سوداريلا
بقلم_رؤي_حسن_علي
#سوداريلا 《01》♡
#بقلم_رؤي_حسن_علي
♡خيالية♡
حلم البنت السودانية معروف ، ودي قصة بنت اتمنت ولقت ♡♡♡ بس بعد ماضاقت المر ♡♡♡
(سودانيز ساندريلا)
عشقتا طيفك قبل القاك
يا الساحرات عيونك ...
وقلبي معاااااااااااك ....
طول عمري بحلم باليوم الذهبي يوم البس الابيض ، وامسك يد حبيبي وراجلي وندخل سوا علي بيتنا .. وسط الزغاريد والبخور طاقي وفايح حوالينا واهلنا ، كل الضحك والبسمة ماتفارق جنا وامو واخو وباقي الخلق تنطق شفاهم سعاده وريده تملي اليوم فرح وسرور ،،، وبعيد ياعكننة ♡♡♡
طلت نسايمك ، يايما علي
متل السحاب يمشي ..
ويبل ريق الارض عطشانه
..
..
..
..
..
حليل ابوي مشا وسافر
افتش فيهو ليل ونهار
والفي قلبي ليهو ...
سنين عمر ماتكفي بوح ♡
انا سندس ،،، ساكنه في الجزيرة 😍 ... ساكنين جمب ناس طيبين .. وبيناتنا العشرة بلا كشرة 😍😍😍 وحيده امي السميحة ،،، عايشين برانا في بيت ملاكي ،،، ابوي سافر من قبل اتولد ، وتاني امي ماسمعت عنو لحدي الان .. ناس يقولو مات ...نلس يقولو شرد ، ناس يقولو ممسوك في سجن 💔
ما شفتا ابوي ولا عشتا معاهو عشان اضوق جد مرة ...
بس العاشتو امي ، كفاية علي قليبي يعيشو .. ولمن عيوني تشوف الدمعه نازلة في وش امي ، ببكي قهر وبعرف قيمه الراجل وسط اهلو ... وفقدتك يا ابوي 💔
عمري 17 سنة شالوني ، جامعه الجزيرة طب 😍 ،، ودخلتها بي نسبتي الحمد لله ❤ ... امي شغاله استاذة في روضه وبنبيع الداندرمة والطعمية ،،، ومرات الكسرة ... بحب اساعد امي في اي شي 😘 ،،، وياما جوني عرسان بس رفضتهم ، مافي زول دخل راسي .. وخصوصا من العايشاهو عن ابوي والبحسو في عيون امي غير مفاهيمي
قبل ما انزل جامعتي بي اسبوع ،،، مشيت الدكان اجيب حاجات الاسبوع للبيت ،،، لاقاني ولد جيرانا ... سلم علي : سندس اذيك يابت ، كيف اخبارك ؟ رديت ليهو تمام الحمد الله ... المهم ما اشتغلتا بيهو كتير ، ومشيت وقفتا قصاد سيد الدكان ، وسلمتا عليهو " ياعمو زكريا اديني حاجات الاسبوع دي ، ومديت ليهو الورقة مكتوب فيها كل الاحتياجات ❤ .. وبعد شلتا الحاجات ، وماشه خلاص ، لقيتو ولد الجيران لسه واقف ومنتظرني من بعيد 😳 طبعا خفتا وبقيت بمشي براحه براحه .. وشي انزل كيس واشيلو تاني ، وصراحه بقيت باخر في نفسي ،،، ماعارفة ليه ، بس جد خفتا شديد 💔 ،،، حسيت بيهو بدا يمشي ، وانا بديت امشي علي حسب سرعتو ، عشان يكون بيناتنا مسافه كبيره .. ووترني شديد ياخ 💔 فجاة حسيت بيهو نزل زي الداير يشيل حاجه من الارض ... خفتا ووقفتا 😳 بعد دقيقتين حسيت بيهو ماشي قمتا مشيت عادي ،،، بس لمن وصلتا المكان الكان واقف فيهو ولد الجيران داك ،، اشوفو ليكم كاتب رقم التلفون بتاعو بالخط العريض في الشارع 😒 ... طبعا ماعرفتا اعمل شنو ، غير اتجاهلتا الموضوع ومشيت سريع رجعتا البيت ❤...
امي لاقتني وانا داخلة علي البيت ، سجمي يابتي في شنو مالك وشك مختوف كده !؟ ... طبعا بقيت بهدئ في نفسي وبقول ليها ، مافي حاجه يا امي بس لاقيت كلب في الشارع ،،، امي قالت لي " ادخلي سريع يابت النقفل الباب " 😅😂 امي طلعت جبانه اكتر مني 💔😫 .. المهم دخلتا جوة وبقيت اساعد في امي ،،،،
بالمساء كده كنتا بكنس في الحوش وبرش فيهو ، جاتني امي وقالت لي نحنا ماشين الخرطوم بعد يومين عرس بت اختها ،،، طبعا اتخلعتا وبقيت اقول لي امي " والجامعه والتسجيل وحاجاتي اكملهم متين " امي قالت لي يابتي كللها يومين وبنرجع ،،، اليوم داك نمتا وانا زهجانه وشايله هم الجامعه الماجهزتا ليها ، والسفر برضو ، وبيني وبينكم الخرطوم مني ليها قريب التلاته سنوات ما دخلتها ...
--------------------------------------
#سوداريلا 《02》♡
#بقلم_رؤي_حسن_علي
تاني يوم صحينا بدري عشان نسافر انا وامي الخرطوم ، وفعلا ركبنا الباص ، ونحنا في الطريق بقيت سررررحاااانه برة الباص ، وامي نايمه يحليلا تعبانه ومرهقه لمن حنيت عليها 😰 ، وخليتا ترقد في كتفي ،،،
طبعا علي هذا الحال لحدي ما وصلنا الخرطوم ،،، واول مانزلنا ، لقيت ولد خالتي اخو العروس واقف لينا ،" وانا طبعا بكرررررهوا شديد " ... جا سلم علينا وركبنا عربيتو """ طبعا امي ركبت قدام ، وانا علي سوء حظي ركبتا وراهو طوالي " وهو السخيف يشيل ويصلح المراية 😒 ويعاين لي " غياظ خلاص 😡👊 ،،، طبعا انا قاعده في النار ، متييييين نصل 😫 التقول كمان بطيق ناس بيتهم " بس طللعوا خالاتي وحبوبتي 😍 " تاني ماعندي حاجه لي زول 👊..
وصلنا بيت ناس خالتي " ساكنين في كافوري " ... اول ما نزلنا لقينا الخيمة الماخمج 😍 والناس اللزيزة الرايقة ❤ ،،، طبعا كانو الناس كتااااار شديد ناس اهلنا ، والجيران ، واصحاب ولد خالتي الغياظ " اصحاب ياخ 😍😅 " ... المهم وسط الجوطه دي فتشتا علي خالتي ، مشيت سللمتا عليها ، طوالي خالتي مسكتني من يدي ودخلتني غرفه بتها امل ، عاد امل ماشاء الله 😍 اصلا هي قرررض 😍 ،،، ومعا الجلخه والقفلة ماشاء الله كانت نااااايرة وحنتها رهيبة 😍😍 واوووول ماشفتها قلتا ماشاء الله تبارك الله 😍😍😍 .. وهي زولة عسسسل جات جارية علي وحضنتني وقالت لي سندس العسولة مشتااااقين 😍😘 ... سلمنا علي بعض ، ويحليلا شالت شنطتي دخلتا لي الدولاب حقها 😘 وقالت لي اتفضلي اقعدي ، طبعا قعدتا في الكرسي ، بقيت بعاين للبنات المعاها ، عالم تاني ، شي بناطلين وشعر فاكي ولبس انسسسوا بس 😍 وانا حاسة اني زي العبارة الشاذة 😂😂😂😂 لبسي حلو 😅👊 بس ما لي درجه فك شعر ولبس مجبص ، ههههه ... طبعا عندها صحبتها فقرية كده اسمها سامرين بتعاين لي من فوق لي تحت ، وتشيل وتسال في امل ، دي بت خالتك انتي متأكدة ؟! .. احححححي طبعا من شده ما زهجتا طلعتا قعدتا في الهول مع الغرباء 💔 !
وهاك يا الابنوس ...
جيب لي فانوس ...
ارميهو للعالي ....
عشانك يا الغالي ....
اتمنيتك قبل كل شي ....
تكون دايما محور دنيتي...
وشايفه الورود علي فرشتي...
قبل ما انوم ودي دايما امنيتي ...
تكون جمبي ...
وسند ضهري ...
ضهري المايل وانتا الشايلني فوق راسك ...
يا السمحات عيونك ومشمماني انفاسك ...
اليوم انتهي طبعا بي جوطتو ... ومشيت نمتاااااااااا 😅 مايفوتكم في الكنبة وفي نص الهول ، ومنظري كان بيش شديد 💔 ... صحيت الصباح ومسافه استحميت ولبستا لي فستان لونو كبدي ومطقمه 😍 وطبعا مابعرف اعمل مكياج ، جاتني بت خالتي المتزوجه اخت العروس 😅 قالت لي الليله مزة كده وسمحه لازم اظبطك ،،، غايتو 😂 دخلتني غرفه المكياج ،، غرفه صغيرة قصادا بلكونه ، فيها مراية وفيها تسريحه وفيها درج كبيييير بي درجات زي السلم كللو مكياج ، حاجات كده رهيييييبه 😍 وفتحت الغرفه بي مفتاح 😂 ،،، اول ما دخلتا عاينت لي وقالت لي فكي الضحكة " عشان قافلاها صح ياسندس !؟ .. يابت دي اسمها الغرفه المحرمة ، اختي ماعندي حاجه ليها 😅 ... ضضحكتا وقلتا ليها خلاص تمام 😍 ... غاااايتو جيييييهتني وبعداك طلعتا وبقيت شغاله مع ناس امي وخالتي والضيوف خلق خلق كتييييرة ماشاء الله 😫😳😍 طبعا من الفطور الناس قاعدين ، والاكل جااااهز ، ونحنا شغالين ضيافه " شاي " قهوة " عصير " موية " ولحدي لحظه العقد ماشاء الله ما وقفنا 😍 بعداك قبلنا علي الخبايز والحلاوة والبلح وزعناهم علي الضيوف ، وادينا الاولاد حق الرجال "" جد جد ماشاء الله لمة حلوة شديييد كانت 😍❤
لمن جا المغرب دخلتا الحمام استحميت ، وطلعتا غيرتا ملابسي ولبستا فستان بيجي حلووووووووو ،،، وتاني دخلوني الغرفة المحرمة 😂👊...
--------------------------------------
#سوداريلا 《03》♡
#بقلم_رؤي_حسن_علي
خطاوي الشوق وقت جابت حنين
اريتني شفتو ومابقيت اسال متين !
بعد جهزنا كلنا ، جابو باص الوالي ، والعرس كان في الصاله الذهبية ❤ ،،، طبعا راكبة في البص ومبسوووووطه شديد 😍 الناس شغالين يزززغردوا ويسيروا في امل ❤ وانا سرحاااانه ومبسووووطه ،،، شويتين كده وصلنا الصالة ودخلنا ،،، اول مادخلتا جاني احساس حلوووو شديد 😍 اتمنيت انو دي تكون صالة عرسي .. اتمنيت اتزوج ، افرح ، اطير من كتر السعاده الحاسة بيها 😍😍😍😍 ، فجاة وانا سرحانه وواقفه في نص الصالة ، بتاع الكاميرا الثقيل قال لي 😒 " عن اذنك يا اصلية ساده الطريق " 👊😒 ،، طبعا والكلام ده حصل واصحاب ولد خالتي 😍 قاعدددديييين قصادي ، اححححي اودي وشي وين ؟ .. فجاة وانا ماشه ، جا ولد خالتي البكرهو ، مسكني من يدي وجراني دخلني لجوة جمب تربيزة فاضية 😳 وقال لي اقعدي 😒 قلتا ليهو ماقاعده ياخ 😡 ... طبعا جا قدامي وفكا يدي " انتي ياسندس شايفه نفسك علي شنو ؟! ياخي خلي السلام خلي الكلام انا ولد خالتك ، ساي ابتسامه ماف ! يابت الناس انا قاتل ليكي زول 😡 !" صراحة انا زودتها شديد 😬" .
.طبعا بقيت بهدئ فيهو ،، يا حسين انا ماقصدي ،، طبعا مشا خلاني وانا بتكلم ! وانا بكره الحركة دي شديييييد 💔 ،،، كرهتو زياده الكلب 😒 اتفوووو عليهو 💦 .... حيوان ... وشغاله طبعا بطنطن والساعه الاتلفتا وراي ودايرة امشي ،💔 قومي ياسندس اطقشي ليك واحد كده بس ، استغفر الله " النوع البخليك وانتي صايمة تقولي اللهم اني صائمة داااااااك 😂😂😂😂" وعلي خيبتو شايل بارد وبشرب فيهو وفيمتو .. غايتو البدلة والقميص بقو في خبر كان 😫😅👊 وانا دايرة بس اتحشر في حفرة ياخ 💔 ...وشغاله اقول ليهو اسفه ماقصدي ياخي بس ، معليش اعزرني !!! وهو الساعه العاين لي من فوق لي تحت ومشا 😳 ... وانا 😳😳😳 ... طبعا بكل طيب خاطر 😬 اتلفتا عليهو وقلتا بصوت عاااالي " تستاااااااهل 😒" ومشت شفتا لي تربيزة قعدتا فيها وانا خلااااص 💔 زهجتا " ...
طبعل الجوطه الجوطه ..الناس الناس 😫 وانا اشتقتا خلااااص لي بيتنا 😍 ولي حلتنا 😍 ياااااااه جد اشتقتا لي ريحه حوشنا 😍 متييييين ينتهي العرس واتخارج ياخ 💔😫 ...
طبعا العروس جات زي الساعه 10:30 وكانو الفنانين تلاته كل واحد نص ساعه 💔 ماف داعي اوريكم " كلو بزخ في بزخ " ايوة وكان عندهم اوفرنايت للجرتك بي انصاف 😍 " بحبها يااااخ " غايتو انطربتا 😍😍😅 واتبسطتا ومزاجي اتعدل .بعداك مشينا ركبنا الباصات ورجعنت علي البيت ... اول ماوصلتا مشيت بقيت برتب في شنطتي 😅 مستعجججلة 👊😂 ،،، امي جات قالت لي بتعملي في شنو يابتي ؟ نحنا حنسافر بعد بكرة ، يعني باعتبار اليوم ده كلو لانو بدا ونسافر اليوم البعديهو 💔 ....وانا طبعا وشي بقا كده 😡 وقلتا ليها حاضر ، مشيت صليت العشاء ورقدتا نمتا وبتقلب الليل كلو 💔
تسرح في عز بكاك ...
يجيك السمح جكاك ..
زي شافع الكورة ،،، يجري وراااااك♡
صحيت تاني يوم الساعه 12 😫 والله كنتا تعبانه ومرهقة شديد وقمتا بي صداع فظيع 😫 دخلتا الحمام استحميت واتسوكتا وصليت الصبح 😰 ومشيت عشان اشرب الشاي ،،، الاقي ليكم منوووو 😒 ... الولد بتاع الفيمتو 😍😍😍😍 ماتقولو مستهبلة ،،، ياخ ود غايتو استغفر الله 😫 ... مشيت علي جمبتي اليمين جا وقف قدامي ، مشيت شمال وقف قدامي برضو ،، طبعا اتخلعتا 😳 مددا لي يدو 😍 ... انا من الخلعة ماقدرتا اسلم ،،، سلم علي بالغصب 😍 وقال لي انا مابعاتي 😂 !" بعاتيه انا وبعاتي حسين وبعاتي ولد جيرانا ، انتا يا يمما خليك ساي 😍😂" طوالي ابتسم كدا وقال لي انا اسمي عمر ، طوالي ابتسمتا ليهو وقلتا ليهو " انا سندس " عاين لي كدا وغمز لي 😳 ومشا وهو ماري بي جمبي قال لي عسسسل 😍 ... " وانا قلبي قال شحححححححح😂 " مشيت بترتع قررربتا اقع ، ولحدي ما وصلتا المطبخ حيلي ما شايلني 😂💔..قعدتا لي في صفرة وكبيت شاي وانا بشرب في الشاي وسررررحانه ،،، لمن امي جات خلعتني قالت لي ، من متين بتاكلي اليانسون ، شايفاكي كملتي الصحن 😂 ... انا طبعا اتخلعتا وماعرفتا اردا ليها اقول ليها شنو 😂 " بقلبي كان كان بامية ناشفه كنتت شربتها بالشاي في الساعه دي "
سكتا يابنات امي عاد 😂 اقول شنو ،،، ابتسمتا ليها ، ومشيت قعدتا في غرفه بت خالتي المتزوجه ،، لقيتا طافية النور 😍 منومه اولادها 😘، وفاتحه المكيف الهمبريب 😍 وانا مشيت شلتا لي مصلاية فرشتا في الارض ، وشلتا معاها مسند ورقدتا ، ونومه واحده ما صحيت الا المغرب 💔😬.
صحيت لقيت ناس البيت كللهم نايمين 😂 من تعب العرس .. وانا قدر مافتشتا لي لي موضوع اشغل نفسي بيهو ما لقيت ، في النهاية فتحتا التلفزيون وقعدتا احضر لحدي الساعه 2 صباحا حتي نمتا ♡
--------------------------------------
#سوداريلا 《04》♡
#بقلم_رؤي_حسن_علي
طبعا كلها ساعتين النمتهم وامي صحتني 😢 قمتا طبعا مافاهمة اي شي ؛ وطوالي دخلتا استحميت ولبستا وودعنا ناس البيت وطلعتنا 😍 مشينا علي الموقف ، وركبنا ،،، طبعا وصلنا ولد خالتي 😒 ،،، وقبل اركب مددا لي ورقة وغمز لي🙄 طبعا اتخلعتا شدييييد 😐 ،،،
بعد الباص اتحرك كالعاده امي حبيبتي نااااامت فوق كتفي 😅 يحليلا من التعب كمان حالتا انسسسوا بس 💔،،،
طبعا النومه شالتني برضو ،، لحدي ماوصلنا ،،،، اوووول ما نزلنا ركبنا لينا ركشة للبيت 💕،،،
طبعا انا وامي من التعب مافي زول اتكلم مع التاني اصلا 💚😅 ،،، وصلنا البيت وطوالي اي زول فينا مسك ليهو سرير ونمننننا 💚،
تستاهل الكد والتعب .... ما انتا نور العين ...
عمرك شقيتو عزاب ،،،، ما انتا كل الزين ...
طبعا انا وامي صحينا اليوم داك ,, بالمساء قريب الساعه ١١م ،،، مشيت استحميت وجيت عملتا لينا حاجه نا كلا انا وامي ،، وشربنا كمية من العصير ،،، بعداك مشينا صلينا كل الصلوات الفاتتنا 😅 ماما بعد انتهينا استأذنتي مشت نامت وانا مشيت برتب في دولابي وطلعتا حاجاتي بتاعت السفر ،،، الساعه اللقيت الورقه الاداني ليها ولد خالتي 😳 الساعه الفتحتها ،لقيت ولد خالتي كاتب لي رقم تلفون وما معاهو اي شي 😳 ،،، طبعا بقيت محتارة شديد من الرقم " وبقيت شغاله معا نفسي يارب ده حقو ؟ ياربي ده حق الولد السمح 😅😐؟ طبعا من كتر التفكير اذان الصبح اذن ،،، غايتو العملتو مسكتا الورقة جدعتا في الوسخ ،،، ومشيت صليت ونمتا 💔
صحيت قريب الساعه ١٢، مشيت لي امي ،لقيت مرة الجيران قاعده معاها في السرير ، سلمتا عليهم ومشيت انضف البيت ،،، انتهيت من النضافه ولقيت لسه المرة قاعدة 😒 وتشيل وتعاين لي 😩 المهم بعد طلعت لقيت امي بتطنطن "غايتو لايوقة خلاص " وانا طبعا فكيت الضحكة 😂 وامي قرصتني وقعد تضحك ،،، طوالي اتلفتت علي وقالت لي ،،، شوفيها كمان دايراكي لي ولدها , 🙄 طبعا اتخلعتا شديد ، بقيت بسال في امي ياتو ولد ؟ لمن وصفتو لي ، اتذكرتو طلع الولد الكتب لي رقموا في الارض داك 😒👊،،، يلا في اللحظه ديكي بدون ما احس، قلتا لي امي " انا ولد خفيف بكتب ارقامو للبنات في الشارع ما دايراهو " امي طبعا اتخلعت 😳 وقالت لي شنو !!!!؟ الولد القليل ادب الما مربي اصلو ما بديك ليهو 😡 """ وانا طبعا بضحك ؛؛ بعداك بقينا نتونس انا وامي عادي ...
طبعا انا زولة ما اجتماعية شديد ،، يعني ما عندي صحبات من الحلة طوالي انا معاهم ،،، وامي شغاله تقول لي " يابتي صاحبي ليكي بنات نافعات في الحلة دي تقضي معاهم زمن حلو بدل الوحدة القاعده فوقا دي ،،،، وانا طوالي سلمتا عليها في راسا " با امي الجامعه قربت بصاحب من هناك " ومشيت خليتا ،،، وهي شايلة همي ☺
اليوم داك بالمساء كده ، كان عندنا بكا ، جيران جمبنا حبوبتهم ماتت 😰😢 طبعا بالخلعه انا وامي اتلابسنا التياب وجرينا والحلة كللها جارية محل الكواريك 😰 ،،، اتخيلو طلع بيت الولد القال دايرني قبيل ده ،،، طبعا اتأثرتا شديد والله العظيم ،، لقيتو بيبكي بي طريقة قطعت لي قلبي 💔 ،،، وانا دون ما احس دموعي جارية عشرة عشرة ،،، اححححي ما بعرفها لكن وجعتني من الوصيف ،،، لاحول ولا قوة الا بالله ، انا لله وانا اليه راجعون " غايتو اليوم داك جو كترة خلق مالغه ياخ ، واشتغلتا معا البنات الفي الحلة ، حتي اتعرفتا علي واحده اسمها ملك ،،، وطلعت بتبقي لي ناس البكا ،،،
طبعا لمن رجعنا البيت ، الساعه ٣ص جات ،، مشيت طوالي نمتا ، وخليت امي دخلت معاها نسوان يبيتو معانا عشان الزحمه في بيت البكا ،،،
صحيت الصباح علي اصوات النساوين بشربو في الشاي وبتونسوا ، مشيت سلمتا عليهم ، واستحميت ولبستا لي قميص هزاز كده ،،، وانا ماشه في الحوش ، اشوف لي الزول القال دايرني داخل وشايل ليهو شاي 😳 مدخلو جوة ،،،قال لي السلام عليكم ، رديت السلام ومشيت سريع سريع لبستا توب ،،، وجيت اساعد امي ،، لقيتا بتقول ليهو ،،، يا ولدي رجع الشاي لاهلك بحتاجو ليهو عشان الضيوف وانا سويت ليهم خلاص ،، وه بحنس فيها عشان تشيلو ،،، وانا واقفه وبعاين ليهو ،، وقلبي مقطوع عشانو 💔،،،
شوفتك عمر ماشي وعمر جاي ...
تسأل روحك ...
ليه انا ؟...
وانا ايه سويت ...
عشان القي المعالم واقفه..
ومن جوة النفس مسدوده...
وغيري زولا ماهو شايف ...
وتحلي بعيونو المواقف ّ..
بس لمتين ،،، لمتين ،، لمتين اجور انا والايام ... والناس نيام
نيام احساس ،،، نيام لهفة ،،،، نيام اشوق ،،، نيام حسا يلاقفك كل الحلو الباين ،، بدون اسباب ،،،،
--------------------------------------
#سوداريلا 《05》♡
#بقلم_رؤي_حسن_علي
بعد تحانيس من امي ،،، الولد طلع مشا بيتهم ،،، مشيت قفلتا الباب وجيت راجعه سمعتا واحده بتقول لي امي ،،، مصعب ده عاد زينة الاولاد... بنات كللهم مكسرين فيهو 😒 ،،،، طبعا قعدتا اضحك ، وقلتا في نفسي " بلاي اسمو مصعب ، اتشرفنا " ...بعداك دخلتا غرفتي ورقدتا نمتا ،،، صحيت بالليل بسبب امي بتتكلم معاي ، اول ما قمتا علي حيلي ،مدت لي جهاز ٱيفون 😍
اتخلعتا ، ده شنو يا امي كمان 😳 ، طوالي باستني وقالت لي ،، خالك في السعودية ضربتا ليهو قبل ما يقبلوكي في الجامعه ووصيتو يرسل ليكي تلفون وانا بحاسبو ،،، حتي هو رفض وقال لي اعتبري هدية مني لي بتي ياااخ 😘 ،،،،، خالو ده ما متزوج ،، والله كنتا بعرس ولدو عديل من شده مابريدو 😂😍😳
طبعا ماصدقتا وبقيت اكوووورك من الفرحه ،،،، اليوم داك طبعا ما نمتا 😂 ،،، حاضناهو علي ورقدتا في السرير دايرة متيييييييين بس الصباح يشرق ، عشان امشي اجيب لي شريحة 😍😍😍 ،،،، غايتو حلم الجعان عيشه 😅👊
طبعا لمن اذان الصبح اذن انا زغللتا 😅 ،،،، من دون احس ، نمتااااااااا ... ماصحيت الا الساعه ١١ ... طبعا قمتا ولقيت التلفون ماقاعد جمبي 😰 ،،، بقيت زي المجنونة جارية ،، امي امي ،،، لمن وصلتها قعدت تضحك قالت لي ، يابتي تلفونك لقيتو واقع في الارض والحمد لله ما حصل ليهو حاجه 😱 ،،،، طبعا انا بقيت مخلوعه شديد ،،، وامي لسه بتضحك ،،، بقيت بقول ليها خلاص امسكي لي , ،، لي بعدين بشيلو منك ،،، ومشيت استحميت واتوضيت صليت وجيت شربتا الشاي ،،،
بالظهر كده مشيت لي امي ،،، تاوقتا ليها بالشباك ،، كان معاها مرة الجيران ... امي تعالي امي تعالي... امي قعد تضحك وجاتني بالدرب .. دخلت الغرفه ، مالك يابتي في شنو ؟ ... وانا بتململ.. امي دايرة اجيب شريحه ياخ ،، امي عاينت لي وقالت لي مفلسه صح وقعدت تضحك .. وانا ،، يا امي ياخ بكرة بشتغل وبديكي القروش انا 👊😅 ،،، هههه امي ادتني عشرين جنيه 😍 ،، طبقتها وختيتا في جيبي ،، وجري مشيت لبستا عبايتي ،،، وطلعتا ملهوفه علي البوتيك ، زي الشافع المتلهف يشتري حلاوة من الدكان 😍😘 ،،، طبعا ماشه في الشارع وبوزع بسمات ساااااي 😂😂😂 ،،، وصلتا البوتيك لقيتو قافل. .. اححححححي طبعا دموعي بقت خلاااااااص شوية وتنزل 💔 ،،، ابيت اصلووووو امشي من جمب البوتيك ،، قلتا ان شالله يفتح المغرب وماماشه من هنا 👊🙄... وقعدتا لي في مصطبه الغاشي والماشي يتفرج فيني 😅😅😅.
طبعا البوتيك مافتح الا العصر الساعه ٥ 😂😂😂 ... وانا متسنترة قااااااعده 😂... بس اشوف ليك توب امي من بعيد اتلافح معا الهوي .. وجاتني مخلوعه ،،، يابتي انتي كويسه ،،، مالك اتأخرتي ؟؟؟ .. وانا بتمتم ،، ياماما بس ... لكن البوتيك يادوب فتح وبتنضف فيهو ،، قلتا بدل ارجع .. انتظر ... طبعا بعد ما ادتني درس طوييييل في الاخلاق 😂 مشت مني وقالت لي عندك ربع ساعه انجزي ... والا حاتعامل معاكي باسلوب تاتني فاهمة😅؟؟! ... وانا بضحك ،، والله فاهمه يا امي ... طبعا بس امي مشت بي جاي ،،، دخلتا البوتيك ،،، واشتريت شريحه mtn وسجلتها ونشطوها لي 😍😍😍😍😍😅 ... عاد وانا راجعه علي البيت مبسوطه بسطه ... يا الله حسيت انو انا سعيده سعاده مبالغه 😂😅 .... فجاة يوقفني مصعب .. سندس ازيك ؟
اهلين يا مصعب ؟ ... وسلم علي في ايدي ،،، شايفك ياسندس اشتريتي شريحة ،،، ان شالله رقمي حفظتيهو ؟! " طبعا انا بيني وبين نفسي ، ده شنو الولد الماعندو احساس ده ؟ حبوبتو ميته يومين ما تمتم وبتعاور .. في اخر لحظة مسكتا نفسي " دي شريحه اشتريتا لي امي عشان تتواصل معا اخوانا ! ... ومشيت من جمبو ،،، وجرررري علي البيت ،،، غايتو كان علي منظر انسو بس 😅 ... لمن وصلتا البيت وقفتا مسافه لحدي ما نفسي هدا ... حتي دخلتا وريت امي اني جيت ،،، ومشيت للغرفه وفتحتا التلفون ،،، ياخي فرحه كده ما كانت سايعاني 😍😍😍 ... وطلعتا غلي امي .. وصورتها واتصورنا سلفي 😂 ... عبط انسو بس ... وشلتا رقم خالي وخالاتي ،،، واتواصلتا معاهم بالواتساب .. عاد كنتا هايجه هيجان بالتلغون 😂😂😂😂
.... طبعا مواضيعي كللها بقت التلفون واتساب وفيس وحاجات ظريفه .. صراحه كانت مالية لي وقتي ،،، وامي كانت مبسوطه انو شايفاني فرحانه ومرتاحه 😘 ... بالمساء كده امي قالت لي ، كدي اديني التلفون اتصل علي خالتك اشوف البيت بعد العرس هدا شوية وللا لسه جايطين ،،، قمتا قلتا ليها تمام ،،، امسكي اتصلي عليها ،،، شالت التلفون واتوووووونست معا خالتي وسلمت علي حسين ولدا ... وجرو الونسه غايتو لمن رصيدي انتهي 👊 والخط قطع ،،، ورجعو ليها من تلفون حسين ... المهم بعد انتهو ،، امي قالت لي سجلي رقم حسين ده اذا احتجنا لبهو ... طبعا في البداية ابيت اسجلو ،،، تاني قلتا ياخ ولد خالتي ،، اسجل اسمو عشان امي ما اكتر ... وخصوصا امي ما عندها اخلاق للتلفون كده !!!!
انتهي اليوم .. وصحيت تاني يوم مشيت علي الجامعه عشان اسجل واشوف الجدول ،،، وصلتا طبعا ،،، زولة برلومة جديده ... اشيل واسال ... لحدي ما عملتا اجرائاتي ،، ومشبت شلتا الجدول ،،، واثناء قاعده برتب في ورقي وبدخل فيهم للشنطه ،،، جاتني واحده سلمت علي : اذبك ،، انا هدي ونازلة طب برضو ،، ممكن نتعرف ! ... قبلتا عليها : انا سندس واتشرفتا بمعرفتك ،، انا برضو نازلة معاكي .. طوالب هدي قعدت جمبي وبقت تتونس معاي ،، وشبكتني ليك " انا متحمسه ياخ الطب مجال حلو ،، وللا العجب لابات التشريح متيييين نبداها ... وانا كده 😳😳😳😳😳😳😳 .... ااااااجييييييي ... هيييييييي البت دي النعمل حسابي منها 😅 ... وووووووواي زكرتني تشريح 😳 جثث 😳 احححححي البت دي مالا ياخ 👊 ... طبعا نص كلامت ما كنتا مركزه معاها 😅👊 ... في النهاية شالت رقمي وشلتا رقما وطلعتا ... وصلتا البيت تعبانه شديد ... رقدتا نمتا ،،، لمن صحيت كان المغرب اذن فتحتا تلفوني لقيت رقم غريب ضارب لي في التلفون ،،، وانا شغاله سجمي ده رقم منو ،،!!! بقا لي ماغريب ،،، اتذكرتا الورقه الكان اداني ليها ولد خالتي قبل نسافر الرقم كان قريب من ده !!!! طبعا استغربتا شديد 😳 !!!!
[
ظهرتا في دنيتي ،،، وانا روحي تايهة ..
شايغني ملاك بلا روح
ولي وين ومتين اروح
انتا العمر ،، انتا القمر ،، وانا ساهية ...وساهية فيك ملخووووومه لي حد الجنون يا الاشواقو رايقة
--------------------------------------
#سوداريلا 《06》♡
#بقلم_رؤي_حسن_علي
طبعا كللها كان يومين وانزل الجامعه اليوم داك ،، اول ما مشيت صليت ،،، جيت لقيت الرقم الغريب متصل علي ،،، وكان الحوار كالاتي :
انا : الو ...
الرقم الغريب : سندس حبيبتي ،، كيفك ؟
انا 😳 : يحبك برص يا كلب 😡 ....
الرقم الغريب : هههههههه😂 ،،، حبيبتي ياخ ! اسمعيني براحه كدي ،،، والله انتي عسل 😂😂😂..
انا 😡 : اذا سمحتا انتا منو ياخ والا بقفل الخط 😒😡...
الرقم الغريب : انا عمر الكشحتي فيهو الفيمتو ،، وطيرتي المزز مني بقميصي المليان وسخ 😒 ....
انا 😱😬 : اهلا ... اهلا ياعمر " ووشي قلب احممممر 😚😚🤣"
الرقم الغريب : ياسندس انا معجب بيكي والله ... وشخصيتك عاجباني وداير ابدا معاكي مشوار وان شالله نهايتو تكون خير 😚😚..
انا : خليت بنات كافوري القرررررض كللهم وضربتا لي 😒..." وانا من جواي قلبي عامل شششششششح 😅 " ....
عمر : هههههههه والله انتي سكرة ،،،، اااااي خليتهم وجيتك ياسندس ... اها رايك شنووووو ؟
انا : 😂😂😂😂😂 " بيني وبينكم كنتا حاسه احاسيس ملخبطة شدييييييييد ... وما قدرتا اقول ولا كلمة 😷😷😷...
عمر : سندس ،، ياعسل فكري حبيبتي تمام ؟
انا : 😳😳😳😳😳😳😳😳😳😳
عمر :، يلا برجع ليك تاني ،،، سلام ...وتوت توت توت الخط قفل ...
وانا لسه 😳😳😳😳😳😳😳😳😳 وفي النهاية بقيت اتبسم براااااي زي الهبلة والليل كلو مساهراهو 😍 ....
تاني يوم نمتا الساعه ٧ صباحا وصحيت الساعه ٣م 😬 ،،، امي بعد صحيت قالت لي ،، ياسندس يابتي ،، بعد تاكلي وتشربي وصلي صلواتك الفاتتك ,, انا مرسلاكي كم حته كده ،، عشان حتنزلي الجامعه وتاني ماحتفضي لي وعاوذاكي تركزي في قرايتك فهمتي ! قلتا ليها تمام ياماما ،،،، مشيت وكملتا حاجاتي كللها ،،، ولبستا عبايتي ومشيت ليها ... اول حاجه رسلتني الدكان اجيب حاجات الاسبوع ،،، وكان في واحده دايرة تشتري منها ملايات وعده . ادتني القروش ووصفت لي البيت ... واخر حاجه رسلتني بيت ناس مصعب ... عشان دايراني اقول لي ام مصعب انو هي عاملة ليها غداء وفطور بكرة ما يعملو حاجه كتيرة ....
المهم مششششييييت قضيت كل القالوهو لي ... وانا راجعه علي شارع بيتنا لقيت ليك مصعب في وشي ... مصعب : المفترية والرافعة قزازا ... علي شنو ياسندس ؟ ماقد المقام وللا شنو !!! ... طبعا اتغظتا شديييييييد والله ورديت : ااااي يامصعب ما قد المقام .وبقيت ماشه سريع .. رددا لي : انتي مغرورة وشايفه نفسك وشكلك زاتو زولة مادية فاكاها في روحك وداخلة طب 😒 ... طبعا اللحظه دي كنتا دايرة اقيف ... بس والله ذدتا سرعتي ووصلتا البيت وانا نفسي قاااايم شديد 😰 ... وزهجتا زهج انسسسسوا بس .. حاولتا ما اظهر لي امي انو في شي اصلا ،،،، وبقيت بتونس معاها ورتبتا البيت .. وجهزنا الحاجات الحنطبخا من بالليل ... وامي مشت نامت .. وانا بقيت مساهرة معا التلفون ... الساعه لمن جات ١ص نعستا وقفلتا التلفون ... وبس دايرة انوم ،،، جات رساله .. لقيتها من عمر " حبيبتي ،، مشتاق ليكي ،،، ياخي وافقي يابت ،،، والله ردتك " ... طبعا اللحظه ديكي بالجد بدا يخش قلبي وكلامو اثر فيني بطريقه فظيعه ماتتخيلو " بس ما رديت ليهو ...وبعداك استسلمتا للنوم .. ونمتا للصباح ...
قلبي دقا ... ونسمات عليلة مكتحة اشواق روحي ...
ولا هو عكر .. ولاهو تراب .. هو ريحه دعاش في نص الصيف
يحكر مداخل الريد وتفتح للغزل بيبانا .....
صحيت الصباح .. احساس حلو ماليني .. احساس اني بحب زول من كلام مرة واحده ... من نظرتين وكلمتين ... قلبي دقا .. وزاد كمان لمن اتصل علي الصباح ... واول ما رديت " سندس عشان خاطر الفيمتو الاتكشح اديني فرصه ... يابت انا روحي عليكي وجد دايرك " وانا حبيت احساسو وطريقة كلامو معاي .. وبقيت بتخجل ! وهو بقا يتونس ويتعرف علي وعرف كل تفاصيل حياتي .. ولحدي ماقفل الخط ، انا ماكنتا عاوذة اقغلو ،،، لانو جد كنتا مرتاحه ،،، بعداك مشيت صبحتا علي امي .. لقيتا مخلوعه " سندس يابت وشك مورد الليله ،،، تكوني بقيتي بتحبي ! ... قعدتا اضحك وقلتا ليها : اااااي بتك مغرومه ... امي باستني قالت لي ان شالله بي فايده ... وقعدت تضحك ومشت ،،،، طبعا بقيت بتبسم وماشه في الحوش اكشت في الحصا ،،، وسررررحانه لحدي ماوصلتا الحمام ... وقضيت اموري كلها ..حتي جيت اساعد امي ....ماشاء الله امي عاد اصلو ماقصرت علي ام مصعب..عزتا فطور وغداء ... ووديناهو ليهم .. واتونسنا معاهم وجينا ،،،، والحيوان داك ما لاقيتو ،،،، بالعصر كده امي جاتني ،،، ياسندس بكرة محاضرتك الساعه كم ؟ وجدولك كيف يابتي ؟ غايتو مشيلاني الهم والله ... انا طوالي جيت جمبها ووريتها انو جدولي مزدحم شدييييييييد وبقت هي راقده في السرير وانا راقده جمبها بنتونس لحدي صلاه المغرب ما جات ...
بعداك مشينا صلينا ... ومشيت جهزتا حاجاتي ورقدتا نمتا من بدري بعد صليت العشاء طوالي ،،، .. طبعا صحيت بدددددري .. مشيت كويت هدومي ،،، وعملتا الشاي لينا انا وامي واتونسنا ... وخلاص قبل اطلع فكيت تلفوني من الشاحن لقيت عمر متصل علي ... قلتا ياخي برجع ليهو لمن اصل الجامعه ،،،، وفعلا وانا في الشارع ،،، اتذكرتا انو ماعندي رصيد ... وصلتا دكان عمو زكريا بس ما لقيتو 😰 ،،، لقيت ولد شاب كده .. اداني الرصيد .. وبحاسب فيهو وقلبي كان مقبوض ... طوالي سالتو،،، عمو زكريا وين ؟ ... دنقر كده سكت مسافه ،،، عم زكريا ده عندو ولدو مات قبل بوم كده ... وهو زاتو تعب ... وما اظن يجي تاني 😰 وانا اخو راجل بتو قالو لي امسك شغلو عشان مايخسر .. لانو ده رزق ... عيشو ... 💔😰😰😰 طبعا انا الدموع الدموع في وشي ... الولد سالني انتي اكيد سندس !! 😳 طبعا اتخلعتا شديييد " اي انا سندس " ابتسم " اصلا عم زكريا كان بقول انتي اكتر بت مؤدبة وحنينه في حلتكم وحتي وصفك ،،، طبعا قعدتا اضحك 😅 وقلتا ليهو يحليلو ياخ .. سلم عليهو ... وقبل امشي قال انا محمد ،،، قلتا ليهو اتشرفنا ومشيت طوالي علي الجامعه ....
طبعا انشغلتا في الجامعه ولحدي ما انتهيت من الجامعه وراجعه علي البيت ... ما اتصلتا علي عمر ،،، بس دخلتي للبيت ،،، عمر يتصل وكان زعلان شديد ...
عمر : سندس حرام عليك ،،، ليه بتعملي فيني كده ؟
انا : والله معليش ،،، جد انشغلتا !
عمر :، طيب ،،، مامشكلة ؛ اهم شي انتي كويسه ؟!
انا :، الحمد لله ؛
عمر : يلا احكي لي يومك كان كيف ؟،
وبديت احكي ليهو كل تفاصيل اليوم ... وجد كنتا مبسوووطه شديد انو بسمعني وبسمعني كلام حلو شديد .. ياخي قلبي رادو لي درجه فظيعه ❤....
بعداك رقدتا نمتتتا.... و صحيت قريب المغرب ،،، مشيت اتغديت واتونستا معا امي بالحصل والجامعه ... وامي يحليلا من شده التعب .. انا بتونس معاها ،،، لقيتا ناااامت .. مشيت خليتا ... طوالي مسكتا تلفوني اتصلتا علي عمر ... رددا لي وبقينا بنتونس .. وكل دقيقه بحس دقات قلبي بتزيد ... وكل كلمه بتطلع منو بحس اني بس عاوذة اسمعو ... كنتا عايشه في عالم براي ... حبيتو شديد ... وقلبي وقع وما سما ...
خطواتك الشايفا
صدقني ماعارفا
علي وين تودي
وعلي مين تندي
طريق شايل تراب الريح
محل ماتقبل تشوفو سريح
--------------------------------------
#سوداريلا 《07》♡
#بقلم_رؤي_حسن_علي
اليوم داك مدورة التلفون معا عمر ،،، لحدي الساعه ١ صباحا ،،، ونمتااااا ... امي جات صحتني .. وانا والله ماقادرة عديييييل اقوم من السرير ... كنتا جد مرهقة ... بعد تحانيس ولحدي ما امي زهجت مني ومشت حتي قمتا من السرير ... لقيت ٨:٣٠ص جات ،،، بقيت بتطاقش في روحي 😅 غايتو اليوم داك طلعتا علي الجامعه مبشتنه بشتنه السواد والرماد ... وصلتا الجامعه ،،، لاقيت هدي في وشي ... ياخي البت دي معاااااااطه 😢🙄🙄🙄 ... مسكت بي زمن والمحاضرة بدت ... غايتو جرجرتا جرجير لحدي ما وصلنا القاعه ... ولسه بتتكلم 😷 ... والله قاعده في الكنبة مافاهمه ولا عارفه الدكتور بقول في شنو 😢 .. غير انو البت دي جد حاسة بيها حتضيعني بهبالتا دي 👊 اححححي يافشفاشي ... المهم اليوم كمل بخيرو وبي شرو !!! ..... طوالي بي منظري المبشتن داك وصلتا البيت ... طبعا عارفين روتين الناس الزيي 😂 ،،، طوالي علي السرير وبي طرحتي بعيد عنكم 👊😅 ... اليوم داك من شده جد مرهقة صحيت الساعه ٨ م .. طبعا صحيت مخلوووووووعه .. فتحتا التلفون لقيت عمر متصل علي قريب ال١٠ مكالمات و٦ رسائل ... طبعا اتضايقتا شديد ... بس قمتا سريع سريع .. ومشيت لي امي وجيت ظبطا اموري كللها .. وبعداك اتصلتا علي عمر ....
انا : الو عمر
عمر 😓 : سندس يابت انتي كويسه ؟؟؟!
انا : الحمدلله بس ....!
قاطعني عمر : ليه كدا ياسندس 😡 !!! ليه كدا .. يابت انتي عارفه اني قربتا اجي حلتكم ...
انا 😳 : سجمي تجي وين !!؟/😱
عمر : اجي حلتكم واجي بيتكم ،،، انتي يابت مجنونه .. ايوة وعلي فكرة بكرة انا جاي ...
انا : ياعمر ما تهظر ياخي ....
عمر : مابهظر انا ياسندس 😡 ... بكرة بحددوا معاكي...
انا 😳 : يا عمر تجيني وين 😱😱😱 سجمي ..
عمر يضحك 🙄 : يابت يا طلعتي لي برة بيتكم يا الجامعه !
انا : 😷😷😷😷😷😷😷😷😷😷😷 ولا كلمة 😂...
عمر : يلا ما تساهري .. وبي حالتك دي ... نتلاقي بكرة سلام يا روحي ...
انا : طيب مع السلامه ياعمر ...
قفلتا الخط وانا مخلووووعه شديد .. ومستنكرة وحاسة اني بحلم شدييييد .. واحاسيسي جايطه ... بي ده قمتا عشيت امي واتعشيت وصليت وجهزتا غيار تاني يوم .. ورقدتا نمتا ....
صحيت الفجر صليت .. ومشيت نضفتا البيت .. وجبتا حاجات لي امي من الدكان .. وبعداك لبستا وطلعتا علي الجامعه ... مشيت اتصلتا علي هدي وطلعنا علي المكتبة كان في حاجات مفروض نطلعا وامورنا جاااايطه .. المهم انشغلتا شديد معاها ...
جات الساعه ٢م وانا قربتا اخلص من الفي يدي ..تلفوني ضرب .. لقيتو عمر ...
عمر : حبيبتي ... انا برة الجامعه !
انا : شنو 😳...
عمر : انا برة الجامعه ؛؛ يا اطلعي يا بجي بعمل ليكي فضيحه ..
انا : لالالا انتا اكيد ما جادي 😰😳😱😱😱...
عمر بزهج 😡 : سندس اطلعي .. والا والله العظيم اجيكي هسي ولا بتلقيني في بيتكم !
طبعا بعد قفلتا طلعتا سريع علي الشارع ، وانا كنتا مبشتنه جنس بشتنه انسوا بس ،،، لابسه اسكيرت جينز معولق وبلوزة معولقه اكتر منو .. والطرحه كعبة .. وشعري من النوع البطلع من الطرحه بي قدام وبديك احساس منكش منكش داااك 😩😩😩😩 ... احي علي حاله ... ده كلو ما اشتغلتا بيهو .. كنتا جد ملخومه شديد ... طلعتا الشارع .. لقيتو واقف جمب مرسيدس سوداء😍 وهو لابس بنطلون أسود وقميص بيجي ولابس نظارة 😍 اححححي قلبي قال شششششح 😂😂😂😂👊 ... بقيت مقهية ومتنحه فيهو وانا ماشه عليهو ... فضل لي الرياله بس تنزل والمشهد يكتمل 😂😂😂😂👊 ،،، ماتضحكوا فيني 😅😅😅😅 ... وصلتو وانا برجف كلي طبعا ... سلم علي وابتسم لي بي بسمه كده ... خلوها 😂😂 ... قال لي اركبي اوصلك البيت ومنها اتكلم معاكي شوية ... قلتا ليهو طيب ،،، ركبتي للعربية كده .. المكيف باااااارد 😍 وعلي الرجفه العلي كانوو عاملين شغل 👊😅 ... مددا يدو ومسك يدي شديد .. وقال لي انتي كويسه ؟ .. والله يابنات امي عاد مصدومه قاعده جمب زول ما زي اي زول 😍😍😍 سمح سماحه استغفر الله العظيم .. الملامح كيف ، الشعر كيف ، الريحه كيف 😍😍😍😅👊...
بقيت جد ماقادرة انطق وبعد تعب قلتا ليهو ،،، بس مامصدقه اني شايفاك ... طوالي وهو ماسك يدي ختتاها علي صدروا كده . وقال لي ،،، ياسلاااام والله انا المامصدق .. وانا اللحظه ديكي خلاص جد اتكهربتا عدييييييييل ،،،، وجد حنيت ليهو وحبيتو وحسيت اني عايشه اجمل احساس .. اتمنيت حياتي كللها تكون في العربية وباللحظه دي بس 😍😍😍😍 ... لانو كان جد احساس ملاني ريدة ليهو وعشق واحساس امان فظيع ... اتمنيت البينا يدوم .... اتسامرنا واتهامسنا .. واتكلمنا واتونسنا كتيييير وعرفني علي اهلو ولحدي ما نزلني طرف شارع بيتنا .. انتهت محادثتنا بي ،،، بحبك ياعمر ... وبموت فيكي ياسندس ...
وقع قلبي
وسمع عقلي
وتابت روحي
وجنا جنوني
دخلتا البيت وانا مبسووووطه شديد .... مشيت لي امي حضنتها شديييييييد ... قالت لي ،،، يا ربي يديكي الفي مرادك واشوفك واحسك مرتاحه زي ما انا شايفه ملامحك هسي وسامعه دقات قلبك ... طبعا عيوني اتملت دموع ،،، وبدون ما تلاحظ ،، دنقرتا واستأذنتها مشيت لغرفتي ،،، دخلتا وقفلتا الباب .. والله قعدتا ابكي جنس بكا .. لمن برجف .. عمري مابكيت البكا دا .... نص ساعه انا ابكي واتنخج .. ياخي احاسيس متلخبطه ومتضاربه ومامفهومه ،،، ابوي الفاقداهو ، اقتناعي بي اني مادايرة ارتبط واتزوج ،،، وحبي لي عمر .. بقيت بحبو شديد بموت فيهو .. بحب اسمع صوتو طوالي ،،، اغرمتا بيهو ... اتمنيتو لي .. راجل ، وابو واخو وحبيب وابو اولاد ... حسيت احساسي تجاهو قتل كل باقي الاحاسيس المشوشاني الجوة .... رقدتاةفي السرير ..وكاني مخدرة وماعارفه انا مالي .. بس احساس جميل جايب لي نسايم حلوة برردت قلبي .. وبقتني ملهوفة لي بكرة ....
الساعه ١١م اتصل علي عمر ....
انا : حبيبي
عمر : حبييييييبتي ... ياااااه اخيرا يابت ...
انا وبتخجل ☺ : ااااي ياعمر ...
عمر : لالا قوليها حبيبتي عليكي الله ...
انا : طيب حبيبي ...
عمر : كويسه انتي ؟
انا : الحمدلله تماااام مية المية ...
عمر : عارفه انك جميله ياسندس !
انا 😳 : عمر ! ما تهظر ياخ !
عمر :، اقسم بايات الله طلعتي روحي 😂
انا : طيب انتا زاتك تستاهل يطلعو راحتك " وانا بيني وبين نفسي عامل سماحتك دي 😂😅👊"
عمر : مقبولة من حبيبتي العسل .. اسمعيني انتي بكرة طالعه بدري صاح ؟
انا : اااي ..
عمر : خلاص بكرة انا بوديكي !
انا : 😳😱 انتا مارجعتا !؟
عمر 😅 : لالا قاعد معا واحد بعرفو من زمان !! وبجيهم كتير هنا !
انا : تمام طيب ☺
اتونسنااااااا قريب الساعه وبعداك مشيت نمتااااااا وانا حاسه اني راقدة في حرير عايم في السحاب والهمبريب يسوي كدي 👋😂
--------------------------------------
#سوداريلا 《08》♡
#بقلم_رؤي_حسن_علي
صحبت تاني يوم وكاني طايرة في السماء من كترة السعاده النافخاني من جوة 😅😂👊 " هي كللللللكم حبيتو واتدشدشتو كمان 😒" ... شكلي كان مبهج .. اذا زول متضايق انا كان متأكده حيحس بسعاده غريبة ... 😍😍😍 ،،،،، مشيت كده لي امي ، اسلم بي جاي واسلم بي جاي ... امي بقت تعاين لي كده 😳 بنفس المنظر 😂👊 ...،،،
طبعا اتخلعتا شديد ... عاينت لي كداااا قالت لي ،، عمللتي ليكي جضيمات في اليومين ديل والنفسيات فل ماشاء الله 😅 ... يابت انتي الحاصل شنو ؟! وثم ثانيا الشمس ماشرقت يابتي 😳 قاعده تتحكحكي فيني كده كمان 😂😂😂 !!! قعدتا اضحححححك باعلي حسي الا سكتتني ههههه 😅😅😅 ؛؛؛ وبقيت طبعا اتخجل واتخجل واتمتم .. الساعه الامي جابتا لي واااارمه 😬😅 " حبيتي ياسندس ؟! " ... وانااااا 😱😱😱😱😱 ،،،، طوالي مشيت هربانه من امي 😅 ،،، ودخلتا الحمام استحميت " عادة بقعد تلت ساعه ،،، المرة دي دبلتها يعني ٤٠ دقيقه كده 😅😅😂😂 الليفه فترت مني " .. طلعتا لقيت امي متنحكرة في نص الحوش 🙄 ومنتظراني ... طبعا استسلمتا ،، وطوالي مشيت قعدتا جمبها ،،، ورديت ليها وانا الخجل داير يقتلني " اي يا امي حبيت " ... وخفتا من رد فعل امي الصراحه ،،، بس مسكتني حضنتني علي ، وقالت لي يابتي انا واعيه وعارفه انو حيجي وقت حتمري بالمرحلة دي ،،، وانتي بتي الوحيده الماعندي بت لا ولد غيرها ،،، يعني باختصار ماعندي غيرك يابتي وماعندنا غير بعض ،،، وبخاف عليكي ،، وبسال ربنا دايما انو ربنا يبعد عنك بنات الحرام واهم اهم شي اولاد الحرام 😍😍😍
هههههه قعدتا اضحك طبعا 😅 وبستها 😘 وحضنتها علي ... وجد اتبسطتا وارتحتا انو امي حبيبتي ممكن من هنا وقدام اكون معاها صريحه لابعد الحدود ❤
مشينا شربنا الشاي ... وبعداك اتوكلتا طلعتا .. مشيت علي الدكان اجيب رصيد ،،، وماركزتا علي كلامي معا عمر واتفاقي معاهو الامس ،!!! ... وصلتا الدكان واخدتا الرصيد ،،، وطلعتا كده لمحتا عربية عمر داخلة ،،، جاني ووقف العربية وسلم علي ،،، ركبتا ومشيت معاهو للجامعه ،،، غايتو لحدي ماوصلتا الجامعه غمز لي مرتين 🙄🤣😂 ،،، وشاغلني كتييييير 😅👋 ،،، وباس يدي وانا نازلة 😅😬☺ ،،،، غايتو دخلتا للقاعه وانا جد مبسوطه وحاسه اني مرتاحة شديييييد ،،، ... مايفوتكم سرحااانه بقيت لحدي المحاضرات ما انتهت انا ما كنتا مركزة نهائي .... غايتو فقتا من الانا فيهو وانا خلاص طالعه ،،، مشيت اشتري موية اشربا ،،، عمر اتصل علي ودعني وقال لي انا رجعتا حبيبتي وبتواصل معاكي تمام !!! زعللللللتا حسيت روحي اتقسمت نصين ... والله العظيم اتضايقتا ضيق 😡 ... مشيت اليوم داك للبيت وانا ماشايفه قدامي من الزعل .. ما طايقه فكرة عدم وجودو معاي ... نزلتا طرف الشارع وانا ماشه لاقاني مصعب وقفني ....
مصعب : سندس يا اصليه كيفك ؟ ومددا يدو ...
انا : اهلا .. وابيت اسللم عليهو ...
مصعب : عايني ياسندس اجيكي من الاخر ... انتي مدام بتجيبيها كبيييرة وناسات اوبها فوق ومرسيدس وناس بيزنس ،،، ماتبدي بالغلابه 😛 وقعد يضحك ! .. شايفك راكبه قبيل في عربية ووصفا لي ؟!
انا : واحد كف مصللللللح لمن عمل صوت 😒😒😒 ،،، ولزيتو وقعتو في الارض وتفيت في وشو ومشيت 💔 .. وانا بررررجف كلي ... وخفتا قلتا الولد ده شكلو خاتيني في بالو وحيفضحني ،،، وانا عارفه نفسي شنو ؟ بس امي ... طبعا جد التوتر بقا فوووووق مسسسخ علي اي احساس مرطب سخانتي الجواي 😩 .....
دخلتا البيت .. لقيت امي نايمه ... مشيت غرفتي ،،، جدعتا شنطتي وبقيت بررجف كلي وخلاص دايرة ابكي ،،، كنتا مرتبكه ارتباك فظيع ،،، لي درجه عمر بيتصل علي ، وانا ولا شغاله بي اني ارد وللا لا ؟!
بقيت متوترة شديد ،،، امشي واجي واجي وامشي ،،، مشيت طوالي استحميت ،،، وطلعتا صليت وعملتا لي عصير وجهزتا الغداء وطبختا لي امي حلتين 😅😩👊 لباقي الاسبوع ،،،، " انا توتري من النوع البخليني اشتغل ٢٤ ساعه ورا بعض بدون اكل وامل 💔" ... وده كللو امي ما صحت ... قللقتا عليها ،، مشيت صحيتها من النوم براحه قالت لي يابتي انا مصدعه شديد ... وفجأة بقت تتلوي لي 😰😳 وانا بقيت اكووورك .. جات بت الجيران جارية 💔 .... غايتو انا هبطتا وبقيت ببكي .. واخر شي شفتو مصعب شايل امي معا ولد جيرانا ومودينها الدكتور .. واغمي علي في لحظتها 😭😭😭😭 ،،، وعيت لقيت البيت مليان وبقيت بكوووورك امي ويييين 😭😭💔 ،،، جات مرة جيرانا مسكتني حضنتني وقالت لي يابت قولي بسم الله امك كويسه ! بس ظهر ليها ضغط وتعبت شديد ! !! حتي هديت ونفسي كان قايم ... فجاة جابو لي تلفوني وفاتحين الخط لقيتو عمر ... بكيييييييييت بدون ما احس .. وهو يحليلو اتجررررس وكان جاييني ،،، وانا رفضتا لانو شغال مشروع ومدينو فترة محدوده وبي عقد غرامه تاخير ! .. المهم اتونس معاي وهدأني ... وقفل ... بعد ساعه امي جات ... ياخي مشيت اترميت علي حضنها وبقيت ببكي .. وبقول ليها يا امي ماتعملي فيني كده ... والجمبي كلهم يبكوا .. وهي تبكي لمن نفسها كتم الا رقدوها ... ادوها ادوية ونامت الحمدلله ... ضيفتا الناس المعانا وطلعوا بالليل ... وبقيت قاعده براي معا امي وبراعي فيها .. وتاني يوم ،،، مامشيت الجامعه قاعده معا امي حبيبتي ... والحمد لله قامت احسن واتونسنا وارتحتا واتطمنتا عليها .. لحدي العصر حسيت اني رجعتا زي الاول ... بعداك مسكتا تلفوني لقيت عمر متصل علي ٣٠ مرة ومرسل ١٢رساله مقللق علي شديد ... اتصلتا عليهو وانا مشتاقه ليهو شوووووق كميييات ❤... والتلفون كان :::
عمر : حياتي وحبيبتي يابت امك كيف وانتي كيف ،،، واخد نفس طويل وطلع نفس حاااار !!!
انا : حبيبي البموت فيهو ،،، اعفي لي ياعمر ... بس امي جد نفسنت بي 💔 .....
عمر : سلامتا الف سلامه بعد الشر عليها ،،، طبعا ياسندس امي متوفيه قبل سنتين !!! والوالد كبير في السن عرستا ليهو عشان عاوز رعايه !!
انا 😰 : كنتا مصدوووومه شديد والله ،، واول مرة اعرف المعلومه دي ... اتأثرتا شديد ... يحليللك ياعمر ،،،
حسيت بيهو سكت والعترة واقفه ليهو في حلقو ... اخد نفس وقال لي الحمد لله !!!
عمر: ياريتني كنتا اشوف امك واحمد ليها السلامه ... ياسندس انا ردتك بس ... وحبيتك ... وحابي اي شي انتي جزء منو ... ياخي انا لمن دخلتا حلتكم حسيت بحنان وامان فظيع ... حسيت عندي غصن مقطوع ولقيتو ....
انا : باسلاااااااااااام يا عمر ،،، اريتك والله ربنا يسهل !!!
عمر : ان شالله يارب ... انتي بس خلي لي بالك من نفسك !!!
اتونسنا مسافه زمن كده،،، واستأذني عشان عندو شغل ... ضحكني وقفل الخط ... خلاني مبسووووطه لمن خدودي بقت وردييية 😍😍😍😍😍😍 ... وبعداك مشبت لي امي اشوف خبرا شنو !
المغرب اذن صليت معا ماما ... وقعدتا جمبها نامت ،،، جات صلاة العشاء .. قومتها وصلت وعملتا ليها العشا وشربتها عصير واديتتا دواها ... ورقدتها في سرير عريض شوية .. وطوالي جيت رقدتا في حضنها وهي مسكتني عليها بايدها وباستني في راسي ... ونمتاااااااااا وحسيت باحساس حلوووو وانا جمب امي ونايمين معا بعض 😍😍😍😍😍😍😍 ...
امي الجنه
امي الدنيا
امي الساس
وامي الراس
وامي العزة ... بحبك يا امي. .❤
--------------------------------------
#سوداريلا 《09》♡
#بقلم_رؤي_حسن_علي
تاني يوم صحيت من النوم ... لقيت امي لافاني بي توبها زي البيبي😍😍😍😍 ،،، ابيت اقوم طبعا مايفوتكم .. ياخي احساس ... فجاة بقيت ببكي شديد ،،، جات امي جارية في شنو يابتي ؟! 💔 ... مسكتها حضنتها شديد وابيت افكها ،، وامي يحليلا تمت الناقصه وهي زاااااتا اتجرست
بقت مافاهماني انا مالي ،،، بس ما سألتني ... حسيت بيها عرفت الجواي شنو ،،،، " ياخي احساس تكوني وحيده وماعندك لا اخت لا اخو وبس امك جمبك ، وفاقده عمود البيت ، احساس صعب والله "
المهم بعد تحانيس من امي ... مشيت الجامعه ... واليوم كان طوووويل شديد .. ومليان مافي فرقة بتاعت نفس الا خلاص وانتي طالعه ... مشيت اشتريت لي شيتات وبدو يدونا في هومويركات ودخلنا اللابات والزحمه بتاعت الطب بدت ...
عدت ايام واسابيع وانا انشغلتا شديد معا الجامعه ،،، وعمر يحليلو مرة ارد ومرة ما اشتغل ليهو وهو يحليلو عارف العلي بقا ... وهو زاتوووو كان مشغوووول معا شغلو ...
يوم كده وامتحاناتي قرربت شديد ... رجعتا علي البيت .. لقيت عربية ولد خالتي حسين واقفه قصاد بيتنا ،،،، طبعا اتخلعتا ، قلتا امي حصل ليها شي ،،، مشيت جارية لمن نفسي كتم ... وقفتا جمب الباب اخدتا نفس ودخلتا ،،، لاقيت حسين جمب الباب في الحوش ،،، طوالي جرا علي ومسكني من كتفي ،" سندس ، سندس كويسه انتي ،، في شنو؟! " طوالي فكيت يدو مني بي زهج كده .. وقلتا ليهو مقللقه علي امي بس ،،، هي كويسه !! قال لي اي كويسه ! دخلتا خليتو قاعد في الحوش ،،، وجريت لي امي ،، لقيتها نصيحه انصح مني 😅👊 ... وخالتي قاعده معاها وجايبه معاها حاجات كتيرة كده ... ما ركزتا بس سلمتا عليهم وجيت اتونستا معاهم لحدي ماخالتي قالت طالعين خلاص ،،، يلا في الحوش ونحنا مقدمينهم ،،، حسين قال لي فكري ووريني رايك ! .. طبعا اتخلعتا مافهمتو وطوالي طلع ،،، بس هم مشوا بي جاي سالتا امي بي جاي ،،، في شنو ؟ .... قالت لي ، حسين طلب يتزوجك ،،، طبعا بقيت مخلوووووووعه 😷😱 ،،، وامي كملت كلاما ،،، ومدينك فترة اسبوعين لي تلاته اسابيع تردي عشان هو مسافر بعد شهر لندن ،،،، وانا لسه مخلوعه واتووووووترتا شدييييييييد 💔 ،،،، امي مسكتني دخلتني جوة البرنده وجابت لي موية .. وقعدت جمبي ،،، انتي رايك شنو ياسندس !!!! بس بقيت ببكي شديد وبقول لي امي ،،، بس انا ما دايراهو يا امي ،،، وامي تشيل وتسكت فيني !!! يابتي كدي اهدي ،،، انا ماغاصباكي يابتي ،،، وماعشان قدامك ، بس موش هو ولد اختي ، عمري ما اتمنيتو ليك ،،، دايما كنتا حاساهو بهتما بيكي ،،،بس يابتي ما دايراهو ليكي ،،، ودي كمان اختي ،، ووالله ماقدرتا اقول ليها شي !!!! ... طبعا انا لسسه ببكي وبقيت ماسكه امي ،" يا امي انا بحب صاحب حسين اسمو عمر ،،، وحسين زاتو اتوسط ليهو لي ،،،" وامي شغاله وووب علي وووب علي يابتي ده كلام شنو ! مالقيتي الا صاحبو !!! وانا خلاااص الدموووووع ملت وشي ،، وبقيت اقول لي امي " اصلا حسين ده حاقد وهو الغدر بي صحبو ،،، ويا امي كان انطبقت الارض علي السماء حسين مابعرسو ،،، الا وانا ميته وعلي جثتي !!! مشيت جريت غرفتي وقفلتها علي وبقيت ببكي ... بعد نص ساعه اتصل علي عمر ،،، ومكالمتنا كانت كده ::::=
عمر : سندس حياتي
انا وببكي : عمر ماشفتا الحصل !
عمر مخلوع :، في شنو مالك يابت بتبكي !!!!؟
انا : حكيت ليهو كل التفاصيل
عمر بقا هايج وقال لي بتصل عليكي بعدين وقفل الخط !!!
طبعا قللقتا اكتر وبقيت ببكي شديد ... لحدي ما نمتا !!! قمتا مشيت علي امي لقيتا زهجانه ومتوترة ومقللقه علي شديد .... مشيت حضنتها واعتزرتا ليها ! وعملنا لينا حاجه اكلناها ،،، وبعداك بقت بتسأل مني في تفاصيل عمر ... والحصل شنو وغيرو .... قامت بعد انتهينا طلبت مني اني اصلي واقول دعاء الاستخارة ،،، وهو اذا فيهو خير ربنا يسهلا .... قلتا ليها ياماما تمام !!!! وفعلا اليوم داك صليت العشاء والشفع والوتر وركعتين الاستخارة ،،، ونمتا مرتاحه شديد ❤
انا شايفاهو كدا 👍
والناس شايفاهو 👎
ودي حياتي ...
وهو روحي ...
والله كريم ....
زي الساعه ٣ صباحا كدا ،اتصل علي عمر ونفسو كان قايم ،،، وزهجان زهج شديد ،،،
انا : ياعمر اهدا حبيبي في شنو
عمر : اهدا كيف وولد خالتك الحيوان ده غدر بي !!
انا : هو في شنو بينك وبينو ؟!
عمر : ياسندس انا قبل تسافري حللفتةو انو يديكي رقمي ،،، وفعلا اداكي ليهو في ورقه ! وما لقيت اتصال ،،، يوم اتصل علي قال لي هاك رقم سندس !! وانا اتبسطتا شديد ! وظبطتا اموري معاكي ،،، وهو كان عادي معاي ! بس بحسا بيهو بتضايق لمن اجيب سيرة اني مبسوط معاكي !
انا : وهسي الحصل شنو ! ليه يعمل كدا الحيوان ده ؟!
عمر : اتخيلي قال لي انا لمن اديتك مستنكر انو سندس تديك وش اصلا اذا انا ولد خالتا لحمها ودمها ،، ما شغاله بي .... وبعداك جيت عرفتا البينكم وكيف اتطور ،، لقيتو مابينفع معاي .. وانا من زمان دايرا وما مدياني كان وش بس !!!
انا اتخلعتا طبعا 😳 : بس ياعمر انا ماعندي ليهو شي وما حاشتغل بيهو !
عمر : الموضوع ده بحاول احلو معاهو بي هداوة ياسندس !
انا قاطعتو : بهداوة كيف 😡 انتا دايرني وللا لعب ساي !!!!
عمر : عشان مالعب داير احلو بي هداوة معاهو. .. وكدي اهدي الصباح رباح ؛؛؛؛؛
قفلتا الخط وانا متضايقه من الجوطه الحاصلة ،،، بس اتمسكتا اكتر بس عمر ...
تاني يوم صحيت زي الساعه ٩ وبعيد عنكم جريت جري للحمام وانا بستفرق " طلعتا الفي بطني كللو !!! ... امي جات جارية وسريع سريع لبستني عباية وبس غسلتا وشي وقالت لي نمشي الدكتور طوالي ،،، وحسيت الحما خلاص طلعت في راسي وبقيت تعبانه وجسمي تقل !!!! امي نادت بت الجيران وتكلوني وبقينا ماشين في الشارع عشان نوقف ركشه ! ... وفجاة بقيت ماسكه جمبتي وبكورك من الالم !!! مصعب لاقانا ماشين في الشارع سلم علي امي ،،،وسالا الحاصل شنو !! ورتو وقالت ليهو يا ولدي عليك الله وقف لينا ركشه البت دي تعبانه .... اتخيلو مصعب قال لي امي شنو 😳 !!! " اخير تمشوا لدكتور نساء وتوليد عدييل عشان تتصرفو معاها قبل الفضيحه " 😳😳😳 ... طبعا انا من المغسه دختا قبلي ! وامي بركت في الارض وبقت تبكي وتكووووورك الحقو بتي ،،، وبت جيرانا صفاء طلعت شبشبها وهبدت ليكم مصعب بالشبط وكفتتوا ودقتوا وتفت في وشو ،،، وسففتو التراب ... غايتو حكو لي ساي بالعملتو قلبي برررد 😩 ،،،،، ناس الحلة اتلموا .. ومحمد سيد الدكان جا شالني شيل وركبوني ودوني المستشفي ،،، وطلع جاني مصران العصبي البيجي معا الزعل داك .. وركبوا لي دربات وانا لسه ما وعيت لحدي ما رجعوني البيت انا ما صحيت .... وامي فتحتو بيت بكا عديل تشيل وتبكي والبيت اتملي .. والمشكله قامت بين سيد الدكان محمد ومصعب وجوة البيت .. والا اهل مصعب جو اعتزروا لي امي وقالو ليها مصعب ده ماعاقل بس وما تواخذوهو ... ومحمد سيد الدكان قال ليهم انا فتحتا بلاغ تشهير فيهو ... والجوطه الجوطه ... واتخيلو بعد ده كلو مصعب قال لي محمد : انتا كان بتحبها كده ما تخطبها ! محمد مسكو دقاهو ومافي زول حاجزهم لانو اهلو زهجوا منو ... وقال ليهو : انا سندس اختي وبحميها من الكلاب الزيكم ... ووالله العظيم كان ما خاطب وما بحب اتشرف بس اكون اخو ليها خلي اعجب بيها !!! ودقاهو لمن فكوهم ....وانا ده كللو ماحضرتو طبعا !
لمن صحيت كان الساعه ١١ م جات ؛؛؛ عاينتا يمين ... وعاينتا شمال مالقيت زول ،،، ناديت امي امي ،،، حسيت بيها نايمه ،،، رقدتا واصلتا نومي !!!
--------------------------------------
#سوداريلا 《10》♡
#بقلم_رؤي_حسن_علي
طبعا قمتا من السرير حسيت في قطعه بتاعت مكمدات خاتينها لي ؛؛؛؛ وقاعده جمبي هدي صحبتي من الجامعه وخالتي قاعده قصادي وممحنه وبتعاين في الارض ،،، .. طبعا دايرة اتكلم وماقادرة !!! ... جاتني هدي سلمت علي وقالت لي حسين برة ولد خالتك وبتشاكل معا ولد جيرانكم في الشارع ،،، طبعا اتخلعتا شديد 😳😳😳😳 !!! طوالي قمتا بالغصب بس تلفوني ضرب ورديت لقيتو عمر .. بقيت ببكي وبحكي ليهو ونفسي مكتوم ! ...عمر انا كلامي ما كملتو قفل في وشي وقفل التلفون ! بعديها بقيت ماسكه هدي وقلتا ليها طلعيني لي امي ! مشيت امي جات سلمت علي وخالتي قالت لي سلامتك ياسندس ! اتكلمتا شوية معاهم وبقيت راااقده ... وسامعه ليكم الجوطه برة الشارع والا خالتي وامي طلعو ... فجاه جا حسين داخل وشو محمر ونفسو قايم شديد .. قال لي خالتي اطلعي بس ،،، خالتي طوالي طلعت وماقالت ولا كلمه قالت لي امي " بضرب ليكي " ومشوا قفلو الباب .. جات هدي اتونست معانا شوية وادتني الشيتات ومشت ... امي طبعا وشها يلعن قفاها كانت زهجانه شديد وتشيل وتبكي يحليلا .... بعد ساعه جات ملك بت اهل مصعب ::: ياخي البت دي احححححي بت ضكرة فهمتو ماشاء الله عليها والله ! جات تبكي وحضنتني واترجتني انو اعفي ليهو عشان خاطري .. يحليلا البت حننتني .. قلتا ليها انا عافية ! بقت تقول لي هو مرفوع عليهو قضيه تشهير ... محمد ده حنسي لينا ! قلتا ليهو طيب بس حاليا حالتي صعبه شويه كده ... المهم شكرتني ومشت ... والله بقيت محتارة شديد ياخي وبقيت زهجانه زهج كمان ،،، واشيل واتصل علي عمر ما يرد علي ،،، جد قللقتا عليهو 😰 ،،، مشيت يا الله يا الله حتي وصلتا الحمام استحميت لقيت امي عملت لي عصير وحاجه آكلا ،،، قعدتا جمبها ؛؛؛ وعاينتا ليها لقيتا مدنقرة وتمسح في دموعها وتبكي بكا شديد خلاص .. طبعا رميت اللقمه من يدي ومشيت من جمبها وبقيت ببكي شديد ؛؛؛؛ لحقتني علي غرفتي وحضنتني :"يابتي انا عاجبني اشوفك كده ! نفسي افرح بيكي يابتي ! نفسي تنستري مامعروف عمرنا متين انتهي !!! وهي تبكي وانا ابكي !!!
بعد هدينا ،،، امي حنستني اقوم آكل واشرب ... والله باكل وكاني باكل في حنضل ،،، وبشرب كاني بشرب في المر ،،، ياخي شوفه امي وهي تعبانه نفسيا بالطريقه دي وشايله همي ، احححححي قاتلاني من جوة ... عيوني كانت مليانه دموع وانا باكل وبشرب ،،، بس بعد مسافه غلبني والله رميت اللقمه من يدي وبقيت ببكي بي صوت ،،،وامي ماسكاني ،،، وببكي من جووووة لمن بطلع صوت وجع جواي كان مكتوم ،،، وامي تبكي وتشيل وتقول لي بسم الله بسم الله في شنو هسي ياسندس. .. احييي يابتي ما تقطعي لي قلبي كده ! بقيت حاضناها وببكي شديد وبقول ليها : يا امي انا بحب عمر شديد والله ،،، وعمري ما ختيت اني احب وللا اخت عرس في راسي ،،، يا امي انا قلبي وقع وماسما ووالله العظيم بحبو شديد ... اي ركبتا عربية معاهو بس والله ماجاتني ذرة خوفه جواي لانو جد حسيتو واضح معاي وبحبني يا امي """" وطبعا لسه كنتا ببكي شديد ،،، امي بقت تهدا فيني وقالت لي ارتاحي شوية يابتي ... امسكي تلفونك اتكلمي معا عمر شوية وللا افتحي واتساب وفيس اتصرفي ... كويس !
قلتا ليها طيب يا امي ،،، رقدتا فتحتا التلفون اتصلتا علي عمر ،،، لقيتو مقفول تلفونو ،،، قفلتا تلفوني وقعدتا ! ... شوية كده حسيت بي نفسي مدرووووخه رقدتا نمتاااا !!!!
بعد ٥ ساعات ونص ؛؛؛ احس بيد ... يد الهنا يايمما ، تشيل وتبوس في يدي واسمع همسات حبيبي عمر ،،، قومي حبيبتي !!! حسيت اني بحلم وطنشتا الاحساي الحلو ده ،،، بس حسيت بد عمر ' خاتيها في جبهتي ،،، وبهمس في اضاني ،،، حبيبتي قومي عشان نتفاهم .. يابت قومي 😍😍😍😍😍 ،،، اول شي قلتا بسم الله بيني وبين نفسي 😂 ؛؛؛ وفتحتا عيوني شوية شوية ❤ ،،، اشوف ليكم وش قلبي الماخمج 😍😍😍😍 ياهو زااااتو حبيب قلبي عمر ،،،، بقيت مخلوعه وبتبسم ،،، عاينتا في عيونو لقيتا محمرة شديد ووشو التقول فشفاش احمر بس ،،، مديت يدي ولمستا وشو قلتا ليهو مالك ! قال لي قومي وبحكي ليكي ،:،، قومني ليك وقعدني في السرير .. لقيت امي مافي ،،، اتلبشتا 😂👊 .. بقيت بتمتم امي امي وينا !!! قعد يضحك قال لي : قاعده معا مرة ابوي برة ... مسكني من يدي وطلعني برة عشان اسلم عليها ... وانا مبشتنه بشتنه انسوا بس 🤣😩 !!! لابسه بجامه وشعري منكوش والعيون مورمه وانتو عارفين الباقي 😂😂😂 ؛؛؛ طلعتا برة سلمتا علي مرة ابو عمر ... وامي لحقتني بي توب لبستو وقعدنا نتونس شوية ... بعد مسافه قمتا معا امي عملنا العصير ليهم ❤...وجينا لقيناهم بتشاوروا واول ماجينا سكتوا ، وابتسموا لينا ❤❤❤ ...
اول ماشربو العصير ،،، عمر قال لي امي ،،، انا داير اعقد علي سندس ،،، لاني والله العظيم بحبها شديد ،،، طبعا هو بقول في الكلام ده ،،، وانا عيوني مليانه دمووووع ومامصدقه وبقيت ببكي شديد ❤ ،،، جا برك لي في الارض ،، وباس يديني وقال لي موافقه ،،، عاينتا ليهو وانا عيوني مليانه دموع ،ووشي حمر وهو بمسح في وشي الدموع ،،، وبقول لي يا ام اولادي .. وانا بقيت اضحك !!! طوالي عاينتا لي امي ،،، امي طوالي قكت الوغروتة ،،، وقالت مبروك 😍😍😍😍😍، ايوي يوي يوي يووووووي دي انا طبعا بقيت بزغرد وعمر بضحك هو ومرة ابوهو .... طوالي طلع اتصل علي ابوهو عشان يجي ،،،
طوالي جا عمر قال لي امي ،،، انا داير اعقد هسي ،،، امي قعد تضحك وقعدتو في السرير ،،، وبقت تقول ليهو ،،، ياولدي اهلها كللهم في الخرطوم ،،، والتجهيزات وهي زاتها ماجاهزة نهائي ،،، وامي تضحك !! طوالي قال ليها " ياخالتي انا عاوذ استر بنتك !!! واعرس بعد شهر كويس ؟! ... امي قالت ليهو اسال سندس ... جاني ووراني ... وافقتا ياجماعه اعمل شنو 😍😍😍😍 والله بس اديتو الاوك مشا طلع نادي رجال الحلة 😍 وجا محمد داخل وببكي وقلد امي وقعد يبكي ياجماعه فرح لي فرح !!! واداني اتكلمتا معا عمو زكريا بالتلفون ❤😍 ،،، وطبعا خالتي ام حسين الوحيده الاتشاكلت معا امي ،، والباقين كللهم فرحو ،،، .. انتو عارفين لحظه العقد البيت كان مليان ،،، وانا لابسه طبعا فستان فنايلي ولابسه ساعه 😂😂😂👊 ،،، وعاملة ضنب حصان وعملتا لي بس شوية روج واتريحتا وبقيت قاعده معا ملك وبنات الجيران الشفع وبسمع في العقد 😍😍😍😍❤ وقلبي شغال " شح شح شح شح شح " احيي يا قلبي كنتا مبسوطه شديد ... وعمر لابس قميصو وبنطلونو زاتو 😂😂😂😂😂 ههههههه ،،، قعدتا اضحك قلتا لي ملك ده فال عفانه بعيد عنكم ههههه👊😂 .... قعدنا نضحك وفجاة سمعنا ضرب النار والزغاريد .. طبعا انا جاتني صدمه وبقيت ببكي شديد جات امي حضنتني وخالتة ريا مرة ابو عمر حضنتني وبتبكي وباركت لي ،،، يلا كلهت ثواني والبيت اتملي رجال ونسوان الحلة بي تياب البيت والشفع بالسفنجات 😂😂😂 غايتو عقد كان مسخرة 😂 بس كنتا مبسوطه شديد ،،،،😍😍😍😍 ... بعد الناس مشوا جاني عمر وبارك لي ،،هههه وخالتو ريا قالت ليهو ابوك ما جا عشان مالقا زول يجيبو ،،، بس قال ليك تاني ماف ليك سندس وتشوفا الا للعرس ... وقعدنا نضحك ونتوتس. .. وبيتو معانا ومشوا تاني يوم !!! " طبعا ام وخالتو ريا اليوم داك نوموني في نصهم 😂😂😂 ،،، وعمر طلع مشا نام معا محمد في الدكان حرسوا الحلة 😍😍😂 ،،،، وبعداك جو فطروا ورجعوا الخرطوم ..
والبيت طبعا كان مليان ،،، ضيوف ضيوف ضيوف 😍😍😍😍😍😍😍 وانا مبسوطه مبسوطه مبسوطه 😍 ،،، ابو عمر اتصل علي وهو بيبكي ،،، وحلف الا يجيني مع عمر تاني يوم .. ياخي جد كنتا مبسووووطه شديد ،،، عمر حبيبي بقا راجلي ،، وده كلو مابيصل لي فرحتي وانا شايفه امي حبيبتي وشها بقا ناير ومبسوطه شديد وبتضحك معا جاراتا من جوة قلبها ،،، جد احلي احساس تشوف نبع الحنان جد مبسوطه 😘😘😘😘 ..
بالعصر كده اهلي كللهم جو باركوا وخالي العسل حجز انو يجي من السعودية قبل اسبوعين من العرس !!! كانت لحظات حلوة شديد ❤ ... عددا اليوم ،،، تاني يوم اتصلت علي هدي قالت لي يابتي الامتحان الاسبوع الجاي 💔 ،،، وووووواي طبعا حسيت اني اتشليت ونسيت موضوع الجامعه كلو كلو😭😭😭 ... قلتا ليها بتكلم معاكي بعدين ،،، صراحه بطني طمت شديد ياخ 😂😂😂 ....
اليوم داك ،،، جا عمر ومعاهو ابوهو ،،، ياخي راجل نكته وعسل شديد والله ... اتبسطنا واتونسنا .. وانا وعمر طردونا في البرندة نتونس ،،،، اتكلمنا في حاجات بسيطه وضحكني والله ياحليلو ّ.... فجاة تلفونو ضرب لقاهو حسين ،،، قال ده حسين وطلع برة يتكلم معاهو ،،، بعد خللص جا وشو مختوف وزهجان ،،، سألتو في شنو !!! ... قال لي مافي حاجه حبيبتي وبعداك تمينا ونستنا وجو باقي الاهل تمو الناقصه وشغلوها لينا 😂😂😂😂 ....
بالليل بعد طلعوا مشيت شلتا تلفوني لقيت ٤ مكالمات من حسين ،،، ورساله لمن فتحتها اتخلعتا " لقيتو كاتب "، ماتفرحي كتير ،،، حأفضح ليكي راجلك القايمه بيهو السما ده وتشوفي ياسندس !!!"
ليلة عمر جات هلت عليا ... فرحت حباني ورقرقت عينيا
--------------------------------------
#سوداريلا 《11》♡
#بقلم_رؤي_حسن_علي
قفلتا الرسالة وبقيت مخلووووووعه وزهجتا زهج شديد ،،،، 💔 طوالي اتصلتا علي عمر ..
انا : الو حبيبي
عمر : مرتي حبيبتي البموت فيها ،،،،مشتاق ليكي والله يابت !
انا: وانا كمان حبيبي !!! اسمعني حسين لقيتو متصل علي ومرسل لي رساله كاتب لي انو حيفضحك لي !! 😳 ...
عمر وهوغضبان 😡 : شوفي ياسندس ،، لا اله الا الله ! ماتقولي لي ولد خالتي ولا اخوي ولا صاحبك ياعمر ! والله وتالله تردي عليهو وللا تتكلمو معاهو والله ماحيحصل كويس فاهمه 😡 !!!
انا وبتمتم وخوفني راجلي 😰 : حاضر حاضر ياعمر ،،، اهدي حبيبي ،،، بس حبيت اوريك الحصل بس ! يعني ما احكي ليك ياعمر !
عمر : ماتحكي لي ، يا سلام 😡 عشان اكسر رقبتك !!!
ووواي عمر طلع هرا ا ا ا ا ش😱 .... غايتو لحظي ما قفل مني عيشني في رعب وقفل ...
غايتو اليوم داك النوم ابي لي نهائي 😂 ،،،،، نمتا معا اذان الصبح ❤ ،،،،
صحيت ساعه الفطور ،،، لقيت جاراتنا فاطرين معانا .. والونسات والشاي والقهوة شغااااله وضاربين الجو ... قمتا استحميت ومشيت قلتا لي امي انا طالعه الجامعه امتحاناتي الاسبوع الجاي وشي ما عارفاهو ،،، قالت لي ما تتأخري .. استأذنتها وسلمتا علي الضيوف وطلعتا ،،،
اول مشوار مشيتو لي محمد سيد الدكان 😍 ' شكرتو واتونستا معاهو ... وضحكني ضحك ،،، حكي لي لن عمر بيت معاهو في الدكان هههههههة😂😂😂😂😂 قال لي راجلك الحنكوش ده ههههه ،،،، الباعوض قطعو اليوموداك 😂😂 غايتو ضحكني ضحك !! وانا ماشه منو ، قلتا ليهو اعفي لي مصعب وهو حيكون اتأدب ،،، ياخي محمد ده طلع صعب شديد 😅 بعد تحانيس حتي قال لي خير لبعدين ان شاء الله ... وبعداك مشيت للجامعه ,, بعد وصلتا باركو لي الدفعه كللها ،،، وشغللوها لي .. بعداك بدينا في الجد قراية والشيتات وانا والله راسي ضرب وقعدتا ابكي ..... في الطريق وانا راجعه ، اتذكرتا العلي بقيت ببكي زي العويرة 😅 والجمبي استغربو 😳 ... اتصلتا علي راجلي وحكيت ليهو بمأساتي في الامتحانات القربت 😭😭😭😭😭😭 وهو اتجرس معاي وبقا بهدا فيني لحدي ما ا اصل البيت .. وفعلا وصلتا وانا خايفه لدرجه قلتا اجمد السنه 💔
دخلتا علي امي لقيتها بتلملم في العده ، لميتها معاها ،،، طوالي قلتا ليها يا امي دايرة اجمد السنه دي ،،، كده حاطفش والله 💔 وبقيت ببكي ليها .. وامي شغاله لي " يابتي الطب ده قايلاهو لعب .. بقيت بقول ليها عشان عارفاهو مالعب يا امي ،،، ياخي هسي ماقادرة ووالله ما مستعده امتحن ،،، عشان كده حاجمد السنه ,,،، امي مشت مني وهي بتقول لي " داك راجلك اتفاهمي معاهو " قلتا ليها خلاص ومشيت رقدتا ،،،
بالعصر اتصلتا علي عمر كتير ما رددا ،،، واصلتا يومي عادي !!!! بالليل امي جاتني قالت لي تعالي اعملي معاي كيك بكرة امل بت خالتك العروس ،،، جاية تبارك ليكي ❤ .. فرحتا شديد والله حتي امي قالت لي احتمال اختها واولادا برضو يجو يقيلو معاها 😍 ،،،، طبعا عملتها حجه وطوالي قلتا لي امي خلاص بكرة ما بمشي ،،،، عاينت لي كدااا قعد تضحك ومشت مني ... بقيت انا بنضف وبرتب وامي بتعمل في عجينه الكيك ،،، المهم مسكنا زمن لحدي انصاص الليالي ونمنا بي حاله صعبه شديد !!! ... تاني يوم امي صحتني من الدغش ،،، واصلنا البنعمل فيهو ،،، وبعداك مشيت استحميت ولبستا واتسرحتا وقعدتا ،،،، عمر ضرب لي وقال انو حيجيني تاني يوم عشان نتفاهم علي امور العرس وكده ،،، ومنها دايرني في كم موضوع !! قلتا ليهو خير ،،، وقبل اقفل وريتو انو عاوذة اجمد السنه ! طبعا اتبسطت بسطه ! قال لي اصلا عرسنا ان شاء الله بعد شهر ،،، والمواضيع حتجر بعض 👊 ،،،، قعدتا اضحك وقلتا ليهو 😂😂😂 هووووووي ما تكون حتحميني بعدين 😂،،، قعد يضحك قال لي والله ياسندس ما حتلقيني الا وانا واقف جمبك يامرتي العسل ،،، غايتو كسسر لي تلج وقفل 😂😂😂😂...
بعد اقل من ساعه ،،، بنات خالتي جو براهم بي عربية امل ،،، دخلو البيت وفكو الزغاريد الماخمج 😍😍😍😍😍 وسلموا علي امي ،،، وجو سللموا علي وباركوا لي ،،، وجابو لي نفسيات الاتنين ماشاء الله 😍😍😍😍 سماحه ونضافه جد 😍🤣😍 ... حسيت وانا جمبهم احساس فظيع 🤣😂😂😂 ،،، طوالي قعدنا واتونسنا معا بعض ،،، وهاك يالضحك والونسة ... غايتو بالجد غيرو لينا جو ❤
بالعصر كده ،،، قالو اخير يرجعوا عشان لحدي مايصلو الوقت بكون اتأخر شديد ،،، يحليهم حللو اليوم والله 😘😘😘 ومشوا مننا ،، بالليل اتونستا معا امي وضحكنا وبدت تجهز للحاجات ،،، وكنا مبسوطين شديد ... قبل انوم اتكلمتا معا عمر وكان مرهق من الشغل ،،، وبعداك قفل ونام يحليلو 😘 ... بس ختيت راسي في المخده كدا ،،، اتصل علي رقم غريب في تلفوني ،،، ابيت ارد وخفتا خوف شديد 💔😳 ... وكل ما يقفل يرجع يتصل تاني ،،، غايتو عشتا في رعب قريب ال٣ مكالمات ... غايتو استغفرتا وصليت علي النبي ونمتا بسلام ❤
تاني قمتا نضفتا البيت ،،، وانا وامي جهزنا حاجات الضيافه ،،، بالظهر كده عمر وابوهو ومرة ابوهو جونا 😘😍😍😍 امي استقبلتهم بي زغروته حلوة وضيفناهم والونسه جررت واتفاهمنا علي كل الحاجات ،،، بعداك عمر قال لي تعالي دايرك ،،، طلعنا برة الحوش قعدنا في ضل 😂👊 ،،، والسرير حاااار من الشمس 😅 ،،، ومصرة اجيب فرشة وهو يقول لي لأ !!! غايتو ضغطتا علي مشاعري وقعدتا 😂😂😂،،،،، طوالي مسك يدي الشمال وطلع الدبلة ولبسني ليها 😍😍😍😍 ،،، طبعا بقيت مبسوطه وهاك يا الدموع الدموع الدمووووع ،،، وهو يضحك 😆 ،،، باس يدي وقال لي : ربنا ما يحرمني منك ! جد ياسندس من دخلتي حياتي مفاهيمي اتغيرت ،،، وبقيت زول تاني !!! ،،، وحسيت بيهو دايرة يقول لي كلام بس سكت 😷 !!!! مشيت الموضوع عادي وكملنا ونستنا ومشينا علي الباقين ،،، اليوم داك ابو عمر اتصل علي خالي في السعودية واتعرف عليهو ،،، واتفاهم معاهو علي كل شي 😍 ،،،، قبل عمر يطلع قال لي : بكرة امشي جمدي السنه وبنتفاهم طيب ،، قلتا ليهو حاضر ،،، وطلعوا ❤....
رجعتا لي امي لقيتا بتتكلم معا خالي وتتونس ،،،وحتي كلمتو بي اني حاجمد السنه 💔🎃 في البداية ما رضا وشاكلني ،،، بس بعد وريتو وضعيتي الميئوس منها اخيرا اقتنع 😍 .... بقيت قاعده معا ماما واقنعتها تمشي معاي الجامعه تاني يوم ،،،منها تغير جو شوية 😍 ووافقت 😘
امي يا درب السلام ❤
بيكي يتحلي الخصام ❤
بالمساء قبل انوم ،،، نفس الرقم الغريب يتصل بس المرة دي ،،، مرة واحده بس تلفون طويل وقفل ،،، بعديها جات رساله " يحللك مني الحللا بلة " طبعا بقيت مهجومه وخايفه في نفس اللحظة 😳 ،،، برضو طنشتا الموضوع ورقدتا نمتا علي كده !!!
الصباح انا وامي جهزنا وشربنا الشاي ،،، وطلعنا علي الجامعه ،،، غشينا محمد سلمنا عليهو ومشينا ،،، وفي الجامعه مسكوا بينا زمن لمن امي زهجت 💔 وقالت لي ليكي حق تجمدي السنه 😂😂😂 ،،، غايتو ملت لي وقتي وضحكتني ضحك وهي الزهج داير يقتلا 😂 !!! الحمد لله انتهينا من الاجراءات بالسلامه ،،،، وركبنا رجعنا البيت ،،، اووول ما دخلنا امي قالت لي : ٱاااااااخ ياسندس يابتي ،،، نسيت القهوة منتهية في البيت ! امشي جيبيها من محمد والله ما سكني صداع يابتي ! .. قلتا ليها حااااضر ،،، يلا بس طلعتا جزمتي ولبستا السفنجه وطلعتا مشيت الدكان ، اتونستا معا محمد شوية وسالتو من عم زكريا وشلتا القهوة وجيت ماشه علي البيت ،، لاقاني مصعب ؛؛؛
مصعب : مبروك ياسندس ...
انا : الله يبارك فيك وعقبالك ...
مصعب : ماعارف اقول ليكي شنو ! بس الله يلعن شيطاني !!! وطالب عفوكي يا سندس !!!
انا : العفو والعافية يا مصعب ،،، حصل كل خير !!!
مصعب وهو فجاة بيضحك : والله يوم عقدك داك راجلك دا هبتي هبت 😂😂😂😂 دقاني دق ،،، الرصيع الرصعو لي محمد في يومييييين ماحصل حق راجلك 😂😂😂...
انا قعدتا اضحك : وبقلبي تستاهل ههههههه : حصل خير ياخ ..
مصعب : حلفتك بالله العظيم ، اذا احتجتي لي اي شي اي شي اخوك قاعد !
انا بابتسامه : تسلم يامصعب ؛ وعقبال افرح بيك ان شاء الله ..
مصعب : ان شاء الله ياسندس ! يلا ما أخرك ..
ومشيت منو ،،، ولحدي ما وصلتا البيت انا بضحك 😂
بعد دخلتا مشيت استحميت وجيت رقدتا جمب امي في السرير ،، ورافعه رجليني فيها وهي نايمه 😅 ... فجاة وانا فاتحه الواتساب بتونس معا راجلي ،،، تجيني رساله من نفس الرقم العامل لي اذعاج ،، والرساله فيديو ،،،، بقيت عاملة كده 😳 ....
--------------------------------------
يتبع.....
التسميات
روايات رومانسية