاولت اتصل ل حسام ، اتصلت علي إيناس = يا غنوة معليش على الحصل معاك و انا ما قدرت اجيك في البيت لانو ما قدرتا أواجهك في الموضوع سامحيني ،،، غنوة = عادي حبيبة نسيت الموضوع خالص قالو الجدول نزل رسليهو لي تمام ، نتلاقة بعد بكرة في الجامعة تمام
● اليوم سبت شغالة محاضرة وحدة برجع البيت بدري ، فتا الجامعة بعربيتي و كنت مسيطرة على مشاعري كانو حسام ما فرق معاي حصلت الجامعة لقيت المحاضرة ملغية قعدتا مع ايناس في الممر نعاين في الغاشي و الماشي ، جا طارق ماري سلم علينا و فات ايناس = (اتخيلي يا غنوة دا آخر سمستر و لهسي طارق ما حس بي دي قسمتي احب من طرف واحد) طارق ود طويل و وسيم ايناس حبتو من اول سمستر و للآن بتحبو و هو ما عارف مشاعرا ولا جايب خبرا بسلم علينا عادي و يفوت ولا حاول يتونس معاها ،،،، انسيهو يا بت امي و عيشي حياتك طبيعي ..............
عشقت متزوج{{07}}❤🔥
بقلمي اسماء محمد 🫶🏻💛
♡♡__✿✿__♡♡
♧♤ طبعآ اتجاوزتا الصدمة بسرعة ما متوقعة
اليوم صحيت بدري صليت و قريت قرآن وهبت لأمي سورة الملك و يس ، ناديت ماما نفيسة و قلت ليها عاوزة خلية ماشة لعفراء بتحبها شديد بذات الفترة دي ، طلعت غرفتي استحميت و لبست عباية سودا و طرحة كبدية، مشيت على المطبخ لقيت ماما نفيسة جهزت الخلية شلتها و مرقتا( عفراء ساكنة قريبة من بيتنا ) مشيت برجولي أثناء ما كنت ماشة جات عربية و فحطت قدامي و وقفت عرفتو دا حسام ولا اشتغلت بيو واصلت مشي ، نزل من عربيتو حصلني و قالي ممكن نتكلم ولا عاينت ليو واصلت مشي ، حصلني و مسكني من معصمي و ركبني عربيتو غصبآ عني و دور .....، مشينا مسافة طويلة وصلنا حتة فاضية وقف قالي انزلي نزلتا و انا ساكتة ، حاول يقرب مني لكن ما سمحت ليو قلت ليو انت واحد وسخ ما رد ،، قالي يا غنوة انا بحبك و عمري م ح انساك ، قلت ليو عشان كدا اتزوجتا صح؟! اوع تلفظ اسمي على لسانك و رجعني من محل جبتني ،، قالي معقولة نسيتيني و نسيت الحب الكان بينا ، قلت ليو اي نسيت انت بجمال يوسف عليه السلام ولا بأخلاق سيدنا النبي عشان ما انساك يلا من خلقتي اصلا الخساسة عندكم ليها ورثة ، اتلائمت زين و ما قالي حاجة ،،، حسام اسمعيني يا غنوة نحنا بنحب بعض تمام و ح نكون لبعض كويس و بالنسبة للحصل انت يا غنوة دغري صدقتي اخوك و رجعتي الدبلة و الهدايا ما خليتي حاجة للذكرى دا شي الحطمني و فقدتا الأمل فيك ( حكا ليها القصة من يوم اتعرف على ملاذ لقايت قصة زواجو من بت خالتو هبة) ، يا حسام بعد عرستا هسي جاي تقولي الحصل كلو سؤ تفاهم ، انا معاك الحصل معانا سؤ تفاهم طيب زواجك برضو سؤ تفاهم مسكنا في بيتنا انا و انت و جاي تقولي سؤ تفاهم حسام انا بقيت اتقرف منك و بتنوم معاها في نفس السرير كلو سؤ تفاهم صح ، لو سمحتا ما تستغبيني ،، حسام قالي انا فعلآ ازوجتا لكن مافي شي بلمنا غير القسيمة هي في سرير و انا في سرير ، ( ضحكتا باستهزاء و عيوني ملانة دموع ) انت هسي عايز تقنعني انو ما لمستها و انا اصدقك بكل بساطة صح ........... رجعني كفاية السمعتو ما عايزة اسمع خرافاتك ، شال تلفوني و سجل رقمو و اتصل ظهر ليو رقمي الجديد ، ركبتا دور و رجعني الحلة ، مشيت لعفراء قيلت معاها المسا رجعتا البيت ، قلت ل ماما نفيسة الليلة ما عايزة عشا عايزة انوم بدري مافي زول يزعجني تمام ، دخلت غرفتي و قفلت الباب و قعدتا اتذكر كلام حسام و التفاصيل الصغيرة الحصلت ، صدقتا كلامو لانو ما متعود يكذب اعمل شنو في وضع زي دا ، انا بحب حسام بجنون ما ح اقدر انساهو حسام لي ، انا لازم ارجع حسام ، نحنا لبعض و هبة خلي يطلقها ، حسيت بشغف و غلبني الشوق و الرغبة اتصلت ل حسام و قلت ليو انا بحبك و نحنا لازم نكون لبعض ، ( كنت أنانية و ح ابني سعادتي فوق تعاست بت بريئة) ،، بكل بساطة رجعت علاقتي مع حسام ..................
عشقت متزوج{{08}} ❤🔥
بقلمي اسماء محمد 🫶🏻💛
♡♡__✿✿__♡♡
♧♤ رجعنا تاني نحب بعض زي اول ، ما حكيت لزول حتى لايناس ما كلمتها عن حسام ابوي كان مستغرب مني قدرت أتجاوز الصدمة لانو لمن اتعلق بحاجة بصعب علي نسيانا ، اخوي كاظم ما كان مقتنع من تصرفاتي الطبيعية كان شاكي لكن ما أظهر لي شكو ، بتعامل معاي عادي بجيب لي هدايا و بطلعني مشاوير على طول
__ فعلآ حسام اتكلم مع امو و ابوهو ( يا أمي الحصل بيني و بين غنوة سؤ تفاهم ، انا بحب غنوة و عايزا تبقى مرتي و هبة ح اطلقا و لو احتاجت اي حاجة بقيف معاها لكن ما اقدر اعتبرا زوجة لي ) امو كانت مصدومة و ساكتة ابوه ضربو كف و قاليو لو طلقتا هبة انا من هسي متبري منك ، و امو قالت ما ح تطلقا انت و هبة ما يفرقكم الا الموت غير كدا شوف ليك ام تانية يا حسام البت يتيمة ما عندها زول غيرنا حن على وضعا ،،،
● انا و حسام بقينا نتلاقة يوميآ بعد الجامعة الا يوم اكون ما شغالة محاضرات ، و حسام بجيني من شغلو نطلع سوا ،
__ اليوم اربع ما شغالة محاضرات يعني ما ح الاقي حسام قلت في نفسي( ح امشي السوق اجيب لحسام هدية اعمل ليو مفاجأة بكرة لمن نتلاقة ) كنت قدام المراية بسوي شعري اتصل علي حسام و قالي عايز اشوفك الموضوع ضروري ،،، غنوة= اليوم ما شغالة محاضرة كيف ح اطلع من البيت ،،، حسام = قلت ليك الموضوع ضروري القي طريقة بوعدك ما ح تتأخري يلا سريع ،،، غنوة= طيب اصلا كنت ماشة السوق نتلاقة بعد نص ساعة
لبست احلى فستان عندي و اتعطرتا وسرعة مرقتا ، في قلبي( حسام اكيد طلق هبة و عايز يقولي وش لوش ) اتقابلنا في المورنقا ، حسام باين عليو التعب و عيونو واقعات من عدم النوم ، سلم علي و قالي يا غنوة انا امبارح اتكلمت مع اهلي و رفضو الموضوع ( حسام حكا لغنوةالنقاش الحصل بينو و بين اهلو) ... انتظرتا كمل كلامو و ضربتو كف انت خاين حبك لي كان مزيف كنت بتغش فيني لاني حبيتك الله لا يسامحك ، قمتا منو حصلني في الباب مسك ايدي و رجعني و شرح لي موقفو كان كيف قدام اهلو و انو بحبني و ح يحاول يلقى طريقة يزوجني ،، رجعت البيت زهجانة و اعصابي باظت دخلت غرفتي و قعدتا ابكي و انبذ في حسام و اهلو أثناء ما كنت ببكي اتصل علي حسام رديت قالي تعالي ، مشيت ليو عايز مني شنو ،،، حسام= يا غنوة انا بحبك ما بقدر بدونك و انا ح اعمل المستحيل عشان تكوني مرتي ، حاول يقنعني بكل الطرق، ابيت ليو نهائي قلت ليو اوع تتصل علي و تسأل مني ، يوم تطلق هبة تعال نتفاهم ، حظرتا رقمو قدامو و حذفتو
مرت الايام و حسام بجيني كل يوم قدام باب الجامعة و ارفضو
● حسام بهناك كره هبة اكتر لانو هي البعدتنا عن بعض كان بتعامل معاها معاملة سيئة و ما بحب تتواجد معاه في نفس المكان كانو بنومو منفصلين لمن تحاول تتكلم معاه يتحجج ( انا مشغول ، عايز انوم ، زهجان ، اختيني) هبة كانت صابرة حتى لمن امو سالتا من علاقتا مع حسام ، هبة = حسام كويس معاي يا خالتي ما مقصر معاي أمورنا كلها ماشة تمام
حسام كان ناوي يكره هبة فيو عشان تطلب الطلاق دي كانت خططو ، لكن هبة كانت مرة قوية و صبورة ..
اليوم احد اول يوم دوام في الأسبوع و آخر شهر للسمستر عندنا مشروع التخرج و رحلة علمية لبورسودان يعني جدولي ملان ما عندي فراغ عشان افكر في حسام ،، بقيت بمرق الجامعة بدري و برجع متأخرة ،، حصلت البيت متأخرة نمتا طوالي اليوم جمعة يوم نوم و راحة لقيت تلاتة مكالمة من رقم غريب ما توقعتو حسام ، اتصلت في الرقم رد علي حسام سلم علي و حكا لي عن حالتو كان كيف لمن بعدتا عنو ، قالي انو قعد ينفذ في خطة عشان يتخلص من هبة و الخطة ماشة تمام ،،، غنوة بصراحة ما كنت واثقة من خططو لكن على الاقل حاول و دي حاجة بتثبت لي انو حسام بحبني زي اول و عايزني في حياتو ، و مرة تانية رجعنا نحب بعض و نتقابل كتير و مكالمات و حب و عبارات حلوة ..........
عشقت متزوج{{09}}❤🔥
*بقلمي اسماء محمد*🫶🏻💛
♡♡__✿✿__♡♡
♧♤ ما فضل كتير للامتحان ، (المشروع تم و اخدنا عليهو درجات كويسة ) الامتحانات كبست و اموري مع حسام ماشة تمام
تذكرو لمن قلت ليكم اخوي كاظم شاكي فيني ؟!!!
اليوم خميس ماشة المكتبة اطبع لي شيت ، مرقتا بعربيتي ، أثناء ما كنت بسوق اتصل حسام ، قالي انا مشتاق ليك و عايز اشوفك قلت ليهو ماشة السوق نتلاقة في ود الشيخ لانو قريب من المكتبة ، ( كاظم كان وراي من مرقتي من البيت مراقبني ) ، حصلت المكتبة و طبعت الشيت ، دخلت المطعم لقيت حسام منتظرني ، قابلني بابتسامة حلوة و دلع سلمت عليهو و قعدتا قالي عايزة شنو ، غنوة= عصير بس ،، طلبنا اتنين عصير و كنا بنتونس و نضحك فجأة كاظم جا داخل المطعم نزل في حسام ضرب لمن عوقو ، و شتايم ، حسام ما دافع عن نفسو نهائي ، كاظم مسك يدي و مرقنا من المطعم ركبني عربيتو و دور ، طول الطريق ما اتكلم لكن كان سايق بجنون و سرعة خيالية ( في قلبي خلاص يا غنوة انتهيتي دا آخر يوم ليك تاني الا القبر يشيلك) ، حصلنا البيت و ما كان في زول غير ماما نفيسة شافت منظر كاظم فظيع و وشو ما يطمن حاولت تتكلم معاه لكن ما اتجاوب معاها ، قاليها يا ماما نفيسة الليلة امشي لعفراء لانو دي شهورها الاخيرة محتاجة ليك اكتر مننا ، خلي الحارس يوديك بعربيتي ، ماما نفيسة مشت لعفراء لكن قلبها ما كان مطمن ،،، بعد مشت ماما نفيسة كاظم طلعني غرفتي و قفل علينا الباب قالي يا غنوة رجعتي علاقتك مع حسام ولا انا فاهم الموضوع غلط ؟!! ،،، غنوة = ( بلآمةو صوت عالي و دموع) مافي حاجة غلط يا كاظم انا بحب حسام و ح يتزوجني بعد يطلق مرتو و الكلام دا ما بعيد ،،،، كاظم ضربني كف ( وقعتا من طولي) قالي غنوة انت عارفة حبك دا اسمو شنو في المجتمع ؟! انت مجرد وسيلة ،، انت عشيقة يا هبلة اصحي يا بت ،،،
● طبعآ كلمة (عشيقة) دي قطعت نفسي و تلفت اعصابي ، عيوني ضلمو ما كنت شايفة حاجة ما كنت سامعة غير كلمة عشيقة في اضاني ، قعدتا اصرخ بأعلى صوت انو انا ما عشيقة زول انا ما عشيقة زول ...........
تاني ما وعيت الا الصباح عاينت في المراية خدي مورم و عيوني حسيت نفسي دايخة قمتا بصعوبة استحميت و لبست عادي نزلتا تحت لقيت ابوي وشو ما يتفسر من الزعل و الغضب ، عاينت ليم كلهم جوة عيونم و بدون خوف ، ابوي قالي شوفي وصلتي نفسك لوين ؟ ،، غنوة ( بكل برودة اعصاب) انتو وصلتوني الحالة دي ما معافياكم كلكم و انا غير حسام ما ح اتزوج ح اقعد ليكم كدا لمن اموت ، مافي زول اتكلم معاي ، اكلتا و رجعتا غرفتي ، كان نفسي اتكلم مع حسام و اطمن عليو لكن مافي تلفون ، قلبتا الغرفة مالقيت اي جهاز ممكن يوصلني لحسام ( جسمي كلو قعد يرجف ما قادرة اسيطر على اعصابي ) رفعت الكرسي كسرت المراية و بديت انزل في الستاير و حالتي كانت جنون رسمي ، اخوي محمد لحقني و حضني ( حضني قوي و كان بحنس فيني و يهديني) لقايت ما نمتا
الصباح لقيت روحي في غرفة محمد ، محمد كان نايم في كرسي جنبي ، ناديت عليو يا محمد .. محمد صحى مفزوع بسم الله مالك ؟!! ،،، غنوة = ولا شي ، مالك نايم في الكرسي؟ ،، محمد = ما حبيت اخليك براك ، خليك مرتاحة امشي اجيب ليك حاجة تاكليها ..... محمد مرق مني و دابي استوعبت الحصل ندمتا شديد ، حسيت الدنيا ضاقت بي ( كنا أسرة سعيدة و متماسكة و بنحب بعض ) التوتر الحاصل دا بسببي ح أصلح اي حاجة ( ضحكت ابوي و ثقة اخواني ) استغرفتا ،قمتا صليت و دعيت بحاجات كتيرة .............
عشقت متزوج{{10}} ❤🔥
بقلمي اسماء محمد 🫶🏻💛
♡♡__✿✿__♡♡
_ بعد صليت ، نزلتا تحت لقيت الأسرة كلها ملمومة حتى عفراء جات لمن عرفت بالحاصل ، سلمت عليم و قعدتا جنب ابوي و اعتذرت منم ، وعدتا ابوي اني تاني ما ح اقابل حسام ولا ح اعمل مشاكل و ح اخلي بالي في قرايتي ، كالعادة سامحوني ،
● بهناك حسام لمن وصل البيت ،، عزة( الدم جاي من وين يا حسام اضاربتا مع منو )؟؟ ،، حسام = يمة مافي حاجة حصلت مشكلة مع صحبي و اضاربنا مع الشباب ، حسام طلع غرفتو حصلتو هبة ، اول مرة يسمح ليها تقرب منو ، ضمضت جرحو و جابت ليهو اكل و قعدت جنبو بدون ما يعترض ......
♧♤ عاينت لوشي في المراية لقيت اثر الكف موجود ( كان باين علي التعب و الهم ، بشكلي دا م ح اقدر امشي الجامعة بغيب الليلة و بكرة يمكن الأثر يروح) ، مشيت على غرفتي لقيتا مطبولة، سألت محمد قالي ( كاظم قال مافي زول تاني يستعمل الغرفة قعد يجهز ليك غرفة تانية باثاث جديد استعيري غرفتي لقايت ما تجهز غرفتك ) حليلو اخوي كاظم قعد يحاول ينسيني بكل الطرق لكن انا ما قادرة انسى حسام استغفر الله ، جاتني عفراء و نصحتني و حاولت تقنعني انسى ، و انا ما كنت سامعة غير حبي لحسام ،، اليوم مر سريع ، الصباح صليت و لبستا للجامعة عملت ميكب تقيل عشان يخفي اثر الكف ، نزلتا سلمت لأبوي قلت ليو وين مفتاح عربيتي قالي تاني مافي ليك عربية محمد يوديك و يرجعك ، ما اعترضتا ركبتا مع محمد جابني لباب الجامعة ، قابلتا إيناس في النشاط و حكيت ليها الحصل معاي و سبب غيابي ، زعلت مني شديد و شاكلتني، و انا ولا هاميني ، همي اوصل لحسام ،، إيناس ما معاي تلفون ممكن تديني تلفونك عايزة اتصل برجعو ليك هسي ،، إيناس = امسكي بس اوع تتصلي ل حسام ،، غنوة = تمام اتفقنا ،، مسكت التلفون و مشيت بعيد من إيناس اتصلت لحسام رد من اول جرس الو ... حسام طمني عليك حبيبي انا آسفة...
حسام = انا كويس مافي حاجة و انت كيف بتمنى ما يكون كاظم ضربك ،،، غنوة = ما ضربني ، كنا بنتكلم عادي كانو ما حصل شي و حبنا ثابت و العبارات الحلوة و الوعود ،،، ( أثناء ما حسام كان بتكلم معاي هبة كانت في الحمام و سمعت حسام و هو بتكلم معاي و فهمت سبب رفضو ليها و زعلت منو شديد) هبة مرقت من الحمام و عيونا ملانة دموع ( بنبرة كلها وجع و خزلان) يا حسام انت قعد تخني انا مقصرة معاك في شنو طالما ما بتحبني لشنو اتزوجتني دي منو العايزة تخرب لي بيتي
حسام = ( كان ساكت ، استمع لكلام هبة ، لمن سكتت ) قاليها اسمعيني يا بت الناس انا ما بحبك ولا عمري ح احبك انا بحب غنوة و انت جابوك لي بالغصب فما تعملي نفسك مرتي ، لو علي بطلقك هسي لكن خايف امي تتبرأ مني ،، قام مشا على الحمام لزاها و دخل
● هبة حست بألم كبير بعد الإهانة الاتعرضت ليها ، مشت لعزة و عبد الله و لامتم ، كانت قعد تبكي و عزة بكت معاها و صبرتا و اقنعتا ما تطلق من حسام و انو ح يتغير و يحبها
♧♤ رجعتا من الجامعة لقيت الغرفة الجديدة جاهزة و الفرش واو ،، بقيت اتواصل مع حسام بتلفون إيناس و بنتكلم يوميآ قدام هبة و قدام اي زول ، مرت الايام و بكرة اول امتحان و انا في قمة الاستعداد و نفسياتي فل .............
عشقت متزوج{{11}}❤🔥
بقلمي اسماء محمد 🫶🏻💛
♡♡__✿✿__♡♡
● اول ايام الامتحان ،، الامتحان كان كويس خالص اشتغلت فوق الممتاز ، بعد مرقنا من قاعة الامتحان اتلمينا الدفعة كلها و اتفقنا نمرق اخر يوم للامتحان نعمل جلسة ثقافية نتشارك أفكارنا و نعمل فقرات شعرية و خواطر و قصص و نتعرف على بعض اكتر ،
بكرة اخر امتحان ،،، يا إيناس محمد اتاخر علي ما تمشي تخليني براي انتظري لمن يجي نوصلك بعداك نرجع البيت ،، تمام ،، إيناس = هسي علاقتك كيف مع ناس البيت ؟ ،، غنوة = تمام و الله علاقتنا رجعت طبيعية و اخوي كاظم فرش لي غرفة جديدة لمن تجيني تشوفيها ،، إيناس = كويس و الله انت الزيك منو عيشي يختي العمر فاني و الحياة ما مضمونة يمكن ما نعيش لبكرة
غنوة = ( لبعتا في ضهرا) دا كلام شنو يا إيناس نحنا ٢٢ سنة ما تميناها نموت لشنو لسع حبيبتي قدامنا عمر و حياة سمحة تاني ممنوع تجيبي سيرة الموت .... ،، إيناس = حاضر يا ست البنات و كسرنا الونسة بضحكة ( وصلنا إيناس لحدي باب بيتم و رجعنا البيت )
♧♤ اليوم آخر امتحان و اخر سمستر دا اليوم المنتظر ٤ سنة منتظرين اليوم دا عسى يعدي علي خير ،، لبست سريعة و مرقتا وصلت الجامعة قابلت إيناس راجعنا سوا قبل الامتحان ، دخلنا القاعة الزمن انتهى ، مرقنا ، كنا ماشين الوسط الدفعة كلنا كدا ، ما شايفة إيناس؟ مافي زول شاف لي إيناس( ما معاي تلفون عشان اتصل يا رب تصبرني) لمحت طارق، يا طارق ،، جاني ،، قلت ليو عايزة تلفون اتصل لايناس لانو راحت مني و انا ما معاي تلفون ،،، طارق = اتفضلي اخدي راحتك
اتصلت لايناس يا بت وين انت؟ امشي اخليك ؟ ،، إيناس = يا غنوة عندي ورق عايزة اوثقو انتو امشو بخلص و بحصلكم، ،، غنوة = طيب ما تتأخري ،، إيناس = حاضر ، دا رقم منو ؟
غنوة = دا رقم طارق ،، ايناس= سيبي العبط ، مع السلامة ،، و دا آخر كلامي مع إيناس للابد .....
وصلنا وسط المدينة و قعدنا على شكل دائرة و بدينا نبرز مواهبنا .... ( يا ربي إيناس مالا اتاخرت؟ ) قمتا و قومتا معاي طارق براحة و سالتو من تلفونو ، اداني التلفون ، اتصلت كذا مرة و إيناس ما بترد رفعت راسي لقيت الناس كلها ماشة على البوابة ،في شنو يا جماعة ، قالو في حادث برة ، قلت لطارق ارح نشوف يمكن نعرف زول منم ، مرقنا و الناس كانت ملمومة شقيت الناس لقيت البت المضروبة ياها إيناس زاتا في حالة مرعبة ( عرفتها من ملابسا لانو وشها ما كان موجود اصلا راسا عبارة عن كومة فتات ) ، رجولي ما شايلني نزلت على ركبي و ما كنت قادرة اقيف ، قربتا منها و مسكتا ايدا ( إيناس قومي حبيبتي معليش عشان سيبتك و جيت إيناس شوفي لسة اليوم ما انتهى و الجلسة في بدايتا قومي نمشي البيت اوريك الغرفة الجديدة ) طارق كان جنبي ، يا طارق قول لايناس تبطل هبالة و تقوم لو جا اخوي محمد ح يسوقني البيت اينااا ....
الحكومة جات و اصلا إيناس كانت ميتة و كنت ماسكة يدها ما قدرتا افارقا ( خلوا مافي زول يقرب منا ح اوديها المستشفى و تصحى عندنا مواضيع كتيرة ما اتشاركناها ) طارق رفعني من الأرض و إيناس الشرطة شالتا ، كنت قعد ابكي بطريقة هستيرية كنت سامعة أصوات لكن ما فاهمة ولا كلمة ...........
● اصعب لحظات حياتي كانت يوم ماتت إيناس و خلتني براي في الدنيا دي ،، قعدتا مع أهلها اسبوع و رجعت البيت لقيت عفراء وضعت جابت بنوتة حليوة سمتا ارجوان بت عسولة و ايديها ناعمات و شفايفا حمرة ،، لشنو مافي زول وراني ،، عفراء = ولدتها يوم الحادث عشان كدا ما خبرناك معليش حبيبتي ،،، غنوة = تمام خير ، عيوني دمعت و قلبي وجعني استغفر الله ربنا يرحمك يا إيناس
● مر شهر على وفاة إيناس و زمن الرحلة جا ، ما كنت عايزة امشي جوني بنات الدفعة اقنعوني و طارق كمان ما قصر معاي كان جنبي طول الفترة الفاتت .
♡♡ بهناك حسام علاقتو مع هبة بدت تتحسن و بقى يعاملا كويس لكن ما بقو زوجين حقيقيين .............
عشقت متزوج{{12}}❤🔥
بقلمي اسماء محمد 🫶🏻💛
♡♡__✿✿__♡♡
♡♡ بعدي عن حسام قربو من هبة بقى يحترما شديد
مر شهر على وفاة إيناس ، في الفترة الفاتت دي نهائي ما تكلمت مع حسام ولا بعرف عن وضعو حاجة ،، كنت قاعدة في السلم قعدة افكر في حسام ، جاني ابوي شايل مفتاح العربية و التلفون قالي حسيتك كبرتي ووعيتي و اثبتي لي انك تستاهلي ثقتي دا تلفونك و مفتاح عربيتك المرة دي ما تخذليني ، باسني في راسي و مشى ،، بصراحة كلام ابوي اثر فيني شديد و بعد موت إيناس عرفت انو الدنيا دي ما تستاهل تزعل ولا تزعل انسان زي ما قالت إيناس العمر فاني( ربنا يرحمك ) ، قمتا صليت ركعتين وهبت لأمي و ايناس سورة يس ، و دعيت ربنا و قلت( يا رب تزوجني حسام لو فيهو خير ،، ولو ما فيهو خير يا رب تنسيني حبو ) استغفرتا و مسكت تلفوني اتصلت لحسام ما رد !! بعد شوية رجع لي كان شايل جواه شوق و حنين لي و انا كمان كنت مشتاقة ليو و فاقداه كتير قالي نتلاقة ، اتفقنا نتلاقة في البستان ، الساعة ٥ لبست عباية سودا و طرحة سودا و لا اتعطرتا (بعد وفاة إيناس ما عندي نفسيات لحاجة ) دورتا مشيت البستان لقيتو منتظرني لمن شاف جا علي و كان عايز يحضني بعدتو مني قلت ليو انت لو عايز تحضني طلق هبة و تعال احضني زعل لكن ما طول في الزعل لانو طولنا من بعض ... سكت مسافة ... قالي = يا غنوة انا م ح اقدر اطلق هبة لانو امي و ابوي ح يتبرو مني و انت برضو اهلك ما ح يوافقو ما عندنا حل غير نشرد ......
غنوة = انت راسك دا فيو حاجة ولا شنو ، لا ، ما بشرد معاك نهائي ...
حسام = اسمعيني نعقد في المحكمة تمام ، عندي اتنين مليار في حسابي بسحبم نطلع برا السودان اي دولة انت عايزاها نكمل حبنا
غنوة = ...... كنت محتارة انا هسي مخيرة بين حسام و أهلي... حسام قدر يقنعني و اتفقنا نشرد بعد تلاتة ايام يعني يوم الخميس ...
● رجعتا البيت لميت حاجاتي المهمة جهزت لي شنطة وحدة و دخلتها في الدولاب عشان ما ألفت النظر ، اتصلت لبتاع البنك اشوف حسابي في كم ،، لقيت فيهو مليار و نص قلت ما ح اسحبو هسي الا يوم اكون مارقة من البلد دي عشان كاظم ما يعرف ، رتبتا اموري كلها ، اتذكرت كلام ابوي الصباح و اتاثرت شديد ، قلت في قلبي ( حليلك يا إيناس كان شاورتك و نصحتيني ربنا يرحمك ) اتذكرت حب إيناس لطارق ، مسكت تلفوني و اتصلت لطارق الوو السلام عليكم كيف حالك؟
طارق= و عليكم السلام الرحمة ، طيب الحمد لله ،، غنوة = يا طارق عايزة اقابلك في حاجة عايزة اقولا ليك ، اليوم فاضي ؟ ،،، طارق = ... بصراحة اليوم مشغول لكن بكرة ممكن ،، تمام الله يحيينا ( بكرة ح اقابل طارق و احكي ليو قصة حب إيناس العاشتا من طرف واحد و بعد بكرة باي يا كسلا و اخيرآ انا و حسام ح نكمل بعض ) .............
عشقت متزوج{{13}}❤🔥
*بقلمي اسماء محمد*🫶🏻💛
♡♡__✿✿__♡♡
♡♡ نمتا و في قلبي ( و اخيرآ ح اكون مع حسام ، واصلا ابوي ما يقدر يزعل مني اكتر من يومين ، بعد نسافر ح اتصل لأبوي و اطلب منو العفو ، ما ح ارجع السودان الا بولدين🤭) صحيت بدري صليت ، اطمنت على شنطتي في الدولاب ، نزلتا شربت الشاي مع ابوي و اخواني ، في قلبي ( حليلكم يا اخواني بحبكم كتير و ربي ما يحرمني منكم دي آخرة لمة لي معاكم سامحوني ) دموعي نزلت بدون ما احس ،،، عفراء = غنوة سارحة و بتبكي مالك؟ ،،، غنوة = (دابي انتبهت لنفسي ) لااا ... اتذكرت إيناس، قمتا سرعة دخلت غرفتي واصلتا بكا ،، شالتني نومة صحاني اتصال طارق الووو ،،، طارق = يا غنوة رايك شنو نتلاقة في القاش انا حاليآ هناك الجو رهيب تعالي ،،، غنوة = تمام، لبست عباية عادية مرقتا قلت لعفراء ماشة السوق اجيب هدية لارجوان، قابلت طارق سلمنا على بعض و قعدنا في العراضة ،،، طارق = بصراحة حتى انا عايز اقوليك حاجة كنت عايز اتصل عليك انت سبقتيني ،، غنوة = حلوو ،، لكن انا اول تمام ،،، طارق = اتفضلي يا ستهم ،، غنوة( الكلمة دي بتكسر و الله ) بصراحة يا طارق إيناس كانت بتحبك من اول سمستر لقايت ما اتوفت و هي بتحبك ما اعترفت ليك لأنها خايفة من الرفض ...... طارق كان ساكت و منزل عينو في الارض و سرح بعيد
طارق = استغفر الله ، انت عارفة يا غنوة؟! انا حبيتك من اول مرة عيوني وقعت فيك حبيتك في كل حالاتك و بكل تفاصيلك ٤سنة و انا بحلم بيك اما ايناس انا ما عمري فكرت فيها لكن بحترما شديد السنين دي كلها دفنتا حبي لمن عرفت انك مخطوبة ، سبحان الله ، دنيا عجيبة
♧♤ طارق قال كلام سمح و منطقي ، طارق عاقل و كلامو موزون
● قصة حبك لي فاجأتني و حيرتني كمان ، انت ما بتعرف كل حاجة عني طيب اسمع ، كنت عايشة قصة حب مع حسام من الطفولة ، خطبني قبل سنتين ، و حاليآ حسام متزوج من بت خالتو هبة ، و انا عايشة زي الطير الضايع .. طارق = سبحان الله ليه سيبتو بعض ؟ خانك؟!! ،، غنوة = حكيت ليو الحصل بالتفصيل ، لكن ما قلت ليو رجعت لحسام بعد ما اتزوج ...
طارق = اسمعيني ، ما تزعلي حسام ما كان نصيب و ربنا كاتب ليو وحدة تانية ولا تلوميهو لانو القسمة بتفرق باي طريقة و تجمع باي طريقة ، ما تنسي العشرة اتمني ليهو حياة سعيدة و ربنا يرزقو زرية صالحة تمام يا ستهم ،،، غنوة حاضر تسلم ( في قلبي دا انسان ولا ملاك ، كلامو عظيم دخل جوة قلبي )............
عشقت متزوج{{14}}❤🔥
بقلمي اسماء محمد 🫶🏻💛
♡♡__✿✿__♡♡
♡♡ مشيت من طارق و أفكاري مشتتة تودي و تجيب ، رحت السوق جبت لارجوان فستان ابيض طقم كامل ، الفستان عجبا شديد لعفراء و قالت تسلمي يا خالتو ، سألت من ماما نفيسة قالو لي ما رجعت من بيت ولدا ، كنت حابة اودعا ، جاتني مكالمة من حسام صمتا التلفون و طلعت فوق رديت الوو ،، حسام = غنوتي ،،، غنوة = عيونة .. ،، حسام = مشتااق ليك . ،،، غنوة = بالاحضااان . ،، حسام = بحبك و بحب عيونك العسلية . ،،، غنوة و انا كمان بحبك ، صحي ح نمشي قطر صح ؟!!
حسام = اي قطر ، عندك فيها مشكلة ؟!! ،، غنوة = ما عندي مشكلة انا كمان حابة نمشي قطر لانو منى بت خالتي مقيمة هناك كدا ما ح احس بالغربة و على الاقل ناس بيتنا يطمنو . ،، حسام = حلوو ، طيب لبكرة بتصل عليك بوريك تمرقي متين و نتلاقة وين!!!!! ،، غنوة = حاضر ربنا يوفقنا ،، فصلت من حسام استحميت و طلعت فوق في السطوح ، متمحنة بعاين للحلة و البيوت و الشوارع فجأة خطر لي كلام طارق راجعت نفسي هل حسام يستحق اسيب اهلي عشانو و هبة تستاهل تعيش ضحية لحبنا ، كنت قعد ابكي و اتنهد و اتذكر كلام ابوي و موت إيناس( كمية من الأفكار ) ضميري انبني شديد ، لقيت نفسي انسانة أنانية بحب نفسي بس احترت بين حسام و أهلي، بعد تفكير عميق اتخذت قرار مصيري ، يا غنوة ما ح اشرد مع حسام ولا ح اتزوجو ما كان نصيب ربي يبدلني بالاحسن .
● بهناك حسام بعد فصل مني كان ماشي على غرفتو عشان يجهز ملابسو قبل ما يحصل الغرفة لمح الباب من بعيد مفتوح حسام = انا ما خليت الباب فاتح و غيري مافي زول بخش غرفتي حصلتا الباب لزيتو براحة ما فتحتو كلو عاينت لقيت هبة نايمة في الارض و حاضنة قميصي ، منظر عجيب لمسني من جوة( هبة المسكينة انت ضحية ، امي و ابوي كانو السبب معقولة بتحبيني قدر دا ) قربتا منها و سحبت قميصي براحة ، حست علي صحت مخلوعة ، اعتذرت مني و مرقت ،، جهزتا شنطتي سرعة ، الليل كلو بفكر في هبة و كيف ح تكون حالتا بعد اسافر ...
♡♡اليوم خميس صحيت نشيطة مليانة امل و قناعة ، فطرتا مع عفراء ، طلعت غرفتي نزلت الشنطة و مرقتا الحاجات الفيها و رتبتم في الدولاب ، انتظرت حسام لمن اتصل قالي تعالي انا منتظرك في الفسحة ، مشيت على الفسحة لقيت حسام منتظرني ، ركبتا معاه ، حسام = وين شنطتك انا ما شايفا؟! ،، غنوة =يا حسام انت ما نصيب ، حسام انا بطلت اشرد معاك رجع لي جوازي و ارجع لهبة ربنا يسعدكم و يرزقكم زرية صالحة
حسام = يا بت جنيتي بطلتي شنو ، ما تخزليني في آخر لحظة يا غنوة انا ضحيت بأهلي و البت البريئة دي عشانك ، ما تقولي كلامك دا انا بحبك غنوة ... غنوة
♧♤ حسام كان قعد يتكلم بطريقة هستيريا من الصدمة حاولت افهمو لكن هو ما مستوعب الحاصل و بقى يهضرب في الكلام ، خفت يعملي حاجة نزلت من العربية ، نزل بوراي حصلني و حضني شديد قالي يا غنوة لو سيبتيني ح اموت حضنتو علي شديد و قلت ليهو نفس الكلام القالو لي طارق ، سحبتا ايدي فتا خليتو واقف في الفسحة ، حصلت البيت مسكت تلفوني حظرت رقمو و حذفتو ، كان مشهد مؤلم جدآ و بكيت لمن دموعي نشفت ، استغفرتا و قمتا صليت ركعتين و دعيت ربنا يصلح حالي و ينسيني حسام ،، تلفون رن ، لقيت المتصل طارق الو ...........
عشقت متزوج{{15}}❤🔥
بقلمي اسماء محمد 🫶🏻💛
♡♡__✿✿__♡♡
_ طارق = الو كيف حالك ؟ ،، غنوة طيبة الحمد لله و انت كيف ؟؟ ،، طارق = بخير الحمد لله ، غنوة ،،، غنوة = نعم ،، طارق = بصراحة انا بحبك و عاوزك تكوني حدي . ،،، غنوة = كنت ساكتة لانو ما عندي رد . ،، طارق = ما تفكري كتير عمومآ التخريج بعد اسبوع جهزت ليو شنو ؟!!! ،، غنوة = ما جهزتا حاجة بشوف إيناس جهزت شنو و برجع ليك ....... ( عيوني دمعت اتذكرتا إيناس ميتة ، ) فضلنا ساكتين في الخط مسافة .... طارق = إيناس ربنا يرحما ، لمن تجهزي حاجة اتصلي علي .
● بهناك حسام كان زعلان و غضبان رجع البيت متأخر لقا هبة راقدة في الصالون ، حسام = هبة مالك ما نايمة في غرفتك ،، هبة = كنت منتظراك ، مالك الليلة اتاخرتا ؟! ،، حسام = شغلي كتير ،، هبة = كنت براي في البيت ما جاني نوم خليت ناس خالتي ينومو بعداك نزلتا رقدتا على أمل تجي داخل ، نمتا بدون ما احس على نفسي ،، حسام = خلاص جيت انا ارح نومي في غرفتك وصلا غرفتا و رجع غرفتو ، نفس اليوم ما نام نهائي من كترة التفكير
♡♡ التخريج باقي ليو ٣ يوم ح امشي الجامعة اشوف الوضع و التجهيزات ، حصلتا الجامعة اول زول قابلتو طارق سلم علي ،قعدنا مع بعض و اختار غنية يزفوني بيها و باقي المواضيع الشركة بتعملو ، رجعتا البيت لقيت عفراء و محمد سالتم من كاظم و ابوي و ماما نفيسة قبل ما اقفل خشمي ابوي و كاظم جو داخلين قعدنا كلنا سوا و قلت ليم ، طبعآ التخريج بعد تلاتة ايام جهزو الهدايا اوع يجي زول ايدو فاضية ، محمد = 😂دي شحدة ما هدية ،، غنوة = سميها على كيفك ، يلا انا طالعة فوق البس الفستان و اعمل بروفة.....
♧♤ و اخيرآ الليلة التخريج عاملنو في الاستاد الأولمبي، جيهو و زينو بورود و بوالين و أضواء ملونة، مباالغة ( فقدتا إيناس شديد ، ) التخريج بدا و كان ظاابط ، ندهوني مرقتا مع ابوي و اخواني و ماما نفيسة الغنية كانت هادية و مؤثرة ، ابوي حضني و بارك لي و اخواني برضو ، و جابو لي هدايا عدا اليوم علي خير ،، تاني يوم صحيت فترانة ، كنت حابة اكمل نومي لكن الحماس حق الهدايا غلبني ، فتحت اول صندوق لقيتو من عفراء جابت لي بدلة و سلسل فضة فيهو فراشة و ابوي لقيت في صندوقو رسالة غرامية قديمة كان مرسلا لأمي( قريتا و دموعي نازلة كانت رهيبة ، ترا ابوي ما هين ) و محمد جاب لي ساعة دهب و جهاز لابتوب جديد ، اخر صندوق من اخوي كاظم لقيت فيهو تذكرتين للإمارات بعد اسبوع ،، صرخت باندهاش نزلت تحت حضنتا عفراء و ابوي و محمد و كاظم و شكرتهم ،، وين ماما نفيسة ما جابت لي هدية ،،، ماما نفيسة = صحن سمبوسة بجبنة مبروشةو شمار أخضر عليها ( بحب السمبوسة البتعملاماما نفيسة ) على كدا استلمت هدية من الكل الا حسام 😔
# تلفوني رن لقيت المتصل رقم غريب الووو....................
عشقت متزوج{{16}}❤🔥
بقلمي اسماء محمد 🫶🏻💛
♡♡_✿✿__♡♡
~ الاخيرة ~
● تلفوني رن لقيت المتصل رقم غريب الووو ،، الو غنوتي، لقيتو حسام (حبست ضحكتي) نعم حسام ،، حسام = الف مبروك التخرج حياة مهنية موفقة ،، غنوة = تسلم .... اممم هبة كيفها ؟!! ،، حسام = طيبة الحمد لله ، و انا ؟!! ،، انت مالك ؟! ،، حسام = ما عاوزة تعرفي حالي ؟ ،،، اكيد انت كويس صحي وين هديتي ؟ حسام = هديتك جاهزة برسلا ليك مع اختي ،،، تمام تسلم ، مع السلامة ( قفلت الخط سريع كنت مبسوطة على كدا فرحتي اكتملت ) ، اتصلت لطارق و قلت ليهو مسافرة الإمارات بعد اسبوع ، الخبر ما عجبو قالي ( ببرود ) توصلي بالسلامة و فصل ، ، عمومآ انا في قمة الانبساط __ الليلة ماشة اسلم لأهل إيناس و اتفقدم شوية ، مشيت مشواري ، لمن رجعتا سلمتا( السلام عليكم) مافي زول رد لي قاعدين يقولو في شنو ما عارفة ، سلمت بصوت عالي بعداك انتبهو لي مالكم؟!! ،، عفراء = الف مبروك يا عروس ،،، غنوة = عروس شنو هي انتو بتخططو لشنو؟! ،، عفراء = جا واحد أتقدم ليك و نحنا وافقنا ،،، غنوة = انتو بتستهبلو ولا شنو انا ما عايزة اعرس هسي ( اضايقتا شديد) دا منو الاتقدم لي ،،، عفراء = طارق زميلك في الجامعة ،، ختيت ايدي في خشمي سجمي طارق ، استغفر الله ، طلعت غرفتي و نبهتا اوع زول يلحقني ، قبل ما احصل الغرفة اتصل علي الوو ،، اي انت قصدك شنو ، كيف تتقدم لي بدون علمي انت فاكر نفسك شنو ؟؟! ... طارق = ( بهداوة) اسمعيني يا غنوة انا عاوزك على سنة الله و رسوله الغلط وين؟! ، انا بحبك و عاوزك في حياتي ،ح اعمل اكتر من كدا عشان تبقي مرتي يا غنوة انا عارف جرحك جديد لكن ( شفاء حب ، حبآ يزوله) انا عارفك ما بتحبيني لكن ممكن تجربي ، الحياة ما بتقيف على زول ، انت لازم تنسي حسام و تحبيني ، انت بس اديني فرصة و انا ح اثبت ليك نفسي ،،، غنوة = بصراحة كلامو صح ، دايمآ بسكتني ( لساني اتربط) قلت ليو انا مسافرة بعد اسبوع ماشة بعيد و احتمال ما ارجع الا بعد تلاتة سنة ،، حسام = عارف بموضوع سفرك انت و اخوك محمد صح ؟!! ركزي معاي اتفقتا مع ابوك على اساس بكرة العقد و المناسبة قبل السفرة بيوم و السفرة في محلها و بدل اخوك محمد انا ح اسافر معاك وقع ليك ، انت بس وافقي و اليحصل كلو لخير ، الو غنوة
غنوة = حسيت نفسي في حلم طارق مالو مستعجل قدر دا و كمان ابوي وافق حتى كاظم ما اعترض ، التقول سحر ، فكرتا براي بمزاج بدون اي ضغط ، وافقتا على عرسي من طارق في الفترة القصيرة دي على الاقل ما ح افكر في حسام
♡♡ اليوم العقد و الدعوة بعد ٤يوم ، مرت الايام اسرع من الخيال ، عملنا عرس بسيط عزمنا فيهو الاهل و الجيران ناس بساط العرس تم على خير و الطيارة بكرة الساعة ١٢ م ، بعد سافرنا ، تاني يوم جات اخت حسام و جابت الهدايا سألت مني عفراء قالت ليها غنوة عرسوها و حاليآ في الإمارات، عفراء اتصلت علي ورتني بجية اخت حسام و الهدايا الجابتم ، قلت ليها أديم لأي زول ،،،،،
♡♡ بهناك اختو لحسام قالت ليو مشيت ما لقيت غنوة لقيت اختا قالت لي غنوة عرسوها و امبارح سافرت الإمارات ،، حسام كان مذهول و متفاجيء نفس اللحظة الكلام وجعو ، حسام اتأكد انو خسر غنوة للابد ، حسام حس نفسو مخنوق في كسلا فقرر يسافر ، سافر الخرطوم اخد فيها اسبوع عقلو رجع ليو و قرر يبدأ صفحة جديدة مع هبة ،، ♡♡ حسام رجع بيتو بعد سلم لناس امو مشا بيتو لقا هبة قاعدة في السرير بتقرا في كتاب نزل على ركبو ، هبة اتخلعت بسم الله مالك يا حسام ،، حسام = ي هبة سامحيني اذيتك و جرحتك كتير و ما اعتبرتك مرتي وما اديتك ولا حق من حقوقك دا غير المعاملة السيئة و اسلوبي كان وسخ معاك ، عافي لي يا هبة و انا بوعدك نبدأ من الصفر ، ح اسعدك ح نعيش حياة طبيعية زي كل زوجين .... هبة ( كانت مسكينة و حنونة رفعتو من الأرض و حضنتو و همست ليو في اضاني، بحبك يا حسام و ، مسامحاك دنيا و آخرة )
♡♡ و انا بهناك عايشة احلى ايام حياتي طارق مرة رومانسي و بحب يجضمني على طول ، مدلعني للآخر، حبيتو بدون سابق إنذار، حسيت نفسي اول مرة احب ،( نسيت حسام و حبو المجنون) هسي مبسوطة مع طارق و اتمنيت لو اتعرفت عليو قبل حسام و حبيتو لانو طارق راجل و انسان بسيط من جوة حتى التفاصيل الصغيرة الفيهو بتعجبني كفاية انو بحبني ،،، مرت سنة على زواجنا جبتا لينا ولد سميناه مكرم ، قررنا ننزل السودان في الشهر الجاي، رتبنا أمورنا كلها و اخدتا هدايا لاخواني و اخوان طارق ، نزلنا السودان وصلنا كسلا ،، في الخريف موسم القاش و ريحة التراب و لمة الناس و القراصة بملح ورق 🤭 كمية من الذكريات السمحة ،، لقيت أبوي شديد زي ما خليتو و اخيرآ كاظم خطب و عرسو بعد شهر و محمد طور نفسو في مجالو( هندسة سيارات) بقى زول مهم ، ارجوان بت عفراء قعد تتاتي و بتكلم بسيط و ماما نفيسة رحلت بيت ولدا بعد سافرتا ،،، دخلت غرفتي القديمة لقيتا زي ما هي اتذكرتا ايامي فيها و ضحكتا كتير على غنوة القديمة( طايشة و متهورة) مشيت سلمت لأهل إيناس ، فرحو لجيتي ،
♧♤ الفضول قاتلني حابة اعرف حسام حياتو مشت كيف بعد رحت منو ، قررت امشي ليو في البيت ، مشيت لقيت ناس بيتم كلهم قاعدين سوا ، ضيفوني و دي اول مرة اشوف هبة في حياتي و اتعرف عليها ، اصلا الأسرة كلها بتعرفني الا هبة ، حسام أشر علي و قال لهبة دي غنوة سلمت علي بابتسامة ما شاء الله حامل في الشهور الاخيرة كمان حملها بارز هبة طلعت مزة و لونا افتح من لوني سبحان الله ،،، هبة = اسمك حلو يا غنوة حاسة نفسي سمعتو قبل اليوم !!!!
غنوة = لا نهائي لانو انا البت الوحيدة الاسمها غنوة في كسلا دي كلها .❤️🤍❤️
هكذا الدنيا نزولآ و ارتحالاااا❤️🤍❤️
كےـل آلود سےـووومےـة🫶🏻💛
التسميات
روايات درامية
ابداع والله استمر في النشر👏👏👏👏❤❤❤❤❤❤❤👌👌👌👌
ردحذف