رفقة ❤️

By:Lola~Hassan

#رفقة《11》❤️
By:Lola~Hassan
ــہہہـ٨ـــ٨ــــہہـ٨ــــہہہـ٨ـــ٨ــــــہہـ٨ــــ♡❥‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏

‏‏‏‏‏‏‏‏‏‏‏‏‏‏‏‏‏ ‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏
مرت ايام ثقيلة شديد على قلوب رفقة واهلها.. الوضع من سيء لاسوأ لدرجة بقو رفقة ورغد ما بياخذو مصاريف للمدرسة 💔 ورهف بتشيل حق المواصلات بس 💔 في حاجات كثيرة اتلغت في البيت منها اللبن شاي الصباح وحتى وجبة الفطور 💔 والكهرباء كملانة ليها يومين وما قادرين يشترو 💔

رفقة ( بالرغم من سوء الفترة المرت من عدم اكل في البيت والجوع والوضع السيء وافتقادنا لمحمد وامتحاناتي التجريبية الما اشتغلت فيها كويس والنفسيات وكل شيء بس ما كان في اسوأ من ورقة الفحص حقت رغد! رغد اختي انا اخر العنقود الجنها ضحك وهظار عندها كانسر؟؟ م كنت قادرة اصدق ولا امي ولا رهف الانهارت طوالي وفقدت الوعي لمن ادوها درب 💔 اليوم داك حرفياً بعد كل المريت بيه كان اسوأ يوم في حياتي 💔 بكينا واتجرسنا ومرت علينا ايام صعبة لكن مافي اي شيء اتغير وبكانا لا ودا ولا جاب 💔)

كانو قاعدين مع الدكتور عشان يوريهم حالتها بالظبط.. سليمان وسامية..
الدكتور وهو بعاين لي ورقة الفحص - طبعاً اللمفوما او سرطان الغدد الليمفاوية من اسمو بصيب الخلايا اللمفية وهو ما خطير شديد اطمنو وفيه نسبة شفاء عالية
سامية قاطعتو - يعني في أمل تعيش؟؟؟
الدكتور - طبعا الحياة والموت بيد ربنا نحن لازم نكون صابرين ومؤمنين و..
سامية تاني قاطعتو - بتي يا دكتور (وبقت تبكي شديييد وسليمان بهدي فيها 💔)
الدكتور - عايني يا ام رغد، والله الاصابكم انتو اخف بكثير من ناس كثيرين دي ارادة ربنا ولازم نكون مؤمنين بيها وزي ما قلت ليك اللمفوما ده ما مرض خطير وممكن يتعالج وفي السودان ما الا تسافرو وفوق ده لسه في المرحلة الاولى اكتشفتوه بدري يعني ما انتشر ❤️ م تشيلي هم بتك ان شاء الله ان شاء الله ح تتعالج وح تكبر وترفع راسك ❤️ كترو الدعاء بس وخلو ثقتكم بالله كبيرة ❤️❤️
.
.
بعد مسافة طلعو من المكتب ورجعو البيت وسامية لسه حاسة نفسها منهارة شديد بالرغم من انو الدكتور طمنها💔 بعد بكرا اول جلسات الكيماوي وحاسة انو الموضوع ده كبير عليها وما بتطيقو انو بتها تاخذ كيماوي 💔

يا كريم يا ارحم الراحمين.. يا ربي اشفي بنتي رغد انا ما بطيق اعيش بدونها 💔 يا رب اشفيها وعافيها، يا رب ارفع عننا البلاء وترجع حياتنا زي زمان، يا ربي ارحمنا واحفظ لي ولدي ورجعو لي حضني واحفظ لي بناتي يا رب العالمين (وبقت تبكي وهي لسه في المصلاية)

.
.
.
تاني يوم..

رفقة في المدرسة وهي بتعاين لي نتيجتها! 80 ٪ ؟؟؟؟؟
منى - رفقة!!
رفقة ساكتة
منى - رفقة مالك خوفتيني!
رفقة - منى انا فاشلة شديد.. انا حرفيا فقدت الامل في كل شي في حياتي
- تفقدي الامل في ربنا يا رفقة معقولة؟ ربنا ده على كل شيء قدير!

- بس انتي ما عارفة حاجة عن الحرب الانا كنت فيها! يا منى انا محبطة شديد.. انا بالجد ندمت على اني عدت! غير خسرت كل شي ما حصل تغيير ونسبتي دي والله علاج طبيعي الكنت بقرا فيه ده يبقى لي حلم 💔

منى - رفقة انتي مريتي بي ظروف صعبة شديد وبعد ده جبتي ٨٠! انتي احسن من ناس كثااار

جرو على خدها دمعتين سريعتين - ٨٠ ما بتعمل اي حاجة!

منى - رفقة عايني لي هنا ( ومسكت وشها بيديها) انتي مريتي بظروف صعبة والامتحانات التجريبية جات صعبة برضو والتصحيح كان صعب ده كلو عشان يخلونا نقرا.. صدقيني امتحان الشهادة ح يكون اسهل من كده، وتصحيحو اسهل وغير كده ح تكوني مستعدة ليه.. انتي في الامتحانات الفاتت يا رفقة كنتي شايلة هم تقيل اكل ما بتاكلي زي الناس ونحن الاستعدينا ونفسياتنا كانت كويسة جبنا يادوب في بداية الثمانينات! اسي انتي شدي حيلك المرة دي واقري كويس اقري للساعة ١١ ونومي لانو قراية الليل والناس نايمة كويسة..

رفقة حست نفسها احسن بعد كلام منى بس قالت ليها بعد ما حست انو منى بقت ثقة- منى بصراحة نحن كهربتنا قاطعة ليها يومين وما عندنا لمبة في البيت عشان كده م بقدر اقرا بالليل.

- غريبة! عامة ولا عندكم بس؟

رفقة بالم - عندنا بس.. كملانة هي 💔

منى طوالي فهمت انو وضعهم كعب شديد لدرجة م قادرين يجيبو كهرباء! وطوالي ربطت الامور ببعضها واتذكرت انو رفقة ما قاعدة تجيب فطور معاها ولا بتشتري وبتقول ليهم انها اكلت في البيت

بس اتكلمت طوالي عشان م تحسسها بحاجة - طيب معناتها كثفي قرايتك بالنهار!

- ما قاعدة اركز كويس وانا يادوب جاية من المدرسة
- طيب شوفي عندي ليك فكرة
- اها؟
-رايك شنو نقعد في المدرسة لحدي بعد العصر المسافة دي نقرا فيها.. انتي بيتك قريب؟
-قريب اي ١٠ دقايق بالرجلين
- طيب حلو شديد إذا نقعد لحدي قريب المغرب
- بسس
-ما بس ولا حاجة مستقبلك واقف في الشهرين ديل لازم تضغطي على نفسك وجو البيت م مساعد معاك ابعدي منو شوية

رفقة بقى ليها كلام مني مقنع واقتنعت وكل شي بس اتذكرت انو ما عندها حاجة تأكلها وما ح تطيق الجوع وهي بتقرا!

رفقة بتحاول تتهرب - بسس ما اظن اهلي يوافقو

منى طوالي فهمت لانو تعابير وشها اتغير وواضح انو في الاول الفكرة عجبتها
ففكرت في حل سريع وبدون م تحرجها

منى - يلا ياااخ اقنعيهم عليك الله لو وافقتي ح تجربي اكل ناس الغرب القلتي نفسك تجربيه (سكتت لمن حست نفسها طبزتها)

(طبعا منى ساكنة في المدرسة مع امها واخوانها بيتهم اصلا جزء من المدرسة بس مفصول)

رفقة - لا ياخ كده ح اتقل على امك ساي واكلفها

- بالعكس ما تقولي كده وامي بتحبك شديد على فكرة وكل يوم بحكي ليها عنك وغير كده انا اصلا بقعد كل يوم في المدرسة عشان اقرا وبجيبو لي غداي براي م بتغدا معاهم يعني مافيها تكليف ولا حاجة، ح احكي ليك برضو عن الغرب وعن كيف جينا الخرطوم وكل شي بس عليك الله حنسي ابوك لو ما وافق بضرب ليه انا دي..

رفقة بعد تحنيسها والحاحها حست بحرج انها ترفض وغير كده هي محتاجة شديد للقعدة دي عشان تركز، وهي زي ما قالت منى مستقبلها واقف في الشهرين ديل!

قامت قالت ك فرصة تهرب اخيرة - طيب ادارة المدرسة بتخلينا؟
منى - اي قلت ليك كل يوم بقرا في المدرسة بعدين استاذة الهام دي قاعدة تقعد لحدي الساعة ٥
رفقة سكتت مسافة.. - خلاص بشوف ابوي
منى - طيب الحي عليهو شديييد عليك الله

بعدها عاينت لساعتها لقت باقي ١٠ دقايق والفسحة قربت تخلص قامت طلعت فطورها ومدت لرفقة - دايرة بطاطس بالقيمة؟

رفقة - لالا اكلت في البيت

- عليك الله اكليه لانو ح يتجدع ساي عملتها خالتي فيها فلفلية وانا ما قاعدة اكلها

رفقة شالته منها لأنها كانت بالجد جيعانة وبقت تدعي ليها في سرها كثيييير

.
.
.
اول م رجعت البيت فتحت مذكراتها وكتبت
(قبل ما اتعرف على منى، الفكرة الكانت في راسي عن ناس الغرب كانت مختلفة تماماً كنت بعافهم وبخاف منهم! وما علي اي لوم لانو العنصرية دي قاعدة في المجتمع وبتتوارث جيل عن جيل وبتلقى الزول في راسو فكرة كاملة عن قبيلة هو ما خالط زول منها في حياتو! والفكرة كلها بتطلع غلط! حسيت بي نفس الاحساس ده لمن عرفت انو اروى شايقية.. كانت الفكرة المترسخة في راسي عن الشوايقة انهم بخيلين بس اروى اكثر زول كريم شفتو في حياتي كلها! اصابع اليد الوحدة بختلفو والاخوان في البيت بختلفو مافي اي منطق يخليك تحكم على قبيلة كاملة بي صفة وحدة!)

قفلت مذكراتها وفتحت الدولاب وشرطت جدولها القديم.. ده بقى ما نافع.. وكتبت جدول جديد بتبدا فيهو القراية من اول الشروق لحدي اخر ساعة في الغروب ❤️

.
.
.
.

كانو قاعدين قريب المغرب والدنيا بدت تظلم، في صينية الغداء الفيها صحن فول مظبط بي ملح بس 💔 كل واحد فيهم آآثر اخوهو على نفسو وهم عارفين انو الاكل ما ح يكفي، كل واحد قاعد وبعاين منتظر الباقيين ياكلو

سامية - اكلو!
رفقة - انا اكلت الليلة في المدرسة ما دايرة اكلي انتي ورهف وراكم مشوار بكرا ( قصدها جلسة الكيماوي) 💔

رهف - امي وابوي انا دايرة اقول ليكم حاجة بس عليكم الله ما ترفضو وتقيفو لي في طريقي

سامية - في شنو؟

- انا دايرة اجمد الجامعة، وما ترفضو لي عليكم الله، مصاريف الجامعة تقيلة وانا ما قاعدة اشتري شيتات صعبة شديد كده واكيد ما ح اجيب معدل كويس، احسن حل اسي اني اجمد واشتغل في البيت واساعد في المصاريف عشان الوضع يتحسن والسنة الجاية انزل عادي.

الكل سكت ومافي زول نطق بعدها سامية بدت تبكي وحضنت رهف الكانت جنبها في السرير
رهف - امي ما تبكي ده وضع مؤقت واكيد ح نرجع زي زمان

سليمان قام وخش الاوضة وقعد يبكي هو برضو 💔
دموع الرجال ما هينة والله .. ومافي أصعب من قهر الراجل في بيتو وهو شايف اسرتو جيعانين قدامو وما بيدو يعمل اي شي 💔

( يا رب لمتين الحال ده 💔 يا رب ارفع عننا البلاء..)

فجأة وهم قاعدين في قعدتهم جا داخل عليهم ولد الجيران الصغير مصطفى وهو ببكي
خالتو سامية خالتو سامية تعالو امي امي
كلهم انتفضو وجرو يشوفو الحاصل شنو.. .
•••••••••••••••••••••••••••••••••••••••••••••••••••••••••••

#رفقة《12》❤️
By:Lola~Hassan
ــہہہـ٨ـــ٨ــــہہـ٨ــــہہہـ٨ـــ٨ــــــہہـ٨ــــ♡❥‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏

‏‏‏‏‏‏‏‏‏‏‏‏‏‏‏‏‏ ‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏
في المستشفى.. يادوب بدت تصحصح وهي بتتمتم باسم مصطفى..
سامية - صحيتي؟؟
نادية بخرف - مصطفى ولدي وينو؟؟
-قاعدين في بيتنا كلهم
حست براحة لمن قالت ليها كده بس بدت تستوعب انها في المستشفى
سامية - كنتي عارفة؟
- بشنو؟
- انك حامل!
سامية قالت ليها البشارة ومتوقعة انها تفرح بس بالعكس وشها قلب طوالي
سامية - بسم الله مالك؟؟؟
نادية - عارفة اي 💔 حاولت اجهضو استغفر الله
- كيف الكلام ده ولي تجهضيهو؟؟
- والله يا سامية غلطة ونحن ما بنقدر على مسؤولية ولد تاني 💔 عبد الكريم (زوجها) يادووب قادر على صرفنا
- م تقولي كده ياخ 💔 الطفل البجي ده بجي بي رزقو وان شاء الله ربنا يوسع ليكم بيه 💔 تقتليه عشان قروش حرام عليك
بدت تبكي - الوضع بقى كعب شديد والله انا ما هاين علي اجهض ولدي لكن يعيش ويتبهدل؟؟ ااكلو من وين البسو من وين؟
- ما بتبهدل يا نادية انتي لي بتقولي كده، الله ده ما ربو؟ في ناس كثار ما عندهم قروش واولادهم كثار معيشينهم كيف؟
- انا ما كنت دايرة كده انا كنت دايرة اعيش اولادي احسن عيشة بس الظروف 💔 واسي الجاي ده والله العظيم ما عارفة ح نصرف عليه كيف البامبرز والحليب والملابس و مصاريف الولادة زاتها ..
قاطعتها - ياخ لحدي الزمن داك يحلها الواحد الأحد، عايني صحتك اسي اهتمي بيها واهتمي بالفي بطنك ده يسألك منو ربنا.. الله قال ( ولا تقتلو اولادكم من املاق نحن نرزقهم واياكم) وقال (لا نسألك رزقا نحن نرزقك) يا نادية انتي بتخافي من الرزق والرزق ده ما بيدك انتي بيد ربنا بسس.. خلي املك بي ربنا كبييير وان شاء الله يفتحها عليكم ❤️
نادية خنقتها العبرة وبقت تبكي 💔
سامية سكتت وهي بتعاين ليها بالم بعدها بقت تعاين لكل الموجودين بالمستشفى 💔
كمية الألم في وجوه الناس ما بتتوصف بي كلمات مكتوبة 💔 في الما لاقي حق العلاج وفي المات ليهو زول اسي وفي وفي
قصص كثيرة شديد ومآسي كبيرة 💔 حرفيا الداير يعرف قدر شنو الناس دي بتعاني وبتعافر والداير يشوف المآسي الجد جد يخش ليه مستشفى حكومي 💔
.
.
.
.
.
.
رفقة كانت حاضنة رهف وبتبكي
رهف - خلاص ياخ مالك؟
رفقة - م تجمدي ياخ 💔💔💔
- ما هو لابد منو
- طيب انا زاتي ح اوقف اسي وامتحن السنة الجاية
- لا يا رفقة انا وضعي بختلف منك، انا بجمد وبنزل السنة الجاية عادي وما ح اكون اتاخرت اكثر من سنة لكن انتي اتاخرتي شديد.
- بس يا رهف
- ما بس ولا شي وانا البعمل فيه ده حاجة عادية شديد لو مكاني كنتي عملتي نفس الشيء، وانا ما دايرة حاجة اسي غير انك تجيبي نسبة عالية ورغد تبقى كويسة ومحمد يرجع ❤️
رفقة انا والله مافي شي اغلى في حياتي منك انتي وباقي اخواني وانتي باقي ليك شهرين بس على الامتحانات شدي حيلك واقري فيهم بعد ده لو عاوزة تشتغلي معاي اشتغلي لكن للزمن داك ح نكون بقينا جلابة عديل..
رفقة سكتت مسافة بعدين قالت - شكرا بالجد!!
ضربتها في ظهرها وقالت - على شنو يا متخلفة
.
.
.
.
.
تاني يوم بعد العصر :
رفقة - دي عصيدة عادية؟؟
منى - ههههه لالا
- فيها شنو؟؟
-دي اسمها عصيدة دامرقا الدقيق البعملو بيها ياهو الدخن بقشروه بطريقة معينة بعداك بتخمر وبتجفف وبطحنو
- اهاااااا حلوة شديييد
- انتي الاحلى ياخ!
بعدها كملو اكل ولمت الصينية ورجعو يقرو
رفقة - يلا ده بشرحو انا عشان اثبت المعلومة
- خلاص اها
رفقة بدت تشرح..
.
.
.
.
.
مرت كم يوم بدون جديد،. خلالها بدت رغد جلسات الكيماوي في المستشفى وعربية سليمان طلعت من الصيانة ورخصها وشغلها.. ورهف مشت الجامعة وعملت اجراءات التجميد..
رهف :
( صح انو كان قرار صعب بس كان اسلم قرار اتخذو في الفترة دي وسنة م طويلة ابدا اسي بتنتهي ان شاء الله بس وضعنا يتحسن ❤️ بعد م اتصلحت عربية ابوي شوية بقت تدخل لكن مشت كلها علاجات رغد، اما انا فمشيت لي مدرسة اساسية جنبنا كان عندها نقص في المعلمين بقيت شغالة كويس بدرس عربي ورياضيات لكن ولانو الدخل بسيط اشتغلت حصص خصوصية برضو، الوضع بقى احسن شوية واشترينا الكهرباء، جبت لي امي حاجات الكسرة بقت تعملها الصباااح قبل م تودي رغد، وتبيعها للدكان، حتى رفقة ما قصرت والله بتصحى من الساعة ٣ صباحا تقرا وفي البريكات بتعمل داردمة وتختها لي في الثلاجة عشان اوديها الدكان برضو ❤️ الأزمة المرت علينا دي ورتني انو انا وسط اسرة مترابطة شديييد، اسرة بحب كل فرد فيها باقي الافراد اكثر من نفسو، اسرة معافرة واسرة قوية ويمكن اغلب الاسر السودانية كده ❤️)
.
.
.
َ.
.
.
راجعة من المدرسة وهي بتعاين في البيوت والعمارات
سبحان الله ناس الحي ديل كلهم جيراننا واغلبهم وضعهم طيب شديد، نهائي م عارفين عننا اي حاجة ما عارفيننا عايشين كيف بننوم كيف بنصبح كيف.. في بلادي ممكن جارك بالحيطة ينوم جيعان وانت م جايب خبرو 💔
زفرت بحزن بعدها حولت نظرها لجهه تانية..
كانت بيوت بعيدة شوية، منها المبني من طين ومنها الحيطتها واقعة 💔 جوا كل بيت من البيوت دي مأساة حقيقة ما بعرفها الا العاشها 💔
السودان بقى لا يطاق 💔 بقى واسع شدييد على ناس وضيق شديد على ناس تانيين 💔 متين يا رب نغيرو للأحسن ومتين نفخر بيه..
دخلت الدكان وسلمت على سيدو..
طوالي طلع قروش وبدا يحسب فيها وادها ليها - ما شاء الله الليلة حاجاتكم اتباعت كلها ❤️
بدت على وشها علامات الفرح - بالجد؟؟
-ايوه.. وفي ناس كثار جو بعد انتهت.. فا بكرة زيدو الكمية..
رفقة فرحت واشترت بجزء من القروش حاجات ضرورية للبيت وشكرتو وطلعت..
عاينت لباقي القروش في يدها!
سبحان الله مقلب الاحوال، نفس القروش دي قبل كم شهر كانت عندنا فكة مجدوعة في البيت ساي لكن اسي عايشين بيها عديل!
بعدها لفت القروش ودخلتهم في الشنطة وتابعت الطريق اول م وصلت البيت ختت يدها في الباب وهي بتقول
يا حليلك يا محمد 💔 البيت بدونك مسيخ شديد 💔 يحليل زمن ما بتخلينا نمشي الدكان وبتهرشنها يحليل لمن نصحيك عشان نفسنا في اندومي وانت بتتزهج وفي الاخير بتمشي 💔
انا متأكدة لو كنت قاعد معانا اسي كانت ح تتحلا لينا مشاكل كثيييرة وما كانت رهف ح تجمد سنتها 💔.
.
.
.
.
.
.
كانت راقدة في السرير وبتبكي شديد - ما دايرة امشي تاني ما دايرة اخد كيماوي الدوا حار شديد
رهف ما كانت قادرة تمنع دموعها بالرغم من انو كلهم ما ببكو قدامها وبحاولو يقووها..
- رغد حبيبتي 😭😭😭😭😭😭😭 ياريتو فيني انا ولا فيك 💔💔💔 والله اي شيء بحرقك بحرقني انا قبلك 💔
رغد لسه بتبكي
رهف - ارفعي يدك كده
رغد رفعت يدها
رهف - قولي يا الله
- يا الله
- اشفيني وبقيني كويسة
- اشفيني وبقيني كويسة
- يا الله برد علي الدواء
-يا الله برد علي الدواء
- ويا رب رجع لينا محمد
- يا رب رجع لينا محمد
- وقولي يا رب رفقة تخش طب
- يا رب رفقة تخش طب
- امييييين
- امييييين
قامت حضنتها وهي بتدعي في سرها كثييييييير.. لحدي ما نامو الاثنين..
.
.
.
تاني يوم الصباح بدرري كانت قاعدة مع امها وهي بتعوس ..
- امي
- اي
-انتي كلمتي احمد بموضوع محمد اخوي؟
- لالا، لي؟
-ما عارفة والله! انا ما كلمتو واسي حاساهو قاعد يطاعن بالكلام
- احمد؟؟؟
-اي
- انتي جادة؟
-اي والله
- شوفي يا رهف انا ما دايرة اكون بينك وبين سعادتك لكن الراجل البعاير ده والله ما كويس اختي دربو عدييييل كفاية انا امك، ما تقعي في نفس غلطي..
- غلطك؟ ابوي من متين بعاير
- رهف انتي بقيتي بت كبيرة وواعية،. ابوك ده من ما عرسنا عايرني بقبيلتي ولمن حصلت مشكلة مع اهلي بقى بعايرني بيها لي يومنا ده..
رهف سكتت مسافة وهي م عارفة تقول شنو؟! كلام امها كان صادم بالنسبة ليها!!!
سامية - انتي لي من الاول ما قلتي ليه؟
- ما عارفة حسيت انو غلط اكلمو
- لي؟ ح يكلم زول مثلا؟!
-لالا بس ده سر في الاسرة
- طيب هو ما ح يبقى فرد من الاسرة!
- فكرت كده بسس..
- ما زول ثقة؟
- ما عارفة يمكن
- رهف فكري كويس،. انتي لسه في بداية حياتك وعمرك ١٨ يادوب قدامك عمر كامل،. ما تعرسي ساي لازم الزول ال ح تعرسيه يكون شاريك، م مهم القروش والوضع الاجتماعي والشكل ابدا بقدر ما مهم الاخلاق،. رهف يا بتي والله انا ما دايرة ليك غير الخير لكن احمد ده لو حسيتي انو ما ح يسعدك لقدام وح تضطري تدسدسي منو اي شي افسخي الخطوبة طوالي..

رهف ما ردت على كلام امها واكتفت بالتفكير..
•••••••••••••••••••••••••••••••••••••••••••••••••••••••••••

#رفقة《13》❤️
By:Lola~Hassan
ــہہہـ٨ـــ٨ــــہہـ٨ــــہہہـ٨ـــ٨ــــــہہـ٨ــــ♡❥‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏

‏‏‏‏‏‏‏‏‏‏‏‏‏‏‏‏‏ ‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏
اليوم الثالث من التفكير المفرط..
كان يوم جمعة وما عندها الليلة دوام، راقدة في السرير وبتعاين للسقف
رهف - يا رفقة انا ما عارفة مفروض اعمل شنو؟! من جهه كلام امي المنطقي شديد ومن جهه تانية ما قادرة اتجاهل اني بحبو وخايفة اكون ظالماهو !
رفقة - انتي متأكدة انو هو قاصد يطاعنك بالكلام؟؟ لو متاكده ده سبب كافي حتى لو بتحبيه
رهف - متأكدة اي، بس صعب والله انتي عارفة نحن قبل م نتخطب كنا مرتبطين سنة وحاجة يعني دي علاقة سنتين عديل
رفقة - وخلال السنتين ديل م شفتي منو حاجة كعبة؟
رهف سكتت مسافة بعدين نطقت - الا شفت، مافي زول بدون عيوب
رفقة - بس في عيوب ممكن تتغطى بي الف حاجة تانية وفي عيوب لا
رهف - كيف يعني؟
- مثلا انا لو اتقدم لي واحد سمح ومقرش ومغترب لكن بخيل ما ح اوافق بيه، ولو اتقدم لي واحد ما عندو قروش مثلا او اي صفة تانية قولي عنيد وراسو قوي لكنو كريم وبحافظ علينا ويكرمنا بعدين ويحترمني ويحفظ مكانتي بين الناس بالاخص اسرتو ف ممكن اوافق!
ف انتي شوفي اعملي جدول بسيط فيهو صفاتو الكعبة وصفاتو الكويسة وقارني.

رهف قامت وفتحت الشنطة الجنبها وطلعت ورقة وقلم، بعدها قعدت جنب رفقة
عملت جدول زي ما قالت ليها وكتبت في الخانة الاولى المحاسن وفي الخانة التانية المساوئ.
اول حاجة كتبت في المساوئ بعايرني.. .
- طيب هممممم المحاسن انو كريم
- بالجد كريم؟ ولا بتحسي انو بتصنعو؟
-كيف يعني؟
-لحظات الشدة بساعدك؟
رهف سكتت مسافة واتذكرت انو من ما وضعهم بدا يسوء للان هو ما ساعدهم بي حاجة ولا بي كيس طماطم!
رهف - ما ساعدنا ونحن محتاجين.. بس هو ما مضطر، لو راجلي عديل نلومو
رفقة هزت راسها بلا - ما كده، حتى لو حاول يقدم مساعدة نحن كنا ح نرفض، لكن دي المواقف البتعرفي بيها الناس..
رهف سكتت
رفقة - في مرة تانية حسيتي انو متصنع؟
رهف هزت راسها باي وقالت بحزن - مرات بحس كده لمن يكون الموضوع فيهو دفع بتهرب منو
رفقة - اذا هو بخيل!
رهف مسكت الورقة وكتبت في المساوئ
2-البخل 3-التهرب من المواقف الجدية 4- ما بعرف الواجب
رفقة - كيف كيف؟
رهف - مواقف كثيرة يا رفقة هو بتهرب منها،. انا نقيت ليهو في راسو نق لمن جا واتقدم لي، وما بعرف الواجب نهائي، حتى لمن اتوفت بت خالو مشى العزا اول يوم وجا قلت ليهو انا مفروض تقيف معاهم في العزا قال لي الشباب كثار ومواقف كثيييييرة يا رفقة م بقدر احكيها ليك اسي

رفقة حست انو رهف اتأثرت شوية قامت قالت ليها خلاص نشوف المحاسن
اول شي عندو بيت وعربية ومصدر دخل كويس
رهف مسكت القلم وكتبت
رفقة - همممممم وكمان بحبك
رهف كتبت بحبني
رفقة - وتاني شنو؟
رهف فكرت مسافة وقالت - بصلي ومتدين
قامت كتبتها
رفقة - وما عندو اخوات
رهف قعدت تضحك وكتبتها..
بعدها فكرو مسافة وما عرفو يكتبو شنو تاني!
رهف عاينت للورقة مسافة وهي مستاءة
رفقة - رهف!!
رهف اتغيرت تعابير وشها للحزم - رفقة أحمد ما مناسب معاي
رفقة - رهف اتريثي وفكري شوية
رهف - انا لي ٣ يوم بفكر، الحب م كفاية يا رفقة، امي حاربت اهلها لانو كانت بتحب ابوي وما عاشت حياة سعيدة
رفقة - نحن م زي اهل امي
- حتى ولو، رفقة انا ح افسخ الخطوبة
رفقة حست بحزن لكن هي برضو شافت انو ده احسن قرار ممكن تتخذو رهف، العرس ما لعبة والوحدة بتعيش في بيت زوجها اكثر من بيت ابوها، لازم تكون مرتاحة وتختار البترتاح معاهو..
رفقة ختت يدها في كتف رهف - ربنا يعوضك بالاحسن منو ❤️
.
.
.
.
.
.
.
.

.
.
.
طلعت تلفونها النوكيا وركبت فيه الشريحة..
طبعا فترة كده انضغطو شديد واضطرو يبيعو تلفوناتهم ويشترو بدلها تلفونات نوكيا.
اول م فتحتو نزلت ليها كم و٤٠ مكالمة اغلبها من اروى قامت اتصلت عليها..
اروى - يا زفتة
رفقة - عيون الزفتة هههههههههه
اروى باندفاع- مالك ياخ قافلة تلفونك ومقلقانا عليك؟ ما عارفينك زاتو حية ولا ميتة؟ انتي لي بتعملي كده التلفونات دي عملوها لشنو!؟
- بسم الله طيب اديني فرصة اتكلم 😂 انا كويسة هندي وعاااايشة بس مرت علي ظروف كده امتحانات وحاجات تانية
- حاجات تانية زي شنو؟ وصح اشتغلتي كيف في التجريبي وجبتي كم؟
- والله م اشتغلت كويس وجبت ٨٠ زي ما قلت ليك مرت علي ظروف كده م بتتحكي بالتلفون.
- لا ياخ 💔 لكن دايما درجات التجريبي بتكون اقل من الشهادة، تعرفي شكلو بيناتنا ونسة كثييييييرة لازم نتلاقى
- اي فعلا
- عايني رسلي لي اللوكيشن حق بيتك بالواتس انا اصلا جاياك لكن لانك حيوانة م بتردي
- ما عندي تلفون
- بتتخلفي فيني انتي؟ والبتتكلمي معاي بيهو ده شنو؟
-ده نوكيا ساي تلفوني اتسرق
- طيب من تلفون اي زول تاني من ناس البيت
بكذب - اتسرقو كلهم جانا حرامي بالليل عدمنا الحبة
- حسبي الله لكن ضراكم شدييد
- اي كل يوم ادعي عليهو حيرنا
- طيب اسي بكرا فاضية؟
- اي ما عندي شي
- والقراية؟
-بضغط نفسي اسي وبقرا الصباح
- خلاص انا زاتي ما ح اطول معاك.. وصفي لي بيتكم
- سمح ( وبدت توصف)
.
.
.
.
.
.
.
رجعت البيت وعيونها مليانة دموع 💔
خشت الاوضة وقعدت في السرير والكلام القبيل بدور في راسها..

" - احمد نحن لازم نخلي بعض
- لي بس؟؟
-ما عارفة بسس
- بس شنو.. في زول قال ليك كلام عني
هزت راسها بلا - نحن م مناسبين لبعض
- من ياتو ناحية قصدك؟
-من كل النواحي
-لا انتي فهميني حاجة م ممكن اكون كده وما فاهم اي شي!
- بصراحة في واحد تاني قال عاوزني
(ما عارفة جبت الجراءة والقوة دي من وين بس لقيت انو مافي مفر تاني، شفتو اتغيرت تعابير وشو واتمنيت لو اللحظة دي ما جات 💔)
- وانتي فضلتيهو علي ونسيتي سنيننا مع بعض ولحظاتنا الحلوة كلها
- احمد العرس ما لعبة
- وقلوب الناس ما لعبة ( وقف على حيلو) يلا مع السلامة
رهف - دقيقة ( وطلعت الدبلة والمحبس وادتهم ليه) "

بقت تبكي بحرقة والعبرة خنقتها 💔 فعلا العملتو ما هين كون انها تقطع علاقتها بانسان بعد ما ارتبطت بيه سنتين 💔و بعد ما فرحت بخطوبتها، ببساطة كده انتهى كل شيء؟
مشاعرها اتلخبطت في اللحظة دي وبدا يغزوها شعور الندم 💔 لي انا عملت كده 💔 هل عيوبو كبيرة للدرجة دي؟ هل انا ظلمتو؟ هو بستاهل الحصل ليه بسببي؟؟ بس انا بحبو وبحبو شديد كمان 💔💔💔
.
.
.
.
في مكان تاني سايق العربية بسرعة ومشى مكان بعيد هو زاتو ما عارفو وين.. نزل من العربية وقعد في الأرض.. انا متأكد انو محمد ملأ ليها رأسها متأكد
قام وقف وضرب بي رجلو العربية، اقسم بالله اندمك على اليوم الجيت تلعب معاي فيهو، الله لا كسبك ياخ
.
.
.
.
مكالمة
حسن - كيف اخبارك ياخ طولنا منك
محمد - والله تقول شنو لاهي مع الشغل بس، امورك انت شنو؟
-والله تماااام الحمد لله
- اسمعني
- اها
- طبعا احمد ده عرف بي موضوعك
-كيف الكلام ده؟؟؟ والكلمو منو؟؟
- والله ما عارف الا يكون لقى ليهو فرضة اتواصل بيها مع غالية راسي ضرب عديل
- غريبة ويلقاها وين؟؟
- والله ما عارف، طبعا الموضوع ده ليهو فترة وما حبيت ازعجك بيهو لكن اسي بقى مهم لازم تعرف وتعمل حسابك!
- كيف ولي ما وريتني من بدري؟؟ واعمل حسابي من شنو؟
- احمد ده نيتو ما نضيفة، قبيل عبد الله قال لي سألو منك ومن محل شغلك وكل شي
-طيب م يتصل علي عديل
- عشان كده قلت ليك اعمل حسابك شكلو ناوي على حاجة
-يا ساتر، خلاص انا ح اقفل منك اسي مشغول مع موضوع كده
- خلاص في امان الله
- يلا
وقفلو الخط
محمد بقى يفكر يا رب أحمد ده ناوي على شنو؟؟.
•••••••••••••••••••••••••••••••••••••••••••••••••••••••••••

#رفقة《14》❤️
By:Lola~Hassan
ــہہہـ٨ـــ٨ــــہہـ٨ــــہہہـ٨ـــ٨ــــــہہـ٨ــــ♡❥‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏

‏‏‏‏‏‏‏‏‏‏‏‏‏‏‏‏‏ ‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏
الله ينتقم لينا منكم يا الفاتح وحاتم حسبي الله ونعم الوكيل

كانت بتقولها وهي قاعدة في البمبر وقدامها الكانون وصاج الكسرة..

كبت العجين وبدت تعوس..

"خلال ٤٨ سنة من عمري كنت بدي، بدي بس وما منتظرة زول يديني!
كنت كبيرة البيت البكر وام اخواني بعد امي، شلتهم وقريتهم وحميتهم ولبستهم وفوق ده ما قريت الثانوي اشتغلت طوالي وراتبي كلو بمشي للبيت ولاخواني، عمري ما لميت لي قروش ولا اشتريت لنفسي حاجة قيّمة للزمن، كنت بجيب ليهم الهدايا وحاتم ده انا زمان جاب درجة ما كويسة وابوي ضربو، انا حجزتو منو والسنة البعدها قريتو وساهرت معاهو وكنت بمشي معاه المدرسة لمن جاب درجة كبيرة وجبت ليه العجلة الكان بتمناها من زمان، ساقها في الحلة وكان طاير من الفرح، ولمن نجح في الشهادة جبت ليه هدوم الجامعة شنطة كاملة، ولمن كان بساهر مع اصحابو برا وانا بقعد حارساهو لمن يجي عشان افتح ليهو الباب وما يتلب بالحيطة، كلو نساهو ونكرو لي حطب 💔 كثييير صوتو علا علي وانا اختو الكبيرة وكثير سكتني ومشى مني وانا بتكلم معاهو ومرة ضربني كف وهو معصب ولا كلف نفسو يعتذر، ولا عمرو فكر انو دخولو لكلية الهندسة ونجاحو في حياتو كلها كان بسبب الأميّة البسيء معاملتها دي 💔، لكن اسوأ حاجة عملها هو وعملها اي واحد من اخواني انهم وقت جات الفرصة انهم يردو الجميل م وقفو معاي وبكل ببساطة اتخلو عني 💔 انا في اشد الحوجة ليهم اسي وهم ما عارفين انا عايشة ولا ميتة! زمان كانو أهل سليمان بخففو علي حبة لمن اشوفهم مترابطين ومتقبليني وبتصلو علينا وبزورونا طوالي وما بتقطعو مننا، بس في اول ازمة اتغيرو وبقو حتى اخوهم م بضربو ليه 💔"

رفعت الطرقة من النار وكبت عجين تاني وبدت تعوس البعدها

" كل العاوزاهو اسي انو اولادي م يكونو زي اعمامهم واخوالهم، عاوزة اولادي يحبو بعض ما عشان كل واحد عندو مصلحة عند التاني وخلاص لا، لازم كل واحد يحب اخوهو لانو اخوه ❤️، بربي فيهم عمري كلو عشان يبقو سند لبعض لانو لا انا ولا ابوهم دايمين ليهم.. وما عندي اي مانع افني عمري عشانهم ❤️"
.
.
رفقة - امي
سامية قشت دمعتها سريع عشان م تشوفها - اها
- صحبتي جاياني الليلة! وما عارفة اضيفها بشنو!
- اعملي من الكركدي حق الداردمة
- بس يا امي هي جاياني من حتة بعيدة اضيفها بي كركدي؟
-والله يا رفقة نحن يادوب وقفين على حيلنا الفطور عيش بي سكر والغدا يا فول يا عدس، براك شايفة الوضع كيف
رفقة حست بحزن، كلام امها صح والحمد لله اصلا انو في كركدي!

سمعت تلفونها بضرب قامت ومشت عليه لقت الاسم ( اروى) ردت
رفقة - الو
اروى - اهليين رفقة ازيك؟ كيف اصبحتي؟
-والله تمام الحمد لله، كيفك انتي؟
- تمام التمام، ضربت عشان اقول ليك اني جاية بعد شوية كده زي الساعة ١٠ لانو اكتشفت انو عندنا محاضرة الساعة ١ طبعا عارفة جامعتنا ومواعيدها
- تنوري في اي وقت
- تسلمي
وقفلت الخط

رفقة - يا الله ياخ بتتعقد اكثر، ١٠ دي وقت فطور ومافي اي شي في البيت غير العيش والسكر اعمل شنو يا الله؟
رفقة مشت لرهف
- رهف عندك قروش؟
-كم يعني
- اي شي لانو صحبتي جاياني اسي ومافي حاجة للفطور
- لا والله المعاي يادوب بكفي اللبن والعيش كدي اسألي ابوي
رفقة مشت لابوها بعدها لامها وادوها لكن بسيط يادوب بجيب رطل زبادي..

يااا رب الهمني اعمل شنو؟ اتدين من الدكان؟
لو اتدينت ح احلو متين لكن وكيف؟ ما مشكلة بحلو حبة حبة

لبست توبها واول م فتحت الباب لقت حاجة عشة جارتهم في وشها وشايلة في يدها صينية صغيرة فيها كورة عصيدة وكورة ملاح روب، ما قدرت تخفي الابتسامة من وشها وفرحت شديييييد

رفقة - خالتو عليك الله اتفضلي
حاجة عشة - ياريت يا بتي لكن جايني ضيوف دايرة امشي السوق المركزي، يمكن اغشاكم بعدين
رفقة - خلاص،. شكرا يا خالتو كثيييير
حاجة عشة ابتسمت ليها ومشت

رفقة دخلت والدنيا م شايلاها ❤️
قالت وهي بتبكي دموع فرح (يا رب اجبر بخاطر خالتو عشة وبتها زي ما جبرت خاطري الليلة)
خشت ودخلتو المطبخ بعدها مشت الدكان واشترت بالقروش الادوها ليها امها وابوها حب شاي وحبة شطة

بعد مسافة جات اروى..
حضنو بعض عند الباب وسلمو على بعض شديييد بعدها رفقة دخلتها جوا
اروى اول م دخلت حست بحاجة غريبة بس م فهمت ده شنو؟ قعدت في السرير ورفقة جابت ليها موية
اروى - اها مالك قلقتيني عليك!
رفقة اخذت نفس وحكت ليها عن محمد ورغد بس ابدا ما جابت ليها سيرة عن السبب الطلع بيهو محمد من البيت او وضعهم ، اروى صح صحبتها شديييد الروح بالروح لكن ما عاوزاها تحس بشفقة اتجاهها او تقدم ليها مساعدة وكده.

اما عن اروى فكانت متأثرة شديد وتلقائيا دموعها نزلت وهي بتسمع في رفقة.
قامت حضنتها شديييييد وهي بتقول ليها - ده كلو مريتي بيهو وانا م جايبة خبر؟
رفقة هزت راسها بلا - ما عاوزة ازعجك واصدع راسك
اروى - رفقة عليك الله م تقولي كده تاني 💔 رفقة انا بستك ولا نسيتي وعملتي ليك صحبات جداد؟ رفقة.. لو ما حكيتي لي انا تحكي لمنو؟ لو ما شلت همك معاك البشيلو منو؟ ولو ما وقفت معاك انا البقيف منو؟؟؟
رفقة حضنت اروى عليها بقوة بدون م تتكلم
اروى - رفقة خلينا نتفق على حاجة.. الانقطاع الحصل بيناتنا ده تاني م عاوزاهو يتكرر، لازم نكون على تواصل وانا خلاص عرفت البيت واقسم بالله م تردي الا اصلك لحدي بيتك وتحكي لي كل حاجة بتحصل معاك اتفقنا؟
رفقة زحت منها وهي بتقش في دموعها وبتهز راسها بأي - اتفقنا
في اللحظة دي دخلت رغد
اروى اول م شافتها حضنتها شديييد والدموع دورت تاني 💔💔💔

حقيقة حاجة صعبة شديد لمن تعرف انو زول قريب منك بعاني كل المعاناة دي 💔
والأشد والاصعب من كده انك تكون ما جايب خبرو وعايش عادي وما عارف عنو اي شي 💔
دي كانت ردة فعل اروى وتأثرها وهي عرفت نص الحكاية بس! ف ما بالك لو عرفت الحكاية كلها؟

.
.
.
.
.
تاني يوم محمد في محل الشغل جاتو وحدة من البنات الشغالات معاهو
البت - انت اسمك محمد سليمان صاح؟
- اي
- انا ما بحب القوالة لكن في زول نبزك للمدير!!
- منو ده؟ شغال معانا؟؟ ( في اللحظة دي اتذكر مكالمة حسن معاهو اول امس)
- ما بعرفو والله
- قال شنو طيب؟
- والله م سمعت الكلام كلو لكن تقريباً كده قال انو انت الشغل ده م بنفع معاك وانك بتستغلو وكلام بالشكل ده
فجأة دخل موظف تاني
- ي محمد المدير عاوزك
محمد قام على حيلو وقال بصوت واطي - الله يستر
.
.
دق الباب ودخل وشاف احمد ببتسم بنصر!.
ما استغرب نهائي، سلم وقعد
المدير قام من مكتبو وخت يدو في كتف محمد وقبل على احمد الكان مستغرب من ردة فعلو!
- محمد سليمان ده افضل زول انا وظفتو مما استلمت منصب المدير في الشركة دي واي كلام ضدو انا ما بقبلو الا اكون شفت بعيني! لو عندك مشكلة معاهو ما تستخدم الاسلوب الرخيص ده، ولو ما عندك كلام تاني اتفضل برا
احمد ومحمد الاثنين كانو مصدومين من كلام المدير!!!!!!
أحمد حس بغيظ وكره شديد وشم الوضع وشكلو بقى بايخ شدييد
قام على حيلو وطلع من المكتب
محمد عاين للمدير وما كان قادر ينطق او يقول شي في الاخير قال - استاذ ناصر ما عارف اشكرك كيف
- انا ما قلت الا الحق وما عملت الا الواجب ❤️
.
.
.
نهاية الدوام أحمد كان قاعد قدام الشركة ودمو بغلي من الحقد والكره..
محمد اول م طلع من الشركة جاهو اتصال
- يااا حبيبنا
حسن - امورك كيف؟
-والله تمااام التمام ٦٠ حصان
- اسمعني، الليلة الجبنة كيف وكيف
- قدام، انا اسي طالع من الشغل
- تمام نتلاقى هناك
- اسمعني
-احكي
- طبعا لاقيت احمد الليلة
- انت جاادي؟
- أي والله وكلامك طلع في محلو
- يا ساتر، عمل ليك شنو؟
- لقيتو مع المدير ووو...
في اللحظة دي حس بحاجة وراهو وكان ح يتلفت بس فجأة حصل الما كان متوقعو!
•••••••••••••••••••••••••••••••••••••••••••••••••••••••••••

#رفقة《15》❤️
By:Lola~Hassan
ــہہہـ٨ـــ٨ــــہہـ٨ــــہہہـ٨ـــ٨ــــــہہـ٨ــــ♡❥‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏

#رفقة《16》❤️
By:Lola~Hassan
ــہہہـ٨ـــ٨ــــہہـ٨ــــہہہـ٨ـــ٨ــــــہہـ٨ــــ♡❥‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏

‏‏‏‏‏‏‏‏‏‏‏‏‏‏‏‏‏ ‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏
سليمان بصوت واطي وصدمة - فرطت في قروش الأرض! اتسرقت من يدي
سامية اول م سمعت وقعت في الأرض طوالي واغمى عليها...
رفقة كانت قريبة وسمعت الكلام والوقعة قامت جارية على امها وبقت تهز فيها
- امممي امي يماااا
رهف جات جارية وبقات تقول بخوف - رفقة الحاصل شنو؟؟ امي مالها؟؟؟؟؟؟ ابووي!!
سليمان عاين ليهم ودخل جوه بدون م ينطق ولا كلمة
رهف طبعا م فهمت اي شي!!
رفقة جرت جابت كباية موية من المطبخ وبقت ترش وتهز في امها - امي اصحي! ردي علي!!
سامية بدت تتمتم وتتحرك حبة
رفقة مسكت راس امها بي يدينها الاثنين - ماما
سامية - رفقة.. (وبدت تبكي)
رهف بقت تأشر لي رفقة بي خشمها ويدها بمعنى الحاصل شنو؟ رفقة عملت بيدها حركة نظام اصبري بكلمك
رفقة ورهف ساعدو امهم في انها تقوم من الارض ورقدوها في السرير وبقت تبكي بدون م تنطق ولا كلمة
رفقة ساقت رهف وحكت ليها رهف طبعا اتصدمت شديييد وبقت تبكي هي التانية وجرت على امها وحضنتها
سامية - يا رب نحن عملنا شنو في حياتنا عشان تبتلينا كل الابتلاءات دي
رهف - حرام يا امي تقولي كده 💔 كده بتضيعي اجر الصبر الصبرتيه زمنك ده كلو 💔
سامية - استغفر الله اللهم اغفر لي 💔
رهف - امي كل البحصل ده ابتلاء من ربنا عشان يختبر صبرنا 💔 امي نحن صبرنا في كل المصايب الفاتت م صح نضيع اجرنا كده 💔 ان شاء الله ح تتفتح علينا من حيث لا نحتسب ويجي اليوم البترجع حياتنا فيه احسن مما كنا، امي كل الحصل علينا ده والمصايب الورا بعض دي ليها شهور بس.. امي نحن كم سنة عشنا في نعيم وما شكرنا ربنا؟ ٢٤ سنة عمر محمد اخوي وانا ما عارفة انتو عشتو كم سنة قبل م تلديهو.
سامية من رهف جابت سيرة محمد رجعت تبكي تاني وتنادي محمد ولدي بصوت مبحوح 💔
رهف وهي بتواسي في امها - امي انا ما كان قصدي اذكرك بيه! اكيد ح يرجع لينا في يوم من الايام، محمد ما زول كعب نهائي وهو تاب لي ربنا وكلنا شاهدين.
سامية كانها ما سمعتها واصلت بكاها 💔
.
.
محمد في اللحظة دي بالذات كان واقف قدام بيت اهلو! ضاقت عليه شديييد ولقى رجلينو تلقائيا ساقتو لي هنا.. رفع راسو وعاين للبيت مسافة وهو حاسي بي حزن العالم ده كلو في صدرو 💔 متين تجيهو مكالمة من امو وتقول ليه ارجع البيت خلاص انا وابوك عفينا عنك؟ متين بس 💔 الحياة دي تقيلة شديد م بتتجازف الا بي الاهل 💔 نزلو دمعتين حارات على خدو 💔

في اللحظة دي حس بي كركبة مفتاح عرف انو في زول طالع جرا ورا شجرة عشان م يشوفوه..
شاف رفقة كانت طالعة من البيت وهي لابسة توب ومتلثمة بيه وشكلها كأنها ماشة الدكان..

محمد في نفسو ( رفقة مالها لافة وشها كده ما عادتها! ولي عيونها حمر كانت بتبكي؟؟؟ يا ربي حصل عليكم شنو بعدي؟ 💔💔💔)

اول م اختفت طلع من ورا الشجرة وخلا المكان ورجع البيت..
ماسك التلفون ليهو ربع ساعة بعاين ليه، كتب رقم رفقة وكان ح يتصل بس اتردد.. ابوه منعو انو يتصل على اي زول من ناس البيت! وغير كده خاف انو يسمع كلام ما يسرو وهو ما بيدو يعمل حاجة!

(يعني ح يكون حصل ليها شنو؟ اكيد اتسببت في مشكلة وابوي ضربها!)

قفل التلفون بعد ما غير رايو وخت يدو في وشو ونام َ..
.
.
.
تاني يوم بعد الظهر..
نادية قبيل جاتهم في البيت وجابت ليهم صحن بتاع كيك هي عملتو، بعدها طوالي فاتت..

الايام دي نادية وامها بقو كل ما يعملو حاجة يدوهم منها حتى لو كانت حاجة بسيطة! تقريبا بشكل شبه يومي! وده حصل بعد ما حاجة عشة سمعت كلام بين رفقة وامها وعرفت انو وضعهم كعب شديد، سامية عرفت انو حاجة عشة وبتها نادية عرفو حاجة لانو دي م كانت عادتهم ف بقو كل ما يفوتو ترفع يدها وتدعي ليهم..

سامية بعد ما ادت رهف ورغد من الكيك وخلت لي رفقة لانها لسه م جات من المدرسة.. شالت الصحن ومشت بيه لي سليمان.. لقتو نايم، قامت ختت الصحن وبقت تهز في كتفو براحة.. وتقول بي صوت واطي
- سليمان.. سليمان
سليمان لا حس ولا خبر
سامية بدت تهز أقوى شوية برضو ما رد عليها، غريبة سليمان نومو خفيف
بقت تضرب في وشو عالخفيف - سليمان اصحى
وهو ولا حركة
هنا حست انو في حاجة ما ياها بقت تهز فيه من اكتافو بي قوة وما صحى.. ختت راسها في صدرو بخوف وهي بتحاول تسمع صوت نبضو وشها ظهرت فيه علامات الصدمة قبل م تسمعها.

زفرت براحة ورفعت راسها وعاينت ليه - لكن لي ما سمعت في الاول؟ ولي نبضو ضعيف كده؟
شالت كباية الموية الجنبها ورشتو برضو م صحي مشت على رهف وكلمتها بالحاصل لبست توب ورهف لبست عباية واصرت تمشي مع امها!
سامية فتحت الخزنة وشالت قروش وطلبت ترحال.. ومشت ورت ناس نادية وحاجة عشة بالحصل عشان لو رفقة جات وكده..
ما هي الا دقايق وبتاع الترحال واقف قدام الباب نزل ساعدهم وشالو ودخلو العربية.. سامية قفلت البيت وركبو العربية واتحركت

لفو زي ٤ مستشفيات يا ما شغالين يا ما بنستقبل طوارئ يا مافي سراير وحالة صعبة شديد..( لو دي مستشفيات العاصمة المفروض تكون واجهه فكيف الاقاليم؟! الزول الا يموت يعني ولا شنو؟) اسرتها سامية في نفسها وما قالتها..

ما هي الا دقايق ووقفو عند المستشفى الخامسة الأخيراً استقبلتهم! اول م شافوه دخلوه بي نقالة وركبو ليه اوكسجين وكم جهاز تاني..
.
.
.
.
بي جهة تانية عند رفقة الجات يادوب من المدرسة دقت الباب كثير وماف زول فتح ليها بقت تحاول تعاين بي قدة الباب وشافت الباب الجوه مقفول! غريب شديد.. ناس بيتنا ديل مشو وين؟

قامت فكرت شوية ولقت احسن حاجة تمشي لي جارتهم حاجة عشة..
دقت الباب وخشت سلمت وسألتهم.. في الاول اصرو عليها تتغدا اول حتى يدوها التلفون تتصل وتشوفهم وين! مع اصرارهم الشديد وافقت واتغدت وكان قصد حاجة عشة من ده انو احتمال اليوم يكون طويل عليها وما تلقى شي تاكلو تاني! بعدها جابو الشاي واثناء ما بشربو فيه في لحظة هدوء كده نادية كلمتها بهدوء شديد رغم ده رفقة اتخلعت واتنفضت والشاي اتكب فيها!!!

- كيف ده ومتين ولي ما كلمتوني؟؟؟؟؟ انا ماشة ليهم هم في ياتو مستشفى؟؟
نادية - يا رفقة ما تمشي خلاص كفاية في امك ورهف وبيناتنا تلفون!
- ما بقدر لازم امشي لازم اتطمن على ابوي
وعلى ده اصرت شديد ف خلوها ونادية ادتها قروش في يدها عشان المواصلات وكده وادتها تلفون..
خشت واتصلت على امها ولاقتهم..
رفقة - امي ابوي مالو؟؟؟؟
سامية - والله يا رفقة لسه م معروف لكن نبضات قلبو م مستقرة
رفقة عيونها اتملت بالدموع وختت يدها في راسها وقعدت في الكرسي..
امها جات وقعدت جنبها وحضنتها وقالت بصوت برجف من البكاء - م تخافي ان شاء الله يكون كويس..
•••••••••••••••••••••••••••••••••••••••••••••••••••••••••••

#رفقة《17》❤️
By:Lola~Hassan
ــہہہـ٨ـــ٨ــــہہـ٨ــــہہہـ٨ـــ٨ــــــہہـ٨ــــ♡❥‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏

‏‏‏‏‏‏‏‏‏‏‏‏‏‏‏‏‏ ‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏
كانت قاعدة في البيت براها تحديدا غرفتها..
قدامها دفترها..
رفقة ( قررت اني افتح دفتري بالذات الصفحات الكتبتها لمن كنت في الثانوي والكتبتها ايام خليت الجامعة و بديت سنة ثالثة، اظني حاليا محتاجة لاكبر قدر من الدعم النفسي الممكن، ما باقي شيء على امتحان الشهادة بدينا المعسكرات ومنى ما قصرت معاي حتى اني لمن ادخل المدرسة بجدع كل مشكلة كانت في البيت، لكن مع ده محتاجة اذكر نفسي بي الهدف الانا هنا عشانو)

وقفت في صفحة لوحدة من مذكراتها وهي في ثانية ثانوي كانت كاتبة

( الليلة وزعو لينا الورق حق المساقات والبنات كانو متجرسين وكثار منهم ما عارفين يختارو مساقهم بس انا كنت مجهزة شعوري للحظة دي من بدري شديد ❤️ انا متحمسة لدرجة الدنيا م قادرة تشيلني ونفسي الاجازة الجاية دي تنطوي عشان ابدا سنة ثالثة طوالي وابدا بقوة واثبت للناس القالو لي انتي ما شبهك شبه طب انو انا قدرو و ح اخشو وح اتفوق فيه)

فتحت كم صفحة بعدها ولقت

( الليلة لي ٣ اسابيع من بدينا الدراسة حاسة حماسي قل لكن ان شاء الله ما ح انتكس وح احقق الهدف الانا في فصل احياء عشانو)

فتحت كم صفحة تاني

(انا طموحي كبير شديد والسودان ضيقة علي شديد 💔)

بعدها فتحت كم صفحة تاني والمرة دي وقفتها بالجد

( لو كنت في دولة برا السودان ودخلت حاجة غير طب وهندسة مستواك بين الناس ما ح يتغير لكن هنا في السودان الما قرا طب ما قرا واي زول تاني بعتبروه مهمش)

وقفت وبقت مشوشة.. ده تفكيري انا كان كده؟ متين كتبت المذكرة دي لي ما متذكرة؟؟ يعني انا ما رغبتي طب الا لانو المجتمع فرضو علي وكنت واهمة نفسي السنين دي كلها؟ اذا معناتها كلام الناس صح وطالما ما قدرت اواصل في العلاج الطبيعي فالطب ح يكون اصعب بكثير!!!

قلبت الصفحة

(لكن انا ما دخلت طب عن رغبة زول او مجتمع سقيم، انا دخلتو لانو رغبتي انا لانو بحب جو المستشفيات من صغيرة وبحب الدكاترة واللابكوتات وريحة المعقمات البتملا المستشفى، ولانو ده قدري وده مصيري اني اكون واقفة في راس مريض بين الحياة والموت مساهرة معاهو من امس وفي الاخير انقذو ويرجع كويس تاني ويتعافى ويصحى ويبتسم لي.. انا دي رغبتي وده شغفي م عاوزة اكون دكتورة عشان يقولو عني دكتورة رفقة ولا عشان مكانة اجتماعية)

عيونها اتملت بالدموع وهي بتقرا! ايوا انا ما بقرا عشان زول! وهدفي ده مافي زول ختاهو لي! انا بقرا عشان نفسي وعشان ابقى دكتورة ❤️ وح يجي اليوم ال ح احقق فيه الحاجة دي.. ده هدفي وده مصيري ولازم اثبت للعالم كلو اني قدرها..
.
.
.
.
.
.
اما عند رهف فكانت قاعدة في كراسي الاستقبال برا بعد ما زهجت من القعدة جوه وكانت بتعاين في الناس من بينهم وقع نظرها على شاب يمكن عمرو في نص العشرينات كده، كان واقف بتكلم مع زول وشايل ورق في يدو ويدو التانية مجبصة..
وهو كان طويل نوعا ما ابيض بس م شديد وشعرو اغبش يعني على رمادي ما ناعم ولا خشن لكن كيرلي.. وشو طويل عيونو عسلية بس ملامحو غريبة شوية

رهف في نفسها.. ده ما سوداني ولا شنو؟ اه انا مالي ومالو
بعدها مدت بوزها ورجعت تعاين ليه تاني لقتو بعاين ليها وببتسم
رهف في نفسها - بسم الله
عملت نفسها ما شايفاهو وسفهتو..
.
.
َ.
.
.
.
اما عند محمد فكان راقد في الشقة براهو وفي بطنو كيس.. فتحو وطلع منو خاتم بتاع ذهب.. طلعو وعاين ليه كويس..
في الفترة الاخيرة الراتب كان كثير وبالاضافة للحوافز حسيت انو احسن اشتري بيه ذهب عشان احفظ بيه قروشي، الليلة اشتريت الخاتم ده وكل ما اوفر تاني ح اشتري، اكيد ح ينفعوني في لحظة زنقة، دخل الخاتم في صندوقو في الكيس ودخلو في شنطة تحت السرير بعدها فتح تلفونو، فتح الصورة المحببة جدا لقلبو وكان متصور فيها مع اخواتو ال٣ والصورة كانت قبل حوالي ٦ سنين..

كان شايل رغد في راسو وهي الزمن داك عمرها ٣ سنة ورفقة ورهف كانو واقفين جنبو ولابسين هدوم المدرسة، ورهف كانت زعلانة ووشها احمر عشان ابوها ضربها بسبب درجاتها في الامتحانات..

اتأمل الصورة كثير في الفترة الفاتت دي ولاحظ فيها حاجات دقيقة م حصل لاحظها قبل كده زي تفاصيل وجوههم وفرحهم الوقت داك (ان شاء الله تكونو لسه مبسوطين كده ❤️)
.
.
.
.
.
.
سمعت الباب بدق قامت وهي مستغربة..
لبست توبها ووقفت ورا الباب بحذر وهي بتقول
- منو؟
- انا جاي اوصل ليكم حاجات
- نحن م طلبنا شي، معليش غلطان في العنوان
- مش ده بيت سليمان الخضر؟
- ايوه بس نحن م طالبين شي
- استلمي بس الحاجات دي مدفوعة قيمتها
رفقة استغربت شديد كيف يعني؟ بعدين فكرت انو دي يمكن طريقة جديدة للاجرام وهي قاعدة في البيت براها ف قررت انها م تفتح في اللحظة دي سمعت صوت جارهم ابو مصطفى وهو بتكلم مع الراجل قامت قررت تطلع تشوف الحاصل شنو طالما ما بقت براها..

طلعت ولقت ابو مصطفى فعلا قاعد سلمت عليه بعدها اتكلمت مع بتاع التوصيل
رفقة - الرسل الحاجات دي منو؟
- معليش والله طلب مني ما اجيب سيرة عنو! انتي بس استلمي التكلفة مدفوعة وكل شيء مافي غلط مش بيت سليمان الخضر؟
- اي ياهو بسس
- بس شنو يا بتنا..
ابو مصطفى اومأ ليها بمعنى خلاص استلمي..
قام نزل الحاجات كانت عبارة عن مواد تموينية كمية بتاعت كراتين صلصة وشعيرية ومكرونة وعدس وعلب مربى وطحنية وزيت وسكر ودقيق وحاجات كمية لدرجة خلت رفقة مصدومة شدييييد وما فاهمة شيء!!!!!!
بقت واقفة في الحوش وهي بتعاين للحاجات! منو وعشان شنو؟؟ منو في الدنيا دي مهتم بينا وبهمهم امرنا!! اسي انا اعمل شنو اتصل على امي؟؟
.
.
بتاع التوصيل - خلاص استلمو
- تمام، تسلم
- الله يسلمك
وقفل الخط
التفت على بتو وقال ليها - استلمو خلاص، الله يكتبو في ميزان حسناتك
اروى فرحت وقامت حضنت ابوها - شكرا يا ابوي

طارت لغرفتها طيران وقعدت في السرير.. من يوم جاتها في البيت عرفت وضعها كويس وكانت دايرة ترسل ليها مساعدة بدون م تعرف عشان م تتحسس، وهي نفسها م كانت قروشها كافية لكن اهلها وضعهم ممتاز شديد عندهم غير بيتهم الكبير العايشين فيه تاني عمارة وابوها كافل كم اسرة وقاعد يتصدق كثير ليهو ولي اولادو ولي امو الله يرحمها، ف لمن كلمتو اروى وبعد شاف الحاحها وافق وما قصر نهائي ❤️
وفوق مستواهم المادي الكويس ده هم متواضعبن شديد لدرجة لو اتعاملت معاهم م بتحس بحاجة وحتى رفقة عارفة انو اروي مرتاحة بس م كانت قايلة للدرجة دي لانو ما حصل جاتهم في بيتهم واروى م بتحكي..
.
.
.
.
.
تاني يوم طوالي سامية كانت واقفة في المطبخ وبتطبخ في فاصوليا وهي فرحانة شديد، متين اخر مرة طبخت ومتين اخر مرة مسكت ظرف صلصة في يدها!!!! ظبطت حلة وكان اليوم داك كانهم اتغدو في مطعم فاخر شديد، بالرغم من انها كانت بس فاصوليا! الا انو في الشهور الفاتت دي اي شي بقى غير الفول جنة!

مشت ودت رغد للجلسة حقت الكيماوي ورفقة مشت المدرسة اما رهف ف كانت الليلة اوف مشت المستشفى طوالي..
دخلت لقت ابوها لسه ما صحى،. طبعا اتشخص بي ارتخاء في عضلة القلب ومن الزمن داك ما صحى بس عندهم امل انو ح يصحى تاني لانو حالتو م كانت صعبة شديد..
طلعت برا في نفس المكان القبيل وبقت تقلب عيونها ما عارفة لي لسه بتفكر فيه! وقبل م تكمل الجملة دي في بالها جا قعد جنبها زول.. استغربت وعيونها وسعت بصدمة! كيف؟؟
قعد يضحك بدون م يعاين ليها
رهف كانت متوترة شديد وبتطقطق اصابعها وما عارفة الصح تعمل شنو تقوم ولا تعمل رايحة ولا شنو بالظبط!!.

- انا اسمي ياسر وانتي؟
في اللحظة دي ساحت في الكرسي ولسانها اتربط وبقت تتمتم - اا اااننا ااا رهف
غبية لي قلتي ليه اسمك
•••••••••••••••••••••••••••••••••••••••••••••••••••••••••••

#رفقة《18》❤️
By:Lola~Hassan
ــہہہـ٨ـــ٨ــــہہـ٨ــــہہہـ٨ـــ٨ــــــہہـ٨ــــ♡❥‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏

‏‏‏‏‏‏‏‏‏‏‏‏‏‏‏‏‏ ‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏
يدينها بردو من التوتر وبقت تطقطق في اصابعها بس فجأة ياسر بدا يضحك
رهف بتوتر - مالك؟
ياسر - مافي حاجة، انتي جاية عشان شنو؟
رهف كانت ح تحكي ليه عن ابوها بس وعت على نفسها وانو هو غريب وبتكلم باريحية فما حست بالأمان وفجأة قامت وقالت عن اذنك ومشت
اما ياسر عاين ليها ورجع بي ظهرو لورا وفتح التلفون..
رهف ( بسم الله يا رب يا رب، انا لي عملت كده؟ انا لي ما قاعدة اتصرف كاني رهف الغريب شنو؟ وده منو ولي بتكلم معاي كده؟ ما مفروض اديهو فرصة ايوة ما مفروض)
في اللحظة دي خشت غرفة ابوها ولقت في ممرضات كثار جوا وواضح انهم متنشنين كده قامت اتخلعت وبقت تحاول تفهم الحاصل وما قادرة تتكلم مع وحدة فيهم كل وحدة مشغولة اكثر من الثانية!
اخيرا وقفت واحدة وطلبت منها تنتظر برا وكل شي ح يكون تمام..
طلعت برا وهي بتبكي ولاول مرة جاها احساس انها ممكن تفقد ابوها 💔 وما حست بنفسها الا وهي في نفس مكانها القبيل وياسر قاعد جنبها وماسك قارورة موية ومناديل!
ياسر - ما تبكي هاك غسلي وشك
رهف ما اشتغلت بيه
هو ولا هظر كبى موية في يدو وغسل ليها وشها!
رهف اتصدمت من جراءتو وهي عمرها مافي زول اتعامل معاها بالصورة دي! بقت تبكي زيادة!!
وبكت مسافة طويلة لحدي ما حست نفسها هدت قبلت لقتو قاعد نفس القعدة وشايل في يدينو قارورة ومناديل زي قبيل!

رهف - انت منو؟
ياسر - قلت ليك انا ياسر
- لا بتعرفني يعني؟
- بعرفك مش قلتي انتي رهف؟
- قصدي بتعرفني قبل يوم الليلة؟
- اي شفتك مع امك قبل كم يوم
بدت تعصب - حصل اتلاقينا برا المستشفى دي؟؟؟
- لالا
- طيب داير مني شنو؟؟
اتحولت نظراتو للجدية وحتى نبرة صوتو اتغيرت - ما داير منك اي حاجة، بقعد في المستشفى كثير وكنت داير اكون صداقات بس م اكثر
- ولي انا بالذات
- عشان سمحة
-انا جادة
- طيب، لانو شايفك بتقعدي كثير برضو، الموضوع بسيط، لكن انتي لو ما بتصاحبي اولاد بحترم رغبتك
- ما قصدي كده بس انت م قلت كده من الاول
- ما قلت اي حاجة انا، سألتك من اسمك بس
-حركاتك كانت غريبة
- انا اصلا ود غريب
- ده شنو اسي
- اسمي ياسر غريب، غريب اسم ابوي
رهف واقفة في راسها علامة استفهام كبيرة وهي لسه م فهمت؟؟؟!!!
ياسر قعد يضحك مسافة بعدين قال - انتي جيتي المستشفى لي
رهف اتصدمت واتذكرت ابوها قامت اتنفضت وهي بتقول ابوي ووقعت شنطتها وتلفونها وجرت

جرت لحدي ما وصلت وحدة من الممرضات جنب الغرفة وسألتها
- يا دكتورة ابوي كيف؟ والحاصل شنو قبيل؟
- مافي حاجة ما تشيلي هم نبضو ضعف فجأة لكن اسي استقر ممكن تخشي عليه لو دايرة
رهف - شكرا ( ودخلت)

وقفت وهي بتعاين لابوها مساافة وحست نفسها ح تبكي وهي بتشوفو راقد وعاجز 💔 رفعت يدها وبقت تدعي بصوت واطي واول م خلصت سمعت صوت وراها بقول ااااامييييين

اتخلعت ونطت وصرخت في نفس اللحظة والتفتت لورا وشافتو ياسر واقف ورافع يدينو وبعاين ليها باستغراب
ياسر - مالك؟
رهف - الجابك شنو؟
- أبو صحبتي ما ادعي ليه؟
-القال ليك منو نحن اصحاب؟
- ما أصحاب يعني؟ خلاص م مشكلة نتلاقى بكرا يا رهف صحبتي (وطلع)
رهف كانت موسعة عيونها بصدمة وبتعاين محل كان واقف!!! ده انسان ولا جني ولا ده شنو ومالو ولي بعمل كده انا ما قادرة افهم! الزول ده طبيعي؟

قعدت وعاينت لابوها تاني - على كل حال الحمد لله ابوي اسي كويس! كدي النتصل على امي
اتذكرت شنطتها نستها هناك ولمن كانت طالعة لقت الشنطة والتلفون في تربيزة جنب الباب! شكلو ياسر جابهم لي!! معناتها م حرامي! طيب مالو؟ كدي خلينا منو
شالت التلفون واتصلت على امها وحكت ليها..
.
.
.
.
.
.
رفقة بعد يوم امس قررت قرار مهم شديد وهي انها ح تطلع من البيت وتقعد مع جارتهم نادية! والسبب في ده انو في البيت ما قاعدة تقرأ كويس لانو بذكرها بحاجات كثيرة وغير كده بقى فاضي ولقت نفسها بتقعد براها كثير..
نادية رحبت بيها شديد خصوصا وانو زوجها بعد يومين ح يسافر لشغل وما برجع الا بعد كم شهر، ف نقلت حاجاتها وبقت الصباح تمشي المعسكر حق المدرسة والمساء بتقعد في اوضة حاجة عشة بتقرا ومرات يتونسو ويشربو الجبنة مع بعض ❤️

رفقة ( حرفياً الحاجة العملتها دي فعّالة شديد وياريتني فكرت فيها من زمان ❤️ القراية مهما كانت كثيرة م زي لمن تكون مركزة لمن تكون فاهم كل سطر بتقراهو! ويادوب وقع لي كلام امي الما قرت الثانوي اصلا وهي بتقول لي اهتمي بالكيفية اكثر من الكمية! باقي شهر بس على امتحان الشهادة! وانا مستعدة تماما ❤️)

المساء رهف جات لرفقة اول قبل م تمشي البيت وحكت ليها الحاصل..
رفقة وهي بتضحك - رهف انتي بتلمي في المتخلفين لي
رهف لبعتها في ظهرها - اسي انتي بتضحكي لي
رفقة ضحكت لمن دمعت ورهف تاني ضربتها
رفقة - خلاص خلاص، ما متذكرة آخر مرة ضحكت للدرجة دي متين!
رهف - كدي خليني من ضحكك انا اعمل شنو واتعامل معاه كيف الزي ده؟
- خليك عادية
- كيف يعني
- يعنيي، انتي لاقية زول عوير في الزمن ده ينسيك زاتو الجدية الحواليك من كل اتجاه
- انتي لي بتتكلمي كده
- بحاول اوصل ليك شعوري
- رفقة شوفي، انا مع الزول الاهبل لانو بنسيك جدية العالم المحيط لاحظي بقيت اتكلم زيك 😂 لكن ده انا م قادرة اتوقع حركاتو وبتوتر اتخيلي واقفة تدعي مع نفسك وزول يقول ليك اميين انا قايلاهو شيطان والله قربت اسوح في الارض انا ما قادرة اوصف ليك..
وقبل م تكمل كلامها لقت رفقة راقدة في السرير وميتة ضحك ( رفقة ضحكتها كاتم صوت يعني بتكتم نفسها مسااافة وهي بتضحك)
رهف - رفقة
رفقة لسه
رهف - رفقة خلاص ياخ
رفقة اخذت نفس وبقت تضحك تاتي بصوت عالي وميتة ضحك
رهف زعلت شالت شبشب من الارض وبقت تضرب فيها

وما اظنها سكتت اليوم داك! يمكن لانو كانت محتاجة للضحكة دي اكثر من اي شي تاني ❤️

.
.
.
.

مرّ شهر على نفس الحال مرات بتضيق مرات بتنفرج بس ما كان في تغيير شديد في الاحداث، سليمان لسه في المستشفى وحالتو مستقرة شديد، رفقة عملت جدول قراية ومشت فيه لحدي اخر يوم وده ما حصل في حياتها قبل كده! 🖤 رهف وياسر لسه بتقابلو مع انو ياسر انهى مقابلاتو وكسرو شبه انجبر بس كان بجي عشان يقابل رهف، علاقتهم اتطورت بقو يتلاقو يومي وحكت ليه الحصل على ابوها واختها رغد وهو بدورو اتأثر شديد لكن لمن طلبت منو يحكي ليها عاين يدو المكسورة وقال ( لمن اشوف يدي بدون جبص ح احكي ليك كل شيء).
اروى طبعا لسه متواصلة مع رفقة ورفقة م عرفتها هي الرسلت الحاجات ، بس قبل حوالي اسبوع بدو يقللو التواصل عشان امتحانات رفقة وكده..
.
.
.
.
.
الأحد.. أول أيام امتحانات الشهادة السودانية..
ما نامت الليل كلو مع انها عاهدت نفسها انها تنوم كويس عشان تخش بذهن صافي لكن القلق غلب عليها!

وقفت قدام المراية وعاينت لنفسها وبقتت تتكلم
( انا رفقة، بتك يا ابوي، ح اثبت نفسي ليك وح تفتخر بي شدييد ❤️ انا مستعدة كويس شديد، ما خليت مذكرة ما حليتها وما خليت تمرين في الكتاب وما اشتغلتو وما خليت معلومة طايرة ما لقطتها! ابوي انا ح ارفع راسك شديد وتشوف براك ❤️ انا المرة دي امتحنت بروح قوية رغم الظروف المرت بي! المرة دي ما زي المرتين الفاتو! لانو المرة دي ح اخش طب ❤️)
.
.
.
.
.
.
كانت قاعدة وبتعاين للساعة ( اسي رفقة تلقاها الامتحان مسخن بيها! يا ربي سهل عليها!!، افففف ود الناس ده مشى وين الليلة؟)
فجأة ظهر ياسر وهو جاي من بعيد بس كان غريب المرة دي! غريب لأنو شايل في يدو اليسار وردة وما كان في اي جبص!!!
وقفت وعاينت ليه بفرح وهو كان مبتسم برضو..
رهف - ياسر!!! فكيت الجبص متين؟؟
قال وهو بعاين ليدو - من يوم الجمعة.. كانت خدرانة شديد
بعدها مد ليها الوردة
رهف شالتها وشمتها - شكرا
- بتشبهك
- عشان سمحة صاح
- لالا الاثنين فيكم شوك
- انت عوير كده لي؟؟
قعد يضحك
رهف - يلا احكي لي كل حاجة زي ما وعدتني!
ياسر اتغيرت تعابيرو ونظرتو لنظرة جادة وحزينة 💔 رهف استغربت لانو م حصل شافتو كده!!!!
رهف - ياسر لو ما بتقدر تحكي ما تحكي
ياسر هز راسو بلا - اسمعي
•••••••••••••••••••••••••••••••••••••••••••••••••••••••••••

#رفقة《19》❤️
By:Lola~Hassan
ــہہہـ٨ـــ٨ــــہہـ٨ــــہہہـ٨ـــ٨ــــــہہـ٨ــــ♡❥‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏

‏‏‏‏‏‏‏‏‏‏‏‏‏‏‏‏‏ ‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏
ياسر - اسمعي..
اول ما فتحت على الدنيا دي امي وابوي كان بيناتهم خلافات كبيرة شديد لدرجة بتصل للضرب ابوي بضرب امي قدامنا ، الزمن داك انت عمري ٨ سنين واختي ٥ سنين بتذكر كنت بسوقها للاوضة التانية وبنقفل الباب وبنقعد نبكي، ابوي عمرو ما فكر فينا وفي نفسياتنا ك أطفال وما حصل حسيت انو انا وراي ابو وسند، عمرو م وجهني لحاجة صاح ولا منعني من حاجة غلط كان بس شغال لمصلحتو هو وممكن يجي داخل البيت زهجان يضربنا بدون سبب، وفي نفس العمر داك ابوي طلق امي وفرقونا انا واختي، اختي ساقتها امي وما عارف مشت وين بس بعدها سمعت انها اتزوجت وسافرت السعودية اما انا فبقيت مع ابوي بعد ما منعها تسوقني، اتزوج هو زاتو وجاب مرتو البيت عشت ايام صعبة شديد مع مرة ابوي زمان ابوي بدقنا وامي بتضارينا وبتمنعو اسي بقو الاثنين فيني وصلت بيهم لدرجة كبو فيني موية بتغلي وانا نايم، والله يا رهف قدر ما احكي ليك ما ح اقدر اوصل ليك سوء المعاملة الاتعرضت ليها..

رهف وعيونها اتملت دموع - ده كلو وعمرك م اتجاوز ال١٠ سنين؟؟ كيف قدرت تعيش بدون عُقَد وأهلك وين من ده كلو؟؟

ياسر - عُقد بس؟ انا كانت عندي امراض نفسية كثيرة شديد واخذت زمن طويل بالسنين حتى اتعالجت وللان ما حاسي اني طبيعي زي الناس وما قادر اندمج مع الناس كويس، بعدين اهل ابوي بكرهو امي وبكرهونا وكانو عارفين كل الحاصل وعاجبهم اما اهل امي فكانو متبريين منها عشان اتزوجت ابوي غصباً عنهم بعد م رفضوه وانقطعو مننا وما عرفت عندهم اي شيء ، ف ما كنت متخيل انو ممكن يستقبلوني في بيتهم، لكن عموما م قدرت اعيش في بيت ابوي اكثر من سنتين بالذات بعد ما كبو فيني الموية وعرفت انو الجاي اكعب، خشيت الاوضة بعد ما طلعو وبقيت افتش في ورق امي حاجة توصلني لي خيلاني وخالاتي ولقيت اخيرا رقم قديم، ف اتصلت ورد علي راجل كبير واتكلمنا مكالمة طويلة حكيت ليه فيه كل شيء واتأثر شديد عكس ما اتوقعت وطلع ده جدي ابو امي، في نفس اليوم جا بنفسو ومعاهو اخوالي اتكلمو مع ابوي واداني ليهم طوالي..
مشيت بيتهم لقيتو عبارة عن قصر اصلا ما بيت عادي! بيت كبير شديد ومليان خدم اول م دخلت ودوني الحمام لقيتو أكبر من بيتنا!

انا اتحمست للبيت الكبير واولاد خيلاني وكل شيء، بس ما كنت قادر اصاحبهم وكنت بخاف منهم كلهم الا جدي بس البقعد معاه شوية شوية اتعودت على حبوبة لانها كانت حنينة شديد، اتعرضت لاطباء نفسيين وكان وضعي النفسي كعب شديد بتذكر حتى اخوالي وخالاتي كانو بتكلمو مع اولادهم عن كيف يتعاملو معاي ومرة سمعتهم واتعقدت زيادة عشان حسيت اني غريب، مرت سنين، طويلة شديد ومع التعويدة حبيتهم وبقو لي كل شيء لكن انا من قمت م قمت زي الأطفال العاديين وكنت فاقد جو الاسرة شديد وفاقد امي، تصدقي اسي عندي جناح عديل براي غرفة بحمامها وفيها بلكونة على الشارع اول م جيت طلباتي كلها مجابة لو عطست ساي البيت بتلم فيني عندي دولاب كبير وما شايل هدومي وكل سبل الراحة موفرينها لي وبعد ده كلو اتمنيت ولو للحظة يرجع بي الزمن لورا لايام القهر والعذاب واحضن امي ويارا اختي 💔💔💔

رهف ببكاء - طيب اسي يمكن تلاقيهم تاني!!

ياسر - يارا ممكن، بس امي انا م مستعد الاقيها

رهف - لي؟؟

ياسر - لانها اتخلت عني،. كان ممكن تصر انها تشيلني معاها بس اختارت تتخلى عني، م رجعت ولا حاولت ولا سألت مني طول السنين دي ولا عارفاني اسي عايش ولا ميت، اتمنيت كثير الاقيها تاني وحاولت افتش عنها في الفيس وفي مواقع كثيرة بس اسي بعد كبرت ادركت انو هي لو مهتمة كان جاتني وكان ساقتني 💔

رهف كانت متأثرة شدييييد والغصة خنقتها 💔 وما قدرت تتكلم وتواسيهو! المر بيه صعب شديد وما اي زول بقدر عليه

سكتو مسافة بعدها ياسر شافها بتبكي حب يغير الجو قام مسك يدو وقال - اما عن يدي المكسورة وعلاقتها بالقصة..
رهف - اها
ياسر - م عندها اي علاقة ( وقعد يضحك)
رهف - انا جادة معاك
ياسر - بالجد ما عندها علاقة.. راكب مع صحبي أرْوَش وما بعرف يسوق عمل بينا حادث
رهف - طيب لي قلت لي لحدي ما يدي تبرا؟
ياسر - ااااا؟ (حك راسو) عشان اجيب ليك بيها وردة.. اقطعي ورقاتها ولا بقولو ليها شنو الحاجات الملونة دي قشي بيها دموعك
رهف ضربتو في كتفو - متخلف
.
.
.
.
.
منى - رفقة اشتغلتي كيف
- والله كويس شديد
- لازم تقفلي عديل الاسلامية دي برفعو بيها الدرجات
- انا اظني غلطت في السؤال البقول (......) م عرفت صح ولا خطأ
- ااااااا ده انا زاتي وقفني، انتي كتبتي شنو؟
رفقة - صح
- انا زاتي
- عاد المادة دي حقتك لو انتي قلتي صح معناها صح غصبا عن الامتحان زاتو
منى قعدت تضحك..
.
.
في بيت حاجة عشة..
رفقة حكت لرهف عن الامتحان ورهف حكت لرفقة عن ياسر ورفقة كانت متأثرة لحدي ما جابت ليها سيرة اختو!!!!!
رفقة بصدمة - اسمها يارا وابوها غريب؟؟؟؟؟
رهف - بتعرفيها؟؟
رفقة - ما عارفة قدر شنو هي قدري انا؟
رهف - قال لمن كان عمرو ٨ هي عمرها ٥ يعني اصغر منو بي ٣ سنة وهو اسي عمرو ٢٤ يعني ح يكون عمرها ٢١ اي قدرك!
رفقة - يلا انا لمن كنت في الجامعة في بت في دفعتنا اسمها يارا غريب وجات من السعودية للجامعة ، بس انتي م تكلميه خليني اتأكد اول طيب؟؟
رهف - طيب بس وريني شكلها كيف؟
رفقة - شفتي يلا هي حلبية وعيونها لونها عسلي فاتح وشفايفها وردية سمحة يعني ووشها طويل كده
رهف قاطعتها - شعرها كيف؟
- بتقصو لرقبتها ولونو م اسود عديل تحسيه اغبش اغبش كده وكيرلي
رهف - قطع شك دي هي لانو هو شعرو كده ووشو طويل وعيونو عسلية !!!
رفقة فكرت شوية وجاتها فكرة سمحة - طيب بتقدري تصبري لحدي ما اخلص امتحانات عشان اقدر الاقيها ونخليهم يتلاقو ونعملها مفاجأة؟؟
رهف - واي ما بقدر اصبر!!
رفقة - حاولي بس عشاني وعشانو هو زاتو!!
رهف على مضض - طيب
.
.
.
.
ومر اليوم واليومين والاسبوع والاسبوعين وانتهت اخيرا امتحانات الشهادة ❤️

رفقة ( وكنت زي ما اتوقعت اشتغلت كويس شديد في كل الامتحانات وحتى الجلسات الطلعو منها الناس ببكو انا طلعت واثقة من اني اشتغلت فيها كويس، ان شاء الله يكون الكابوس ده فعلا انتهى وتطلع نتيجتي كويسة ❤️ اول حاجتين عملتهم اول م اجزت نزلت شغل في المدرسة وبديت افتش عن يارا غريب وبحكم انها معاي في الجامعة م اخذ مني زمن كثير لمن لقيت رقمها واتواصلت معاها.. قبل الخطوة دي لاقيت اروى وحكيت ليها القصة كلها واسي اتفقنا ال٣ نتلاقى في الساحة عشان اوريها انا دايرة منها شنو!)

في الساحة
رفقة - يارا كيفك؟
-كويسة الحمد لله، بس الشمار حرقني الموضوع شنو؟
رفقة - بتعرفي ياسر غريب؟
يارا ختت يدها في وشها اللي قلب احمر والغصة وصلت حلقها وبقت تتكلم وصوتها مبحوح من الغصة - مالو؟؟؟ بتعرفيه؟؟ رفقة عليك الله بتعرفيه؟؟؟ وينو هو وكويس؟
رفقة قامت حضنتها وهي بتقول ليها خلاص م تبكي ❤️ بعرفو اي وهو في اتم صحة وعافية ومشتاق ليك شديد
يارا بادلت رفقة الحضن وبقت تبكي وما قدرت تخفي صوتها 💔💔💔💔
يارا - وديني ليه عليك الله 😭😭😭 اسي اسي انا ما قادرة اصبر وما قادرة اصدق يا رفقة عليك الله انتي جادة لو بتهظري علي ممكن تجيني حاجة
رفقة بقت تمسح في ظهرها - انا جادة وح تلاقيه ماشين ليه اسي كمان بس هو م عارف انو ح يلاقيك الليلة.. عاملينها ليه مفاجأة (بعدها رفعت نظرها لأروى اللي كانت متأثرة شدييييد و بتبكي)
يارا ما قدرت تنتظر ولا دقيقة وبقت في راس رفقة وديني ليه وديني ليه فرقونا صغار انا ما شفتو من كنت قدر كده ( وتأشر بيدها)

من ناحية تانية في الساحة كانو قاعدين رهف وياسر بعد ما اقنعتو انو لازم يوم يطلعو ويغيرو جو وكانت جايباه بالعافية لانو ما بحب يطلع ومقعداهو بالعافية برضو كل شوية يقوم ويقول ماشي البيت وتقعدو

لحدي ما فجأة...
•••••••••••••••••••••••••••••••••••••••••••••••••••••••••••

☆يتبــــــــــــــــــــــــــــــــــــــــــــع☆☆

احدث الروايات

رواية دقة_قلب -(الفصل الاول)

رواية اغرمت_به الجزء الأول

روايه انقذتني ــ ضرتي (الجزء الاول)

رواية اغرمت_به الجزء الثاني

روايه انقذتني ــ ضرتي (الجزء الثاني)

رواية اغرمت_به الجزء الثالث

رواية أحببتها~حد~الهوس -(الفصل الاول)

رواية نوارة

رواية الوادي_الملعون -(الفصل الاول)

رواية زوجة ابني اصبحت بنتي -(الفصل الثاني)

رواية رفقة -(الفصل الثاني)